‘Mtihani wa Unyofu wa Upendo Wako’

MANENO yaliyo juu yaleta wazo gani akilini mwako? Je! ni mnyanyaso na magumu? Je! ni kufia imani? Hapo awali maneno hayo yaliandikwa kwa kalamu na mtume Paulo katika barua moja kwa Wakristo katika Korintho wa kale. Ni ya umaana mkubwa kwa watu wa Yehova leo kwa sababu ‘unyofu wa upendo wao’ unatahiniwa vivyo hivyo. Lakini jinsi gani? Kwa kujibu, acheni tuchunguze mazingira ambayo maneno ya Paulo yanahusika.

Msingi wa Mtihani Ule

Miongo kama miwili baada ya kuanzishwa kwa Ukristo, kundi katika Yerusalemu lilikuwa katika matatizo makubwa ya kifedha. Kwa kukaa katika ngome hiyo ya upinzani na ubaguzi wa Kiyahudi, Wakristo walikuwa ‘wamestahimili mashindano makubwa ya maumivu,’ kwa miaka kadhaa, hata ‘wakinyang’anywa mali zao.’ (Waebrania 10:32-34) Ilikuwa imekuwa lazima wapate msaada wa nje.

Kwa uhakika, ndugu zao wasio Wayahudi wangalipaswa kusukumwa na moyo wawasaidie kuhusu shida yao kubwa. Ingawaje, wao walikuwa na “deni” la maalumu kwa Wakristo katika Yerusalemu. Je! si Yerusalemu ambako habari njema zilitoka zikaenea kuwafikia wasio Wayahudi? Paulo alichukua hivi: “Ikiwa Wakristo Wayahudi walishiriki hazina zao za kiroho pamoja na wasio Wayahudi, ni wazi kwamba wasio Wayahudi wana wajibu wa kuchangia mahitaji yao ya kimwili.”—Warumi 15:27, The New English Bible.

Kuupanga Mchango kwa Njia ya Kitengenezo

Paulo alikuwa ameelekezwa na baraza lenye kuongoza ‘awakumbuke Wakristo maskini.’ (Wagalatia 2:10) Kwa hiyo aliwapelekea Wakristo katika Ulaya na Esia Ndogo habari zilizohusu hali iliyokuwa katika Yerusalemu. Haya ndiyo maagizo ya Paulo; “Kwa habari ya ile changizo kwa ajili ya watakatifu, kama vile nilivyoamuru makanisa ya Galatia, nanyi fanyeni vivyo. Siku ya kwanza ya juma kila mtu kwenu na aweke akiba kwake, kwa kadiri ya kufanikiwa kwake; ili kwamba michango isifanyike hapo nitakapokuja.”—1 Wakorintho 16:1, 2.

Kwa kupanga matumizi ya pesa zao kwa njia hii, hakuna mmoja angehisi akishurutika au akibanwa wakati changizo lilipofanywa hasa. Akina ndugu hawakuwa na hofu yoyote kwamba pesa zao zingetumiwa kwa njia isiyofaa au kutapanywa. ‘Wanaume wenye kukubaliwa’ tu ndio wangeruhusiwa kupeleka pesa hizo zilizochangwa, huku Paulo akiandamana nao yeye mwenyewe ikiwa jambo hilo lingeonwa kuwa lahitajiwa kabisa. — 1 Wakorintho 16:3-5, NW.

Itikio la Wakorintho lilikuwa nini? Ingawa yaonekana kwamba akina ndugu waliitikia shauri la Paulo kwa njia yenye kupendeleka, mchango huo haukupelekwa kamwe. (2 Wakorintho 8:6, 10, 11) Labda wazee walishughulikia sana kuondolea kundi mgawanyiko, ukosefu wa adili, na matatizo mengine ambayo Paulo alikuwa amewaandikia.

‘Uwe na Wingi Katika Kutoa kwa Fadhili’

Vyovyote vile, Paulo aliwaandikia barua nyingine akisema hivi: “Tena ndugu zetu, twawaarifu habari ya neema ya Mungu, waliyopewa makanisa ya Makedonia; maana walipokuwa wakijaribiwa kwa dhiki nyingi, wingi wa furaha yao na umaskini wao uliokuwa mwingi uliwaongezea utajiri wa ukarimu wao. Maana nawashuhudia kwamba, kwa uwezo wao, na zaidi ya uwezo wao, kwa hiari yao wenyewe walitoa vitu vyao; wakituomba sana pamoja na kutusihi kwa habari ya neema hii, na shirika hili la kuwahudumia watakatifu. Tena walitenda hivi si kama tulivyotumaini tu, bali kwanza walijitoa nafsi zao kwa Bwana; na kwetu pia, kwa mapenzi ya Mungu. Hata tukamwonya Tito kuwatimilizia neema hii kwenu kama vile yeye alivyotangulia kuianzisha. Lakini kama mlivyo na wingi wa mambo yote; imani, na usemi, na elimu, na bidii yote, na upendo wenu kwetu sisi; basi vivyo hivyo mpate wingi wa neema hii pia.”—2 Wakorintho 8:1-7.

Kielelezo cha Wamakedonia wenye kujidhabihu kiliwapa Wakorintho mambo mengi ya kufikiria. Korintho ulijulikana kimithali kwa sababu ya utajiri wao, anasa, na ubiashara. Baadhi ya akina ndugu huenda wakawa walikuwa maskini kwa kulinganishwa, hata hivyo kundi hilo likiwa lote kwa ujumla bila shaka lilikuwa na hali bora kuliko Wakristo Wamakedonia waliokuwa katika ‘umaskini mwingi.’ Hata hivyo, Wamakedonia walikuwa wametoa mchango “zaidi ya uwezo wao.” Hawakuwa wamehitaji kuchochewa na Paulo ili watoe mchango. Kwani, wao ‘walimwomba’ Paulo ‘kwa kusihi’ ili washiriki katika mchango huu! Huu ulikuwa ushuhuda wa kwamba kwa kweli Wakristo Wamakedonia “walijitoa nafsi zao kwa Bwana [katika wakfu usio na masharti] na [kwa Paulo na waandamani wake],” wakijitiisha kwenye mwelekezo wao wa kitheokrasi.

Watahiniwa Kuhusu Upendo na Ukarimu Wao

Je! Wakorintho vilevile wangesukumwa na moyo ‘wawe na wingi katika kutoa kwa fadhili’? Alipokuwa akizuru Korintho mara ya kwanza, Paulo alikuwa amelazimika kujiruzuku mwenyewe akiwa mfanyiza mahema. (Matendo 18:1-3) Aliendelea na mwongozo huu wa kujiruzuku hata kundi lilipokuwa likisitawi huko, akijiepusha kutumia “mamlaka” yake ya kupokea msaada wa kifedha akiwa mweneza-evanjeli wa wakati wote.—1 Wakorintho 9:3-12.

Thomas Scott mwelezaji wa Biblia asema hivi: “Labda yeye alikuwa ameshuhudia mambo fulani katika nia ya Wakristo Wakorintho, ambalo kwanza lilimfanya akatae kupokea riziki yoyote kutoka kwao.” Labda kwa kuongozwa na hali iliyowazunguka ya kufuatia vitu vya kimwili kwa ubinafsi, huenda ikawa Wakorintho hao walikuwa hawana tu nia ya kuwa wakarimu. Huenda pia ikawa Paulo alihofu kwamba Wakorintho hao wenye fikira ya kufuatia ubiashara wangetia shaka juu ya kusudio lake kama angekubali msaada wao wa kifedha. Huenda hata kukawa na wale ambao, kama watu fulani katika Thesalonike, walikuwa wavivu na walitaka kupata udhuru wa kuishi kwa kuwategemea Wakristo wenzao.—2 Wathesalonike 3:7-12.

Vyovyote ilivyokuwa, Paulo na waandamani wake walichagua, kujiruzuku wenyewe, “ili sisi tusizitolee kizuizi chochote zile habari njema ambazo zahusu yule Kristo.” (1 Wakorintho 9:12, NW) Ingawa hivyo, baada ya muda Paulo aliingia katika matatizo makubwa ya kifedha, na habari hizo zikafikia ndugu wale maskini wenye kuishi katika Filipi. Paulo aliwaambia Wakorintho hivi: “Naliwanyang’anya makanisa mengine mali yao, nikitwaa posho langu ili niwahudumia ninyi. Nami nilipokuwa pamoja nanyi na kuhitaji sikumlemea mtu. Maana hao ndugu waliokuja kutoka Makedonia walinipa kadiri ya mahitaji yangu; nami katika mambo yote nalijilinda nafsi yangu nisiwalemee hata kidogo; tena nitajilinda.”—2 Wakorintho 11:8, 9; linganisha Wafilipi 4:15, 16.

Ni kweli kuwa Paulo mwenyewe alikiri kwamba ‘hangekubali maandalizi’ kutoka kwa Wakorintho. Lakini Paulo alipokuwa amejaribu kukataa ukaribishaji-wageni wa Lidia mwanamke Mfilipi, ‘aliwashurutisha. ‘ (Matendo 16:15) Je! Wakorintho walionyesha hangaikio ilo hilo la usisitivu kuhusu hali njema ya Paulo ya vitu vya kimwili? Hilo ndilo swali ambalo mtu ajiuliza kwa kushangaa, Vyovyote ilivyokuwa, Paulo alitambua kwamba hali iliyohusu kundi la Yerusalemu ilitokeza fursa ya kutahini kama Wakorintho walikuwa na elekeo la kukunja sana mkono wao kwa unyimivu au kama ukarimu wao ulikuwa umeongezeka. Hivyo yeye alihimiza hivi:

“Sineni ili kuwaamuru, bali . . . nijaribu [nitahini, NW] unyofu wa upendo wenu. Maana sisemi hayo, ili wengine wapate raha nanyi mpate dhiki [yaani, si ili kwamba wengine wapate kitulizo na ninyi mteseke]; bali mambo yawe sawasawa; wakati huu wa sasa wingi wenu uwafae upungufu wao, ili na wingi wao uwafae ninyi mtakapopungukiwa; ili mambo yawe sawa-sawa. Kama ilivyoandikwa, Aliyekusanya vingi, hakuzidi, wala yeye aliyekusanya vichache hakupungukiwa.”—2 Wakorintho 8:8, 13-15.

Ushuhuda waonyesha wazi kwamba Wakorintho walipita mtihani wao. Muda fulani baadaye Paulo aliripoti hivi: “Imewapendeza watu wa Makedonia na Akaya [ambako Korintho ulikuwa] kufanya changizo kwa ajili ya watakatifu huko Yerusalemu walio maskini.”—Warumi 15:26.

Kuukabili Mtihani Leo

Hata hivyo, je! sisi tunapita mitihani ya upendo na ukarimu ambayo yajitokeza leo? Twaishi katika “nyakati za hatari zilizo ngumu kushughulika nazo.” (2 Timotheo 3:1-5, NW) Mibano ya kifedha yalemea wengi wetu. Na nyakati fulani “tamaa ya mnofu na tamaa ya macho na wonyesho mshaufu wa mali za maisha za mtu” hufanyiza mibano yayo yenyewe. (1 Yohana 2:16, NW) Ni jambo jepesi kama nini kujitegemea wenyewe, kukosa hisia za kujali mahitaji ya wengine.

Kwa ujumla, Mashahidi wa Yehova leo wamekabiliana na mitihani ya upendo wao wa kidugu kwa njia yenye kutokeza. Kwa kielelezo, siku ya Machi 3, 1985, tetemeko la dunia lilipiga Santiago, Chile. Mamia ya ndugu walipoteza makao na mali zao. Mara hiyo, makundi yakapanga kitengenezo jitihada za kusaidia. “Katika muda wa saa kadhaa,” waripoti ndugu hao, “baadhi yao walianza kuwasili wakiwa na chakula, nguo, blanketi na vitu vingine vyenye mafaa.” Michango pia ilitoka sehemu zote za ulimwengu. Matukio kama hilo yametukia mara nyingi sana muda wa miaka iliyopita.

Lakini hatuhitaji kungojea msiba utukie ndipo tuthibitishe upendo wetu wa kidugu. Mkristo mwenzetu akipatwa na ugumu wa kifedha, twaweza kuwa na wepesi wa hisia ya kujali mahitaji yake, tukifanya mengi kuliko kusema, “Mkaote moto na kushiba.” (Yakobo 2:15, 16) Na namna gani wale walio katika utumishi wa wakati wote ambao ‘hupata riziki kwa ile Injili.’ Kama Paulo, wao hawadai wala hawatarajii usaidizi wa kifedha kutoka kwa wale ambao wao huwatumikia. Hata hivyo, wengi wamesukumwa kuonyesha ukarimu kuelekea wale ambao hufanya kazi ya jasho ili ‘wapande vitu vya kiroho’ kwa ajili yao.—1 Wakorintho 9:11, 14.

Na namna gani juu ya mahitaji ya tengenezo la ulimwenguni pote la Mashahidi wa Yehova? Kitabu cha Mwaka cha Mashahidi wa Yehova cha 1989 (kwa Kiingereza) charipoti kwamba “wakati wa mwaka wa utumishi wa 1988 Sosaiti ya Mnara wa Mlinzi ilitumia dola 29,834,676.97 katika kutunza mapainia wa pekee, wamisionari, na waangalizi wenye kusafiri katika migawo yao ya utumishi wa shambani. “Pia kulikuwako gharama kubwa za kutunza na kununua maeneo ya matawi, vifaa, mashine, karatasi —licha ya gharama za kimsingi zilizokuwapo kuhusiana na maisha ya jamaa ya Betheli duniani pote, ambayo hesabu yao sasa ni zaidi ya 9,000! Kwa kuongezea, miradi kama 18 ya ujenzi na utengenezaji-upya inaendelea sasa hivi katika matawi mbali-mbali, na 19 kwenye makao makuu yetu katika Brooklyn, New York. Je! wewe unashiriki kutoa fedha ya kazi hii ya duniani pote?

Kama ilivyokuwa katika karne ya kwanza, leo wote hushiriki kutunza daraka hili, kutia na wale wasio na pesa nyingi, ambao, kwa kutumia michango yao midogo, wamethibitika kuwa mhimili mkuu wa kusaidia Sosaiti kifedha. Baadhi yao huona likiwa jambo la msaada kufuata kanuni iliyowekwa kwenye 1 Wakorintho 16:2 na hupanga kwa ukawaida matumizi ya pesa za kibinafsi ambazo zitachangwa kwenye Jumba la Ufalme la kwao. Huenda pia baadhi yao wakaamua kuchanga.,pesa moja kwa moja kwenye Sosaiti ya Mnara wa Mlinzi kule 25 Columbia Heights, Brooklyn, New York 11201, au kwenye moja la ofisi za matawi yayo.

Uwe na uhakikisho wa kwamba Yehova huwaangalia wale ambao, kupitia ukarimu wao, huthibitisha unyofu wa upendo wao. Usijinyime mibaraka! Paulo aliahidi hivi: “Mungu aweza kuwajaza kila neema kwa wingi, ili ninyi, mkiwa na riziki za kila namna sikuzote, mpate kuzidi sana katika kila tendo jema.”—2 Wakorintho 9:8.

[Sanduku katika ukurasa wa 26]

JINSI WATU FULANl HUCHANGIA KAZI YA UFALME

◻ ZAWADI: Michango ya kujitolea ya pesa ingeweza kupelekwa moja kwa moja kwenye ofisi ya tawi la kwenu la Sosaiti. Mali kama vile rasilmali za urithi, na pia vito vyenye thamani au vitu vingine vya bei kubwa, zaweza kuchangwa pia. Barua fupi ikisema kwamba huo ni mchango wa moja kwa moja yapasa ifuatane na michango hiyo.

◻ MPANGO WA MCHANGO WENYE MASHARTI: Pesa zaweza kupewa kwa Sosaiti ya Mnara wa Mlinzi zishikiliwe zikiwa amana, kukiwa na uandalizi wa kwamba kikitokea kisa cha uhitaji wa kibinafsi, zitarudishwa kwa mwenye kuchanga.

◻ BIMA: Sosaiti ya Mnara wa Mlinzi yaweza kutajwa kuwa mwenye kunufaishwa na mpango wa bima ya maisha au katika mpango wa kustaafu kazi/malipo ya uzeeni. Sosaiti yapasa kujulishwa juu ya mipango yoyote kama hiyo.

◻ AMANA: Akiba za pesa zilizo benki zaweza kuwekwa zikiwa amana kwa ajili ya Sosaiti. Jambo hilo likifanywa, tafadhali ijulishe Sosaiti. Rasilmali za hisa, dhamana, nyanja na majengo zaweza pia kuchangwa chini ya mpango wa kunufaisha mwenye kuchanga katika muda wa maisha yake. Njia hiyo huondolea mbali gharama na mashaka-mashaka yenye kutokana na ule mpango wa kuthibitisha usahihi wa wasia, huku njia hiyo ikihakikisha kwamba Sosaiti itapokea uwanja au jengo hilo ikiwa kifo kitatukia.

◻ MAWASIA: Uwanja au majengo au pesa zaweza kupangiwa kuwa urithi wa Sosaiti ya Mnara wa Mlinzi kupitia wasia wenye kutekelezwa kisheria. Nakala moja yapasa kupelekwa kwa Sosaiti.

Kwa habari zaidi na ushauri kuhusu mambo hayo, andikia ofisi ya tawi la kwenu la Sosaiti.