Kuishi kwa Ajili ya Mapenzi ya Mungu—Leo na Milele
“Ninyi nanyi . . . tangu sasa msiendelee kuishi katika tamaa za wanadamu, bali katika mapenzi ya Mungu.”—1 PETRO 4:1, 2
1, 2. (a) Watu wengi wanalionaje wazo la kujitiisha chini ya mapenzi ya mtu mwingine? (b) Huenda wengine wakaonaje jambo hilo katika kundi la Kikristo? (c) Basi ni maulizo gani yanayotokezwa?
WEWE unalionaje wazo la kuacha maisha yako yaongozwe na Mungu? Watu wengi leo wanaliona kuwa wazo lenye kuchukiza kujitiisha chini ya mapenzi ya mtu mwingine. Hata katika zile zinazoitwa jamii za watu wenye uthabiti kuna ongezeko la uasi kinyume cha mamlaka, Ghasia, mateto, msuko-suko, na jeuri ndiyo mambo ya kila siku. Kunapokuwa na mikazo, ule unaoonekana kuwa ustaarabu unafunuliwa kuwa ni kisingizio tu chenye kumalizika upesi.—2 Timotheo 3:1-3.
2 Tofauti na hivyo, Mashahidi wa Yehova wanaonyesha kwa uaminifu wao kwamba wao wanaishi kwa ajili ya mapenzi ya Mungu, kwa mfano, katika huduma yao ya nyumba kwa nyumba. Hata hivyo, nyakati nyingine ndani ya kundi la Kikristo, roho ya kujitegemea imedhihirishwa na wachache. Huenda wao wakaudhika juu ya nidhamu wanayopewa na wazee. Wachache wanaonyesha dharau kuelekea jamii ya “mtumwa mwaminifu mwenye akili” na Baraza Linaloongoza lake. (Mathayo 24:45-47; Matendo 15:2, 23) Basi maulizo yanatokea: Kwa sababu gani mimi nijitiishe kwa mapenzi ya Mungu? Kwa sababu gani maisha yangu yaongozwe na Mungu?
Mfano wa Kristo Usio wa Choyo
3. Petro alitoa shauri gani kuhusu nia yetu ya akilini?
3 Petro, aliyeshiriki kuona mambo mengi akiwa pamoja na Yesu, aliamini kulikuwa na sababu nzuri sana ya kuishi kwa ajili ya mapenzi ya Mungu badala ya yale ya mtu mwenyewe. Yeye alisema: “Kwa hiyo kwa kuwa Kristo ameteswa katika mwili, ninyi pia jipatieni silaha za nia za akili ile ile; kwa sababu mtu yule ambaye ameteswa katika mwili ameachana na dhambi, ili kusudi apate kuishi baki la wakati wake katika mwili, si kwa tamaa za mwanadamu tena, bali kwa mapenzi ya Mungu.”—1 Petro 4:1, 2, NW.
4. Yesu alionyeshaje utiifu wake kwa Baba yake?
4 Kwa sababu gani Yesu alitaabika katika mwili? Ni kwa sababu yeye aliunga mkono upande wa Baba yake katika lile suala la enzi kuu, au utawala wa ulimwengu wote. Alimthibitisha Mungu kuwa wa kweli na Shetani kuwa mwongo. Naye alifanya hivyo kwa kuacha maisha yake ya kidunia yaongozwe na Mungu, ingawa hiyo ilimfanya apatwe na kifo cha mfia-imani.—2 Wakorintho 5:14, 15.
5. Ni mwito gani wa ushindani unaotokezwa mbele yetu na mfano wa Kristo?
5 Hata hivyo kifo hicho kilikuwa wonyesho wa upendo wa Mungu kupitia Kristo. (1 Yohana 4:10) Kwa sababu gani? Kwa sababu kilifanya faida ziweze kupatikana na wanadamu wote. (Warumi 5:8; 6:23) Lakini ni wangapi walio na nia ya kujipatia faida hizo? Ni watu wangapi walio na nia ya kufuata mfano wa Kristo na kujinyima tamaa zao wenyewe ili wajitiishe kwa mapenzi wa Mungu?—Waebrania 13:15, 17.
Faida za Sasa na Katika Wakati Ujao
6, 7. Ni faida gani za kujitiisha chini ya mapenzi ya Yehova?
6 Hivyo, ule mwaliko ambao Yehova aliwatolea Israeli miaka 2,700 iliyopita unafaa sana hata katika nyakati zetu: “Mimi ni [Yehova], Mungu wako, nikufundishaye ili upate faida, nikuongozaye kwa njia ikupasayo kuifuata. Laiti ungalisikiliza amri zangu! ndipo imani yako ingalikuwa kama mto wa maji, na haki yako kama mawimbi ya bahari.”—Isaya 48:17, 18; Linganisha Mwanzo 22:18.
7 Yehova anatufundisha tujipatie faida kwa kuishi kwa ajili ya mapenzi yake—na faida hizo si kupata amani na uadilifu sasa tu. Zinatia ndani baraka za wakati ujao za uzima wa milele, sawa na vile Yesu alivyoahidi: “Kwa kuwa mapenzi yake Baba yangu ni haya, ya kwamba kila amtazamaye Mwana na kumwamini yeye, awe na uzima wa milele; nami nitamfufua siku ya mwisho.”—Yohana 6:40.
8. Kwa njia gani ahadi ya Yesu ya ufufuo ni faraja leo?
8 Maneno hayo ni faraja kuu kwa Wakristo waaminifu leo walio wazee sana katika umri. Mfumo huu wa mambo umeingia katika mwaka wao wa 72 tangu ile tarehe ya maana ya 1914. Ulimwengu wa Shetani umeendelea kuwapo muda mrefu kuliko ilivyotazamiwa na wengi. Kwa kweli, Wakristo fulani waaminifu ambao walitazamia kuiona Har–Magedoni na mwanzo wa mfumo mpya wa mambo katika muda wa maisha yao wamekufa. Hata hivyo mwendo wao wa maisha, uliowekwa wakfu ili kufanya mapenzi ya Mungu, haukuwa wa bure tu. Kwa kutimiza ahadi yake, Yesu atawafufua awape faida ya uzima wa milele.—Yohana 5:28, 29; 1 Wakorintho 15:58.
Nia ya Akilini ya Kristo
9, 10. (a) Ni lazima tujipatie silaha gani? (Wafilipi 2:5-8) (b) Ni jambo gani lililo la pekee kuhusu neno la Kigiriki lililotafsiriwa “nia ya akili” katika 1 Petro 4:1?
9 Ni jambo gani linaloweza kufanya iwe rahisi kwetu kujitiisha chini ya mapenzi ya Mungu? Kulingana na shauri la Petro, lililotajwa katika fungu la 3, ni lazima tujipatie “nia ya akili ile ile” aliyokuwa nayo Yesu.—1 Petro 4:1, NW.
10 Hapa Petro anatumia neno la Kigiriki linalopatikana mara mbili tu katika Maandiko ya Kigiriki—enʹnoi·a. Ingawa watafsiri wengine wanalifasiri kuwa “akili,” hilo si lile neno la kawaida la Kigiriki la kusema “akili,” ambalo ni nous. Basi Petro, kwa kuongozwa na Mungu, alikuwa akifikiria jambo fulani la wazi alipochagua kutumia jina hilo la ujumla. Mwanachuo Mgiriki W. E. Vine anasema kwamba neno enʹnoi·a “linaonyesha madhumuni, kusudi, kiolezo kilichotungwa.” Kamusi Greek-English Lexicon ya J. H. Thayer inafafanua neno hilo kuwa ni “njia ya kufikiri na kujisikia.”
11. Tunaweza kujifunza nini kutokana na mfano wa Yesu kuhusu njia ambayo tunatumia maisha zetu?
11 Mwendo wa Yesu wa kujinyima ulionyesha wazi kusudi, au kiolezo chake. Yeye hakuwa akiishi maisha ya juu juu tu, akitafuta anasa na raha tu. Alijua kwamba hakuwa ameacha maisha yake ya hapo kwanza mbinguni ili apoteze bure miaka michache akiwa duniani kwa kufuatia shughuli za kichoyo. (Ona utofautiano katika Mwanzo 6:1, 2, 4, na Yuda 6.) Hivyo yeye alisema: “Mimi sikushuka kutoka mbinguni ili niyafanye mapenzi yangu, bali mapenzi yake aliyenipeleka.” (Yohana 6:38) Yesu alikuwa na kusudi moja tu akilini alipojitoa kufuata njia aliyowekewa na Baba yake, sikuzote akaithamini zaidi ya mapenzi yake mwenyewe, mpaka akafa kifo chenye aibu.—Luka 22:42.
12, 13. (a) Yesu alidhihirishaje nia yake ya akili kwenye chemchemi ya Yakobo? (b) Yesu alimaanisha nini aliposema, “Mimi ninacho chakula msichokijua
12 Hata alipokuwa amechoka na akiwa mwenye njaa, Yesu alionyesha waziwazi nia yake ya akili kuelekea mapenzi ya Baba yake. Katika pindi moja, wanafunzi wake walipoenda kutafuta chakula, yeye alipumzika kwenye chemchemi ya Yakobo. Badala ya kuitumia nafasi hiyo nzuri sana ili alale kidogo mpaka wanafunzi wake warudi, alijitahidi kufanya mapenzi ya Mungu. Aliichukua hatua isiyo ya kawaida kwa Myahudi. Alifanya maongezi na mwanamke Msamaria. Aliyafungua macho ya mwanamke huyo apate kumfahamu Mungu yule wa kweli. Matokeo yakawa kwamba, “katika mji ule Wasamaria wengi walimwamini kwa sababu ya neno la yule mwanamke.”—Yohana 4:6-26, 39-42.
13 Wanafunzi wake waliporudi, walimhimiza ale. Yeye aliwajibuje? “Mimi ninacho chakula msichokijua ninyi.” Wao walishangazwa sana na jibu lake mpaka akaongeza hivi, “Chakula changu ndicho hiki, niyatende mapenzi yake aliyenipeleka, nikaimalize kazi yake.” Ni wazi kwamba Yesu alifurahia kujitiisha chini ya mapenzi ya baba yake. Kufanya hivyo kulikuwa kama chakula kwake, na sawa na vile ilivyo kuhusu kula chakula kizuri, kwa kufanya hivyo yeye alishiba kweli kweli. Ikiwa sisi tunataka kujisikia kweli kweli kwamba tumetoshelezwa katika maisha zetu, ingefaa tufuate mfano wa Yesu Kristo.—Yohana 4:31-38.
Matokeo ya Kuwa na Nia ya Akilini ya Kristo
14. Sisi tunahitaji nini ili tuwe na nia ya akili ya Kristo? Toa mfano.
14 Basi, kuwa na nia ya akili ya Kristo kumepasa kuwe na matokeo gani juu yetu? Tukijifunza kufikiri kama Kristo, tutakuwa na kani kindani itakayotuongoza tufanye kama vile Yesu angefanya kama angekuwa chini ya hali zo zote. (Luka 22:42; Waefeso 4:23, 24) Hatutajipatia kani hiyo kwa sababu ya kuogopa adabu tu, kama vile kutiwa nidhamu na wazee kundini, bali itatokana na uthamini mwingi sana wa sheria na kanuni za Yehova. Tunaweza kulinganisha hali hiyo na mtu anayetii sheria za barabarani wakati tu anapoona polisi—yeye anajitiisha kwenye maongozi ya nje tu. Lakini mtu anayethamini uhai, anayependa jirani yake, na kuiona hekima ya kuwapo kwa sheria za barabarani atatii kwa sababu anaiheshimu sheria. Yeye ana kichocheo cha ndani chenye nguvu.—Zaburi 51:10.
15. (a) Ni jambo gani linalothibitisha kwamba Yesu alikuwa na kani ya kindani ikitendesha akili yake? (Waefeso 4:23) (b) Ni mifano gani ya kisasa ya ukamilifu wa Kikristo inayotoa ushuhuda kuhusu kuwa na nia ya akili ya Kristo?
15 Yesu alikuwa na ile ‘kani ya ndani yenye kutendesha akili yake.’ Hivyo yeye alikuwa mwaminifu kwa mapenzi ya baba yake, mpaka kifo. Alivumilia taabu bila kulalamika wala kutukana watesi wake. (1 Petro 2:21-24) Nyakati nyingine sisi Wakristo tunaweza kupatwa na mikazo kama hiyo. Mamlaka zenye kupinga zinaweza kujaribu kukomesha utendaji wetu wa kuhubiri na mikutano, kama vile walivyofanya katika Hispania wakati wa kipindi cha Franco na katika nchi mbalimbali za Ulaya wakati wa utawala wa Nazi. Ndugu na dada wengi walitendwa vibaya kwa jitihada ya kuwafanya wasaliti ndugu wenye madaraka katika kundi la kwao. Wajapoteswa, walio wengi walisimama imara. (Ona 1978 Yearbook of Jehovah’s Witnesses, kurasa 171-2, 182-3; 1986 Yearbook of Jehovah’s Witnesses, kurasa 137-159.)
16. Ni nini baadhi ya njia ambazo Mkristo anaweza kujaribiwa leo? Sisi tunaweza kupingaje?
16 Tunaweza kuja chini ya mkazo kuhusiana na kutokuwamo kwa Kikristo au kuhusiana na kutiwa damu mishipani. (Matendo 5:29; 15:28, 29) Hapo ndipo suala linapotokea, Je, sisi tunaishi kwa ajili ya mapenzi ya Mungu au ya wanadamu? Au kishawishi kinaweza kutokana na tamaa za kimwili pamoja na washirika wasiofaa. Labda kule shuleni au mahali petu pa kazi, nafasi inaweza kutokea kuvuta sigareti au kutumia dawa za kulevya bila mtu mwingine ye yote kundini kujua jambo hilo. Au namna gani kile kishawishi cha kucheza kamari? Au kuingia katika uasherati au uzinzi? Mara nyingi sana mazingira ya kazi ya kilimwengu yanaweza kusababisha mawazo na vitendo visivyofaa—isipokuwa tuwe na uthabiti kama Kristo kuhusu kuyafanya mapenzi ya Mungu. Wewe utafanya nini? Je! utakuwa na kani yenye unyofu ikitendesha akili yako ili ufuate mwendo wa Kristo chini ya hali kama hizo?—Waefeso 4:17-20; 1 Yohana 2:15, 16, NW.
17, 18. (a) Ni jambo gani lenye mkazo mwingi ambalo Petro anataja kuhusu wale wanaozoea dhambi? (b) Ni nini kinachohitajiwa ili kupinga dhambi isipenye?
17 Petro anaendelea kukazia uhitaji wa kufanya mapenzi ya Mungu anaposhauri hivi: “Maana wakati wa maisha yetu uliopita watosha kwa kutenda mapenzi ya Mataifa; kuenenda katika ufisadi, na tamaa, na ulevi, na karamu za ulafi, na vileo, na ibada ya sanamu isiyo halali; mambo ambayo wao huona kuwa ni ajabu ya ninyi kutokwenda mbio pamoja nao katika ufisadi ule ule usio na kiasi, wakiwatukana. Nao watatoa hesabu kwake yeye aliye tayari kuwahukumu walio hai na waliokufa.”—1 Petro 4:3-5.
18 Hapa Petro anaeleza jambo lenye mkazo mwingi—wale wanaopuuza mapenzi ya Mungu watapaswa kutoa sababu. (Linganisha Warumi 14:12 na Waebrania 13:17.) Paulo anafikia mkataa unaofanana na huo katika barua yake kwa Wakolosai ambapo anaandika hivi: “Basi, vifisheni viungo vyenu vilivyo katika nchi, uasherati, uchafu, tamaa mbaya, mawazo mabaya, na kutamani, ndiyo ibada ya sanamu: kwa ajili ya mambo hayo huja ghadhabu ya Mungu.” Wote wanaozoea mambo kama hayo hakika hawaishi kwa ajili ya mapenzi ya Mungu bali, ni kwa kusudi la kutosheleza tamaa zao wenyewe zenye pupa. Hata hivyo watu wanaweza kutoka katika hali hiyo iliyoshuka ya maadili, kama vile Paulo alivyosema, “Katika hayo ninyi nanyi mlitembea zamani, mlipoishi katika hayo.”—Wakolosai 3:5-7; Waefeso 4:19; Ona pia 1 Wakorintho 6:9-11.
Kufahamu Mapenzi ya Mungu Ni Nini
19. Watu wengi wanaonyeshaje sasa kwamba wanaishi kwa ajili ya mapenzi ya Yehova? (Warumi 12:1, 2)
19 Watu zaidi ya milioni tatu wamekwisha kufahamu mapenzi ya Mungu ni nini kwao miaka hii ya mwisho ya karne ya 20. Matokeo ni kwamba, wao wanahubiri kwa bidii habari njema za serikali ya Ufalme wa Mungu. (Matendo 8:12; Marko 13:10) Wao hawaishi kwa ajili yao wenyewe tu, kama watu walio wengi wanavyofanya. Wao wanajua kwamba karibuni Mungu atakomesha mfumo huu wenye ufisadi, nao wanajinyima mambo ili wasaidie wengine kupata maarifa hayo sahihi, kama vile mtume Paulo alivyoshauri: “Basi angalieni sana jinsi mnavyoenenda; si kama watu wasio na hekima, bali kama watu wenye hekima; mkiukomboa wakati kwa maana zamani hizi ni za uovu. Kwa sababu hiyo msiwe wajinga, bali mfahamu ni nini yaliyo mapenzi ya [Yehova].”—Waefeso 5:15-17.
20, 21. (a) Inatupasa tuioneje zawadi ya uzima? (Yakobo 4:13-17) (b) Tunaweza kuepukaje kufuatisha mtindo wa ulimwengu?
20 Maisha ni kama bilauri ya maji baridi yenye kuburudisha. Katika miongo ya kwanza ya maisha ya mtu, yeye “anakunywa” sana na kwa haraka—mpaka anapoanza kushangaa ni miaka mingapi ya maisha imebaki katika “bilauri” hiyo! Hilo ndilo jambo la ajabu linaloshangaza sana kila mtu. Basi, ni jambo la maana kama nini kuishi maisha kwa kuona daraka tulilo nalo kuelekea Mungu na wanadamu wenzetu! Kuna uhitaji mkubwa sana wa kuzingatia mapenzi ya Mungu wala si mapenzi yetu wenyewe tu ya kichoyo!—Mathayo 7:21, 24, 26.
21 Lakini, kwa kuwa tunaishi katika ulimwengu unaoongozwa na roho ya Shetani, si rahisi sikuzote kuishi kwa ajili ya mapenzi ya Mungu. (Ufunuo 12:9) Mikazo inatokezwa wakati wote ili kutugeuza tufuate maenzi ya ulimwengu na mwelekeo wao wa akili. Mitindo ya mavazi na misisimuko mikubwa sana ya kufuata njia fulani inaweza kuongoza wengine hata katika kundi, hivi kwamba wanaanza kuonekana ni kama wanamfuata bila kufikiri mtu fulani aliye mashuhuri katika kutumbuiza watu. Basi, linafaa sana shauri la Paulo: “Na mwache kufanyizwa kulingana na mtindo wa huu mfumo wa mambo, bali mgeuzwe kwa kubadili akili zenu, ili mpate kujithibitishia wenyewe mapenzi ya Mungu yaliyo mema na yenye kukubalika na makamilifu.”—Warumi 12:2, NW.
22. (a) Mapenzi ya Mungu ni nini kwa wakati wetu? (b) Tunaweza kuonyeshaje kwamba tunaishi kwa ajili ya mapenzi ya Mungu? (c) Ni baraka gani inayongoja wale wanaoishi kwa ajili ya mapenzi ya Mungu?
22 Mapenzi ya Mungu ni kwamba ‘habari njema hizi za Ufalme’ zihubiriwe ulimwenguni pote kabla yeye hajaleta kikomo kwa utaratibu uliopo sasa ulimwenguni. (Mathayo 24:14, Ufunuo 14:6, 7) Jambo hilo linatokeza sababu kubwa zaidi ya kwamba uitikie mwito unaotakwa wa wahudumu wengi zaidi wa wakati wote ikiwa hali zako zinaruhusu. Hiyo ni sababu, pia, kwa wazee na watumishi wa huduma wajitoe ili wahamie makundi ambako huenda kukawa na uhitaji wa msaada wao. Tena hiyo ni sababu yenye nguvu sana kwa kila Shahidi awe shahidi Mkristo wa kweli—si kuwa na kisingizio tu cha kuwa hivyo bali aishi kweli kweli kwa ajili ya mapenzi ya Mungu sasa na milele. Ujue kwamba kwa kufanya hivyo ‘utakuwa ukijiwekea akiba msingi mzuri kwa wakati ujao, ili upate uzima ulio kweli kweli.’—1 Timotheo 6:19.
Wewe ungejibuje?
◻ Yesu alionyeshaje kwamba aliishi kwa ajili ya mapenzi ya Mungu?
◻ Ni faida gani zinazopatikana kwa wale wanaoishi kwa ajili ya mapenzi ya Mungu?
◻ Nia ya Kristo ya akilini ilikuwa nini kuelekea mapenzi ya Mungu?
◻ Ile ‘kani inayotendesha akili’ inapasa kuwa na matokea gani juu yetu?
◻ Inatupasa tuwe na maoni gani juu ya maisha?
[Picha katika ukurasa wa 21]
je! wewe unatii sheria kwa sababu ya kuithamini au ni kwa sababu tu polisi yupo?