Kutoka kwa Wasomaji Wetu

Ugonjwa wa Kusafiri Nina umri wa miaka kumi nami nataka kuwashukuru kwa habari “Ugonjwa wa Kusafiri” katika “Kuutazama Ulimwengu.” (Januari 22 1996) Nilijaribu madokezo yaliyokuwa katika makala hiyo, nayo yalikuwa na matokeo! Tafadhalini endeleeni kutangaza makala kama hizo.

J. C. S., Brazili

Hali ya Kukaribia Kifo Naandika kuhusu makala “Madaktari Walijifunza Kutokana na Hali Yangu ya Kukaribia Kifo.” (Desemba 22, 1995) Je, erithropoetini haisawazishwi na asilimia chache ya albumini, protini ya damu?

R. P., Marekani

Katika visa fulani, ndiyo, na kila Mkristo apaswa kuamua kibinafsi kama atakubali dawa zilizo na viwango vidogo vya albumini au sivyo. Kwa mazungumzo ya kina, tafadhali ona “Maswali Kutoka kwa Wasomaji” katika matoleo ya “Mnara wa Mlinzi” ya Oktoba 1, 1994, na Juni 1, 1990.—Mhariri.

Tetemeko la Dunia Nilisoma ile makala “Msiba wa Ghafula wa Japani—Jinsi Watu Walivyokabili Hali.” (Agosti 22, 1995) Ningependa kujua, kwa nini kazi yenu ya kutuliza huelekezwa kwa Mashahidi pekee? Mtu angefikiri kwamba Mashahidi wangeonyesha upendo kwa Mashahidi na wasio Mashahidi vilevile.

V. C. E., Nigeria

Kwa hakika, watu wengi wasio Mashahidi walisaidiwa. Mara nyingi, kupitisha ugavi wa kutuliza kupitia makutaniko ya Mashahidi wa Yehova kumethibitika kuwa njia ya haraka zaidi ya kufikisha ugavi huo kwa wenye uhitaji. Katika kisa kimoja magari yaliyojaa ugavi wa chakula yalipelekwa kwa kitovu kimoja cha wakimbizi cha mahali fulani. Vielelezo vingi kama hivyo vyaweza kutajwa. Ni jambo la kawaida kwamba Mashahidi walitanguliza washiriki wa kutaniko, kwa kuwa katika Biblia twahimizwa: “Tuwatendee watu wote mema; na hasa jamii ya waaminio.” (Wagalatia 6:10)—Mhariri.

Mashindano ya Michezo Makala yenu “Je, Mashindano katika Michezo ni Kosa?” (Desemba 8, 1995) ilikuwa yenye kunitatanisha sana, kwa kuwa ilitumia Wagalatia 5:26. Kitabu cha Wagalatia kina uhusiano gani na michezo? Paulo anazungumza juu ya roho dhidi ya mwili na uhuru dhidi ya utumwa. Tafsiri ya King James Version husema hivi katika mstari huo: “Tusitamani utukufu ulio ubatili, tukichokozana.”

P. O., Marekani

Ni kweli kwamba mtume huyo hakuwa akifikiri kihususa mashindano ya riadha wakati alipoandika maneno hayo. Hata hivyo, ni wazi kwamba Wakristo fulani walikuwa wakijilinganisha na mmoja na mwenzake. Hilo liliongoza kwenye mitazamo ya ‘kimwili’ kama vile ‘uadui, ugomvi, wivu, fitina na faraka.’ (Wagalatia 5:20, 21; 6:3, 4) Hivyo Paulo aliwatahadharisha Wakristo ‘wasichochee mashindano kati ya mmoja na mwenzake.’ (NW) Kulingana na The New Thayer’s Greek-English Lexicon, neno la Kigiriki linalorejezea “mashindano” lamaanisha “kutoa mwito wa ushindani ili kupambana au kushindana na mtu.” Kanuni hii bila shaka yatumika kwa utendaji wa michezo au kwa utendaji mwingineo wote uwezao kusababisha Wakristo washindane mmoja na mwenzake katika njia isiyojenga.—Mhariri.

Kutopenda Kusoma Nilisoma makala “Linda Dhidi ya Kutopenda Kusoma” (Januari 22, 1996) nami niliifurahia sana hivi kwamba nilisukumwa kuwaandikia na kuwashukuru kwa habari ya kusoma yenye kuarifu mnayoandaa. Kusoma hutupatia fursa ya kumjua Muumba wa ulimwengu wote mzima kupitia Neno lake, Biblia. Hivyo kuna uhusiano kati ya udhaifu wa kiroho na kutopenda kusoma.

R. R., Marekani

Ingawa nimekuwa Mkristo aliyebatizwa kwa miaka 28 na msomaji wa kawaida wa vichapo vya Sosaiti, nilikuwa nikiahirisha kusoma na kuhisi kwamba nilikuwa nikipoteza tamaa ya kusoma. Makala yenu ilitambulisha tatizo langu! Kusababu kwenu juu ya habari hii kulinipa kichocheo cha kusoma ili kujinufaisha.

A. O., Kanada