Shangilieni Katika Yehova!

“Sikuzote shangilieni katika Bwana. Mara moja tena hakika nitasema, Shangilieni!”—WAFILIPI 4:4, NW.

1. Kwa nini twaweza kujiuliza Paulo alimaanisha nini aliposema kwamba Wakristo wapaswa kushangilia siku zote?

SABABU za kutufanya tushangilie huenda zikaonekana kuwa chache sana siku hizi. Watu wa mavumbi, hata Wakristo wa kweli, hupatwa na hali zenye kuleta huzuni—kama vile ukosefu wa kazi, afya mbaya, vifo vya wapendwa, matatizo ya kiutu, au upinzani kutoka kwa washiriki wa familia wasioamini au marafiki wa zamani. Kwa hiyo tueleweje himizo la Paulo, “Sikuzote shangilieni”? Kwa kufikiria hali zisizofurahisha na zenye magumu ambazo ni lazima sisi sote tukabili, je, hilo hata lawezekana? Mazungumzo ya muktadha ya maneno hayo yatasaidia kuelewesha wazi jambo hilo.

Shangilia—Kwa Nini na kwa Njia Gani?

2, 3. Umaana wa shangwe ni nini, kama unavyotolewa kielezi kwa habari za Yesu na Waisraeli wa kale?

² “Sikuzote shangilieni katika Bwana. Mara moja tena hakika nitasema, Shangilieni!” Jambo hili laweza kutukumbusha maneno ambayo Waisraeli waliambiwa karne 24 zilizopita: “furaha [“shangwe,” NW] ya BWANA ni nguvu zenu,” au kulingana na tafsiri ya Moffatt: “Kushangilia katika yule wa Milele ni nguvu zenu.” (Nehemia 8:10) Shangwe huandaa nguvu na ni kama ngome ambamo mtu aweza kuingia apate faraja na ulinzi. Shangwe ilimsaidia sana hata mwanadamu mkamilifu Yesu avumilie. “Kwa ajili ya shangwe iliyowekwa mbele yake alivumilia mti wa mateso akidharau aibu, na ameketi kwenye mkono wa kuume wa kiti cha ufalme cha Mungu.” (Waebrania 12:2, NW) Kwa wazi, kuweza kushangilia ujapokabili magumu ni muhimu kwa ajili ya wokovu.

³ Kabla tu ya kuingia katika Bara Lililoahidiwa, Waisraeli walikuwa wameamriwa: “Ukafurahie [“Ukashangilie,” NW] mema yote ambayo BWANA, Mungu wako, amekupa, na nyumba yako, wewe, na Mlawi, na mgeni aliye kati yako.” Matokeo ya kutomtumikia Yehova kwa kushangilia yangekuwa mabaya sana. “Laana hizi zote zitakujilia juu yako, zitakuandama na kukupata, hata uangamizwe . . . kwa kuwa hukumtumikia BWANA, Mungu wako, kwa furaha [“kushangilia,” NW] na moyo wa kushukuru [“shangwe ya moyo,” NW], kwa ajili ya ule wingi wa vitu vyote.”—Kumbukumbu la Torati 26:11; 28:45-47.

4. Kwa nini twaweza kukosa kushangilia?

⁴ Basi ni jambo la lazima kwamba mabaki watiwa-mafuta wa leo pamoja na waandamani wao wa “kondoo wengine” washangilie! (Yohana 10:16) Paulo, kwa kurudia shauri lake, “mara moja tena hakika nitasema,” alikazia umaana wa kushangilia mema yote ambayo Yehova ametufanyia. Je, sisi hufanya hivyo? Au sisi hunaswa sana katika shughuli za maisha za kila siku hivi kwamba nyakati nyingine sisi husahau sababu nyingi zinazopasa kutufanya tushangilie? Je, matatizo hujaa kiasi cha kwamba yanakinga mwono wetu wa Ufalme na baraka zao? Je, twaruhusu mambo mengine—kutotii sheria za Mungu, kupuuza kanuni za kimungu, au kutojali wajibu wetu wa Kikristo—yatunyang’anye shangwe yetu?

5. Kwa nini mtu asiyekubali sababu hupata ugumu wa kushangilia?

⁵ “Hali yenu ya kukubali sababu na ijulikane kwa watu wote. Bwana yuko karibu.” (Wafilipi 4:5, NW) Mtu asiyekubali sababu hana usawaziko. Anaweza kushindwa kutunza afya yake ifaavyo, akifanya mwili wake upatwe na mkazo au wasiwasi usiofaa. Labda hajajifunza kukubali mapungufu yake na kuishi kulingana na hayo. Anaweza kuweka miradi yake ikiwa juu mno naye ajaribu kuitimiza bila kujali gharama. Au aweza kutumia mapungufu yake kuwa udhuru wa kupunguza mwendo au bidii. Akikosa usawaziko na kuwa mtu asiyekubali sababu, hupata ugumu wa kushangilia.

6. (a) Wakristo wenzetu wapaswa kuona nini kwetu, nao wataona hilo tukifanya nini pekee? (b) Maneno ya Paulo kwenye 2 Wakorintho 1:24 na Warumi 14:4 yatusaidiaje kuwa wenye kukubali sababu?

⁶ Hata kama wapinzani wetu watuona kuwa washupavu, sikuzote Wakristo wenzetu wapaswa kuiona hali yetu ya kukubali sababu. Nao wataona hivyo ikiwa tuna usawaziko na tusipotarajia kuwa wakamilifu au kuwatarajia wengine kuwa wakamilifu. Zaidi ya yote, ni lazima tuepuke kuwekelea wengine mizigo yenye kulemeza kupita vile yalivyo matakwa ya Neno la Mungu. Mtume Paulo alisema: “Si kwamba tunatawala imani yenu; bali tu wasaidizi wa furaha [“shangwe,” NW] yenu.” (2 Wakorintho 1:24) Zamani akiwa Farisayo, Paulo alijua sana kwamba sheria kali zisizobadilikana zenye kuwekwa na kushurutishwa na wale walio na mamlaka hukandamiza shangwe, huku madokezo yenye mafaa yanayotolewa na wafanyakazi wenzi huiongeza. Hakika ya kwamba “Bwana yuko karibu” yapasa kukumbusha mtu mwenye kukubali sababu kwamba sisi hatupaswi ‘kuhukumu mtumishi wa mwingine. Kwa bwana wake mwenyewe yeye husimama au huanguka.’—Warumi 14:4.

7, 8. Kwa nini ni lazima Wakristo watarajie kupata matatizo, lakini yawezekanaje kwao kuendelea kushangilia?

⁷ “Msijisumbue kwa neno lo lote; bali katika kila neno kwa kusali na kuomba, pamoja na kushukuru, haja zenu na zijulikane na Mungu.” (Wafilipi 4:6) Leo tunapatwa na “nyakati za hatari” ambazo Paulo aliandika. (2 Timotheo 3:1-5) Kwa hiyo ni lazima Wakristo watazamie kupata matatizo. Maneno ya Paulo “sikuzote shangilieni” hayaondoi uwezekano kwamba Mkristo mwaminifu-mshikamanifu aweza kupatwa na pindi za mara kwa mara za kukata tamaa au za kuvunjika moyo. Katika hali ya Paulo mwenyewe, yeye alikiri hivi kihalisi: “Pande zote twadhikika, bali hatusongwi; twaona shaka, bali hatukati tamaa; twaudhiwa, bali hatuachwi; twatupwa chini, bali hatuangamizwi.” (2 Wakorintho 4:8, 9) Lakini, shangwe ya Mkristo hupunguza na hatimaye kushinda vipindi vya muda vya hangaiko na huzuni. Hiyo hutoa nguvu inayohitajika ili kuendelea kusonga mbele, bila kuacha kamwe zile sababu zinazotufanya tushangilie.

⁸ Matatizo yatokeapo, hata yawe ya aina gani, Mkristo mwenye shangwe huomba msaada wa Yehova kwa unyenyekevu kupitia sala. Yeye hashindwi na mahangaiko yenye kupita kiasi. Baada ya kufanya yale ambayo yeye angeweza kufanya ili kusuluhisha tatizo hilo, yeye huacha matokeo mikononi mwa Yehova kwa kupatana na mwaliko huu: “Umtwike BWANA mzigo wako naye atakutegemeza.” Wakati uo huo, Mkristo huendelea kumshukuru Yehova kwa wema Wake wote.—Zaburi 55:22; ona pia Mathayo 6:25-34.

9. Ujuzi wa kweli huletaje amani ya akili, na hiyo ina uvutano gani mzuri kwa Mkristo?

⁹ “Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu.” (Wafilipi 4:7) Ujuzi wa kweli ya Biblia huondoa ubandia katika akili ya Mkristo na kumsaidia kusitawisha kawaida za kufikiri kuzuri. (2 Timotheo 1:13) Kwa njia hiyo yeye husaidiwa kuepuka mwenendo mbaya au usio wa hekima uwezao kuharibu mahusiano yenye amani pamoja na wengine. Badala ya kufadhaishwa na ukosefu wa haki na kuwapo kwa maovu, yeye huweka tumaini lake katika Yehova asuluhishe matatizo ya wanadamu kupitia Ufalme. Amani ya akili kama hiyo hulinda moyo wake, hufanya makusudi yake yawe safi nyakati zote, na huongoza kufikiri kwake kwa njia ya uadilifu. Nayo makusudi mazuri na kufikiri kuzuri hututolea sababu nyingi sana za kushangilia, tujapokabili matatizo na mikazo iletwayo na ulimwengu uliovurugika.

10. Shangwe ya kweli yaweza kupatikana kwa kuzumgumzia na kufikiria nini pekee?

¹⁰ “Hatimaye, ndugu zangu, mambo yo yote yaliyo ya kweli, yo yote yaliyo ya staha, yo yote yaliyo ya haki, yo yote yaliyo safi, yo yote yenye kupendeza, yo yote yenye sifa njema; ukiwapo wema wowote, ikiwapo sifa nzuri yo yote, yatafakarini hayo.” (Wafilipi 4:8) Mkristo hafurahii kuzungumzia au kufikiria mambo mabaya. Mara moja hilo laondoa vitumbuizo vingi ambavyo ulimwengu huandaa. Hakuna mtu yeyote awezaye kudumisha shangwe ya Kikristo iwapo anajaza akili yake na moyo wake mambo ya uongo, mizaha ya kipumbavu, na mambo yasiyo ya uadilifu, yasiyo ya adili, yasiyo na sifa njema, ya chuki, na ya kuchukiza. Kusema wazi, hakuna mtu awezaye kupata shangwe ya kweli kwa kujaza akili yake na moyo wake kwa mambo machafu. Katika ulimwengu wa Shetani wenye ufisadi, ni jambo lenye kujenga kama nini kujua kwamba Wakristo wana mambo mengi sana mema ya kufikiria na kuzungumza!

Sababu Nyingi Sana za Kutufanya Tushangilie

11. (a) Ni nini hakipaswi kupuuzwa kamwe, na kwa nini? (b) Hudhurio katika mkusanyiko mmoja wa kimataifa lilikuwa na tokeo gani kwa mjumbe mmoja na mke wake?

¹¹ Tunapozungumzia sababu za kutufanya tushangilie, tusisahau udugu wetu wa kimataifa. (1 Petro 2:17) Vikundi vya kilimwengu vya kitaifa na kikabila vichukianapo kabisa, watu wa Mungu hukaribiana sana kwa upendo. Muungamano wao huonekana hasa katika mikusanyiko yao ya kimataifa. Kuhusu ule mkusanyiko uliofanywa 1993 katika Kiev, Ukrania, mjumbe mmoja kutoka Marekani aliandika hivi: “Yale machozi yenye shangwe, macho yang’aayo, ule wingi wa makumbatiano ya kifamilia, na zile salamu zilizopeperushwa uwanjani na vikundi vyenye kupepea miavuli na vitambaa vyenye rangi maridadi zilikuwa ushuhuda wa wazi wa muungamano wa kitheokrasi. Mioyo yetu hufurika kwa fahari kwa mambo yale ambayo Yehova ametimiza katika udugu wetu wa ulimwenguni pote. Tukio hilo limetugusa moyo sana mimi na mke wangu na limeimarisha imani yangu zaidi.”

12. Isaya 60:22 inatimizwaje tukiona na macho yetu?

¹² Ni jambo lenye kuimarisha imani kama nini kwa Wakristo leo kuona unabii mbalimbali wa Biblia ukitimizwa wakiona kwa macho yao wenyewe! Kwa kielelezo, ebu fikiria maneno ya Isaya 60:22: “Mdogo atakuwa elfu, na mnyonge atakuwa taifa hodari; mimi, BWANA, nitayahimiza hayo wakati wake.” Katika wakati wa kuzaliwa kwa Ufalme katika 1914, ni watu 5,100 pekee—mdogo—waliokuwa wakihubiri kwa bidii. Lakini katika miaka mitano ambayo imepita, ukubwa wa udugu wa ulimwenguni pote umekuwa ukiongezeka kwa wastani wa Mashahidi wapya 5,628 wanaobatizwa kila juma! Katika 1993, kilele cha wahudumu wenye bidii 4,709,889 kilifikiwa. Ebu wazia! Jambo hilo lamaanisha kwamba “mdogo” wa 1914 amekaribia kihalisi kuwa “elfu”!

13. (a) Ni nini imekuwa ikitukia tangu 1914? (b) Mashahidi wa Yehova huionaje kanuni ya maneno ya Paulo kwenye 2 Wakorintho 9:7?

¹³ Tangu 1914 Mfalme wa Kimesiya ameshinda kati ya maadui wake. Utawala wake umeungwa mkono na wafuasi wa kibinadamu wenye hiari wanaochanga wakati, nguvu, na fedha kuendeleza kazi ya kuhubiri ulimwenguni pote na vilevile kampeni ya ujenzi wa kimataifa. (Zaburi 110:2, 3) Mashahidi wa Yehova hushangilia kwamba michango ya kifedha inatolewa ili kuona kwamba utendaji huo unakamilishwa, hata ingawa fedha hutajwa mara chache sana katika mikutano yao.a (Linganisha 1 Mambo ya Nyakati 29:9.) Wakristo wa kweli hawapaswi kuchokorwa ndipo watoe michango; wao huona jambo hilo kuwa pendeleo la kutegemeza Mfalme wao kwa kadiri hali zao ziruhusuvyo, kila mmoja “kama alivyokusudia moyoni mwake, si kwa huzuni, wala si kwa lazima.”—2 Wakorintho 9:7.

14. Ni hali gani miongoni mwa watu wa Mungu imekuja kuonekana wazi tangu 1919, ikiwapa sababu gani ya kushangilia?

¹⁴ Hali iliyotabiriwa ya kurudishwa kwa ibada ya kweli miongoni mwa watu wa Mungu imetokeza kufanyika kwa paradiso ya kiroho. Hiyo imepanuka hatua kwa hatua tangu 1919. (Zaburi 14:7; Isaya 52:9, 10) Matokeo ni nini? Wakristo wa kweli ‘huchachawa na kushangilia.’ (Isaya 51:11, NW) Matunda mema yatokeayo ni uthibitisho wa mambo ambayo roho takatifu ya Mungu inaweza kutimiza kupitia wanadamu wasiokamilika. Sifa na heshima yote humwendea Yehova, lakini kuna pendeleo gani kubwa zaidi kuliko kuwa mfanyakazi mwenzi wa Mungu? (1 Wakorintho 3:9) Ikihitajika, Yehova ana uwezo wa kufanya mawe yatangaze ujumbe wa kweli. Lakini, hajachagua kutumia njia hiyo, bali amewachochea viumbe wenye hiari waliofanywa kwa mavumbi kutekeleza mapenzi yake.—Luka 19:40.

15. (a) Sisi twafuatia kwa upendezi matukio gani ya kisasa? (b) Twatazamia tukio gani kwa kushangilia?

¹⁵ Wakijaa kicho, watumishi wa Yehova sasa hutazama matukio ya ulimwengu yanapofanana na unabii mbalimbali wa Biblia wenye kutokeza. Mataifa yanajaribu sana—lakini bila mafanikio—kupata amani yenye kudumu. Matukio yanayotukia yanalazimu mataifa yaombe shirika la Umoja wa Mataifa lichukue hatua katika sehemu zenye mizozo za ulimwengu. (Ufunuo 13:15-17) Wakati uo huo, watu wa Mungu tayari wanatazamia kwa hamu nyingi mojapo matukio yenye shangwe zaidi kupata kutukia, tukio lizidilo kukaribia kila siku. “Acheni tushangilie na kuwa wenye shangwe mno, na acheni tumpe yeye utukufu, kwa sababu ndoa ya Mwana-Kondoo imewasili na mke wake amejitayarisha mwenyewe.”—Ufunuo 19:7, NW.

Kuhubiri—Mzigo au Shangwe?

16. Toa kielezi cha jinsi kukosa kufuatia yale aliyojifunza kwaweza kumnyang’anya Mkristo shangwe yake.

¹⁶ “Mambo mliyojifunza kwangu na kuyapokea, na kuyasikia na kuyaona kwangu, yatendeni hayo; na Mungu wa amani atakuwa pamoja nanyi.” (Wafilipi 4:9) Kwa kutenda yale waliyojifunza, Wakristo waweza kutarajia baraka ya Mungu. Moja la mambo yenye maana zaidi waliyojifunza ni kuhubiri habari njema kwa wengine. Kwa kweli, nani awezaye kuwa na amani ya akili au awe mwenye shangwe ikiwa hatolei watu wenye mioyo minyoofu habari ambazo uhai wao unategemea kuzisikia?—Ezekieli 3:17-21; 1 Wakorintho 9:16; 1 Timotheo 4:16.

17. Kwa nini utendaji wetu wa kuhubiri uwe sababu ya kuwa na shangwe?

¹⁷ Ni shangwe kama nini kutafuta watu wenye mfano wa kondoo walio tayari kujifunza juu ya Yehova! Hakika, wale wanaotumika kwa makusudio mazuri sikuzote watapata utumishi wa Ufalme kuwa jambo la kuleta shangwe. Ndivyo ilivyo kwa sababu jambo kuu la kuwa Shahidi wa Yehova ni kusifu jina Lake na kutegemeza cheo Chake akiwa Mtawala Mwenye Enzi Kuu. (1 Mambo ya Nyakati 16:31) Mtu atambuaye hakika hiyo atashangilia hata kama watu wanakataa kwa njia isiyo ya hekima habari njema aletayo. Yeye ajua kwamba kuhubiria wasioamini kutakwisha siku moja; kusifu jina la Yehova kutaendelea milele.

18. Ni nini humchochea Mkristo afanye mapenzi ya Yehova?

¹⁸ Dini ya kweli huchochea wale wanaoifuata wafanye mambo yanayotakikana na Yehova, si kwa kulazimisha, bali kwa sababu wao wataka kufanya hivyo. (Zaburi 40:8; Yohana 4:34) Watu wengi huona ni vigumu kuelewa jambo hilo. Pindi mmoja mwanamke mmoja alimwambia hivi Shahidi mmoja aliyekuwa akimtembelea: “Wajua nini, ni lazima nikupongeze. Kwa hakika mimi siwezi kwenda nyumba kwa nyumba nikihubiri juu ya dini yangu kama unavyofanya.” Kwa kutabasamu Shahidi huyo alijibu hivi: “Naelewa jinsi unavyohisi. Kabla sijawa mmoja wa Mashahidi wa Yehova, hungeweza kunifanya niwaendee watu wengine kuzungumzia dini. Lakini sasa nataka kufanya hivyo.” Mwanamke huyo akafikiria kwa muda mfupi kisha akasema: “Kwa wazi dini yako ina jambo fulani zaidi ambalo yangu haina. Labda yafaa nichunguze.”

19. Kwa nini huu ndio wakati wa kushangilia kuliko wakati mwingine wowote?

¹⁹ Andiko la mwaka la 1994, linaloonyeshwa sana katika Majumba ya Ufalme, kwa kawaida hutukumbusha hivi: “Mtumaini BWANA kwa moyo wako wote.” (Mithali 3:5) Je, kungeweza kuwa kuna sababu kuu zaidi ya kushangilia kuliko kuweza kumtumaini Yehova, nguzo yetu tunayemkimbilia? Zaburi 64:10 yaeleza: “Mwenye haki atamfurahia [“atashangilia katika,” NW] BWANA na kumkimbilia.” Huu si wakati wa kuyumbayumba au kufua dafu. Kila mwezi upitao hutuleta karibu hata zaidi na mambo halisi ambayo watumishi wa Yehova wametamani sana kuona tangu siku za Abeli. Huu ndio wakati wa kumtumaini Yehova kwa moyo wetu wote, tukijua kwamba hatujapata kamwe kuwa na sababu nyingi sana hivi za kushangilia!

[Maelezo ya Chini]

Ungejibuje?

◻ Kulingana na Nehemia 8:10, kwa nini tushangilie?

◻ Kumbukumbu la Torati 26:11 na 28:45-47 zaonyeshaje umaana wa kushangilia?

◻ Wafilipi 4:4-9 yaweza kutusaidiaje siku zote tushangilie?

◻ Andiko la mwaka la 1994 latupa sababu gani ya kushangilia?

[Picha katika ukurasa wa 16]

Mashahidi Warusi na Wajerumani washangilia kuwa sehemu ya udugu wa kimataifa

[Picha katika ukurasa wa 17]

Kushiriki kweli na wengine ni sababu ya kushangilia