‘Endeleeni Kutembea Katika Muungano na Kristo’

“Kwa hiyo, kama ambavyo mmempokea Kristo Yesu Bwana, endeleeni kutembea katika muungano na yeye.”—WAKOLOSAI 2:6.

1, 2. (a) Biblia yafafanuaje maisha ya Enoki ya utumishi mwaminifu kwa Yehova? (b) Yehova ametusaidiaje tutembee naye, kama Wakolosai 2:6, 7 linavyoonyesha?

JE, UMEPATA kumtazama mvulana mdogo atembeapo na baba yake? Huyo jamaa mdogo huiga kila hatua ya baba yake, uso wake ukiwa umeng’aa kwa sababu ya kuvutiwa; baba humsaidia atembee pamoja naye, uso wake ukichangamka ukiwa na upendo na kibali. Kwa kufaa, Yehova hutumia ufafanuzi huo hasa, kufafanua maisha ya utumishi mwaminifu kwake. Kwa mfano, Neno la Mungu husema kwamba mwanamume mwaminifu Enoki “[alitembea] pamoja na Mungu [wa kweli].”—Mwanzo 5:24; 6:9.

² Kama vile ambavyo baba mwenye kumfikiria mwana wake mchanga angemsaidia kutembea naye, Yehova ametupatia msaada bora zaidi. Alimtuma Mwana wake mzaliwa-pekee duniani. Katika kila hatua ya maisha yake yote duniani, Yesu Kristo alimdhihirisha kikamilifu Baba yake wa kimbingu. (Yohana 14:9, 10; Waebrania 1:3) Kwa hiyo, ili tutembee na Mungu, twahitaji kutembea na Yesu. Mtume Paulo aliandika hivi: “Kwa hiyo, kama ambavyo mmempokea Kristo Yesu Bwana, endeleeni kutembea katika muungano na yeye, mkiwa wenye kutia mizizi na kujengwa katika yeye na kuimarishwa katika imani, kama vile mlivyofundishwa, mkifurikwa na imani katika utoaji-shukrani.”—Wakolosai 2:6, 7.

3. Kulingana na Wakolosai 2:6, 7, kwa nini twaweza kusema kwamba kuna mengi yanayohitajiwa ili kutembea katika muungano na Kristo, kuliko kubatizwa tu?

³ Kwa sababu wanataka kutembea katika muungano na Kristo, wakijitahidi kufuata hatua zake kamilifu, wanafunzi wa Biblia wenye mioyo ya haki hubatizwa. (Luka 3:21; Waebrania 10:7-9) Ulimwenguni pote, katika 1997 peke yake, watu zaidi ya 375,000 walichukua hatua hiyo muhimu—wastani wa watu zaidi ya 1,000 kila siku. Ongezeko hilo linasisimua wee! Hata hivyo, maneno ya Paulo yaliyorekodiwa kwenye Wakolosai 2:6, 7 yaonyesha kwamba kuna mengi yahusikayo katika kutembea katika muungano na Kristo kuliko kubatizwa tu. Kitenzi cha Kigiriki kinachofasiliwa “endelea kutembea” hufafanua tendo ambalo lazima liwe lenye kuendelea, lenye kufanyika muda wote. Zaidi, Paulo aongezea kwamba kutembea na Kristo hutia ndani mambo manne: kutia mizizi katika Kristo, kujengwa katika yeye, kuimarishwa katika imani, na kufurikwa na shukrani. Acheni tuchunguze kila fungu la maneno, tuone jinsi linavyotusaidia tuendelee kutembea katika muungano na Kristo.

Je, ‘Umetia Mizizi Katika Kristo’?

4. ‘Kutia mizizi katika Kristo’ kwamaanisha nini?

⁴ Kwanza, Paulo aandika, twahitaji ‘kutia mizizi katika Kristo.’ (Linganisha Mathayo 13:20, 21.) Mtu aweza kujitahidije kuelekea kuwa ametia mizizi katika Kristo? Bila shaka, mizizi ya mmea imefichwa isiweze kuonekana, bali ni muhimu kwa mmea—hiyo huupa uthabiti na kutoa lishe. Vivyo hivyo, kielelezo na ufundishaji wa Kristo watuathiri bila kuonekana, ukitiwa ndani ya akili zetu na mioyo yetu. Huko ndiko zinakotulisha na kutuimarisha. Tunapoziruhusu zitawale kufikiri kwetu, matendo yetu, na maamuzi yetu, twachochewa kuweka maisha zetu wakfu kwa Yehova.—1 Petro 2:21.

5. Twaweza ‘kufanyizaje hamu’ ya chakula cha kiroho?

⁵ Yesu alipenda ujuzi kutoka kwa Mungu. Hata aliulinganisha na chakula. (Mathayo 4:4) Naam, katika Mahubiri yake ya Mlimani, alitoa manukuu 21 kutoka katika vitabu vinane mbalimbali vya Maandiko ya Kiebrania. Ili kufuata kielelezo chake, lazima tufanye kama mtume Petro anavyohimiza sana—‘tufanyize hamu’ ya chakula cha kiroho “kama vitoto vichanga vilivyozaliwa karibuni.” (1 Petro 2:2) Kitoto kichanga kilichozaliwa karibuni kinapokuwa na hamu ya lishe, hujulisha waziwazi hamu yake kubwa. Ikiwa kwa sasa hatuhisi hivyo kuhusu chakula cha kiroho, maneno ya Petro hututia moyo ‘tufanyize’ hamu hiyo. Jinsi gani? Kanuni ipatikanayo kwenye Zaburi 34:8 huenda ikasaidia: “Onjeni mwone ya kuwa BWANA yu mwema.” ‘Tukionja’ Neno la Yehova, Biblia, kwa ukawaida, labda kusoma sehemu yake kila siku, tutaona kwamba linatia nguvu na ni zuri. Baada ya muda, hamu yetu katika hilo itaongezeka.

6. Kwa nini ni jambo la maana kutafakari yale tunayosoma?

⁶ Hata hivyo, ni jambo la maana kumeng’enya chakula vizuri mara baada ya kukila. Kwa hiyo twahitaji kutafakari yale tusomayo. (Zaburi 77:11, 12) Kwa mfano, tusomapo kitabu Yule Mtu Mkuu Zaidi Aliyepata Kuishi, kila sura hutunufaisha sana tukitua na kujiuliza: ‘Ni sehemu gani ya utu wa Kristo ninayoona katika kisa hiki na naweza kuiigaje katika maisha yangu mwenyewe?’ Kutafakari kwa njia hiyo kutatuwezesha tutumie yale tunayojifunza. Kisha, tunapohitaji kufanya uamuzi, huenda tukajiuliza wenyewe kile ambacho Yesu angalifanya. Tukifanya uamuzi wetu ifaavyo, twathibitisha kuwa kweli tumetia mizizi katika Kristo.

7. Maoni yetu yapasa kuwa nini kuhusu lishe ya chakula kigumu cha kiroho?

⁷ Paulo anatusihi pia tule “chakula kigumu,” kweli zenye kina za Neno la Mungu. (Waebrania 5:14) Huenda kusoma Biblia yote nzima kukawa mradi wetu wa kwanza kuhusiana na hilo. Kisha kuna vichwa vya mazungumzo hususa vya funzo, kama vile dhabihu ya fidia ya Kristo, maagano mbalimbali ambayo Yehova alifanya na watu wake, au baadhi ya ujumbe mbalimbali uliomo katika Biblia. Kuna wingi wa habari itakayotusaidia tufyonze na kumeng’enya chakula hicho kigumu cha kiroho. Mradi wa kutwaa ujuzi huo ni nini? Si tujipatie sababu ya kujisifu, bali kujenga upendo wetu kwa Yehova na kutufanya tumkaribie zaidi. (1 Wakorintho 8:1; Yakobo 4:8) Tukitwaa ujuzi huu kwa hamu sana, tuutumie, na kuutumia kusaidia wengine, kwa kweli tutakuwa tukimwiga Kristo. Kufanya hivyo kutatusaidia tutie mizizi vizuri katika yeye.

Je, ‘Unajengwa Katika Kristo?’

8. ‘Kujengwa katika Kristo’ kwamaanisha nini?

⁸ Kuhusu sehemu nyingine ya kutembea katika muungano na Kristo, Paulo abadili haraka matumizi ya mfano mmoja wenye kuonekana na kutumia mwingine tofauti—aacha kutumia mfano wa mmea na kutumia ule wa jengo. Tufikiripo juu ya jengo linaloendelea kujengwa, twafikiri si juu ya msingi tu bali pia jumba linaloinuka juu likionekana wazi bila kizuizi, likijengwa kwa kazi ya jasho. Vivyo hivyo, lazima tufanye kazi ya jasho ili kujenga sifa na mazoea yaliyo kama ya Kristo. Jitihada hiyo haikosi kuonekana, kama vile Paulo alivyomwandikia Timotheo: ‘Acha kusonga mbele kwako kupate kuwa dhahiri kwa watu wote.’ (1 Timotheo 4:15; Mathayo 5:16) Ni zipi baadhi ya kazi za Kikristo ambazo hutujenga?

9. (a) Ili tumwige Kristo katika huduma yetu, ni baadhi ya miradi gani inayofaa ambayo twaweza kuweka? (b) Twajuaje kwamba Yehova ataka tufurahie huduma yetu?

⁹ Yesu alitupa mgawo wa kuhubiri na kufundisha habari njema. (Mathayo 24:14; 28:19, 20) Aliweka kielelezo kikamilifu, cha kutoa ushahidi kwa ujasiri na kwa matokeo. Bila shaka, hatutafanya kamwe kama yeye alivyofanya. Hata hivyo, mtume Petro atuwekea mradi huu: “Mtakaseni Kristo kuwa Bwana katika mioyo yenu, sikuzote mkiwa tayari kujitetea mbele ya kila mtu ambaye hudai kwenu sababu ya tumaini lililo katika nyinyi, lakini mkifanya hivyo kwa tabia-pole na staha yenye kina kirefu.” (1 Petro 3:15) Ikiwa wewe huhisi kwamba ‘sikuzote hauko tayari kujitetea,’ usikate tumaini. Weka miradi ya kiasi itakayokusaidia usonge hatua kwa hatua kuelekea kiwango hicho. Kujitayarisha kimbele kwaweza kukuwezesha ubadilishe utoaji wako wa maelezo au kutia andiko moja au mawili. Waweza kuweka miradi ya kuangusha fasihi zaidi za Biblia, kufanya ziara zaidi za kurudia, au kuanzisha funzo la Biblia. Mkazo haupaswi kuwa juu ya wingi hasa—kama vile katika hesabu ya saa, maangusho, au mafunzo—bali katika ubora. Kuweka miradi ya kiasi na kujitahidi kuifikia kwaweza kutusaidia tufurahie kujitoa wenyewe katika huduma. Hivyo ndivyo anavyotaka Yehova—sisi tumtumikie “kwa furaha.”—Zaburi 100:2; linganisha 2 Wakorintho 9:7.

10. Ni baadhi ya kazi nyingine gani za Kikristo ambazo twahitaji kufanya, nazo hutusaidiaje?

¹⁰ Pia kuna kazi ambazo sisi hufanya katika kutaniko zinazotujenga katika Kristo. Iliyo ya maana zaidi ni ile ya kuonyeshana upendo, kwa kuwa hii ndiyo ishara ya kutambulisha Wakristo wa kweli. (Yohana 13:34, 35) Tunapokuwa bado twajifunza, wengi wetu huwa tuna ukaribu sana na mwalimu wetu, kwa kuwa jambo hilo ni la asili. Hata hivyo, sasa je, twaweza kufuata shauri la Paulo la ‘kupanuka’ kwa kupata kuwajua wengine kutanikoni? (2 Wakorintho 6:13) Wazee pia wahitaji upendo na uthamini wetu. Kwa kushirikiana nao, kutafuta na kukubali shauri la Kimaandiko, tutarahisisha kazi yao iliyo ngumu. (Waebrania 13:17) Wakati uleule, hilo litachangia kujengwa kwetu katika Kristo.

11. Ni maoni gani yafaayo kuhusu ubatizo tunayopaswa kuwa nayo?

¹¹ Ubatizo ni pindi yenye kusisimua wee! Hata hivyo, hatupaswi kutazamia kila dakika maishani baada ya hapo iwe yenye kusisimua hivyohivyo. Sehemu kubwa ya kujengwa kwetu katika Kristo yahusisha “kutembea kwa utaratibu katika kawaida hiyohiyo.” (Wafilipi 3:16) Hiyo haimaanishi mtindo-maisha usiochangamsha, wenye kuchosha. Humaanisha tu kutembea mbele katika mstari ulionyooka, yaani, kujenga mazoea mazuri ya kiroho na kuyashikilia siku kwa siku, mwaka baada ya mwaka. Kumbuka kwamba, “yeye ambaye amevumilia hadi mwisho ndiye atakayeokolewa.”—Mathayo 24:13.

Je, Wewe ‘Umeimarishwa Katika Imani’?

12. “Kuimarishwa katika imani” kwamaanisha nini?

¹² Katika fungu lake la tatu la maneno linalofafanua kutembea kwetu katika muungano na Kristo, Paulo atusihi ‘tuimarishwe katika imani.’ Tafsiri moja yasema hivi, “kuthibitishwa kuhusiana na imani,” kwa kuwa neno la Kigiriki alilotumia Paulo laweza kumaanisha “kuthibitisha, kutoa uhakikisho kamili, na kuifanya iwe halali isiyobadilika.” Tukuapo katika ujuzi, twapewa sababu zaidi za kuona kwamba imani yetu katika Yehova Mungu ni yenye msingi mzuri na, kwa hakika, imethibitishwa kihalali. Matokeo ni ongezeko la uthabiti wetu. Hufanya liwe jambo gumu kwa ulimwengu wa Shetani kutufanya tuyumbeyumbe. Hilo hutukumbusha onyo pole la Paulo “tuzidi kusonga mbele kwenye ukomavu.” (Waebrania 6:1) Ukomavu na uthabiti huambatana.

13, 14. (a) Wakristo wa karne ya kwanza katika Kolosai walikabili vitisho gani vya uthabiti wao? (b) Huenda ikawa Mtume Paulo alihangaishwa na nini?

¹³ Wakristo wa karne ya kwanza katika Kolosai walikabili vitisho vya uthabiti wao. Paulo alionya hivi: “Jihadharini: labda huenda kukawa na mtu fulani ambaye atawachukua nyinyi kama windo lake kupitia falsafa na udanganyo mtupu kulingana na mapokeo ya wanadamu, kulingana na mambo ya msingi ya ulimwengu na si kulingana na Kristo.” (Wakolosai 2:8) Paulo hakutaka Wakolosai, ambao walikuwa wamepata kuwa raia katika “ufalme wa Mwana wa upendo wa [Mungu],” wachukuliwe, waondoshwe kutoka katika hali yao ya kiroho iliyobarikiwa. (Wakolosai 1:13) Waongozwe vibaya kwa njia gani? Paulo alitaja “falsafa,” mara pekee ambayo neno hili laonekana katika Biblia. Je, alikuwa akiongea kuhusu wanafalsafa Wagiriki, kama vile Plato na Socrates? Ingawa hao walitisha Wakristo wa kweli, katika siku hizo, neno “falsafa” lilikuwa na matumizi makubwa. Kwa ujumla lilimaanisha vikundi vingi na watu wa kauli moja—hata wale wa kidini. Kwa mfano, Wayahudi wa karne ya kwanza kama Josephus na Philo waliita dini yao wenyewe kuwa falsafa—labda kuongezea uvutio wake.

¹⁴ Falsafa fulani ambazo huenda zilimhangaisha Paulo labda zilikuwa za kidini. Baadaye katika sura hiyohiyo ya barua yake kwa Wakolosai, aliwaambia wale waliofundisha hivi, “Usishike, wala usionje, wala usiguse,” akidokeza sehemu za Sheria ya Kimusa zilizokomeshwa na kifo cha Kristo. (Waroma 10:4) Kuongezea falsafa za kipagani, kulikuwa na mavutano yaliyotisha hali ya kiroho ya kutaniko. (Wakolosai 2:20-22) Paulo alionya dhidi ya falsafa iliyokuwa sehemu ya “mambo ya msingi ya ulimwengu.” Fundisho hilo lisilo la kweli lilitokana na binadamu.

15. Twaweza kuepukaje kupeperushwa na kufikiri kusiko kwa Kimaandiko ambako mara nyingi hutukabili?

¹⁵ Kule kuendeleza mawazo ya binadamu na kufikiri kusikotegemea kwa uthabiti Neno la Mungu kwaweza kuhatarisha uthabiti wa Kikristo. Sisi leo lazima tujihadhari na vitisho kama hivyo. Mtume Yohana alisihi hivi: “Wapendwa, msiamini kila usemi uliopuliziwa, lakini jaribuni semi zilizopuliziwa ili kuona kama hizo zatokana na Mungu.” (1 Yohana 4:1) Kwa hiyo ikiwa mwanashule mwenzako ajaribu kukusadikisha kwamba kuishi kulingana na viwango vya Biblia ni kwa kizamani, au kama jirani aelekea kukushawishi uwe na mtazamo wa kufuatia vitu vya kimwili, au kama mfanyakazi mwenzako akusonga kwa hila upuuze dhamiri yako iliyozoezwa na Biblia, au kama mwamini mwenzako atoa maelezo ya kuchambua kuhusu wengine kutanikoni yanayotegemea maoni yake mwenyewe, usikubali tu yale wasemayo. Ondoa yale yasiyopatana na Neno la Mungu. Tukifanya hivyo, tutadumisha uthabiti wetu tutembeapo katika muungano na Kristo.

“Mkifurikwa na Imani Katika Utoaji-Shukrani”

16. Sehemu ya nne ya kutembea katika muungano na Kristo ni ipi, na huenda tukauliza swali gani?

¹⁶ Sehemu ya nne ya kutembea katika muungano na Kristo ambayo Paulo anataja ni kwamba tuwe ‘tukifurikwa na imani katika utoaji-shukrani.’ (Wakolosai 2:7) Neno “kufurikwa” hutukumbusha mto unaofurika kingo zake. Hilo hudokeza kwamba kwetu sisi Wakristo, utoaji-shukrani wetu wapasa kuwa jambo lenye kuendelea au kuwa mazoea. Kila mmoja wetu aweza kujiuliza, ‘Je, mimi ni mwenye shukrani?’

17. (a) Kwa nini yaweza kusemwa kwamba sisi sote tuna mengi ambayo yatupasa kutolea shukrani, hata nyakati zenye magumu? (b) Ni baadhi ya zawadi zipi kutoka kwa Yehova ambazo kwa ajili ya hizo wewe wahisi ukiwa mwenye shukrani hasa?

¹⁷ Kwa kweli, sisi sote tuna sababu ya kutosha ya kufurikwa na shukrani kwa Yehova kila siku. Hata katika nyakati zilizo mbaya kabisa, huenda kukawa na mambo fulani mepesi ambayo huandaa vipindi vifupi vya kitulizo. Wakati rafiki aonyeshapo hisia-mwenzi. Mpendwa atugusapo kwa njia inayotumainisha. Usingizi wa kutosha usiku huburudisha. Mlo wenye ladha hutuliza kabisa maumivu ya njaa. Wimbo wa ndege, kicheko cha mtoto, anga la buluu lenye kumetameta, upepo mwanana wenye kuburudisha—yote haya na mengineyo huenda yakatupata kwa siku moja tu. Ni rahisi kuchukulia zawadi hizo kijuu-juu tu. Je, hatustahili kusema asante kwa ajili ya zote hizo? Zote hizo hutoka kwa Yehova, yule Chanzo cha “kila zawadi njema na kila upaji mkamilifu.” (Yakobo 1:17) Naye ametupatia zawadi zinazofanya zile zilizotajwa hapo juu ziwe ndogo zaidi—kwa mfano, uhai wenyewe. (Zaburi 36:9) Na zaidi, ametupatia fursa ya kuishi milele. Ili aandae zawadi hii, Yehova alitoa dhabihu kuu kuliko zote kwa kumtuma Mwana wake mzaliwa-pekee, ‘aliyekuwa furaha yake.’—Mithali 8:30; Yohana 3:16.

18. Twaweza kujionyeshaje kuwa wenye shukrani kwa Yehova?

¹⁸ Basi, maneno ya mtunga-zaburi ni ya kweli kama nini: “Ni neno jema kumshukuru BWANA.” (Zaburi 92:1) Vivyo hivyo, Paulo aliwakumbusha Wakristo katika Thesalonike hivi: “Kuhusiana na kila jambo toeni shukrani.” (1 Wathesalonike 5:18; Waefeso 5:20; Wakolosai 3:15) Kila mmoja wetu anaweza kuazimia kuwa mwenye shukrani zaidi. Sala zetu hazihitaji kuwa dua tu kwa Mungu kuhusu mahitaji yetu. Inafaa kuzitia ndani. Lakini ebu wazia ukiwa na rafiki ambaye hukuzungumzia tu anapohitaji kitu kutoka kwako! Kwa hiyo kwa nini usisali kwa Yehova ili kumshukuru tu na kumsifu yeye? Sala hizo zampendeza kama nini atazamapo chini hapa katika ulimwengu huu usio na shukrani! Manufaa ya pili ni kwamba sala hizo huenda zikatusaidia tukazie sehemu zinazojenga za maisha, zikitukumbusha jinsi ambavyo tumebarikiwa kwelikweli.

19. Maneno ya Paulo kwenye Wakolosai 2:6, 7 yadokezaje kwamba huenda sisi sote tukaendelea kufanya maendeleo katika kutembea na Kristo?

¹⁹ Mwongozo mwingi wenye hekima ambao waweza kupatikana katika kifungu kimoja tu cha Neno la Mungu je, si wenye kutokeza? Shauri la Paulo la kuendelea kutembea na Kristo ni jambo ambalo kila mmoja wetu apaswa kutaka kulitii kutoka moyoni. Basi, acheni tuazimie ‘kutia mizizi katika Kristo,’ “kujengwa katika yeye,” “kuimarishwa katika imani,” na ‘kufurikwa katika utoaji-shukrani.’ Shauri hilo ni muhimu hasa kwa wale waliobatizwa karibuni. Lakini latumika kwetu sote. Fikiria jinsi mzizi mkuu ukuavyo hatua kwa hatua kuelekea chini na jinsi jengo linaloendelea kujengwa liongezekavyo urefu hatua kwa hatua. Ndivyo kutembea kwetu na Kristo kusivyokwisha. Kuna fursa ya kutosha ya ukuzi. Yehova atatusaidia na kutubariki, kwa kuwa anataka sisi twendelee kutembea naye na Mwana wake mpendwa bila kukoma.

Ungejibuje?

◻ Kutembea katika muungano na Kristo kwahusisha nini?

◻ ‘Kutia mizizi katika Kristo’ kwamaanisha nini?

◻ Twaweza ‘kujengwaje katika Kristo’?

◻ Kwa nini ni jambo la maana “kuimarishwa katika imani”?

◻ Ni sababu zipi tulizo nazo za ‘kufurikwa na utoaji-shukrani’?

[Picha katika ukurasa wa 10]

Huenda mizizi ya mti isionekane, lakini hiyo hutolea mti chakula na kuutia nanga uwe imara