Kuthamini Makusanyiko ya Kikristo
“Acheni tufikiriane ili kuchocheana kwenye upendo na kazi zilizo bora, si kuachilia mbali kukusanyika pamoja sisi wenyewe.” —WAEBRANIA 10:24, 25.
1, 2. (a) Kwa nini ni pendeleo kuhudhuria kukusanyika kwa Wakristo wa kweli? (b) Yesu yupo kwenye makusanyiko ya wafuasi wake katika maana gani?
NI PENDELEO lililoje kuhudhuria kusanyiko la Kikristo, kuwe kumefanyizwa na waabudu wa Yehova wapunguao kumi au wawe elfu kadhaa, kwa maana Yesu alisema hivi: “Palipo na wawili au watatu wakiwa wamekusanyika pamoja katika jina langu, hapo mimi nipo katikati yao”! (Mathayo 18:20) Ni kweli, alipokuwa akitoa ahadi hiyo, Yesu alikuwa akizungumzia mambo ya kihukumu yaliyohitaji kushughulikiwa kwa usahihi na wale wenye kuongoza kutanikoni. (Mathayo 18:15-19) Lakini maneno ya Yesu yaweza pia kutumiwa kuhusu makusanyiko yote ya Kikristo ambayo hufunguliwa na kufungwa kwa sala katika jina lake? Ndiyo. Kumbuka, Yesu alipowapa wafuasi wake utume wa kazi ya kufanya wanafunzi, aliwaahidi hivi: “Tazameni! mimi nipo pamoja nanyi siku zote hadi umalizio wa mfumo wa mambo.”—Mathayo 28:20.
2 Hapawezi kuwa na shaka kwamba Kichwa cha kutaniko la Kikristo, Bwana Yesu Kristo, apendezwa sana na makusanyiko yote ya wafuasi wake waaminifu. Isitoshe, twaweza kuwa na hakika kwamba yupo pamoja nao kupitia roho takatifu ya Mungu. (Matendo 2:33; Ufunuo 5:6) Yehova Mungu pia apendezwa na kukutana kwetu pamoja. Kusudi la msingi la mikutano hiyo ni kuinua sifa juu kwa Mungu “katika makusanyiko.” (Zaburi 26:12) Kuhudhuria kwetu mikutano ya kutaniko ni uthibitisho wa upendo wetu kwake.
3. Sisi huthamini makusanyiko ya Kikristo kwa sababu zipi za maana?
3 Kuna sababu nyingine nzuri zitufanyazo tuthamini makusanyiko ya Kikristo. Kabla ya kuondoka duniani, Yesu Kristo aliwaweka rasmi wanafunzi wake watiwa-mafuta ili watende wakiwa “mtumwa mwaminifu na mwenye busara” katika kugawa chakula cha kiroho cha wakati ufaao kwa watu wa nyumba ya imani. (Mathayo 24:45) Njia ya maana ambayo kulishwa huko kwa kiroho hufanywa ni kupitia mikutano ya kutaniko na vilevile makusanyiko na mikusanyiko iliyo mikubwa zaidi. Bwana Yesu Kristo huongoza mtumwa mwaminifu huyo ili aandae habari muhimu kwenye makusanyiko hayo kwa ajili ya wale wote ambao wataka kuokoka mwisho wa mfumo huu mwovu na kupata uhai katika ulimwengu mpya wa Mungu wenye uadilifu.
4. Ni “desturi” gani hatari iliyotajwa katika Biblia, na ni nini kitakachotusaidia tuiepuke?
4 Kwa sababu hiyo, hakuna Mkristo yeyote awezaye kusitawisha desturi hatari iliyotajwa na mtume Paulo, aliyeandika hivi: “Acheni tufikiriane ili kuchocheana kwenye upendo na kazi zilizo bora, si kuachilia mbali kukusanyika pamoja sisi wenyewe, kama vile wengine walivyo na desturi, bali kutiana moyo, na zaidi sana hivyo kwa kadiri mwonavyo siku ikikaribia.” (Waebrania 10:24, 25) Kutafakari juu ya pendeleo na juu ya manufaa ya kuhudhuria makusanyiko ya Kikristo kutatusaidia kutegemeza makusanyiko hayo kwa uaminifu-mshikamanifu na kwa moyo wote.
Mikutano Ijengayo
5. (a) Usemi wetu kwenye mikutano wapaswa kuwa na matokeo gani? (b) Kwa nini hatupaswi kukawia kuwaalika watu wenye kupendezwa kuhudhuria mikutano?
5 Kwa kuwa Wakristo husali ili roho takatifu ya Yehova itende kwenye mikutano ya Kikristo, kila mhudhuriaji mmoja-mmoja apaswa kufanya yote awezayo ili kufanya kazi kwa kupatana na roho na ‘asiwe akiitia kihoro roho takatifu ya Mungu.’ (Waefeso 4:30) Mtume Paulo alipoandika maneno hayo yaliyopuliziwa, alikuwa akizungumzia matumizi yafaayo ya usemi. Yale tusemayo yapasa sikuzote yatumiwe “kwa ajili ya kujenga kama vile kuwezavyo kuwa na uhitaji, ili huo upate kuwapa wasikiaji lililo la kupendeleka.” (Waefeso 4:29) Jambo hilo ni la maana hasa kwenye makusanyiko ya Kikristo. Katika barua yake kwa Wakorintho, Paulo alikazia uhitaji wa mikutano kuwa yenye kujenga, kufundisha, na kutia moyo. (1 Wakorintho 14:5, 12, 19, 26, 31) Wahudhuriaji wote hunufaika kutokana na mikutano hiyo, kutia na wahudhuriaji wapya, ambao huenda wakakata kauli hivi: “Mungu kwa kweli yumo miongoni mwenu.” (1 Wakorintho 14:25) Kwa sababu hiyo, hatupaswi kukawia katika kuwaalika waliopendezwa karibuni ili wakusanyike pamoja nasi, kwa sababu kufanya hivyo kutaharakisha maendeleo yao ya kiroho.
6. Ni yapi baadhi ya mambo yasaidiayo kufanya mkutano uwe wenye kujenga?
6 Wote wapewao migawo ya hotuba, mahojiano, au maonyesho kwenye mikutano ya Kikristo wataka kuwa na hakika kwamba usemi wao ni wenye kujenga na wenye kupatana na Neno la Mungu lililoandikwa, Biblia. Kwa kuongezea kutamka usemi sahihi, twapaswa kuonyesha hisia na hisia-moyo ambazo zapatana na nyutu zenye upendo za Mungu na Kristo. Ikiwa wote wenye kutoa sehemu katika programu ya mikutano ni wenye kukazia uangalifu kudhihirisha ‘matunda ya roho ya Mungu,’ kama vile shangwe, ustahimilivu na imani, basi wote wenye kuhudhuria kwa hakika watahisi wamejengwa.—Wagalatia 5:22, 23.
7. Wahudhuriaji wote waweza kuchangiaje kukusanyika kwenye kujenga?
7 Ijapokuwa ni wachache tu ambao huenda wakawa na sehemu katika programu kwenye mikutano ya kutaniko, wote waweza kuchangia kukusanyika kwenye kujenga. Mara nyingi kuna fursa mbalimbali kwa wasikilizaji kujibu maswali. Hizo ni pindi za kutangaza hadharani imani yetu. (Waroma 10:9) Hazipaswi kamwe kutumiwa kuwa fursa za kuendeleza mawazo yetu ya kibinafsi, kujisifia mafanikio yetu ya kibinafsi, au kuchambua mwamini mwenzetu. Je, jambo hilo halingeitia roho ya Mungu kihoro? Tofauti kati yetu na waamini wenzetu hushughulikiwa vizuri zaidi faraghani katika roho ya upendo. Biblia yataarifu hivi: “Iweni wenye fadhili nyinyi kwa nyinyi, wenye huruma kwa njia nyororo, mkisameheana kwa hiari mtu na mwenzake kama vile Mungu pia kupitia Kristo alivyowasamehe nyinyi kwa hiari.” (Waefeso 4:32) Ni fursa bora kama nini ambayo makusanyiko ya Kikristo hututolea ili tutumie shauri hilo zuri! Ili kuonyesha wengine fadhili, wengi hufika kwenye mikutano mapema na huendelea kukaa baada ya mkutano kumalizika. Hilo pia husaidia waliopendezwa karibuni, ambao wana uhitaji wa pekee wa kuhisi kwamba wamekaribishwa. Hivyo Wakristo wote waliojiweka wakfu wana daraka la kutimiza katika kufanya mikutano iwe yenye kujenga kwa ‘kufikiriana na kuchocheana kwenye upendo na kazi zilizo bora.’
Tayarisha Vizuri
8. (a) Wengine hujidhabihuje kwa njia istahiliyo pongezi ili kuhudhuria mikutano? (b) Yehova huweka kielelezo gani akiwa mchungaji?
8 Ingawa huenda kwa kulinganisha ikawa rahisi kwa watu fulani kuhudhuria makusanyiko ya Kikristo, kwa wengine hilo lataka kujidhabihu kwa kuendelea. Kwa kielelezo, mama Mkristo ambaye alazimika kufanya kazi ya kimwili ili kusaidia kuandalia watu wa nyumbani mwake mahitaji ya lazima, kwa kawaida hurudi kutoka kazini akiwa amechoka. Kisha huenda akalazimika kutayarisha mlo na kuwasaidia watoto wake kuwa tayari kwa ajili ya mkutano. Huenda Wakristo wengine wakasafiri umbali mrefu ili kufika mikutanoni, au huenda wakazuiwa na udhaifu mbalimbali au uzee. Bila shaka, Yehova Mungu huelewa hali ya kila mhudhuriaji mwaminifu wa mikutano, kama vile mchungaji mwenye upendo huelewa mahitaji ya pekee ya kondoo mmoja-mmoja katika kundi lake. ‘Kama mchungaji,’ Biblia yataarifu, ‘Yehova atalilisha kundi lake. Atawakusanya wana-kondoo mikononi mwake; na kuwachukua kifuani mwake, nao wanyonyeshao atawaongoza polepole.’—Isaya 40:11.
9, 10. Twaweza kunufaikaje kikamili kutokana na mikutano?
9 Wale ambao hulazimika kujidhabihu kwa kadiri kubwa katika njia mbalimbali ili kuwa wa kawaida kwenye mikutano, huenda wasiwe na wakati wa kutosha ambao waweza kutumiwa katika kutayarisha habari itakayochunguzwa. Kwenda sambamba na ratiba ya kila juma ya usomaji wa Biblia hufanya kuhudhuria Shule ya Huduma ya Kitheokrasi kuwe kwenye kuthawabisha zaidi. Vivyo hivyo, kutayarisha mapema kwa ajili ya mikutano mingine, kama vile Funzo la Mnara wa Mlinzi na Funzo la Kitabu la Kutaniko, hufanya mikutano hiyo iwe yenye kunufaisha zaidi. Kwa kusoma mapema habari za funzo na kwa kuyapa ufikirio angalau baadhi ya maandiko ya Biblia yaliyotajwa, wale wenye hali za familia zinazotumia wakati mwingi watakuwa tayari zaidi kuwa na ushiriki wenye maana katika mazungumzo haya ya Biblia.
10 Wengine, ambao hali zao haziwazuii sana, waweza kutumia wakati zaidi katika kutayarisha mikutano. Kwa kielelezo, wao waweza kufanya utafiti juu ya maandiko ambayo yametajwa lakini hayakunukuliwa. Hivyo wote waweza kuwa wamejitayarisha ili kunufaika kikamili kutokana na mikutano na kuwa na ushiriki mzuri katika kulijenga kutaniko kwa hotuba na maelezo yao. Kwa kujitayarisha vizuri, wazee na watumishi wa huduma wataweka kielelezo chema katika kutoa majibu mafupi, yasiyo na maelezo mengi. Kwa sababu ya staha kwa ajili ya maandalizi ya Yehova, wale wenye kuhudhuria wataepuka mazoea yoyote yenye kukengeusha fikira mikutano inapoendelea.—1 Petro 5:3.
11. Kwa nini nidhamu ya kibinafsi yahitajiwa ili kuwa tayari kwa ajili ya mikutano?
11 Huenda utendaji mbalimbali na vitumbuizo visivyo vya muhimu kwa afya yetu ya kiroho vikatumia wakati wetu mwingi mno. Ikiwa ndivyo, twahitaji kujichunguza na “[kuacha] kuwa wenye kukosa akili” kwa habari ya matumizi ya wakati wetu. (Waefeso 5:17) Lengo letu lapaswa kuwa ‘kujinunulia kabisa wakati’ kutoka kwenye mambo yasiyo ya maana ili kutumia wakati mwingi zaidi katika funzo la Biblia la kibinafsi na matayarisho ya mikutano, na vilevile utumishi wa Ufalme. (Waefeso 5:16) Kwa kukiri wazi, jambo hilo si rahisi sikuzote na hutaka kujitia nidhamu. Vijana ambao hutolea jambo hilo uangalifu wanaweka msingi mzuri kwa maendeleo ya wakati ujao. Paulo alimwandikia hivi Timotheo mwandamani wake mchanga zaidi. “Fikiri kwa uzito juu ya mambo haya [shauri la Paulo kwa Timotheo]; vama katika hayo, ili kusonga mbele kwako kupate kuwa dhahiri kwa watu wote.”—1 Timotheo 4:15.
Vielelezo Kutoka Katika Neno la Mungu
12. Ni kielelezo gani chenye kutokeza kilichowekwa na familia ya Samweli?
12 Fikiria kielelezo chema kilichowekwa na familia ya Samweli, aliyeshiriki kwa ukawaida katika mipango ya kukusanyika pamoja na waabudu wenzake tabenakulo la Mungu lilipokuwa huko Shilo. Watu wa kiume tu ndio waliotakiwa wazuru kila mwaka kwenda kwenye sherehe za msherehekeo. Lakini Elkana baba ya Samweli, alipeleka familia yake yote ‘alipokuwa akikwea kutoka mjini kwake mwaka kwa mwaka, ili kuabudu na kumtolea BWANA wa majeshi dhabihu katika Shilo.’ (1 Samweli 1:3-5) Yawezekana mji wa nyumbani wa Samweli, Rama-Msufi, ulikuwa karibu na pwani ya Rentis ya siku ya kisasa kwenye vilima vidogo vya “nchi ya milima milima ya Efraimu.” (1 Samweli 1:1) Hivyo hiyo safari ya kwenda Shilo ingehusisha mwendo wa kilometa zipatazo 30, safari yenye kuchosha siku hizo. Hivyo ndivyo familia ya Elkana ilivyofanya kwa uaminifu-mshikamanifu ‘mwaka kwa mwaka, mara nyingi kadiri walivyokwea kwenda nyumbani kwa BWANA.’—1 Samweli 1:7.
13. Ni kielelezo gani kilichowekwa na Wayahudi waaminifu wakati Yesu alipokuwa duniani?
13 Yesu pia alikua akiwa sehemu ya familia kubwa. Kila mwaka hiyo familia ilisafiri kutoka Nazareti kilometa zipatazo 100 kuelekea kusini ili kuhudhuria msherehekeo wa Sikukuu ya Kupitwa huko Yerusalemu. Kuna njia mbili ambazo wangeweza kupitia. Njia ya moja kwa moja zaidi ilihusisha kuteremka kuingia katika Bonde la Megido, kisha kupanda juu meta zipatazo 600 kupitia eneo la Samaria na kuendelea hadi Yerusalemu. Njia nyingine iliyopendwa sana ilikuwa ile Yesu aliyopitia katika safari yake ya mwisho kwenda Yerusalemu mwaka wa 33 W.K. Hiyo ilihusisha kuteremka kuingia katika Bonde la Yordani hadi chini ya usawa wa bahari hadi alipofika “mipaka ya Yudea . . . ng’ambo ya Yordani.” (Marko 10:1) Kutoka hapo, ‘barabara ya kupanda kwenda Yerusalemu’ ni mwendo wa kilometa zipatazo 30, ukihusisha kupanda kwa meta zaidi ya 1,100. (Marko 10:32) Kwa ukawaida, umati wa washerehekeaji wa Msherehekeo walio waaminifu walifunga hiyo safari ngumu kutoka Galilaya hadi Yerusalemu. (Luka 2:44) Ni kielelezo chema kama nini kwa watumishi wa Yehova katika nchi zenye utajiri leo, wengi ambao kwa kulinganisha waweza kuhudhuria makusanyiko ya Kikristo kwa starehe, kwa sababu ya namna mbalimbali za usafiri wa kisasa!
14, 15. (a) Anna aliweka kielelezo gani? (b) Twaweza kujifunza nini kutokana na mtazamo mwema uonyeshwao na wahudhuriaji fulani wa mikutano walio wapya?
14 Kielelezo kingine ni kile cha Anna, mjane mwenye umri wa miaka 84. Biblia hutaarifu kwamba “[hakukosa] kamwe kuwa katika hekalu.” (Luka 2:37) Isitoshe, Anna alionyesha upendezi wenye upendo kwa wengine. Alipomwona yule mtoto mchanga, Yesu, na kujua kwamba alikuwa ndiye Mesiya aliyeahidiwa, alifanya nini? Alimshukuru Mungu na kuanza “[kusema] juu ya huyo mtoto kwa wale wote wenye kungojea ukombozi wa Yerusalemu.” (Luka 2:38) Ni mtazamo mwema na kigezo kilichoje kwa Wakristo leo!
15 Ndiyo, kuhudhuria na kushiriki katika mikutano yetu kwapaswa kuwa jambo lenye kupendeza hivi kwamba, kama Anna, hatutaki kamwe kukosa. Wengi walio wapya huhisi hivyo. Wakiwa wametoka gizani kuingia katika nuru ya Mungu ya ajabu, wao wataka kujifunza yote wawezayo, na wengi huonyesha shauku kubwa kwa ajili ya mikutano ya Kikristo. Kwa upande mwingine, wale ambao wamekuwa katika kweli kwa muda mrefu zaidi lazima walinde dhidi ya “kuacha upendo waliokuwa nao hapo kwanza.” (Ufunuo 2:4) Matatizo mazito ya afya au mambo mengine ambayo yapita udhibiti wa mtu huenda yakazuia uhudhuriaji wa mikutano nyakati nyingine. Lakini tusiruhusu kamwe ufuatiaji wa vitu vya kimwili, tafrija, au kukosa upendezi kutufanye tuwe wahudhuriaji wa mikutano wasio tayari, wenye kujikalia tu, au wasio wa kawaida.—Luka 8:14.
Kielelezo Chema Zaidi
16, 17. (a) Yesu alikuwa na mtazamo gani kuelekea makusanyiko ya kiroho? (b) Wakristo wote wapaswa kujaribu kufuata desturi gani njema?
16 Yesu aliweka kielelezo chenye kutokeza katika kuonyesha uthamini kwa ajili ya makusanyiko ya kiroho. Akiwa na umri mchanga wa miaka 12, alionyesha kupenda kwake nyumba ya Mungu iliyokuwa Yerusalemu. Wazazi wake walishindwa kujua mahali alikokuwa lakini mwishowe walimpata akizungumza Neno la Mungu pamoja na walimu hekaluni. Kwa kuitikia hangaiko la wazazi wake, Yesu aliuliza hivi kwa staha: “Je, hamkujua kwamba ni lazima mimi niwe katika nyumba ya Baba yangu?” (Luka 2:49) Kwa kunyenyekea, Yesu mchanga alirudi Nazareti pamoja na wazazi wake. Huko aliendelea kuonyesha upendo wake kwa mikutano ya ibada kwa kuhudhuria kwa kawaida kwenye sinagogi. Hivyo, alipoanza huduma yake, Biblia yaripoti hivi: “Akaja hadi Nazareti, ambako alikuwa amelelewa; na, kulingana na desturi yake siku ya sabato, akaingia katika sinagogi, naye akasimama ili asome.” Baada ya Yesu kusoma na kufafanua Isaya 61:1, 2, wasikilizaji walianza “[ku]staajabia maneno yenye uvutio mwingi yenye kutoka kinywani mwake.”—Luka 4:16, 22.
17 Mikutano ya Kikristo leo hufuata kiolezo hichohicho cha msingi. Baada ya mkutano kufunguliwa kwa wimbo wa sifa na sala, mistari kutoka katika Biblia (au mistari iliyonukuliwa katika habari ya funzo la Biblia) husomwa na kufafanuliwa. Wakristo wa kweli wako chini ya wajibu wa kuiga ile desturi njema ya Yesu Kristo. Kadiri hali zao ziruhusuvyo, wao hupendezwa na kuwa wa kawaida katika kuhudhuria makusanyiko ya Kikristo.
Vielelezo vya Siku ya Kisasa
18, 19. Ni vielelezo gani bora ambavyo ndugu katika nchi zisizo na utajiri sana wameweka kwa habari ya mikutano, makusanyiko, na mikusanyiko?
18 Katika sehemu za dunia zisizo na utajiri sana, wengi wa ndugu na dada zetu huweka kielelezo chema cha kuthamini makusanyiko ya Kikristo. Katika Msumbiji ilimchukua mwangalizi wa wilaya, Orlando, na mke wake, Amélia, muda wa saa 45 kutembea kilometa zipatazo 90 juu ya mlima mrefu ili kutumikia kusanyiko fulani. Kisha walilazimika kusafiri mwendo huo tena kurudi ili kutumikia kusanyiko jingine. Kwa kiasi Orlando aliripoti hivi: “Tulihisi kwamba hatukuwa tumefanya lolote tulipokutana na ndugu kutoka Kutaniko la Bawa. Ili kuhudhuria hilo kusanyiko na kurudi nyumbani kwao ilihusisha safari ya siku sita ya karibu kilometa 400 kwa miguu, na miongoni mwao mlikuwemo ndugu mwenye umri wa miaka 60!”
19 Vipi uthamini wa mikutano ya kutaniko ya kila juma? Kashwashwa Njamba ni dada mdhaifu aliye katika miaka yake ya 70. Yeye huishi Kaisososi, kijiji kidogo umbali wa karibu kilometa tano kutoka Jumba la Ufalme lililoko Rundu, Namibia. Ili kuhudhuria mikutano, yeye husafiri kilometa kumi kupitia kichakani kwenda na kurudi. Kwenye njia hiyo wengine wameshambuliwa ili kupokonywa vitu, lakini Kashwashwa hufuliza kuja. Mikutano iliyo mingi huongozwa kwa lugha ambazo haelewi. Hivyo yeye hunufaikaje kutokana na kuhudhuria? “Kwa kufuata maandiko,” Kashwashwa asema, “mimi hujaribu kupambanua hotuba ni juu ya nini.” Lakini yeye hawezi kusoma wala kuandika, hivyo yeye hufuataje maandiko? “Mimi huyasikiliza maandiko niyajuayo kwa moyo,” yeye ajibu. Na katika miaka ambayo imepita, ameweka akiba hesabu kubwa ya maandiko katika kumbukumbu lake. Ili kuboresha uwezo wake wa kutumia Biblia, yeye huhudhuria darasa la kujifunza kusoma na kuandika lililopangwa na kutaniko. “Napenda kuhudhuria mikutano,” yeye asema. “Sikuzote kuna mambo mapya ya kujifunza. Napenda kushirikiana na ndugu na dada zangu. Hata ingawa siwezi kusema na wote, sikuzote wao huja na kunisalimu. Na lililo la maana zaidi, najua kwamba kwa kuhudhuria mikutano, ninafanya moyo wa Yehova utereme.”
20. Kwa nini haitupasi kuacha makusanyiko ya Kikristo?
20 Kama Kashwashwa, mamilioni ya waabudu wa Yehova kotekote duniani huonyesha uthamini ustahilio pongezi kwa makusanyiko ya Kikristo. Ulimwengu wa Shetani usongapo kuelekea uharibifu wake, hatuwezi kuthubutu kuacha kukusanyika kwetu pamoja. Badala ya hivyo, acheni tudumu tukiwa macho kiroho na kuonyesha uthamini wenye kina kirefu kwa mikutano, makusanyiko, na mikusanyiko. Jambo hilo halitafanya tu moyo wa Yehova utereme bali pia litatunufaisha sana tushirikipo ufundishaji wa kimungu ambao huongoza kwenye uhai wa milele.—Mithali 27:11; Isaya 48:17, 18; Marko 13:35-37.
Maswali ya Kupitia
◻ Kwa nini ni pendeleo kuhudhuria makusanyiko ya Kikristo?
◻ Wote wenye kuhudhuria waweza kuchangiaje kuwa na mkutano wenye kujenga?
◻ Yesu Kristo aliweka kielelezo gani chenye kutokeza?
◻ Ni somo gani liwezalo kupatikana kutokana na ndugu katika nchi zisizo na utajiri sana?
[Sanduku katika ukurasa wa 17]
Wao Huthamini Mikutano ya Kila Juma
Mamilioni ya watu huishi katika majiji yaliyokumbwa na umaskini na uhalifu. Zijapokuwa hali hizo, Wakristo wa kweli miongoni mwao huthamini vikusanyiko vya Kikristo kwa njia istahiliyo pongezi. Mzee mmoja anayetumikia mojawapo ya makutaniko ya Soweto katika mkoa wa Gauteng, Afrika Kusini, aripoti hivi: “Katika kutaniko lililo na Mashahidi na wahubiri wasiobatizwa 60, sisi huwa na wahudhuriaji kati ya 70 na 80, na nyakati nyingine zaidi, kwenye mikutano yetu. Ingawa ndugu na dada hawasafiri mbali ili kuhudhuria, hali katika sehemu hii ya Soweto ni yenye ghasia. Ndugu mmoja alichomwa kisu mgongoni alipokuwa akitembea kwenda mkutanoni. Angalau dada wawili walibambwa na watu waliokuwa wakijaribu kuwapokonya. Lakini hilo haliwazuii kuja. Kila Jumapili, tunakuwa na mazoezi mafupi ya kuimba baada ya kufunga mikutano kwa sala. Angalau asilimia 95 hubaki na kuimba nyimbo zote zitakazotumiwa mikutanoni juma linalofuata. Hilo husaidia wenye kupendezwa karibuni kujifunza nyimbo na kuimba pamoja nasi.”
Wakaaji wa mashambani wana vizuizi vingine, kama vile umbali mrefu ambao lazima wasafiri ili kuhudhuria mikutano mara tatu kwa juma. Wenzi fulani wa ndoa wenye kupendezwa huishi umbali wa kilometa 15 kutoka kwenye Jumba la Ufalme lililoko Lobatse, Botswana. Kwa muda wa mwaka mmoja uliopita, wamehudhuria mikutano kwa ukawaida pamoja na wanao wawili. Mume hushona viatu ili kutegemeza familia. Mke huuza bidhaa ndogo-ndogo kuongezea mapato ya familia ili waweze kulipia usafiri wa kwenda na kurudi kutoka mikutanoni.
Jioni moja ya kiangazi hivi majuzi, baada ya kuwa na mkutano pamoja na mwangalizi wa mzunguko, familia hiyo ilijikuta imekwama kwenye kituo cha basi saa 3:00 usiku. Mabasi yalikuwa yameacha kufanya kazi mapema kwa sababu ya halihewa mbaya. Ofisa wa polisi alisimamisha gari lake na kuwauliza walichokuwa wakifanya. Aliposikia juu ya hali yao mbaya, aliwasikitikia na kuwasafirisha kwa gari ile safari ya kilometa 15 hadi nyumbani. Mke wake, ambaye ni mhubiri asiyebatizwa, alimwambia mumewe hivi: “Ona, tukiiweka mikutano kwanza, sikuzote Yehova huandaa.” Sasa mume ameonyesha tamaa ya kuwa mhubiri wa habari njema pia.
[Picha katika ukurasa wa 18]
Mashahidi kama hawa katika Rumania wanaweka kielelezo bora cha uthamini wa makusanyiko ya Kikristo