Twaa Fursa Hii ya Pekee!

PETER alikuwa ameendelea sana katika masomo yake ya kitiba, ujumbe wa Biblia wa wokovu uliponasa upendezi wake. Alipohitimu na kuanza kufanya kazi akiwa daktari katika hospitali, wakubwa wake waliendelea kumtia moyo afanye masomo maalumu ya kuwa mpasuaji wa nyuroni. Hapo palikuwa na fursa ambayo madaktari wapya wengi wangetwaa bila kusita.

Hata hivyo, Petera aliamua kutotwaa fursa hiyo. Kwa nini? Je, alikosa tu tamaa ya kufuatia makuu na msukumo unaohitajiwa? La, kwa kuwa Peter alifikiria toleo hilo kwa uangalifu. Baada ya kuwa Shahidi wa Yehova aliyejiweka wakfu na kubatizwa, alitamani kutumia wakati mwingi iwezekanavyo katika sehemu mbalimbali za huduma ya Kikristo. Yeye alisababu kwamba, mara angestahili kuwa mpasuaji wa nyuroni, kazi yake ingezidi kutumia wakati wake na nishati yake. Je, alikuwa mpumbavu kuacha taraja hilo lenye umashuhuri, au alikuwa mwenye hekima?

Kwa watu fulani, huenda uamuzi wa Peter ukawa ulionekana kuwa wa kipumbavu. Hata hivyo, alifikiria maandiko ya Biblia kama Waefeso 5:15, 16. Humo mtume Paulo aliwasihi sana Wakristo wenzake hivi: “Angalieni sana jinsi mnavyoenenda; si kama watu wasio na hekima bali kama watu wenye hekima; mkiukomboa wakati [“unaofaa,” NW] kwa maana zamani hizi ni za uovu.”

Tafadhali kazia uangalifu maneno “wakati unaofaa.” Yametafsiriwa kutokana na neno la Kigiriki linalotumiwa katika Biblia kurejezea hasa wakati au kipindi kilichotiwa alama na matukio fulani au kinachofaa utendaji hususa. Hapa Paulo alikazia kwamba Wakristo wapaswa kuweka kando wakati kwa ajili ya mambo yaliyo ya maana. Kwa kweli, wanahitaji “kuhakikisha mambo yaliyo ya maana zaidi.” (Wafilipi 1:10, NW) Hilo ni jambo la kuweka mambo ya kutangulizwa.

Kwa hiyo basi, kusudi la kimungu ni nini kwa wakati wetu? Mapenzi ya Mungu ni nini kwa wale wampendao? Unabii mbalimbali wa Biblia hutambulisha kwa wazi siku yetu kuwa “wakati wa mwisho,” au “siku za mwisho.” (Danieli 12:4; 2 Timotheo 3:1) Kristo Yesu alionyesha waziwazi ni nini kingekuwa chenye umaana zaidi kwa siku yetu. Alisema kihususa kwamba kabla ya mwisho wa mfumo mwovu huu wa mambo, “habari njema ya ufalme itahubiriwa katika ulimwengu wote, kuwa ushuhuda kwa mataifa yote.” Ndipo tu mwisho utakapokuja.—Mathayo 24:3, 14.

Kwa hiyo, twahitaji kutwaa kila fursa ya kuhubiri habari njema ya Ufalme na kufanya wanafunzi. (Mathayo 28:19, 20) Kwa kuwa utendaji huo mbalimbali hautapata kurudiwa kamwe, hii ndiyo fursa ya mwisho ya sisi kujitahidi kabisa katika kazi hii ya kuokoa uhai. “Wakati uliokubalika ndio sasa.” Kwa kweli, “siku ya wokovu ndiyo sasa.”—2 Wakorintho 6:2.

Kufanya Uamuzi Wenye Hekima

Peter—yule kijana aliyetajwa mwanzoni—alifikiria uamuzi wake kwa uangalifu akapima machaguo yake. Aling’amua kwamba lisingekuwa kosa kwake kufanya masomo kwa kusudi la kuwa mpasuaji wa nyuroni. Lakini ni nini kilichokuwa cha maana zaidi kwake? Ni utendaji wake katika huduma ya Kikristo, kwa kufikiria hali ya hima ya kazi hii. Wakati uo huo, alikuwa na wajibu mbalimbali wa kutimiza. Alikuwa ameoa na alihitaji kumtegemeza mkewe, aliyekuwa akishiriki katika kazi ya kuhubiri wakati wote. (1 Timotheo 5:8) Peter alihitaji pia kulipia madeni yaliyohusu elimu yake. Basi aliamua kufanya nini?

Peter aliamua kufanya masomo maalumu katika rediolojia na kufanya uchunguzi wa kikamili wa maradhi kwa kutumia kiuka sauti. Kazi hiyo ingehusisha siku ya kawaida ya kazi. Yeye angepata mazoezi yake pia katika saa za kawaida za kazi. Ndiyo, huenda watu fulani wakaona hilo kuwa wadhifa usio mashuhuri sana, lakini ungempa wakati zaidi wa kutolea ufuatiaji mbalimbali wa kiroho.

Jambo jingine la kufikiriwa lilichochea uamuzi wa Peter. Bila kuwahukumu wengine ambao huenda wakawa wameamua tofauti, alijua kwamba kuhusika sana katika mambo ya kilimwengu kwa kweli humtia Mkristo hatarini. Kwaweza kumfanya apuuze madaraka ya kiroho. Hilo latolewa kielezi na kielelezo kingine kilichohusisha kazi ya kuajiriwa.

Mhubiri fulani wa Ufalme wa wakati wote alikuwa msanii aliyezoezwa. Aliweza kujitegemeza kifedha kwa kuuza michoro yake ya rangi. Hivyo aliweza kujitegemeza kwa ustarehe, huku akitoa wakati wake ulio mwingi kwa huduma ya Kikristo yenye umaana zaidi. Hata hivyo, tamaa ya kuendeleza kazi-maisha yake ya usanii ikaanza kukua. Alizidi kuhusika katika kuchora kwa rangi na katika ulimwengu wa sanaa, akaacha huduma ya wakati wote, na hatimaye akaacha kutenda kabisa kwa habari ya utendaji wa kuhubiri Ufalme. Hatimaye, akahusika katika mwenendo usio wa Kimaandiko, ukimfanya asiwe sehemu ya kutaniko la Kikristo tena.—1 Wakorintho 5:11-13.

Wakati Wetu Ni wa Pekee

Tukiwa wale wanaomtumikia Yehova sasa, kwa hakika twataka kuendelea kuwa waaminifu kwake. Twajua kwamba tunaishi katika wakati wenye kutokeza katika historia ya kibinadamu. Ili kuendelea kumtumikia Mungu na kukabiliana na hali za sasa kwa matokeo, huenda tukahitaji kufanya marekebisho mbalimbali. Twaweza kulinganisha hili na wakati wa mavuno kwa mkulima. Hicho ni kipindi cha utendaji wa pekee, wakati wafanyakazi wa shambani wanapotazamiwa kujitahidi zaidi kuliko ilivyo kawaida na kufanya kazi muda mrefu zaidi kwa siku. Kwa nini? Kwa sababu mavuno lazima yakusanywe katika kipindi kifupi cha wakati.

Mfumo mwovu wa mambo uliopo una wakati mfupi sana uliosalia. Sasa zaidi ya wakati mwingine wowote, Mkristo wa kweli ahitaji kujitahidi ili kufuata kielelezo cha Yesu na kutembea katika nyayo zake. Mwendo wake wa maisha ulionyesha kwa wazi ni nini kilichokuwa chenye umaana zaidi kwake. Alisema hivi: “Imetupasa kuzifanya kazi zake yeye aliyenipeleka maadamu ni mchana, usiku waja asipoweza mtu kufanya kazi.” (Yohana 9:4) Kwa kusema kwamba usiku ulikuwa ukija, Yesu alikuwa akirejezea wakati wa kesi yake, kutundikwa kwake, na kifo chake, wakati huduma yake ya kidunia ingeisha naye asingeweza kushiriki tena katika kazi za Baba yake wa kimbingu.

Ni kweli, katika huduma yake ya miaka mitatu na nusu, Yesu alitumia baadhi ya wakati wake akifanya miujiza na kuponya wagonjwa. Hata hivyo, alitumia wakati wake ulio mwingi ili kuhubiri ujumbe wa Ufalme na “kuwatangazia wafungwa [wa dini isiyo ya kweli] kufunguliwa kwao.” (Luka 4:18; Mathayo 4:17) Yesu alijitahidi sana katika huduma yake na pia alitumia wakati kuwazoeza wanafunzi wake ili waweze kujenga juu ya msingi aliokuwa ameweka na kuendelea na kazi ya kuhubiri kwa matokeo. Yesu alitwaa kila fursa ya kuendeleza masilahi ya Ufalme na alitaka wanafunzi wake wafanye vivyo hivyo.—Mathayo 5:14-16; Yohana 8:12.

Sawa na Yesu, sisi tulio wafuasi wake wa siku ya kisasa twahitaji kuona hali ya wanadamu sawa na vile Yehova Mungu huiona. Wakati wa mfumo huu wa mambo unapungua, na Mungu ataka kwa rehema wote wawe na fursa ya kupata wokovu. (2 Petro 3:9) Kwa hiyo, je, lisingekuwa jambo lenye hekima kuweka ufuatiaji mwingine wote katika mahali pa pili baada ya kule kufanya mapenzi ya Yehova? (Mathayo 6:25-33) Hasa wakati wa pekee kama huu, jambo ambalo kwa kawaida lingeonwa kuwa la maana laweza kwa urahisi kuwa lenye umaana mdogo zaidi maishani mwetu tukiwa Wakristo.

Je, yeyote kati yetu atapata kujuta kwa sababu ya kutanguliza mapenzi ya Mungu maishani mwetu? La hasha, kwa kuwa mwendo wa Kikristo wa kujidhabihu ni wenye kuthawabisha kwa njia ya ajabu. Mathalani, Yesu aliwaambia wanafunzi wake hivi: “Amin, nawaambieni, Hakuna mtu aliyeacha nyumba, au ndugu waume, au ndugu wake, au mama, au baba, au watoto, au mashamba, kwa ajili yangu, na kwa ajili ya Injili, ila atapewa mara mia sasa wakati huu, nyumba, na ndugu waume, na ndugu wake, na mama, na watoto, na mashamba, pamoja na udhia; na katika ulimwengu ujao uzima wa milele.”—Marko 10:29, 30.

Hakuna mtu awezaye kupima thamani ya kifedha ya thawabu zinazofurahiwa na wale watumiao wakati wao ili kumsifu Yehova na kupiga mbiu ya ujumbe wa Ufalme. Wao hufurahia baraka nyingi sana! Hizo zatia ndani marafiki wa kweli, uradhi wa kufanya mapenzi ya kimungu, tabasamu ya Mungu ionyeshayo kibali chake, na taraja la uhai usio na mwisho. (Ufunuo 21:3, 4) Na ni baraka iliyoje kusaidia watu kiroho na kuletea heshima jina takatifu la Yehova tukiwa Mashahidi wake! Bila shaka, ‘kuukomboa wakati ufaao’ ni jambo lenye hekima kikweli na ni mwendo wenye thawabu. Sasa kuliko wakati mwingine wowote ndio wakati wa kushiriki katika kuitangaza habari njema ya Ufalme wa Mungu. Je, wewe utatwaa na kushikilia fursa hii ya pekee?

[Maelezo ya Chini]