Kutumikia Tukiwa Wajumbe wa Amani ya Kimungu

“Jinsi ilivyo mizuri juu ya milima miguu yake . . . yeye aitangazaye amani.”—ISAYA 52:7.

1, 2. (a) Kama ilivyotabiriwa kwenye Isaya 52:7, ni habari njema gani ipaswayo kutangazwa? (b) Maneno ya Isaya ya kiunabii yalimaanisha nini katika kisa cha Israeli la kale?

KUNA habari njema ya kupigwa mbiu! Ni habari juu ya amani—amani halisi. Ni ujumbe juu ya wokovu unaohusu Ufalme wa Mungu. Zamani za kale, nabii Isaya aliandika kuuhusu, na maneno yake yamehifadhiwa kwa ajili yetu kwenye Isaya 52:7, tusomapo hivi: “Jinsi ilivyo mizuri juu ya milima miguu yake aletaye habari njema, yeye aitangazaye amani, aletaye habari njema ya mambo mema, yeye autangazaye wokovu, auambiaye Sayuni, Mungu wako anamiliki [“amekuwa mfalme,” NW]!”

² Yehova alimpulizia nabii wake Isaya kuuandika ujumbe huo kwa manufaa ya Israeli la kale na kwa manufaa yetu leo. Maana ya maneno hayo ni nini? Wakati Isaya alipoandika maneno hayo, ufalme wa kaskazini wa Israeli huenda tayari ukawa umepelekwa uhamishoni na Waashuri. Baadaye, wakazi wa ufalme wa kusini wa Yuda wangepelekwa Babiloni wakiwa wahamishwa. Siku hizo zilikuwa zenye uchungu wa moyoni na msukosuko katika hilo taifa kwa sababu watu hawakuwa wamekuwa watiifu kwa Yehova na kwa hiyo hawakuwa na amani pamoja na Mungu. Sawa na vile Yehova alivyowaambia, mwenendo wao wenye dhambi ulikuwa ukisababisha mgawanyo kati yao na Mungu wao. (Isaya 42:24; 59:2-4) Hata hivyo, kupitia Isaya, Yehova alitabiri kwamba katika wakati ufaao malango ya Babiloni yangefunguka wazi. Watu wa Mungu wangekuwa na uhuru wa kurudia nchi ya kwao, huko wapate kujenga upya hekalu la Yehova. Sayuni lingerudishwa, na ibada ya Mungu wa kweli ingeendelea tena Yerusalemu.—Isaya 44:28; 52:1, 2.

3. Ahadi ya kurudishwa kwa Israeli ilikuwaje pia unabii wa amani?

³ Ahadi hii ya ukombozi ilikuwa pia unabii juu ya amani. Kurudishwa kwenye nchi ambayo Yehova alikuwa amewapa Waisraeli kungekuwa uthibitisho wa rehema ya Mungu na ya kutubu kwao. Kungeonyesha kwamba walikuwa na amani pamoja na Mungu.—Isaya 14:1; 48:17, 18.

“Mungu Wako Amekuwa Mfalme!”

4. (a) Katika 537 K.W.K. ingeweza kusemwa kwa maana gani kwamba ‘Yehova alikuwa amekuwa mfalme’? (b) Yehova aligeuzaje mambo kwa manufaa ya watu wake katika miaka ya baadaye?

⁴ Yehova alipofanya ukombozi huo katika 537 K.W.K., Sayuni liliweza kutolewa tangazo hili kwa kufaa: “Mungu wako anamiliki [“amekuwa mfalme,” NW]!” Kwa kweli, Yehova ndiye “Mfalme wa umilele.” (Ufunuo 15:3) Lakini ukombozi huo wa watu wake ulikuwa wonyesho mpya wa enzi kuu yake. Huo ulionyesha kwa njia yenye kutokeza ubora wa nguvu zake juu ya milki ya kibinadamu yenye uweza zaidi kufikia wakati huo. (Yeremia 51:56, 57) Likiwa tokeo la utendaji-kazi wa roho ya Yehova, njama nyingine dhidi ya watu wake zilizuiwa. (Esta 9:24, 25) Tena na tena, Yehova aliingilia katika njia mbalimbali ili kufanya wafalme wa Umedi na Uajemi washirikiane na utekelezaji wa mapenzi ya enzi kuu yake mwenyewe. (Zekaria 4:6) Mambo mazuri ajabu yaliyotukia siku hizo yamerekodiwa kwa ajili yetu katika vitabu vya Biblia vya Ezra, Nehemia, Esta, Hagai, na Zekaria. Na kuyapitia ni jambo lenye kuimarisha imani kama nini!

5. Ni mambo gani ya maana yanayoonyeshwa kwenye Isaya 52:13–53:12?

⁵ Hata hivyo, mambo yaliyotukia katika 537 K.W.K. na baadaye yalikuwa mwanzo tu. Mara tu baada ya unabii wa kurudishwa katika sura ya 52, Isaya aliandika juu ya kuja kwa Mesiya. (Isaya 52:13–53:12) Kupitia Mesiya, aliyethibitika kuwa Yesu Kristo, Yehova angeandaa ujumbe wa ukombozi na amani wenye umaana mkubwa hata zaidi kuliko yale yaliyotukia mwaka wa 537 K.W.K.

Mjumbe wa Amani wa Yehova Aliye Mkubwa Kupita Wote

6. Ni nani aliye mjumbe wa amani wa Yehova aliye mkubwa kupita wote, naye alitumia utume gani kujihusu?

⁶ Yesu Kristo ndiye mjumbe wa amani wa Yehova aliye mkubwa kupita wote. Yeye ndiye Neno la Mungu, Msemaji wa kibinafsi wa Yehova mwenyewe. (Yohana 1:14) Kwa kupatana na hili, muda fulani baada ya kubatizwa katika Mto Yordani, Yesu alisimama ndani ya sinagogi la Nazareti na kusoma kwa sauti kubwa utume wake kutoka Isaya sura ya 61. Utume huo ulieleza wazi kwamba yale aliyotumwa kuhubiri yalihusisha “kuachiliwa” na “kupata kuona tena,” na pia fursa ya kupata kukubaliwa na Yehova. Hata hivyo, Yesu alifanya mengi zaidi kuliko kupiga mbiu ya ujumbe wa amani. Mungu alikuwa pia amemtuma aandae msingi wa amani idumuyo.—Luka 4:16-21.

7. Ni nini kinachotokana na amani pamoja na Mungu inayowezeshwa kupitia Yesu Kristo?

⁷ Wakati wa kuzaliwa kwa Yesu, malaika walikuwa wametokea kwa wachungaji karibu na Bethlehemu, wakimsifu Mungu na kusema: “Utukufu katika mahali pa juu kwa Mungu, na juu ya dunia amani miongoni mwa watu wa nia njema.” (Luka 2:8, 13, 14) Ndiyo, kungekuwa na amani kwa wale ambao Mungu alikuwa amewaonyesha nia njema kwa sababu walidhihirisha imani katika uandalizi aliokuwa akifanya kupitia Mwana wake. Hilo lingemaanisha nini? Lingemaanisha kwamba ingawa wanadamu wanazaliwa katika dhambi, wangeweza kupata msimamo safi pamoja na Mungu, uhusiano wa kukubaliwa naye. (Waroma 5:1) Wangeweza kufurahia utulivu wa kindani, ile amani, usiowezekana kwa njia nyingine yoyote. Kwa wakati uliowekwa na Mungu, kungekuwa na hali ya kuachiliwa kutoka matokeo yote ya dhambi iliyorithiwa kutoka kwa Adamu, kutia na magonjwa na kifo. Watu hawangekuwa vipofu au viziwi au vilema tena. Udhaifu wenye kuvunja moyo na miparaganyo ya akilini yenye kuhuzunisha sana yangeondolewa daima dawamu. Ingewezekana kufurahia maisha katika ukamilifu milele.—Isaya 33:24; Mathayo 9:35; Yohana 3:16.

8. Amani ya kimungu inatolewa kwa nani?

⁸ Amani ya kimungu inatolewa kwa nani? Inatolewa kwa wote wanaodhihirisha imani katika Yesu Kristo. Mtume Paulo aliandika kwamba ‘Mungu aliona vema kupitia Kristo kupatanisha tena kwake mwenyewe vitu vingine vyote kwa kufanya amani kupitia damu ambayo Yesu alimwaga juu ya mti wa mateso.’ Huyo mtume aliongeza kwamba upatanisho huo ungehusisha “vitu vilivyo katika mbingu”—yaani, wale ambao wangekuwa warithi-washiriki pamoja na Kristo mbinguni. Ungehusisha pia “vitu vilivyo juu ya dunia”—yaani, wale ambao wangependelewa kuwa na fursa ya kuishi milele kwenye dunia hii inapoletwa kwenye hali kamili ya Paradiso. (Wakolosai 1:19, 20) Kwa sababu ya kujinufaisha wenyewe na thamani ya dhabihu ya Yesu na kwa sababu ya utii wao kwa Mungu kutoka moyoni, hao wote wangeweza kufurahia urafiki mchangamfu pamoja na Mungu.—Linganisha Yakobo 2:22, 23.

9. (a) Amani pamoja na Mungu huwa na uvutano juu ya mahusiano mengine yapi? (b) Kwa kusudi la kuleta amani kila mahali, Yehova alimpa Mwanaye mamlaka ipi?

⁹ Amani hiyo pamoja na Mungu ni muhimu kama nini! Kusipokuwa na amani pamoja na Mungu, hakuwezi kuwa na amani idumuyo au iliyo na maana katika uhusiano mwingine wowote. Amani pamoja na Yehova ndiyo msingi wa amani ya kweli duniani. (Isaya 57:19-21) Kwa kufaa, Yesu Kristo ndiye Mkuu wa Amani. (Isaya 9:6) Yehova amekabidhi pia mamlaka ya kutawala, kwa huyu ambaye kupitia kwake wanadamu wanaweza kupatanishwa na Mungu. (Danieli 7:13, 14) Na kuhusu matokeo ya utawala wa Yesu akiwa mkuu juu ya wanadamu, Yehova aahidi hivi: ‘Amani haitakuwa na mwisho kamwe.’—Isaya 9:7; Zaburi 72:7.

10. Yesu aliwekaje kielelezo katika kutangaza ujumbe wa amani wa Mungu?

¹⁰ Ujumbe wa Mungu wa amani unahitajiwa na jamii yote ya kibinadamu. Yesu aliweka binafsi kielelezo cha bidii katika kuuhubiri. Alifanya hivyo katika eneo la hekalu katika Yerusalemu, kando ya mlima, kando ya barabara, kwa mwanamke Msamaria kisimani, na nyumbani kwa watu. Popote pale palipokuwa na watu, Yesu alifanya fursa za kuhubiri kuhusu amani na Ufalme wa Mungu.—Mathayo 4:18, 19; 5:1, 2; 9:9; 26:55; Marko 6:34; Luka 19:1-10; Yohana 4:5-26.

Wazoezwa Kutembea Katika Nyayo za Kristo

11. Yesu aliwazoeza wanafunzi wake kwa kazi ipi?

¹¹ Yesu aliwafundisha wanafunzi wake wahubiri ujumbe wa Mungu wa amani. Sawa na vile Yesu alivyokuwa “shahidi [wa Yehova] mwaminifu na wa kweli,” walitambua kwamba wao pia walikuwa na daraka la kutoa ushahidi. (Ufunuo 3:14; Isaya 43:10-12) Walimtegemea Kristo kuwa Kiongozi wao.

12. Paulo alionyeshaje umaana wa utendaji wa kuhubiri?

¹² Mtume Paulo alisababu juu ya umaana wa utendaji wa kuhubiri, akisema: “Andiko lasema: ‘Hakuna yeyote awekaye imani yake juu ya yeye atakayekatishwa tamaa.’” Yaani, hakuna yeyote anayedhihirisha imani katika Yesu Kristo kuwa Wakili Mkuu wa Yehova wa wokovu atakayekatishwa tamaa. Na kabila la mtu yeyote halimfanyi akose kustahili, kwa maana Paulo aliongeza hivi: “Hakuna tofauti yoyote kati ya Myahudi na Mgiriki, kwa maana kuna Bwana yuleyule juu ya wote, aliye tajiri kwa wote wale wanaomwita. Kwa maana ‘kila mtu aitiaye jina la Yehova ataokolewa.’” (Waroma 10:11-13) Lakini watu wangejifunzaje kuhusu fursa hiyo?

13. Ni nini kilichohitajiwa ili watu wapate kuisikia habari njema, na Wakristo wa karne ya kwanza waliitikiaje uhitaji huo?

¹³ Paulo alishughulikia uhitaji huo kwa kuuliza maswali yapaswayo kufikiriwa na kila mtumishi wa Yehova. Mtume aliuliza hivi: “Watamwitiaje ambaye hawajaweka imani katika yeye? Nao watawekaje imani katika yeye ambaye hawajasikia? Nao watasikiaje bila mtu fulani kuhubiri? Nao watahubirije isipokuwa wawe wametumwa?” (Waroma 10:14, 15) Rekodi ya Ukristo wa mapema yatoa ushuhuda dhahiri wa kwamba wanaume na wanawake, vijana na wazee, waliitikia kielelezo kilichowekwa na Kristo na mitume wake. Walipata kuwa wapiga-mbiu wenye bidii wa habari njema. Kwa kumwiga Yesu, walihubiri watu popote ambapo wangeweza kuwapata. Wakiwa na tamaa ya kutokosa mtu yeyote, walifanya huduma yao hadharani na pia nyumba hadi nyumba.—Matendo 17:17; 20:20.

14. Ilithibitikaje kuwa kweli kwamba “miguu” ya wale waliotangaza habari njema ilikuwa “mizuri”?

¹⁴ Bila shaka, si kila mtu aliyewapokea wahubiri Wakristo kwa fadhili. Hata hivyo, yale aliyonukuu Paulo kutoka Isaya 52:7, yalithibitika kuwa kweli. Baada ya kuuliza swali, ‘Nao watahubirije isipokuwa wawe wametumwa?’ aliongeza hivi: “Kama vile imeandikwa: ‘Jinsi ilivyo yenye kupendeza miguu ya wale watangazao habari njema ya mambo mema!’” Wengi wetu hatuioni miguu yetu kuwa mizuri, au yenye kupendeza. Kwa hiyo, hili lamaanisha nini? Kwa kawaida miguu ndiyo humpeleka mtu huku na huku aendapo kuwahubiri wengine. Kwa kweli miguu hiyo inamwakilisha mtu huyo. Na twaweza kuwa na hakika kwamba kwa wengi waliosikia habari njema kutoka kwa mitume na kutoka kwa wanafunzi wengine wa Yesu Kristo wa karne ya kwanza, Wakristo hao wa mapema kwa kweli walikuwa mwono wenye kupendeza. (Matendo 16:13-15) Zaidi ya hayo, wao walikuwa wenye thamani machoni pa Mungu.

15, 16. (a) Wakristo wa mapema walionyeshaje kwamba walikuwa wajumbe wa amani kikweli? (b) Ni nini kiwezacho kutusaidia kufanya huduma yetu kwa njia ileile walivyoifanya Wakristo wa karne ya kwanza?

¹⁵ Wafuasi wa Yesu walikuwa na ujumbe wa amani, na waliutoa kwa njia yenye amani. Yesu aliwapa wanafunzi wake maagizo haya: “Popote pale mwingiapo katika nyumba semeni kwanza, ‘Nyumba hii na iwe na amani.’ Na ikiwa rafiki wa amani yumo, amani yenu itatulia juu yake. Lakini ikiwa hayumo, itawarudia nyinyi.” (Luka 10:5, 6) Sha·lohmʹ, au “amani,” ni salamu ya Kiyahudi ya kidesturi. Hata hivyo, maagizo ya Yesu yalihusisha mengi zaidi kuliko hayo. Wakiwa “mabalozi walio badala ya Kristo,” wanafunzi wake watiwa-mafuta waliwasihi sana watu hivi: “Iweni wenye kupatanishwa na Mungu.” (2 Wakorintho 5:20) Kwa kupatana na maagizo ya Yesu, waliongea na watu kuhusu Ufalme wa Mungu na kile ambacho ungeweza kumaanisha kwao wakiwa mtu mmoja-mmoja. Wale waliosikia walipokea baraka; wale waliokataa katakata ujumbe huo walikosa thawabu.

¹⁶ Mashahidi wa Yehova wanafanya huduma yao kwa njia iyo hiyo leo. Habari njema wanayopelekea watu si yao; ni ya Yule aliyewatuma. Utume wao ni kuitoa. Watu wakiikubali, wanajiweka katika hali ya kuja kupokea baraka nzuri ajabu. Wakiikataa katakata, wanakataa katakata amani pamoja na Yehova Mungu na Mwanaye, Yesu Kristo.—Luka 10:16.

Wenye Amani Katika Ulimwengu Wenye Msukosuko

17. Hata tukabilipo watu wenye kutukana, twapaswa kujiendeshaje, na kwa nini?

¹⁷ Itikio la watu liwe ni nini, ni jambo la maana kwa watumishi wa Yehova kukumbuka kwamba wao ni wajumbe wa amani ya kimungu. Watu wa ulimwengu huenda wakashiriki katika majibizano makali na kuonyesha hasira kwa kusema maneno ya kuumiza au kwa kuwapaazia matukano wale wanaowaudhi. Labda baadhi yetu tulifanya hivyo katika nyakati zilizopita. Hata hivyo, ikiwa tumevaa utu mpya na sasa sisi si sehemu ya ulimwengu, hatutaiga njia zao. (Waefeso 4:23, 24, 31; Yakobo 1:19, 20) Hata watu watendeje, sisi tutatumia hili shauri: “Ikiwezekana, kwa kadiri itegemeavyo nyinyi, iweni wenye kufanya amani na watu wote.”—Waroma 12:18.

18. Twapaswa kuitikiaje ikiwa ofisa wa umma anatudhulumu, na kwa nini?

¹⁸ Huenda nyakati nyingine huduma yetu ikatuleta mbele ya maofisa wa umma. Wakitumia mamlaka yao kwa uthabiti, huenda ‘wakadai kwetu’ elezo wajue kwa nini sisi hufanya mambo fulani au kwa nini sisi huepuka kushiriki katika utendaji fulani. Huenda wakataka kujua kwa nini sisi huuhubiri ujumbe tunaohubiri—ujumbe unaofunua dini isiyo ya kweli na unaosema juu ya mwisho wa mfumo wa mambo uliopo. Kustahi kwetu kielelezo alichoweka Kristo kutatusukuma kudhihirisha tabia-pole na staha yenye kina kirefu. (1 Petro 2:23; 3:15) Mara nyingi, maofisa hao wanasongwa na makasisi au labda na wakubwa wao wenyewe. Jibu lenye upole huenda likawasaidia wathamini kwamba utendaji wetu si tisho kwao au kwa amani ya jumuiya. Jibu la jinsi hilo linachochea roho ya staha, ushirikiano, na amani katika wale wanaolikubali.—Tito 3:1, 2.

19. Mashahidi wa Yehova hawashiriki kamwe katika utendaji gani mbalimbali?

¹⁹ Mashahidi wa Yehova wanajulikana duniani kote kuwa watu wasioshiriki katika ugomvi wa ulimwengu. Hawahusiki katika mapambano ya ulimwengu juu ya jamii, dini, au siasa. (Yohana 17:14) Kwa sababu Neno la Mungu hutuelekeza “[tu]we katika ujitiisho kwa mamlaka zilizo kubwa,” hata tusingewazia kushiriki katika matendo ya kuasi serikali ili kuteta dhidi ya sera zayo. (Waroma 13:1) Mashahidi wa Yehova hawakupata kamwe kujiunga na harakati yoyote yenye lengo la kupindua serikali fulani. Kwa sababu ya viwango ambavyo Yehova aliwawekea watumishi wake Wakristo, kushiriki kwao katika umwagikaji wa damu au ujeuri wa aina yoyote ni jambo lisilowazika! Wakristo wa kweli hawazungumzi tu kuhusu amani; bali pia wanaishi kwa kupatana na yale wanayohubiri.

20. Kwa habari ya amani, Babiloni Mkubwa imeweka rekodi ya aina ipi?

²⁰ Kinyume cha Wakristo wa kweli, wale wanaowakilisha matengenezo ya kidini ya Jumuiya ya Wakristo hawakuthibitika kuwa wajumbe wa amani. Dini za Babiloni Mkubwa—makanisa ya Jumuiya ya Wakristo na dini zisizo za Kikristo vilevile—zimeruhusu, zimeunga mkono, na kuongoza kihalisi katika vita vya mataifa. Pia zimechochea mnyanyaso na hata uuaji-kimakusudi wa watumishi waaminifu wa Yehova. Kuhusu Babiloni mkubwa, Ufunuo 18:24 lajulisha rasmi hivi basi: “Katika yeye ilipatikana damu ya manabii na ya watakatifu na ya wote wale ambao wamechinjwa juu ya dunia.”

21. Watu wengi wenye mioyo ya haki huitikiaje waonapo tofauti kati ya mwenendo wa watu wa Yehova na wa wale wanaozoea dini isiyo ya kweli?

²¹ Tofauti na dini za Jumuiya ya Wakristo na sehemu inayobaki ya Babiloni Mkubwa, dini ya kweli ni kani chanya, inayounganisha. Yesu Kristo aliwaambia hivi wafuasi wake wa kweli: “Kwa hilo wote watajua kwamba nyinyi ni wanafunzi wangu, mkiwa na upendo miongoni mwenu wenyewe.” (Yohana 13:35) Huo ni upendo upitao mipaka ya kitaifa, ya kijamii, ya kiuchumi, na ya kirangi ambayo sasa huwagawanya wale wengine wa jamii ya kibinadamu. Kwa sababu ya kuona jambo hilo, mamilioni ya watu duniani pote wanawaambia watumishi watiwa-mafuta wa Yehova hivi: “Tutakwenda pamoja nanyi, kwa maana tumesikia kwamba Mungu yu pamoja nanyi.”—Zekaria 8:23.

22. Sisi huionaje kazi ya kutoa ushahidi inayohitaji kufanywa bado?

²² Tukiwa watu wa Yehova, twashangilia sana katika yale ambayo yametimizwa, lakini kazi haijaisha bado. Baada ya kupanda mbegu na kulima shamba lake, mkulima haachii hapo. Anaendelea kufanya kazi, hasa katika upeo wa msimu wa mavuno. Wakati wa mavuno hutaka jitihada nyingi, yenye kudumu. Na sasa hivi kuna mavuno makubwa zaidi ya waabudu wa Mungu wa kweli kuliko wakati mwingine wowote hapo awali. Huu ndio wakati wa kushangilia. (Isaya 9:3) Ni kweli, sisi hukabili upinzani na ubaridi. Tukiwa mtu mmoja-mmoja, huenda tukawa twajitahidi kushughulikia ugonjwa mbaya, hali ngumu za familia, au ugumu wa kiuchumi. Lakini kumpenda Yehova kwatuchochea tudumu. Ujumbe ambao tumekabidhiwa na Mungu ni jambo ambalo watu wahitaji kusikia. Ni ujumbe wa amani. Kwa kweli, ndio ujumbe ambao Yesu mwenyewe alihubiri—habari njema ya Ufalme wa Mungu.

Jibu Lako Ni Nini?

◻ Isaya 52:7 lilikuwa na utimizo gani kwa Israeli la kale?

◻ Yesu alithibitikaje kuwa mjumbe wa amani aliye mkubwa kupita wote?

◻ Mtume Paulo alihusianishaje Isaya 52:7 na kazi ambayo Wakristo hushiriki?

◻ Ni nini kinachotiwa ndani katika kuwa wajumbe wa amani katika siku yetu?

[Picha katika ukurasa wa 13]

Sawa na Yesu, Mashahidi wa Yehova ni wajumbe wa amani ya kimungu

[Picha katika ukurasa wa 15]

Mashahidi wa Yehova hudumu wenye amani hata watu waitikieje ujumbe wa Ufalme