Maswali Kutoka kwa Wasomaji

Katika Wafilipi 2:9 (“NW”), Paulo alisema hivi kumhusu Yesu: “Mungu alimkweza kwenye cheo cha juu zaidi na kumpa kwa fadhili jina lililo juu ya kila jina jingine.” Jina hilo jipya ni gani? Na ikiwa Yesu ana cheo cha chini kwa Yehova, inakuwaje kwamba jina la Yesu liko juu ya kila jina jingine?

Wafilipi 2:8, 9 (NW) lasema: “Zaidi ya hilo, [Yesu] alipojipata mwenyewe katika sura ya kuwa binadamu alijinyenyekeza mwenyewe akawa mtiifu hadi kifo, ndiyo, kifo juu ya mti wa mateso. Kwa sababu hiihii pia Mungu alimkweza kwenye cheo cha juu zaidi na kumpa kwa fadhili jina lililo juu ya kila jina jingine.”

Fungu hili halimaanishi kwamba kwa kuwa ni Yehova pekee analo jina lililo juu kabisa kuliko kila jina jingine, ni lazima Yesu awe ndiye Yehova. Kama muktadha katika Wafilipi sura ya 2 uonyeshavyo, Yesu alipokea jina lake lililokwezwa baada ya kufufuliwa. Kabla ya wakati huo, hakuwa na jina hilo. Kwa upande mwingine, sikuzote Yehova amekuwa mkuu kuliko wote, na cheo chake hakijabadilika kamwe. Hakika ya kwamba Yesu alipokea jina lililo juu ya jina alilokuwa nalo kabla ya utumishi wake wa kidunia lathibitisha kwamba yeye si Yehova. Paulo aliposema kwamba Yesu alipewa jina lililo juu ya kila jina jingine, alimaanisha kwamba sasa Yesu ana jina lililo juu zaidi ya viumbe vyote vya Mungu.

Jina la Yesu lililo juu ni lipi? Isaya 9:6 latusaidia kujibu. Katika kutoa unabii kuhusu kuja kwa Mesiya, Yesu, mstari huo wasema hivi: “Uweza wa kifalme utakuwa begani mwake; naye ataitwa jina lake, Mshauri wa ajabu, Mungu mwenye nguvu, Baba wa milele, Mfalme wa amani.” (Italiki ni zetu.) Hapa “jina” la Yesu lahusika na cheo chake na mamlaka yake ya juu, na ndivyo tunavyoelewa maneno “jina lililo juu ya kila jina jingine” yanayotajwa katika Wafilipi 2:9, (NW). Kila goti linaamriwa lipigwe kwa Yesu kwa kutambua cheo cha juu na mamlaka ambayo Yehova amempa—cheo chenye mamlaka kilicho juu ya kile kilichopewa kiumbe chochote kile. Neno “jingine” katika tafsiri hii haliko moja kwa moja katika andiko la Kigiriki, lakini ladokezwa katika maana ya huo mstari. “Jina” la Yesu haliko juu ya jina lake mwenyewe bali ni juu ya jina la kila kiumbe kingine.

Twafurahi kama nini kuungana na malaika wote waaminifu pamoja na wanadamu katika kupiga magoti kwa kutambua jina la Yesu! Twafanya hivyo kwa kumtii Yesu akiwa na cheo kilichokwezwa na chenye nguvu ambacho amepewa na Yehova—“kwa utukufu wa Mungu Baba.”—Wafilipi 2:11; Mathayo 28:18.