Kunyenyekea Mamlaka kwa Shangwe

‘Mlitii kwa mioyo yenu.’—WARUMI 6:17.

1, 2. (a) Ni roho gani inayoonekana wazi katika ulimwengu leo, na chanzo chayo ni nini nayo ina athari gani? (b) Watumishi wa Yehova waliojiweka wakfu huonyeshaje kwamba wao ni tofauti?

“ILE roho ambayo sasa hutenda kazi katika wana wa kutotii” inaonekana wazi leo kwa njia ya kushangaza. Ni roho ya kujitegemea kusikozuiwa, itokayo kwa Shetani, “mtawala wa mamlaka ya hewa.” Roho hii, “hewa” hii, au mtazamo wenye kuenea wa ubinafsi na kutotii, ina “mamlaka,” au uwezo, juu ya wanadamu walio wengi. Hiyo ni sababu moja inayofanya ulimwengu upitie lile ambalo limekuja kuitwa mashaka ya mamlaka.—Waefeso 2:2, NW.

² Kwa furaha, leo watumishi wa Yehova waliojiweka wakfu hawajazi mapafu yao ya kiroho na “hewa” hii iliyochafuzwa, au roho ya kuasi. Wao wajua kwamba “hasira ya Mungu huwajia wana wa uasi.” Mtume Paulo aongezea hivi: “Basi msishirikiane nao.” (Waefeso 5:6, 7) Badala ya hivyo, Wakristo wa kweli hujitahidi ‘kujazwa roho ya Yehova,’ nao hunywa kutokana na “hekima itokayo juu,” ambayo ni “safi, tena ni ya amani, ya upole, tayari kusikiliza maneno ya watu.”—Waefeso 5:17, 18; Yakobo 3:17.

Kunyenyekea Enzi Kuu ya Yehova kwa Hiari

3. Ni nini ufunguo wa unyenyekeo wa hiari, na historia yatufundisha somo gani kubwa?

³ Ufunguo wa kunyenyekea kwa hiari ni kule kutambua mamlaka iliyo halali. Historia ya wanadamu yaonyesha kwamba kukataa enzi kuu ya Yehova hakuleti furaha. Adamu na Hawa hawakupata furaha kwa kuikataa, wala mchochezi wa uasi wao, Shetani Ibilisi. (Mwanzo 3:16-19) Katika hali yake mbaya ya sasa, Shetani ana “ghadhabu nyingi” kwa sababu yeye ajua ya kuwa wakati wake ni mfupi. (Ufunuo 12:12) Ndiyo, amani na furaha ya wanadamu wote na ya ulimwengu wote mzima yategemea ulimwengu mzima kutambua ile enzi kuu ya Yehova yenye uadilifu.—Zaburi 103:19-22.

4. (a) Yehova anataka watumishi wake waonyeshe unyenyekeo na utii wa aina gani? (b) Twapaswa kuwa na hakika juu ya nini, na mtunga-zaburi aonyeshaje jambo hilo?

⁴ Lakini, kwa sababu ya sifa zake zenye kusawazika kiajabu, Yehova haridhiki na utii usio mchangamfu. Yeye ni mwenye nguvu kwelikweli! Lakini yeye si mdhalimu. Yeye ni Mungu wa upendo, naye ataka viumbe wake wenye akili wamtii kwa hiari, kutokana na upendo. Yeye anawataka wanyenyekee enzi kuu yake kwa sababu wao wanachagua kwa moyo wote kujitiisha chini ya mamlaka yake yenye uadilifu na iliyo halali, wakiwa wamesadiki kwamba hakuna jambo jema kwao kuliko kumtii yeye milele. Aina ya mtu ambaye Yehova anataka katika ulimwengu wake ni yule aliye na hisia kama za mtunga-zaburi aliyeandika hivi: “Sheria ya BWANA ni kamilifu, huiburudisha nafsi. Ushuhuda wa BWANA ni amini, humtia mjinga hekima. Maagizo ya BWANA ni ya adili, huufurahisha moyo. Amri ya BWANA ni safi, huyatia macho nuru. Kicho cha BWANA ni kitakatifu, kinadumu milele. Hukumu za BWANA ni kweli, zina haki kabisa.” (Zaburi 19:7-9) Uhakika kamili kwa haki na uadilifu wa enzi kuu ya Yehova—huo wapasa kuwa mtazamo wetu ikiwa twataka kuishi katika ulimwengu mpya wa Yehova.

Kumnyenyekea Mfalme Wetu kwa Shangwe

5. Yesu alithawabishwaje kwa utii wake, na twakiri nini kwa hiari?

⁵ Kristo Yesu mwenyewe ni kielelezo chema sana cha kunyenyekea Baba yake wa kimbingu. Twasoma kwamba “alijinyenyekeza akawa mtii hata mauti, naam, mauti ya msalaba [mti wa mateso, NW].” Paulo aongezea hivi: “Kwa hiyo tena Mungu alimwadhimisha mno, akamkirimia Jina lile lipitalo kila jina; ili kwa jina la Yesu kila goti lipigwe, la vitu vya mbinguni, na vya duniani, na vya chini ya nchi; na kila ulimi ukiri ya kuwa Yesu Kristo ni Bwana, kwa utukufu wa Mungu Baba.” (Wafilipi 2:8-11) Ndiyo, twapiga goti kwa shangwe mbele ya Kiongozi wetu na Mfalme anayetawala, Kristo Yesu.—Mathayo 23:10.

6. Yesu amethibitishaje kuwa shahidi na kiongozi wa vikundi vya mataifa, na ‘uweza wake wa kifalme’ utaendeleaje baada ya dhiki ile iliyo kuu?

⁶ Kwa habari ya Kristo akiwa Kiongozi wetu, Yehova alitabiri hivi: “Angalieni, nimemweka kuwa shahidi kwa kabila za watu; kuwa kiongozi na jemadari kwa kabila za watu.” (Isaya 55:4) Kwa huduma yake ya kidunia na kwa kuelekeza kwake kazi ya kuhubiri kutoka mbinguni baada ya kifo chake na ufufuo wake, Yesu amejithibitisha kuwa “shahidi aliye mwaminifu na wa kweli” wa Baba yake kwa watu wa mataifa yote. (Ufunuo 3:14; Mathayo 28:18-20) Vikundi hivyo vya mataifa sasa vinawakilishwa na “mkutano mkubwa,” wanaoendelea kuongezeka na ambao wataokoka “dhiki ile iliyo kuu” wakiwa chini ya uongozi wa Kristo. (Ufunuo 7:9, 14) Lakini uongozi wa Yesu haukomi hapo. Na ‘uweza wake wa kifalme’ utadumu kwa miaka elfu moja. Kwa wanadamu watiifu, yeye atawatendea kwa kupatana na jina lake la “Mshauri wa ajabu, Mungu mwenye nguvu, Baba wa milele, Mfalme wa amani.”—Isaya 9:6, 7; Ufunuo 20:6.

7. Kama tunataka Kristo Yesu atuongoze kwenye “chemchemi za maji yenye uhai,” ni lazima tufanye nini bila kukawia, na ni nini kitakachotufanya tupendwe na Yesu na Yehova?

⁷ Tukitaka kunufaika na “chemchemi za maji yenye uhai” ambayo Mwana Kondoo, Kristo Yesu, aelekeza wanadamu wenye mioyo ifaayo, ni lazima tuthibitishe bila kukawia kwa matendo yetu kwamba twanyenyekea kwa shangwe kwa mamlaka yake akiwa Mfalme. (Ufunuo 7:17; 22:1, 2; linganisha Zaburi 2:12.) Yesu alisema hivi: “Mkinipenda, mtazishika amri zangu. Yeye aliye na amri zangu, na kuzishika, yeye ndiye anipendaye; naye anipendaye atapendwa na Baba yangu; nami nitampenda na kujidhihirisha kwake.” (Yohana 14:15, 21) Je! wataka kupendwa na Yesu na Baba yake vilevile? Basi nyenyekea mamlaka yao.

Waangalizi Wanatii kwa Shangwe

8, 9. (a) Kristo ameandaa nini kwa ajili ya kujengwa kwa kutaniko, na ni katika hali zipi wanaume hao wanapaswa kuwa vielelezo kwa kundi? (b) Unyenyekeo wa waangalizi Wakristo wafananishwaje katika kitabu cha Ufunuo, na wapaswa kutafutaje “moyo wa [utii]” wanaposhughulikia mambo ya kihukumu?

⁸ ‘Kutaniko liko katika ujitiisho kwa Kristo,’ Akiwa Mwangalizi walo, yeye ameandaa “zawadi katika wanadamu” kwa ajili ya ‘kulijenga’ kutaniko. (Waefeso 4:8, 11, 12; 5:24, NW) Wanaume hao walio wazee kiroho wanaambiwa ‘walichunge kundi la Mungu lililo kwao,’ si ‘kwa kujifanya mabwana juu ya mitaa yao, bali kwa kujifanya vielelezo kwa lile kundi.’ (1 Petro 5:1-3) Kundi ni la Yehova, na Kristo ni “mchungaji [walo] mwema.” (Yohana 10:14) Kwa kuwa waangalizi kwa kufaa hutazamia ushirikiano wa hiari kutoka kwa kondoo ambao Yehova na Kristo wamewapa, wao wenyewe wapaswa kuwa vielelezo vyema vya unyenyekeo.—Matendo 20:28.

⁹ Katika karne ya kwanza, waangalizi waliotiwa mafuta walifananishwa kwa njia ya mfano kuwa “katika,” au “juu ya,” mkono wa kuume wa Kristo, jambo linaloonyesha unyenyekeo wao kwake akiwa Kichwa cha kutaniko. (Ufunuo 1:16, 20; 2:1, NW) Vivyo hivyo leo, waangalizi katika makutaniko ya Mashahidi wa Yehova wapaswa kunyenyekea mwelekezo wa Kristo na ‘kujinyenyekeza chini ya mkono wa Mungu ulio hodari.’ (1 Petro 5:6) Wanapoombwa washughulikie mambo ya kihukumu, wanapaswa kusali hivi kwa Yehova kama alivyofanya Sulemani katika miaka aliyokuwa mwaminifu: “Nipe mimi mtumwa wako moyo wa adili [utii, NW] niwahukumu watu wako, na kupambanua mema na mabaya.” (1 Wafalme 3:9) Moyo mtiifu utamfanya mzee atake kuona mambo jinsi Yehova na Kristo Yesu wayaonavyo ili uamuzi unaofanywa duniani ufanane kwa kadiri iwezekanavyo na ule unaofanywa mbinguni.—Mathayo 18:18-20.

10. Waangalizi wote wapaswa kujitahidije kumwiga Yesu katika njia aliyotendea kondoo?

¹⁰ Waangalizi wasafirio na wazee wa kutaniko vilevile watajitahidi kuiga Kristo kwa njia aliyotendea kondoo. Tofauti na Mafarisayo, Yesu hakuweka sheria nyingi ambazo zilikuwa ngumu kufuata. (Mathayo 23:2-11) Yeye aliambia wenye mfano wa kondoo hivi: “Njoni kwangu, ninyi nyote msumbukao na wenye kulemewa na mizigo, nami nitawapumzisha. Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu; kwa maana nira yangu ni laini, na mzigo wangu ni mwepesi.” (Mathayo 11:28-30) Ingawa ni kweli kwamba ni lazima kila Mkristo ‘achukue mzigo wake mwenyewe,’ waangalizi wapaswa kukumbuka kielelezo cha Yesu na wasaidie ndugu zao wahisi kwamba mzigo wao wa daraka la Kikristo ni “laini,” “mwepesi,” na wenye shangwe kubeba.—Wagalatia 6:5.

Unyenyekeo wa Kitheokrasi

11. (a) Mtu awezaje kustahi ukichwa na huku asiwe mtheokrasi kwa kweli? Toa kielezi. (b) Yamaanisha nini kuwa mtheokrasi kwelikweli?

¹¹ Theokrasi ni utawala wa Mungu. Inahusisha kanuni ya ukichwa inayotajwa kwenye 1 Wakorintho 11:3. Lakini inamaanisha zaidi ya hiyo. Huenda mtu akaonekana anastahi ukichwa na bado asiwe mwenye kufuata theokrasi kwa maana halisi ya neno hilo. Inawezekanaje hivyo? Kwa kielelezo, demokrasi ni serikali ya watu wenyewe, na mdemokrasi amefafanuliwa kuwa “mtu aaminiye kanuni za demokrasi.” Mtu anaweza kudai kuwa mdemokrasi, ashiriki katika uchaguzi, na hata awe mwanasiasa shupavu. Lakini, ikiwa katika tabia yake ya jumla, anavunja roho ya demokrasi na kanuni zayo zote, je, yaweza kusemwa kwamba yeye kwa kweli ni mdemokrasi? Kwa njia iyo hiyo, kuwa mtheokrasi wa kweli, ni lazima mtu afanye mengi zaidi ya kunyenyekea ukichwa kivivi-hivi tu. Ni lazima aige njia na sifa za Yehova. Ni lazima kwa kweli atawalwe na Yehova kwa kila njia. Na kwa kuwa Yehova amempa Mwana wake mamlaka kamili, kuwa mtheokrasi kwamaanisha pia kumwiga Yesu.

12, 13. (a) Kuwa mtheokrasi kwahusisha nini hasa? (b) Je! unyenyekeo wa kitheokrasi wahusisha kutii sheria nyingi? Toa kielezi.

¹² Kumbuka kwamba Yehova ataka unyenyekeo wa hiari unaosukumwa na upendo. Hiyo ndiyo njia yake ya kutawala ulimwengu wote mzima. Yeye ni wonyesho halisi wa upendo. (1 Yohana 4:8) Kristo Yesu ni “mng’ao wa utukufu wake na chapa ya nafsi yake.” (Waebrania 1:3) Yeye anataka wanafunzi wake wa kweli wapendane. (Yohana 15:17) Kwa hiyo kuwa mtheokrasi hakumaanishi tu kuwa na unyenyekeo bali kwamaanisha pia kuwa na upendo. Jambo hilo laweza kusemwa hivi kwa ufupi: Theokrasi ni utawala wa Mungu; Mungu ni upendo; kwa hiyo theokrasi ni utawala wa upendo.

¹³ Mzee aweza kufikiri kwamba ili ndugu wawe watheokrasi, wao wapaswa kutii sheria zozote zile. Wazee fulani wameweka sheria kutokana na madokezo yanayotolewa mara kwa mara na “mtumwa mwaminifu mwenye akili.” (Mathayo 24:45) Mathalani, pindi moja ilipendekezwa kwamba kwa ajili ya kufahamu ndugu katika kutaniko kwa njia bora zaidi, huenda isiwe vizuri kuketi kwenye kiti kilekile nyakati zote katika Jumba la Ufalme. Jambo hilo lilimaanishwa liwe dokezo la kutumika, bali si sheria kali. Lakini huenda wazee fulani wakawa na mwelekeo wa kulibadili kuwa sheria na kuhisi kwamba wale ambao hawaifuati sheria hiyo si watheokrasi. Lakini, kunaweza kuwa na sababu nyingi nzuri zinazofanya ndugu au dada apendelee kuketi mahali fulani. Ikiwa mzee hafikirii kwa upendo mambo kama hayo, je, yeye mwenyewe ni mtheokrasi kweli? Ili mwe watheokrasi, “mambo yenu yote na yatendeke katika upendo.”—1 Wakorintho 16:14.

Kutumikia kwa Shangwe

14, 15. (a) Mzee awezaje kuwanyang’anya ndugu fulani au dada fulani shangwe yao ya kumtumikia Yehova, na kwa nini jambo hilo halingekuwa la kitheokrasi? (b) Yesu alionyeshaje kwamba athamini upendo unaoonyeshwa na utumishi wetu, badala ya kiasi cha utendaji? (c) Wazee wapaswa kufikiria nini?

¹⁴ Kuwa mtheokrasi kwamaanisha pia kumtumikia Yehova kwa shangwe. Yehova ni “Mungu mwenye furaha.” (1 Timotheo 1:11, NW) Yeye anawataka waabudu wake wamtumikie kwa shangwe. Wale wanaosisitiza sheria wapaswa kukumbuka kwamba miongoni mwa sheria ambazo Israeli ilipaswa ‘kutunza kufanya’ ni hii ifuatayo: “Furahi mbele za BWANA, Mungu wako, katika yote utakayotia mkono wako.” (Kumbukumbu la Torati 12:1, 18) Chochote kile tufanyacho katika utumishi wa Yehova chapaswa kuwa chenye shangwe, bali si mzigo. Waangalizi waweza kuchangia sana katika kufanya akina ndugu wawe na furaha ya kufanya yote wawezayo katika kumtumikia Yehova. Kwa upande mwingine, wazee wasipokuwa waangalifu, wao waweza kunyang’anya baadhi ya akina ndugu shangwe yao. Kwa kielelezo, ikiwa wao hulinganisha watu, wakisifu wale ambao wamefikia au kupita wastani wa kutaniko wa saa za kuhubiri na wachambue kwa njia fulani ya kudokeza wale ambao hawakuifikisha, wale ambao huenda walikuwa na sababu nzuri za kuripoti saa za chini sana watahisije? Je! jambo hilo halingewafanya wahisi hatia isivyofaa na kuwanyang’anya shangwe yao?

¹⁵ Zile saa chache ambazo wengine waweza kutumia kuhubiri peupe zaweza kuwa ni jitihada kubwa zaidi kuliko saa nyingi ambazo wengine wanatumia katika kuhubiri, kwa sababu ya umri mchanga, afya bora, na hali nyinginezo. Kwa hali hiyo, wazee hawapaswi kuwahukumu. Kwa kweli, ni Yesu ambaye Baba amempa “amri ya kufanya hukumu.” (Yohana 5:27) Je! Yesu alichambua yule mjane maskini kwa sababu toleo lake lilikuwa kidogo kuliko wastani? La, yeye alitambua kile ambacho senti hizo ndogo mbili kwa kweli zilimgharimu. Zilikuwa “vyote alivyokuwa navyo, ndiyo riziki yake yote.” Huo ulikuwa wonyesho wa upendo wa kina kirefu kwa Yehova kama nini! (Marko 12:41-44) Je! wazee hawapaswi kuwa wepesi wa kuona jitihada za upendo za wale ambao vyote walivyo navyo vikihesabiwa ni chini ya “wastani”? Kwa habari ya upendo kwa Yehova, jitihada kama hizo zaweza kuwa hata zaidi ya wastani!

16. (a) Ni kwa nini waangalizi wahitaji utambuzi na usawaziko mzuri watumiapo tarakimu katika hotuba zao? (b) Ndugu wanaweza kusaidiwaje kwa njia bora zaidi waongeze utumishi wao?

¹⁶ Je! maneno hayo sasa yabadilishwe kuwa “sheria” mpya kwamba tarakimu—hata wastani—zisitajwe kamwe? La hasha! Jambo kuu ni kwamba waangalizi wapaswa kuwa na usawaziko kati ya kuwatia moyo akina ndugu wapanue huduma yao na kuwasaidia kufanya yote wawezayo kwa shangwe. (Wagalatia 6:4) Katika kielelezo cha Yesu cha talanta, bwana-mkubwa aliwapa watumwa wake “kila mtu kwa kadiri ya uwezo wake.” (Mathayo 25:14, 15) Wazee vilevile wapaswa kufikiria uwezo wa kila mhubiri wa Ufalme. Jambo hilo lahitaji utambuzi. Huenda ikawa kwamba wengine hasa wanahitaji kitia-moyo ili wafanye zaidi. Wao waweza kuthamini msaada wa kuwasaidia kupanga utendaji wao kwa njia bora zaidi. Kwa hali yoyote ile, kama wanaweza kusaidiwa kufanya yote wawezayo kwa shangwe, yaelekea kwamba shangwe hiyo itawaimarisha wapanue zaidi utendaji wao wa Kikristo iwezekanapo.—Nehemia 8:10; Zaburi 59:16; Yeremia 20:9.

Amani Itokanayo na Kunyenyekea kwa Shangwe

17, 18. (a) Kunyenyekea kwa shangwe kwawezaje kutuletea amani na uadilifu? (b) Twaweza kupata nini tukizisikiliza sana amri za Mungu?

¹⁷ Kunyenyekea kwa shangwe enzi kuu ya Yehova iliyo halali hutuletea amani nyingi sana. Mtunga-zaburi alisema hivi katika sala kwa Yehova: “Wana amani nyingi waipendao sheria yako, wala hawana la kuwakwaza.” (Zaburi 119:165) Kwa kutii sheria ya Mungu, sisi wenyewe twanufaika. Yehova aliambia Israeli hivi: “BWANA, mkombozi wako, mtakatifu wa Israeli, asema hivi; Mimi ni BWANA, Mungu wako, nikufundishaye ili upate faida, nikuongozaye kwa njia ikupasayo kuifuata. Laiti ungalisikiliza amri zangu! ndipo amani yako ingalikuwa kama mto wa maji, na haki yako kama mawimbi ya bahari.”—Isaya 48:17, 18.

¹⁸ Dhabihu ya fidia ya Kristo yatuletea amani pamoja na Mungu. (2 Wakorintho 5:18, 19) Kama tuna imani katika damu ya Kristo yenye kukomboa na kujitahidi kwa kudhamiria kushinda udhaifu wetu mbalimbali na kufanya mapenzi ya Mungu, twafarijika kwa kukosa hisia za hatia. (1 Yohana 3:19-23) Imani kama hiyo, ikionyeshwa kwa matendo, yatupa msimamo wenye uadilifu mbele ya Yehova na tumaini zuri ajabu la kuokoka “dhiki ile iliyo kuu” na kuishi milele katika ulimwengu mpya wa Yehova. (Ufunuo 7:14-17; Yohana 3:36; Yakobo 2:22, 23) Twaweza kupata mambo hayo yote ‘laiti tusikilize amri za Mungu.’

19. Furaha yetu na tumaini letu la uhai wa milele wategemea nini, na Daudi alionyeshaje hisi yetu ya moyoni?

¹⁹ Naam, furaha yetu sasa na tumaini letu la uhai wa milele katika dunia-paradiso zategemea kunyenyekea kwetu kwa shangwe mamlaka ya Yehova akiwa Bwana Mwenye Enzi Kuu wa ulimwengu wote mzima. Na nyakati zote tuhisi kama Daudi, aliyesema hivi: “Ee BWANA, ukuu ni wako, na uweza, na utukufu, na kushinda, na enzi; maana vitu vyote vilivyo mbinguni na duniani ni vyako; ufalme ni wako, Ee BWANA nawe umetukuzwa, u mkuu juu ya vitu vyote. Basi sasa, Mungu wetu, twakushukuru na kulisifu jina lako tukufu.”—1 Mambo ya Nyakati 29:11, 13.

Mambo ya Kukumbuka

◻ Yehova anataka watumishi wake waonyeshe unyenyekeo na utii wa aina gani?

◻ Yesu alithawabishwaje kwa utii wake, na matendo yetu yapasa kuthibitisha nini?

◻ Waangalizi wote wapaswa kumwigaje Yesu katika njia aliyotendea kondoo?

◻ Kuwa mtheokrasi kwahusisha nini?

◻ Unyenyekeo wa shangwe hutuletea baraka zipi?

[Picha katika ukurasa wa 24]

Wazee hutia moyo kundi lifanye kwa shangwe yote wawezayo kufanya

[Picha katika ukurasa wa 26]

Yehova hufurahia wale wanaomtii kutoka moyoni