Je, Wakumbuka?

Je, umefurahia kuyasoma matoleo ya karibuni ya Mnara wa Mlinzi? Ikiwa ndivyo, utaliona kuwa jambo lenye kupendeza kukumbuka yafuatayo:

◻ Ni nini maana ya neno la Kigiriki pa·rou·si’a linalotumiwa kwenye Mathayo 24:3, 27, 37, 39?

Kamusi Expository Dictionary of New Testament Words ya Vine yasema hivi: “PAROUSIA . . . huonyesha kuwasili na kuwapo pamoja kunakofuata.” Basi, halimaanishi muda wa kuwasili tu, bali kuwapo kunakoendelea tangu kuwasili.—8/15, ukurasa 11.

◻ ‘Siku zile zilifupizwaje’ ili “mwili” uweze kuokolewa katika karne ya kwanza, na hilo litatukiaje kwa kadiri kubwa zaidi? (Mathayo 24:22)

Mwaka wa 66 W.K., Waroma walifupiza ghafula mazingiwa yao juu ya Yerusalemu, hilo likiruhusu “mwili” wa Kikristo uponyoke. Vivyo hivyo, twatazamia kwamba shambulio linalokuja juu ya Babiloni Mkubwa litafupizwa kwa njia fulani. Hivyo Wakristo watiwa-mafuta pamoja na waandamani wao wataokolewa kutoka katika uwezekano wa uharibifu.—8/15, kurasa 18-20.

◻ Tuitikieje ikiwa mtu aanza kushiriki mifano ya Ukumbusho au aacha kufanya hivyo?

Hakuna uhitaji kwa Wakristo wengine kuhangaishwa na hilo. Yesu alisema: “Mimi ni mchungaji mwema, nami nawajua kondoo zangu.” Kwa hakika vivyo hivyo, Yehova awajua wale ambao amewachagua kikweli kuwa wana wa kiroho. (Yohana 10:14, NW; Warumi 8:16, 17)—8/15, ukurasa 31.

◻ Kusudi kuu la Sheria ya Kimusa lilikuwa nini?

Kimsingi, iliwafundisha Waisraeli kuhitaji kwao Mesiya, ambaye angewakomboa kutokana na hali yao ya dhambi. (Wagalatia 3:24) Sheria pia ilifundisha hofu ya kimungu na utii, na ilisaidia Waisraeli kujiepusha na mazoea yenye ufisadi ya mataifa yaliyowazunguka. (Mambo ya Walawi 18:24, 25)—9/1, ukurasa 9.

◻ Ni nini kusudi la agano jipya? (Yeremia 31:31-34)

Ni kutokeza taifa la wafalme na makuhani ili kubariki wanadamu wote. (Kutoka 19:6; 1 Petro 2:9; Ufunuo 5:10)—9/1, kurasa 14, 15.

◻ Kwa nini tuzoee ustadi wa kuomba radhi?

Kuomba radhi kwaweza kusaidia kuondoa maumivu yasababishwayo na hali ya kutokamilika, na kwaweza kupoza mahusiano yenye shida. Kila wakati tuombapo radhi twapata somo la unyenyekevu na twazoezwa kuwa wenye kujali zaidi hisia za wengine.—9/15, ukurasa 24.

◻ Je, gharika ya tufeni pote ya siku ya Noa ilikuwa jambo la hakika la kihistoria?

Ndiyo. Masimulizi ya kale yanayoeleza juu ya furiko la tufeni pote yaweza kupatikana ulimwenguni pote, kutoka bara za Amerika hadi Australia. Kuenea sana kwa habari hiyo huongezea utegemezo wa lile jambo la hakika kwamba gharika ya ulimwenguni pote ilitukia, kama ilivyoripotiwa katika Biblia. (Mwanzo 7:11-20)—9/15, ukurasa 25.

◻ Ni nini kinachohusika katika kuwa mkaribishaji-wageni? (Warumi 12:13)

Neno “ukaribishaji-wageni” limetafsiriwa kutoka neno la Kigiriki ambalo limefanyizwa kwa maneno mawili ya msingi yanayomaanisha “upendo” na “mgeni.” Hivyo, ukaribishaji-wageni humaanisha kwa msingi “kupenda wageni.” Lakini huo unahusisha mengi zaidi kuliko upendo unaotegemea kanuni, uonyeshwao kutokana na wajibu. Unategemea upendo, shauku, na urafiki halisi.—10/1, ukurasa 9.

◻ Hoja ya Paulo ni nini kuhusu ndoa na useja katika barua yake ya kwanza kwa Wakorintho, sura ya 7?

Ndoa ni halali na, chini ya hali fulani, ni jambo lifaalo kwa watu fulani. Hata hivyo useja bila shaka ni wenye faida kwa mwanamume au mwanamke Mkristo atakaye kumtumikia Yehova pasipo kukengeushwa fikira hata kidogo.—10/15, ukurasa 13.

◻ Mzee ‘huwatunzaje wale walio wake’? (1 Timotheo 5:8)

Mzee apaswa ‘kuwatunza wale walio wake’—mke wake na pia watoto wake—kimwili, kiroho, na kihisia-moyo.—10/15, ukurasa 22.

◻ Yehova huwatoleaje watumishi wake faraja?

Roho takatifu ya Mungu hutenda ikiwa “mfariji.” (Yohana 14:16, NW, kielezi-chini) Njia nyingine ambayo kwayo Mungu huandaa faraja ni kupitia Biblia. (Warumi 15:4) Mungu hujua mahitaji yetu mmoja-mmoja naye aweza kututumia tufarijiane, kama vile Paulo alivyopata faraja kupitia ripoti ya Tito juu ya Wakorintho. (2 Wakorintho 7:11-13)—11/1, kurasa 10, 12.

◻ Ni nini kinachodokezwa na ufafanuzi wa Paulo juu ya Yehova kuwa “Baba wa rehema [“nyororo,” NW],” unaopatikana kwenye 2 Wakorintho 1:3?

Nomino ya Kigiriki itafsiriwayo “rehema nyororo” yatokana na neno litumiwalo ili kuonyesha huzuni kuelekea kuteseka kwa mwingine. Hivyo Paulo anafafanua hisia nyororo za Mungu kwa watumishi Wake wote waaminifu wanaopatwa na dhiki.—11/1, ukurasa 13.

◻ Ni nini kilichotimizwa na mfungo wa Waisraeli katika Siku ya Kufunika ya kila mwaka? (Mambo ya Walawi 16:29-31; 23:27)

Kufunga kuliwasukuma watu wa Israeli wafahamu zaidi hali yao yenye dhambi na ule uhitaji wa kupata ukombozi. Kwa kufanya hivyo walionyesha huzuni kwa sababu ya dhambi zao na walionyesha toba mbele ya Mungu.—11/15, ukurasa 5.

◻ Ni nini kinachodokezwa na amri hii kwa vijana: “Mkumbuke Muumba wako”? (Mhubiri 12:1)

Chanzo kimoja chenye mamlaka chasema kwamba neno la Kiebrania litafsiriwalo “kumbuka” mara nyingi hudokeza “ile shauku ya akili na tendo linaloandamana na kukumbuka.” Kwa hiyo, kutii amri hiyo kwamaanisha mengi zaidi ya kumfikiria Yehova tu. Kwahusisha utendaji, kufanya limpendezalo.—12/1, ukurasa 16.