Mungu Akujali Wewe

MARY, mwanamke mmoja Mkristo aliye katika miaka ya mwisho-mwisho ya 40, ameteseka sana maishani mwake. Uzinzi wa mume wake ulifanya watalikiane zaidi ya miaka kumi iliyopita. Baada ya tukio hilo, Mary alijitahidi kutimiza wajibu wake akiwa mzazi mmoja kwa watoto wake wanne. Na bado angali mzazi mmoja, na nyakati nyingine yeye huonekana kushindwa na upweke. Mary hujiuliza, ‘Je, hili lamaanisha kwamba Mungu hanijali au hawajali watoto wangu wasio na baba?’

Uwe umepata magumu kama hayo au hapana, hakika unaweza kusikitikia hisia za Mary. Sote tumevumilia hali zenye kujaribu, na huenda tulijiuliza ni lini na ni jinsi gani Yehova angetenda kwa niaba yetu. Baadhi ya mambo hayo tunayopata ni matokeo ya kushikamana na sheria za Mungu. (Mathayo 10:16-18; Matendo 5:29) Mengine ni matokeo ya kuwa wanadamu wasiokamilika wanaoishi katika ulimwengu unaotawalwa na Shetani. (1 Yohana 5:19) Mtume Paulo aliandika: “Viumbe vyote pia vinaugua pamoja, navyo vina utungu.”—Warumi 8:22.

Hata hivyo, kukabili majaribu magumu sana hakumaanishi kwamba Yehova amekuacha au kwamba hapendezwi na hali-njema yako. Unawezaje kuwa na uhakika wa jambo hili? Ni nini kionyeshacho kwamba Mungu akujali wewe?

Kielelezo cha Kale

Biblia huandaa uthibitisho wa wazi wa utunzi wa Yehova kwa kila mtu binafsi. Fikiria Daudi. Yehova alipendezwa kibinafsi na mchungaji huyu mchanga, akimwona kuwa “mtu aupendezaye moyo wake.” (1 Samweli 13:14) Baadaye, Daudi alipotawala akiwa mfalme, Yehova alimwahidi: ‘Nami nitakuwa pamoja nawe kila utakakokwenda.’—2 Samweli 7:9.

Je, hilo lamaanisha kwamba Daudi “aliyafurahia” maisha, bila kupata magumu yoyote? La, Daudi alikabili majaribu magumu sana kabla ya na wakati wa utawala wake. Kwa miaka kadhaa kabla ya kuwa mfalme, alikimbizwa sana na Mfalme Sauli aliyetaka kumwua. Katika kipindi hiki cha maisha yake, Daudi aliandika: “Nafsi yangu imo kati ya simba . . . hata wana wa wanadamu, ambao meno yao ni mikuki na mishale.”—Zaburi 57:4, NW.

Na bado, katika taabu hizo zote Daudi alikuwa na uhakika kwamba Yehova alimjali yeye binafsi. “Umehesabu kutanga-tanga kwangu,” akasema katika sala kwa Yehova. Ndiyo, kwa Daudi ni kana kwamba Yehova alikuwa ameyaandika masaibu yake yote. Kisha Daudi akaongezea: “Uyatie machozi yangu katika chupa yako [“chupa yako ya ngozi,” NW] (Je, hayamo katika kitabu chako?)”a (Zaburi 56:8) Kwa mfano huo, Daudi alionyesha uhakika wake kwamba Yehova hakujua tu hali yake bali alijua jinsi ilivyomwathiri kihisia-moyo.

Kuelekea mwisho wa maisha yake, Daudi aliandika kutokana na mambo aliyojionea: “Hatua za mtu zaimarishwa na BWANA, naye aipenda njia yake. Ajapojikwaa hataanguka chini, BWANA humshika mkono na kumtegemeza.” (Zaburi 37:23, 24) Wewe pia waweza kuwa na uhakika kwamba hata kama majaribu yako ni yenye kudumu na yenye kuendelea, Yehova ayaona naye huthamini uvumilivu wako. Paulo aliandika: “Mungu si dhalimu hata aisahau kazi yenu, na pendo lile mlilolidhihirisha kwa jina lake, kwa kuwa mmewahudumia watakatifu, na hata hivi sasa mngali mkiwahudumia.”—Waebrania 6:10.

Na zaidi, Yehova aweza kutenda kwa niaba yako kwa kukupa nguvu ya kuvumilia vikwazo vyovyote vile vitakavyokuwa mbele yako. “Mateso ya mwenye haki ni mengi,” akaandika Daudi, “lakini BWANA humponya nayo yote.” (Zaburi 34:19) Kwa kweli, Biblia hutuambia kwamba macho ya Yehova “hukimbia-kimbia duniani mwote, ili ajionyeshe mwenye nguvu kwa ajili ya hao, waliokamilika moyo kuelekea kwake.”—2 Mambo ya Nyakati 16:9.

Yehova Amekuvuta

Uthibitisho wa ziada wa kwamba Yehova anakujali wewe binafsi waweza kupatikana katika maneno ya Yesu. “Hakuna mtu awezaye kuja kwangu,” akasema, “asipovutwa na Baba aliyenipeleka.” (Yohana 6:44) Ndiyo, Yehova husaidia mtu mmoja-mmoja kupata manufaa za dhabihu ya Kristo. Kwa njia gani? Hasa ni kupitia kazi ya kuhubiri Ufalme. Ni kweli, kazi hii ni “ushuhuda kwa mataifa yote,” na bado hiyo hufikia kila mtu mmoja-mmoja. Kusikiliza na kuitikia ujumbe wa habari njema ni uthibitisho wa hangaiko la Yehova kwako binafsi.—Mathayo 24:14.

Kupitia roho takatifu, Yehova huvuta mtu mmoja-mmoja kuelekea Mwana wake na tumaini la uhai udumuo milele. Jambo hilo huwezesha kila mtu kufahamu na kutumia kweli za kiroho ajapokuwa na vizuizi na kutokamilika kulikorithiwa. Kwa kweli, mtu hawezi kuelewa makusudi ya Mungu bila kupata msaada wa roho ya Mungu. (1 Wakorintho 2:11, 12) Kama Paulo alivyowaandikia Wathesalonike, “si wote walio na imani.” (2 Wathesalonike 3:2) Yehova huwapa roho takatifu wale tu wanaoonyesha utayari wa kuvutwa naye.

Yehova huvuta watu kwa sababu yeye awapenda wakiwa mtu mmoja-mmoja naye ataka wapate wokovu. Ni uthibitisho thabiti kama nini wa kwamba Yehova hujali mtu binafsi! Yesu alisema: “Haipendezi mbele za Baba yenu aliye mbinguni kwamba mmoja wa wadogo hawa apotee.” (Mathayo 18:14) Ndiyo, machoni pa Mungu kila mtu binafsi ni mwenye thamani. Hiyo ndiyo sababu Paulo aliweza kuandika: ‘Atamlipa kila mtu kwa kadiri ya matendo yake.’ (Warumi 2:6) Na mtume Petro alisema: “Mungu hana upendeleo; bali katika kila taifa mtu [mtu binafsi] amchaye na kutenda haki hukubaliwa na yeye.”—Matendo 10:34, 35.

Miujiza ya Yesu

Upendezi wa kibinafsi wa Mungu kwa wanadamu binafsi ulionyeshwa kwa njia yenye kugusa moyo katika miujiza iliyofanywa na Mwana wake, Yesu. Maponyo hayo yaliandamana na hisia nyingi sana. (Marko 1:40, 41) Kwa kuwa Yesu “hawezi kutenda neno mwenyewe ila lile ambalo amwona Baba analitenda,” huruma yake nyororo yaonyesha hangaiko lenye kugusa moyo la Yehova kwa kila mmoja wa watumishi wake.—Yohana 5:19.

Fikiria simulizi la muujiza uliofanywa na Yesu, lililorekodiwa kwenye Marko 7:31-37. Hapo Yesu aliponya mtu aliyekuwa kiziwi na pia kuwa na matatizo ya kusema. Yeye “akamtenga [mtu huyo] na mkutano faraghani,” Biblia yasimulia. Kisha, “akatazama juu mbinguni, akaugua, akamwambia, Efatha, maana yake, Funguka.”

Kwa nini Yesu alimtenga mtu huyu na umati? Yaelekea kwamba kiziwi ambaye hawezi kusema angekuwa na wasiwasi mbele ya watazamaji. Huenda Yesu alikuwa ameona wasiwasi wa mtu huyo, na ndiyo sababu alichagua kumponya faraghani. “Simulizi hilo lote,” asema msomi mmoja wa Biblia, “latuonyesha dhahiri shahiri kwamba Yesu hakumfikiria mtu huyo kuwa kisa tu cha ugonjwa; bali alimwona kuwa mtu binafsi. Mtu huyo alikuwa na uhitaji wa kipekee na tatizo la kipekee, na kwa huruma nyororo sana Yesu alishughulika naye kwa njia ambayo haikuumiza hisia zake na kwa njia ambayo aliweza kuelewa.”

Simulizi hilo laonyesha hangaiko la kibinafsi la Yesu kwa watu. Unaweza kuwa na uhakika kwamba anapendezwa nawe kwa njia iyo hiyo. Ni kweli kwamba kifo chake cha kidhabihu kilikuwa wonyesho wa upendo kwa ajili ya ulimwengu wote wa wanadamu wawezao kukombolewa. Hata hivyo, unaweza kuona kwamba tendo hilo linakuhusu binafsi, kama Paulo, aliyeandika: “Mwana wa Mungu . . . alinipenda akajitoa nafsi yake kwa ajili yangu.” (Wagalatia 2:20, italiki ni zetu.) Na kwa kuwa Yesu alisema kwamba ‘aliyemwona alikuwa amemwona Baba,’ twaweza kuwa na hakika kwamba Yehova anapendezwa jinsi hiyo na kila mmoja wa watumishi wake.—Yohana 14:9.

Yehova Awa Mthawabishaji

Kutwaa ujuzi wa Mungu kwatia ndani kujua kila upande wa utu wake kama unavyofunuliwa katika Biblia. Jina lenyewe Yehova lamaanisha “Yeye Husababisha Iwe,” likidokeza kwamba Yehova aweza kuwa chochote atakacho ili kutekeleza mapenzi yake. Katika historia yote, yeye amechukua madaraka mbalimbali, kutia ndani yale ya Muumba, Baba, Bwana Mwenye Enzi Kuu, Mchungaji, Yehova wa majeshi, Msikiaji wa sala, Hakimu, Mfunzi Mtukufu, na Mkombozi.b

Ili kufahamu maana halisi ya jina la Mungu, ni lazima pia tumjue Yehova katika daraka la Mthawabishaji. Paulo aliandika: “Lakini pasipo imani haiwezekani kumpendeza; kwa maana mtu amwendeaye Mungu lazima aamini kwamba yeye yuko, na kwamba huwapa thawabu wale wamtafutao.”—Waebrania 11:6.

Yehova amewaahidi wale wanaochagua kumtumikia kwa moyo wote uhai udumuo milele kwenye dunia iliyo paradiso. Si ubinafsi kutazamia utimizo wa ahadi hiyo tukufu, wala si kuwa kimbelembele kuwazia ukiwa unaishi huko. Musa “aliyatazamia hayo malipo.” (Waebrania 11:26) Vilevile Paulo alitazamia kwa hamu utimizo wa ahadi ya Mungu kwa Wakristo watiwa-mafuta walio waaminifu. Yeye aliandika: “Nakaza mwendo, niifikilie mede ya thawabu ya mwito mkuu wa Mungu katika Kristo Yesu.”—Wafilipi 3:14.

Wewe pia waweza kutazamia thawabu ambayo Yehova aahidi wale wanaovumilia. Kutarajia thawabu hiyo ni sehemu muhimu ya ujuzi wako wa Mungu na uvumilivu wako kwenye utumishi wake. Kwa hiyo tafakari kila siku juu ya baraka ambazo Yehova amekuwekea. Mary, aliyetajwa mwanzoni, amefanya jitihada ya kipekee ili kufanya hivyo. “Kwa mara ya kwanza kabisa maishani mwangu,” yeye asema, “hivi majuzi nilikubali kwamba dhabihu ya fidia ya Yesu yanihusu. Ninaanza kuhisi kwamba Yehova hunijali nikiwa mtu binafsi. Nimekuwa Mkristo kwa zaidi ya miaka 20, lakini ni majuzi tu nilipoanza kuamini jambo hili.”

Kupitia funzo na kutafakari kwa moyo wote juu ya Biblia, Mary, pamoja na mamilioni wengine, anajifunza kwamba Yehova hujali watu wake si wakiwa kikundi tu bali vilevile wakiwa watu mmoja-mmoja. Mtume Petro alisadiki sana jambo hilo hivi kwamba aliandika: ‘Mtupe hangaiko lenu lote juu ya Mungu, kwa sababu yeye huwajali nyinyi.’ (1 Petro 5:7, NW) Ndiyo, Mungu akujali wewe!

[Maelezo ya Chini]

[Sanduku katika ukurasa wa 6]

Ufufuo—Uthibitisho wa Kwamba Mungu Hujali

UTHIBITISHO wenye kusadikisha wa upendezi wa Mungu kwa kila mtu wapatikana katika Biblia kwenye Yohana 5:28, 29 (NW): “Saa inakuja ambayo katika hiyo wote wale waliomo ndani ya makaburi ya ukumbusho watasikia sauti [ya Yesu] na kutoka.”

Kwa kupendeza, neno la Kigiriki mne·meiʹon (kaburi la ukumbusho) limetumiwa hapa badala ya taʹphos (kaburi). Neno taʹphos huleta maana tu ya maziko. Lakini mne·meiʹon ladokeza kwamba rekodi ya mtu aliyekufa inakumbukwa.

Kwa habari hiyo, ebu fikiria kile ambacho ufufuo utahitaji kutoka kwa Yehova Mungu. Ili kumleta mtu tena kwenye uhai, ni lazima ajue kila kitu kumhusu—kutia ndani tabia zake zilizorithiwa na kumbukumbu lake kamili. Ni kwa njia hiyo tu awezapo kurudishwa akiwa yuleyule.

Bila shaka, jambo hilo haliwezekani kwa maoni ya kibinadamu, lakini “yote yawezekana kwa Mungu.” (Marko 10:27) Yeye anaweza hata kutambua kilicho ndani ya moyo wa mtu. Hata kama mtu huyo amekufa kwa karne nyingi, kumbukumbu la Mungu juu yake halikosei; halififii. (Ayubu 14:13-15) Hivyo, alipotaja Abrahamu, Isaka, na Yakobo, Yesu aliweza kusema hata karne nyingi baada ya wao kufa kwamba Yehova “si Mungu wa wafu, bali wa walio hai; kwa kuwa wote huishi kwake.”—Luka 20:38, italiki ni zetu.

Hivyo, mabilioni ya watu ambao wamekufa wamo katika kumbukumbu la Yehova Mungu hata kwa mambo madogo-madogo. Huo ni uthibitisho wenye nguvu kama nini kwamba Mungu hujali wanadamu wakiwa mtu mmoja-mmoja!

[Picha katika ukurasa wa 7]

Yesu alipendezwa kibinafsi na wale aliowaponya