“Vaeni Suti Kamili ya Silaha Kutoka kwa Mungu”

WAKRISTO wavae silaha? Kwa nini wachukue vifaa kama hivyo vya vita? Je! wao si wapendao amani? (2 Timotheo 2:24) Naam, sisi ni wapendao amani. Hata hivyo, Wakristo wote wa kweli wamo katika vita—moja ambayo katika hiyo wajitahidi, si kuua, bali kushinda.

Kama Shetani asingaliasi, pigano hilo lisingalikuwa la lazima. Lakini aliasi, na kuongoza vibaya Adamu na Hawa wajiunge katika uasi wake. Tangu wakati huo mfumo wa ulimwengu ambao umesitawi uko chini ya uwezo wa “yule mwovu,” Shetani Ibilisi. (1 Yohana 5:19) Ni lazima wale wanaojitiisha kwa yule Mwenye Enzi Kuu aliye na haki, Yehova, wakinze uvutano wa ulimwengu na mtawala wao. Ni lazima wapige vita kwa ajili ya uhai wao wa kiroho. Kwa sababu hiyo, Wakristo wanahimizwa hivi: “Vaeni suti kamili ya silaha kutoka kwa Mungu mpate kuweza kusimama imara kushindana na hila za Ibilisi.”—Waefeso 6:11, NW.

Suti ya Silaha

Ona kwamba tunahitaji “suti kamili ya silaha kutoka kwa Mungu” ikiwa tutalindwa kwa kufaa. Acheni basi, tuangalie kila sehemu ya silaha hiyo kama ielezwavyo na mtume Paulo na tujipime wenyewe kwa unyofu ili kuamua kama tuko tayari kabisa kwa ajili ya vita ya kiroho.—Waefeso 6:14-17.

“Simameni imara, basi, viuno vyenu vikiwa vimefungwa mshipi wa ukweli.” (Waefeso 6:14a, NW) Katika nyakati za Biblia askari-jeshi walivaa mshipi wa ngozi wenye upana wa kufikia centimeta 15. Mshipi huo ulilinda viuno. Askari-jeshi alipokaza mshipi wake, hilo lilimaanisha alikuwa tayari kwa ajili ya vita.

Basi, inafaa kama nini kwamba kweli ya kimungu yafananishwa na mshipi wa askari-jeshi! Hilo laonyesha kwamba twapaswa kuweka Neno la Mungu la kweli likiwa karibu sana na sisi, kana kwamba ni mshipi wetu. Twapaswa kufikiria sana mawazo yaliyomo ndani ya Neno la Mungu. Hilo litatulinda tusiongozwe vibaya na uwongo na udanganyifu mbalimbali. Isitoshe, semi za kinywa cha Yehova zitatutegemeza na kutuimarisha kiroho na kuupa nguvu uaminifu wetu wa kimaadili.

“Mkiwa mmevaa bamba la chuma la kifuani la uadilifu.” (Waefeso 6:14b, NW) Bamba la chuma la kifuani la askari-jeshi lililinda ungo muhimu sana—moyo. Basi, katika silaha zetu za kiroho za kupewa na Mungu, uadilifu hulinda moyo wetu. Kiroho, moyo ni mfano unaofaa wa vile tulivyo ndani—hisia, mawazo, na tamaa zetu. Kwa kuwa Biblia husema pia kwamba moyo huwa na mwelekeo wa kufanya mabaya, ni muhimu kusitawisha azimio la kushikilia kiwango cha Yehova cha uadilifu. (Yeremia 17:9) Ni lazima utii kwa Mungu usiwe wonyesho wa nje-nje wa kinafiki; ni lazima utoke ndani. Hilo lataka kwamba tusitawishe upendo wenye nguvu sana kwa ajili ya uadilifu na chuki yenye nguvu iyo hiyo kwa ajili ya ukosefu wa kutii sheria. (Zaburi 45:7) Hivyo moyo wetu utalindwa.

“Nyayo zenu zikiwa zimevishwa vifaa vya habari njema za amani.” (Waefeso 6:15, NW) Je! nyayo zako zimevishwa katika njia hiyo? Je! zinakupeleka kwa ukawaida katika huduma ya shambani kutangaza rasmi habari njema? Je! unajitahidi kufanyia maendeleo ubora wa utendaji wako wa kuhubiri na kufundisha? Ni kweli, maeneo fulani si yenye kuitikia kwa kadiri fulani. Watu mmoja mmoja huenda wakawa wenye kutokujali, wenye ubaridi, au wenye kupinga. Kuhubiri kwetu huenda hata kukatuletea mnyanyaso. Lakini kwa kudumu, Wakristo husitawisha uvumilivu, sifa inayoandaa ulinzi dhidi ya mashambulio ya Shetani. Ingawa alinyanyaswa, Paulo alikuwa mhubiri mwenye bidii, na sisi tunatiwa moyo ‘tumfuate yeye kama alivyomfuata Kristo.’—1 Wakorintho 11:1.

Kuwa na shughuli nyingi katika utendaji wa kuhubiri ufalme kunaimarisha uhakika wetu katika habari njema. Zaidi ya hayo, kunaruhusu roho ya Yehova ifanye kazi kupitia sisi katika kutimiza mapenzi Yake. Kwa kweli, utendaji wa jinsi hiyo hutufanya tuwe wafanya kazi pamoja na malaika—hata pamoja na Yehova Mungu mwenyewe. (1 Wakorintho 3:9; Ufunuo 14:6) Na kuwa na mengi ya kufanya katika ‘kazi ya Bwana sikuzote’ kunatufanya ‘tuimarike na tusitikisike.’ (1 Wakorintho 15:58) Hilo huandaa ulinzi mzuri ajabu kama nini!

“Chukueni ngao kubwa ya imani.” (Waefeso 6:16, NW) Akiwa na ngao kubwa, askari-jeshi wa nyakati za kale alijilinda mwenyewe dhidi ya mikuki na mishale. Ikiwa angekosa kutumia ngao, angeweza kujeruhiwa vibaya au hata kuuawa. Wakristo hukabili silaha zenye kudhuru vibaya hata zaidi—‘makombora yanayowaka moto ya yule mwovu.’ Hizo hutia ndani mbinu zile zote ambazo Shetani hutumia ili kudhoofisha imani yetu na kutuua kiroho. Zinatia ndani mnyanyaso, uwongo mbalimbali, falsafa za kilimwengu zenye udanganyifu, mavutano ya vitu vya kimwili, na kishawishi cha kushiriki katika ukosefu wa adili. Ili tulindwe na mambo hayo yote, twahitaji ngao kubwa. Hakuna sehemu yoyote yetu iwezayo kuachwa bila kulindwa salama.

Abrahamu na mke wake, Sara, walikuwa na imani yenye nguvu. Walipopita umri wa kuzaa watoto, waliweka imani katika ahadi ya Mungu kwamba mbegu ingezaliwa kwao. Baadaye, Abrahamu alionyesha imani yenye kutokeza alipotii ule mwito wa kumdhabihu Isaka, mwana wake wa pekee aliyezaliwa na Sara mpendwa. Yehova aliuzuia mkono wa Abrahamu na kuandaa dhabihu ya badala. Lakini Abrahamu alikuwa tayari kutii. Kwa nini? Kwa sababu alikuwa na imani kamili kwamba Yehova angeweza kumfufua mwana wake na kutimiza zile ahadi zilizofanywa kuhusu yeye.—Warumi 4:16-21; Waebrania 11:11, 12, 17-19.

Musa pia alikuwa na aina ya imani tunayohitaji. Alikataa katakata mali ya Misri, akichagua badala yake kupatwa na uonevu pamoja na watu wa Mungu. Kwa nini? Kwa sababu alikuwa na imani kwamba Yehova yuko na angeleta wokovu kwa Waisraeli. Imani ya Musa ilikuwa yenye nguvu sana hivi kwamba “alistahimili kama amwonaye yeye asiyeonekana.”—Waebrania 11:6, 24-27.

Je! tuna imani katika Yehova inayofanana na hiyo? Je! uhusiano wetu pamoja na Yehova ni wa karibu sana hivi kwamba karibu ni kana kwamba twaweza kumwona? Je! tuna nia ya kufanya dhabihu yoyote au kuvumilia ugumu wowote ili kudumisha uhusiano wetu pamoja na Mungu? Je! tuna imani kamili katika Yehova? (Waebrania 11:1) Ikiwa ndivyo, makombora ya Shetani yanayowaka moto hayatafanya njia kwa nguvu kupitia ngao yetu ya imani.

“Mwipokee kofia ya chuma ya wokovu ya kukinga kichwa.” (Waefeso 6:17a, NW) Kofia ya chuma ya askari-jeshi ililinda kichwa chake na hivyo ubongo—kiungo cha kusawazisha mfumo wa mshipafahamu na wa fikira. Tumaini la Kikristo la wokovu linafananishwa na kofia ya chuma kwa sababu linalinda akili. Akili ya Mkristo imefanywa upya kupitia maarifa sahihi, lakini ingali ni ya mtu dhaifu na asiyekamilika. (Warumi 7:18; 12:2) Tukiruhusu akili ifikirie mambo yasiyo safi yenye kuharibu imani yanayotokezwa na roho ya ulimwengu huu, uhakika wetu katika wokovu utafifia na huenda ukafa hatimaye. Kwa upande ule mwingine, tukilisha akili zetu daima na maneno ya Mungu yenye kuimarisha, tumaini letu litakaa likiwa jangavu na wazi. Je! wewe huweka kofia yako ya chuma ya wokovu ya kukinga kichwa ikiwa imekazwa kikiki kichwani.

“Upanga wa roho, yaani, neno la Mungu.” (Waefeso 6:17b, NW) Ule usemi kwamba ulinzi bora zaidi ni shambulio bora ni jambo la kweli katika vita ya Kikristo. Nyayo zetu, zikiwa zimevishwa vifaa vya habari njema za amani, zinapotupeleka miongoni mwa wasioamini, hatuwi bila silaha. Neno la Mungu, Biblia, hutenda likiwa upanga wenye nguvu wa kukatilia mbali uwongo mbalimbali na makosa ya kiroho na kusaidia watu wenye mioyo myeupe wapate uhuru wa kiroho.—Yohana 8:31, 32.

Yesu alionyesha uwezo wa silaha hiyo wakati ambao, kwa kweli, alipigana vita na Shetani Ibilisi. Aliposhawishwa jangwani, Yesu alijilinda mwenyewe dhidi ya mashambulio matatu ya kishetani kwa kutumia Neno la Mungu kwa mafanikio na kusema: “Imeandikwa.” (Mathayo 4:1-11) Tukijifunza kutumia upanga huo kwa ustadi, twaweza kuwasaidia walio wasikivu watoke chini ya uwezo wa Shetani. Halafu, pia, wazee wa kundi hutumia Neno la Mungu kulinda kundi kutokana na watu mmoja mmoja wanaojaribu kupotosha imani ya walio dhaifu zaidi.—Matendo 20:28-20.

Ustadi wa askari-jeshi wa kutumia upanga hauji kwa urahisi. Mazoezi na matumizi ya muda mrefu wa kujitolea huhitajiwa ili kuutumia kwa ustadi. Vivyo hivyo, katika vita ya kiroho kujifunza kwingi na kujizoeza kikawaida katika huduma kwahitajika ili kuwa mwenye kulitumia Neno la Mungu kwa ustadi. Kwa hakika, acheni tujitahidi inavyohitajika ili tuwe wastadi wa kiroho wa kutumia upanga, wenye uwezo wa ‘kutumia kwa halali neno la kweli.’—2 Timotheo 2:15.

Endeleeni Kusali, Simameni Imara

Sehemu zote za silaha yetu ya kiroho ni za muhimu ili kudumisha uaminifu wa kimaadili kwa Mungu. Lakini twaweza kuendeleaje tukiwa tumevaa silaha hizo? Kujifunza Biblia kwa ukawaida, kujitayarisha kimbele kwa ajili ya mikutano ya Kikristo, na kisha kusikiliza kwa uangalifu na kushiriki kwa bidii katika mikutano hiyo kutatusaidia tuendelee tukiwa tumevaa silaha zetu. (2 Timotheo 3:16; Waebrania 10:24, 25) Huduma ya shambani ya kawaida na yenye bidii pamoja na ushirika mzuri wa Kikristo utasaidia pia kudumisha katika hali nzuri silaha zetu za kiroho za kushambulia na kulinda.—Mithali 13:20; Warumi 15:15, 16; 1 Wakorintho 15:33.

Kukuza mwelekeo wa kiakili unaofaa ni kwa maana pia. Ni lazima tukatae kuruhusu mavutano ya ulimwengu huu yatukengeushe fikira. Badala ya hivyo, acheni tusitawishe ‘jicho sahili.’ (Mathayo 6:19-24) Kwa kumwiga Yesu Kristo, ni lazima tujifunze kupenda uadilifu na kuchukia ukosefu wa kutii sheria. (Waebrania 1:9) Mambo hayo yote hutusaidia kuendelea tukiwa tumeivaa silaha zetu za kiroho za kupewa na Mungu.

Baada ya kuzungumza juu ya kila sehemu ya silaha ya kiroho, Paulo amalizia kwa kusema hivi: “Kwa kila namna ya sala na kusihi mkiendelea kuomba katika kila pindi katika roho. Na kwa kusudi hilo endeleeni kuwa wenye kuamka kwa uendelevu wote na kusihi kwa ajili ya watakatifu.” (Waefeso 6:18, NW) Askari-jeshi waaminifu-washikamanifu huendelea kuwasiliana na makao makuu ya jeshi na kutii maagizo. Tukiwa askari-jeshi Wakristo, ni lazima tuwasiliane daima na Bwana yetu Mwenye Enzi Kuu, Yehova Mungu, kupitia “jemadari kwa kabila za watu” wake, Yesu Kristo. (Isaya 55:4) Hilo laweza kufanywa, si kwa sala ya kijuujuu tu, bali kupitia sihi yenye kuhisiwa moyoni inayoonyesha ukaribu na ujitoaji wenye kina kwa Yehova. Kwa kuwasiliana na Yehova kwa ukawaida, tunapokea kila siku imara ya kututegemeza katika pigano hilo.

Yesu alisema hivi: “Mimi nimeushinda ulimwengu.” (Yohana 16:33) Yehova ataka pia tuwe washindi. Kifo cha mtume Paulo kilipokaribia, angeweza kusema: “Nimevipiga vita vilivyo vizuri, mwendo nimeumaliza, Imani nimeilinda.” (2 Timotheo 4:7) Na tuweze kusema maneno ayo hayo juu ya sehemu yetu katika pigano hilo. Ikiwa kwa kweli twatamani hilo, acheni ‘tusimame imara kushindana na hila za Ibilisi’ kwa kuendelea tukiwa tumeivaa suti kamili ya silaha kutoka kwa Mungu.—Waefeso 6:11.