Shangilieni Katika Tumaini la Ufalme!

“Kwa tumaini, mkifurahi [Shangilieni katika tumaini, NW]; katika dhiki, mkisubiri.”—WARUMI 12:12.

 1. Ni kwa nini twaweza kupata shangwe katika ushirika pamoja na Yehova, na mtume Paulo aliwahimiza Wakristo wafanye nini?

“MUNGU mwenye furaha.” (1 Timotheo 1:11, NW) Hiyo inamweleza Yehova vizuri jinsi gani! Kwa nini? Kwa sababu kazi zake zote humletea furaha nyingi sana. Kwa kuwa Yehova ndiye Chanzo cha vitu vyote vizuri na vyenye kufurahisha, viumbe wake wote wenye akili wanaweza kupata furaha katika ushirika pamoja na yeye. Kwa kufaa, mtume Paulo aliwahimiza Wakristo walithamini pendeleo lao lenye shangwe la kumjua Yehova Mungu, kushukuru kwa ajili ya zawadi Zake zote nzuri ajabu za uumbaji, na kushangilia katika fadhili-upendo Anazowaonyesha. Paulo aliandika hivi: “Furahini katika Bwana sikuzote; tena nasema, furahini”!—Wafilipi 4:4; Zaburi 104:31.

 2. Ni tumaini gani linaloleta shangwe kubwa, na Wakristo wanatiwa moyo kufanya nini kuhusu tumaini hilo?

² Je! Wakristo wanatii himizo hilo alilotoa Paulo? Kwa kweli wanalitii! Ndugu za kiroho za Yesu Kristo wanashangilia katika lile tumaini tukufu waliloandaliwa na Mungu. (Warumi 8:19-21; Wafilipi 3:20, 21) Naam, wanajua kwamba watashiriki katika kutimiza lile tumaini kubwa la wakati ujao wa ainabinadamu, wanaoishi na wale waliokufa pia, kwa kutumikia pamoja na Kristo katika serikali yake ya Ufalme wa kimbingu. Ebu wazia jinsi watakavyoshangilia katika mapendeleo yao wakiwa warithi-washirika, wakitumikia wakiwa wafalme na makuhani! (Ufunuo 20:6) Watakuwa na furaha iliyoje wanaposaidia ainabinadamu yenye uaminifu ifikie ukamilifu na kusaidia kuongoza katika kurudisha Paradiso kwenye dunia yetu! Kwa kweli, watumishi wote wa Mungu wana “tumaini la uzima wa milele, ambao Mungu asiyeweza kusema uongo aliuahidi tangu milele.” (Tito 1:2) Kwa sababu ya tumaini hilo tukufu, mtume Paulo awatia moyo Wakristo wote: “Kwa tumaini, mkifurahi.”—Warumi 12:12.a

Shangwe ya Kweli—Sifa ya Moyoni

3, 4. (a) Neno “kushangilia” linamaanisha nini, na Wakristo wanapaswa kushangilia mara nyingi kadiri gani? (b) Shangwe ya kweli ni nini, nayo inategemea nini?

³ “Kushangilia” humaanisha kuhisi na kuonyesha shangwe; haimaanishi kuwa daima katika hali ya msisimuko mwingi, au ya ukunjufu mwingi. Vitenzi vinavyolingana na maneno ya Kiebrania na Kigiriki yaliyotumiwa katika Biblia kwa “shangwe,” “mchachawo,” na “kushangilia” huonyesha hisia ya kindani na pia udhihirisho wa nje wa shangwe. Wakristo wanatiwa moyo ‘waendelee kushangilia,’ ‘washangilie sikuzote.’—2 Wakorintho 13:11; 1 Wathesalonike 5:16, NW.

⁴ Lakini mtu anaweza kushangiliaje sikuzote? Hiyo yawezekana kwa sababu shangwe ya kweli ni sifa ya moyoni, sifa ya ndani sana, ya kiroho. (Kumbukumbu la Torati 28:47; Mithali 15:13; 17:22) Hiyo ni tunda la roho ya Mungu, lililoorodheshwa na Paulo baada tu ya upendo. (Wagalatia 5:22) Ikiwa sifa ya ndani, haitegemei mambo ya nje, haitegemei hata ndugu zetu. Bali hiyo hutegemea roho takatifu ya Mungu. Nayo hutokana na ule uradhi wa ndani sana wa kujua kwamba una kweli, tumaini la Ufalme, na kwamba unafanya lile limpendezalo Yehova. Kwa hiyo, shangwe si tabia tu ya kiutu tunayozaliwa nayo; hiyo ni sehemu ya “utu mpya,” mkusanyo wa sifa zilizompambanua Yesu Kristo kuwa mtu tofauti.—Waefeso 4:24; Wakolosai 3:10.

 5. Maonyesho ya nje ya shangwe yaweza kuwako wakati gani na kwa jinsi gani?

⁵ Ingawa shangwe ni sifa ya moyoni, hata hivyo inaweza kuonyeshwa kwa nje mara kwa mara. Maonyesho hayo ya nje ya shangwe ya mara kwa mara ni gani? Yaweza kuwa jambo lolote kutoka hali ya kuwa mtulivu kwa sura hadi kuruka kihalisi kwa shangwe. (1 Wafalme 1:40; Luka 1:44; Matendo 3:8; 6:15) Basi, je! hilo linamaanisha kwamba watu wasiopiga domo sana au ambao hawatabasamu sikuzote hawana shangwe? La! Shangwe ya kweli haijionyeshi yenyewe kwa kupayuka, kucheka, kutabasamu, au kutoa meno kwa kutabasamu daima. Hali husababisha shangwe ijionyeshe yenyewe katika njia mbalimbali. Si shangwe peke yayo inayotufanya tupatane kwenye Jumba la Ufalme, bali ni shauku yetu ya kidugu na upendo.

 6. Ni kwa nini Wakristo wanaweza kushangilia nyakati zote hata wanapokabili hali zisizopendeza?

⁶ Hali isiyobadilika ya shangwe ni udumifu wayo wa kindani ikiwa sehemu ya kuhisiwa moyoni ya utu mpya wa Mkristo. Hiyo ndiyo inayowezesha kuwe na kushangilia sikuzote. Bila shaka, nyakati nyingine huenda tukasumbuliwa na jambo fulani, au huenda tukakabili hali zisizopendeza. Lakini twaweza bado kuwa na shangwe moyoni mwetu. Wakristo wengine wa mapema walikuwa watumwa, wakiwa na mabwana wakubwa walio wagumu kupendeza. Je! Wakristo kama hao wangeweza kushangilia sikuzote? Naam, kwa sababu ya tumaini lao la Ufalme na shangwe iliyokuwa mioyoni mwao.—Yohana 15:11; 16:24; 17:13.

 7. (a) Yesu alisema nini kuhusu shangwe chini ya dhiki? (b) Ni nini kinachotusaidia kuvumilia chini ya dhiki, na ni nani aliyeweka mfano mwema zaidi katika jambo hilo?

⁷ Baada tu ya mtume Paulo kusema: “Kwa tumaini, mkifurahi,” aliongeza hivi: “Katika dhiki, mkisubiri.” (Warumi 12:12) Yesu pia aliongea kuhusu shangwe chini ya dhiki aliposema kwenye Mathayo 5:11, 12: “Heri [wenye furaha, NW] ninyi watakapowashutumu na kuwaudhi . . . Furahini [shangilieni, NW], na kushangilia [kuruka kwa shangwe, NW]; kwa kuwa thawabu yenu ni kubwa mbinguni.” Hapa kushangilia na kuruka kwa shangwe hakuhitaji kuwe onyesho halisi la nje; hasa ni uradhi wa kindani sana ambao mtu anakuwa nao katika kupendeza Yehova na Yesu Kristo anaposimama imara chini ya jaribu. (Matendo 5:41) Kwa kweli, shangwe ndiyo inayotusaidia tuvumilie chini ya dhiki. (1 Wathesalonike 1:6) Yesu aliweka Mfano mwema zaidi katika jambo hilo. Maandiko hutuambia hivi: “Kwa sababu ya shangwe ambayo iliwekwa mbele yake yeye alivumilia mti wa mateso.”—Waebrania 12:2, NW.

Kushangilia Katika Tumaini Yajapokuwa Matatizo

 8. Huenda Wakristo wakakabili matatizo gani, lakini kwa nini matatizo hayaondoi shangwe ya Mkristo?

⁸ Kuwa mtumishi wa Yehova hakumweki mtu huru na matatizo. Huenda kukawa matatizo ya familia, magumu ya kiuchumi, afya iliyodhoofika, au kifo cha wapendwa. Ingawa mambo ya jinsi hiyo huenda yakasababisha huzuni, hayaondoi msingi wetu wa kushangilia katika tumaini la Ufalme, shangwe ya ndani tuliyo nayo moyoni mwetu.—1 Wathesalonike 4:13.

 9. Abrahamu alikuwa na matatizo gani, na tunajuaje kwamba alikuwa na shangwe moyoni mwake?

⁹ Kwa mfano, fikiria Abrahamu. Maisha hayakuwa ya kupendeza kwake sikuzote. Alikuwa na matatizo ya familia. Suria yake, Hajiri, na mke wake, Sara, hawakupatana. Kulikuwako mzozo. (Mwanzo 16:4, 5) Ishmaeli alimdhihaki Isaka akimnyanyasa. (Mwanzo 21:8, 9; Wagalatia 4:29) Hatimaye Sara, mke mpendwa wa Abrahamu, akafa. (Mwanzo 23:2) Yajapokuwa matatizo hayo, alishangilia juu ya tumaini la Mbegu ya Ufalme, Mbegu ya Abrahamu, ambayo kupitia kwayo, familia zote za dunia zingejibariki. (Mwanzo 22:15-18) Akiwa na shangwe moyoni mwake, alivumilia katika utumishi wa Yehova kwa miaka mia moja baada ya kuondoka mji wake wa kuzaliwa wa Uri. Kwa hiyo imeandikwa hivi juu yake: “Alikuwa akiutazamia mji wenye misingi, ambao mwenye kuubuni na kuujenga ni Mungu.” Kwa sababu ya imani ya Abrahamu katika kuja kwa Ufalme wa Kimesiya, Bwana Yesu Kristo, alipokuwa tayari amewekwa rasmi na Mungu kuwa Mfalme, angeweza kusema hivi: “Ibrahimu [Abrahamu, NW], . . . alishangilia kwa vile atakavyoiona siku yangu; naye akaiona, akafurahi.”—Waebrania 11:10; Yohana 8:56.

10, 11. (a) Sisi tukiwa Wakristo tuna pambano gani, nasi tunaokolewaje? (b) Ni nini kinacholipia hali yetu ya kutoweza kupigana kwa ukamilifu dhidi ya mnofu wetu wenye dhambi?

¹⁰ Tukiwa wanadamu wasiokamilika, sisi tunao pia mnofu wetu wenye dhambi wa kukabiliana nao, na jitihada hiyo ya kufanya lililo zuri yaweza kuwa yenye kutaabisha sana. Hata hivyo, pambano letu dhidi ya udhaifu wetu mbalimbali halimaanishi kwamba sisi hatuna tumaini. Paulo alihuzunika juu ya pigano hilo, naye alisema hivi: “Ni nani atakayeniokoa na mwili huu wa mauti? Namshukuru Mungu, kwa Yesu Kristo Bwana wetu.” (Warumi 7:24, 25) Kupitia Yesu Kristo na ile fidia aliyoandaa, tunaokolewa.—Warumi 5:19-21.

¹¹ Dhabihu ya fidia ya Kristo hulipia hali yetu ya kutoweza kupigana vita hiyo kwa ukamilifu. Twaweza kushangilia katika fidia hiyo kwa sababu inawezesha kuwe na dhamiri iliyosafishwa na kusamehewa kwa dhambi zetu. Kwenye Waebrania 9:14, Paulo asema juu ya “damu yake Kristo” iliyo na nguvu ya ‘kusafisha dhamiri zetu na matendo mafu.’ Hivyo, dhamiri za Wakristo hazihitaji kulemezwa na lawama na hisia za hatia. Hilo, pamoja na tumaini tulilo nalo, hufanyiza nguvu imara kwa furaha yenye shangwe. (Zaburi 103:8-14; Warumi 8:1, 2, 32) Tukitafakari juu ya tumaini letu, sisi sote tutatiwa moyo kupigana vita hiyo kwa mafanikio.

Kuliweka Tumaini Letu Karibu Katika Akili

12. Ni tumaini gani ambalo Wakristo wapakwa-mafuta wanaweza kutafakari?

¹² Ni jambo lenye maana kwa mabaki wapakwa-mafuta kwa roho na kondoo wengine pia kuliweka ‘tumaini lao la wokovu’ akilini, wakijivika hilo likiwa kofia ya kukinga. (1 Wathesalonike 5:8) Wakristo wapakwa-mafuta wanaweza kutafakari juu ya lile pendeleo zuri ajabu la kupata uhai usioweza kufa mbinguni, la kuingia mahali alipo Yehova Mungu, na la kuonea shangwe ushirika wa kibinafsi pamoja na Yesu Kristo na mitume na wote wengine wa wale 144,000, waliodumisha uaminifu wao wa kimaadili kwa muda wote wa karne zilizopita. Lo, huo ni ushirika wenye utajiri usioelezeka kama nini!

13. Wapakwa-mafuta walio duniani bado huhisije juu ya tumaini lao?

¹³ Wapakwa-mafuta wachache walio duniani bado huhisije juu ya tumaini lao la Ufalme? Hilo laweza kutolewa muhtasari kwa maneno ya mmoja aliyebatizwa katika 1913: “Tumaini letu ni jambo la hakika, na litatimizwa kikamili kwa ki-i-la mmoja wa wale washiriki 144,000 wa kundi dogo kwa kadiri inayopita hata yale ambayo tumeweza kuwazia. Sisi wa mabaki waliokuwako katika mwaka wa 1914, wakati tulipotazamia kwamba sisi sote tungeenda mbinguni, hatujapoteza maoni yetu ya thamani ya tumaini hilo. Bali tungali wenye imara kwalo jinsi tulivyokuwa wakati wowote ule, na tunalithamini hata zaidi tunapozidi kulingojea. Ni jambo linalostahili kungojewa, hata ikiwa lingehitaji miaka milioni moja. Ninakadiri tumaini letu kuwa lenye thamani kubwa zaidi ya wakati mwingine wowote, nami sitaki kamwe kupoteza tumaini langu kwalo. Tumaini la kundi dogo hutoa uhakikishio pia kwamba tazamio la umati mkubwa wa kondoo wengine litatimizwa kuupita upeo wa uwazio wetu ulio mwangavu zaidi, bila uwezekano wowote wa kutofaulu. Hiyo ndiyo sababu tunavumilia kwa imara hadi saa hii, nasi tutavumilia hadi wakati Mungu atakapoonyesha kwa hakika kwamba yeye ni mwaminifu kwa ‘ahadi zake kubwa mno, za thamani.’”—2 Petro 1:4; Hesabu 23:19; Warumi 5:5.

Kushangilia Sasa Katika Tumaini la Paradiso

14. Ni tumaini gani ambalo umati mkubwa unahitaji kuweka akilini?

¹⁴ Maneno hayo ya imani yenye furaha nyingi huingiza katika wale walio wa umati mkubwa wa kondoo wengine sababu tukufu za kushangilia. (Ufunuo 7:15, 16) Watu wa jinsi hiyo wanahitaji kuweka akilini tumaini la kuokoka Har–Magedoni. Naam, tazamia kuona Ufalme wa Mungu ukitetea enzi kuu ya ulimwengu wote mzima ya Yehova Mungu na kulitukuza jina lake tukufu kwa kuleta dhiki kubwa, ambayo itasafisha dunia kwa kuondoa walio waovu ambao mungu wao amekuwa Ibilisi. Itakuwa shangwe iliyoje kuokoka dhiki kubwa hiyo!—Danieli 2:44; Ufunuo 7:14.

15. (a) Yesu alifanya kazi gani ya kuponya alipokuwa duniani, na kwa nini? (b) Mahitaji ya afya ya waokokaji wa Har–Magedoni yatakuwa nini, na ni kwa nini mahitaji hayo ni tofauti na yale ya wale wanaofufuliwa?

¹⁵ Kuhusu ule umati mkubwa, Ufunuo 7:17 husema hivi: “Mwana-Kondoo . . . atawachunga, naye atawaongoza kwenye chemchemi za maji yenye uhai, na Mungu atayafuta machozi yote katika macho yao.” Ingawa unabii huo una utimizo wa kiroho sasa, waokokaji wa Har–Magedoni watauona ukitimizwa kihalisi. Jinsi gani? Kwani, Yesu alifanya nini alipokuwa duniani? Aliwaponya viwete, alifanya vilema watembee, alifumbua masikio ya viziwi na macho ya wale waliokuwa vipofu, naye aliponya ukoma, kipooza, na “magonjwa yote na udhaifu wa kila aina.” (Mathayo 9:35; 15:30, 31) Je! hilo si jambo ambalo Wakristo leo wanahitaji? Umati mkubwa utabeba udhaifu mbalimbali na magonjwa ya ulimwengu wa zamani hadi katika ulimwengu mpya. Tunatazamia Mwana-kondoo afanye nini kuhusu jambo hilo? Mahitaji ya waokokaji wa Har–Magedoni yatakuwa tofauti sana na mahitaji ya wale watakaofufuliwa. Wale watakaofufuliwa yaelekea wataumbwa upya na miili mizima, timamu, na yenye afya, ingawa bado hawatakuwa na ukamilifu wa kibinadamu. Kwa sababu ya muujiza wa ufufuo, ni wazi kwamba hawatahitaji baada ya hapo kurudishwa upya kutokana na udhaifu wowote wa zamani kupitia muujiza wa kuponya. Kwa upande mwingine, kwa sababu ya ono lao la pekee la kuokoka Har–Magedoni, kurudishwa upya kimuujiza ni jambo ambalo wengi wa umati mkubwa watahitaji na watapokea. Kwa wazi, kusudi kuu la maponyo ya Yesu lilikuwa kuonyesha kwa kitia-moyo cha umati mkubwa tazamio lenye shangwe kwamba hawataokoka tu bali wataponywa baada ya hapo.

16. (a) Maponyo ya kimuujiza ya waokokaji wa Har–Magedoni huenda yakatukia wakati gani, kukiwa na tokeo gani? (b) Tutaendelea kushangilia katika tumaini gani wakati wa Mileani?

¹⁶ Maponyo ya kimuujiza ya jinsi hiyo, kwa kupatana na usababu wa kiakili, yatatukia miongoni mwa waokokaji wa Har–Magedoni muda mfupi tu baada ya Har–Magedoni na muda mrefu wa kutosha kabla ya ufufuo kuanza. (Isaya 33:24; 35:5, 6; Ufunuo 21:4; linganisha Marko 5:25-29.) Wakati huo watu watatupilia mbali miwani, bakora, mikongojo, viti-visukumwa, meno-bandia, misaada ya kusikia, na vitu kama hivyo. Ni sababu iliyoje ya kushangilia! Jinsi utendaji huo wa mapema wa kurudisha wa Yesu unavyopatana vyema na daraka la waokokaji wa Har–Magedoni wakiwa msingi wa dunia mpya! Magonjwa yenye kulemeza yataondolewa mbali ili waokokaji hao waweze kusonga mbele kwa bidii, wakitazamia kwa juhudi utendaji mzuri ajabu wa Mileani itakayonyooka mbele yao, bila kuzuiwa na dhara ambalo huenda ikawa ulimwengu wa zamani uliwataabisha kwalo. Naam, hata baada ya Har–Magedoni, umati mkubwa utaendelea kushangilia katika tumaini hili zuri ajabu la kupata uhai mkamilifu wa kibinadamu mwishoni mwa miaka elfu moja. Muda wote wa Mileani, watakuwa wakishangilia katika tumaini la kufikia mradi huo wenye furaha.

17. Ni mambo gani ya shangwe yatakayokuwako wakati kazi ya kurudisha Paradiso inapoendelea?

¹⁷ Ikiwa hilo ndilo tumaini lako, tafakari pia juu ya shangwe ya kushiriki katika kurudisha Paradiso duniani. (Luka 23:42, 43) Bila shaka waokokaji wa Har–Magedoni watasaidia kuisafisha dunia na hivyo kuandaa mahali pazuri ambapo wafu watafufuliwa. Maziko yangeweza kubadilishwa kwa vipindi vya kuwakaribisha wale waliofufuliwa, kutia na wapendwa wetu wenyewe waliokufa. Na ebu wazia ule ushirika wenye kutajirisha pamoja na wanaume na wanawake waaminifu wa kutoka karne zilizopita. Ni nani ambaye wewe wapenda hasa kuongea naye? Je! ni Habili, Henoko, Noa, Ayubu, Abrahamu, Sara, Isaka, Yakobo, Yusufu, Musa, Yoshua, Rahabu, Debora, Samsoni, Daudi, Eliya, Elisha, Yeremia, Ezekieli, Danieli, au Yohana Mbatizaji? Basi, tazamio hilo lenye kupendeza ni sehemu pia ya tumaini lako. Wewe utaweza kuzungumza nao, kujifunza kwao, na kufanya kazi pamoja nao katika kuifanya dunia yote kuwa paradiso.

18. Ni shangwe gani zaidi ambazo twaweza kutafakari?

¹⁸ Ebu wazia, pia, kile chakula kinachofaa, maji yaliyo safi, na hewa iliyo safi, dunia yetu ikiwa imerudishwa kwenye usawaziko wayo kamili wa kimazingira jinsi Yehova alivyoiumba iwe. Maisha wakati huo yatakuwa, si kuonea shangwe ukamilifu kwa kukaa tu, bali yatakuwa ya ushirika wenye utendaji na wenye umaana katika shughuli za shangwe. Tafakari juu ya jamii ya watu ya ulimwenguni pote iliyo huru na uhalifu, kujiona, wivu, ugomvi—udugu ambapo matunda ya roho yanasitawishwa na kutokezwa na wote. Inasisimua kama nini!—Wagalatia 5:22, 23.

Tumaini Linalofanya Maisha Yastahili Kuishi

19. (a) Kushangilia kunakotajwa kwenye Warumi 12:12 kwapasa kufanyike wakati gani? (b) Ni kwa nini twapaswa kupiga moyo konde tusiruhusu mizigo ya maisha isukume kando tumaini letu?

¹⁹ Matazamio yakiisha kutimizwa si tumaini tena, kwa hiyo kushangilia kunakotiwa moyo na Paulo kwenye Warumi 12:12 ni jambo lipasalo kufanyika sasa. (Warumi 8:24) Kufikiria tu baraka za wakati ujao zitakazoletwa na Ufalme wa Mungu ni sababu kwetu kushangilia katika tumaini hilo sasa. Kwa hiyo piga moyo konde usiruhusu mizigo ya maisha katika ulimwengu mchafu isukume kando tumaini lako tukufu. Usichoke wala kuzimia moyo, kuacha kuona tumaini liliko mbele. (Waebrania 12:3) Kuacha mwendo wa Kikristo hakutasuluhisha matatizo yako. Kumbuka, mtu akiacha kutumikia Mungu kwa sababu ya mambo yote yenye kulemeza ya maisha sasa, bado matatizo hayo yamemkwama, lakini anapoteza tumaini na hivyo kupoteza uwezekano wa kushangilia katika matazamio mazuri ajabu yaliyoko mbele.

20. Tumaini la Ufalme lina tokeo gani kwa wale wanaolikubali, na kwa nini?

²⁰ Watu wa Yehova wana kila sababu kuwa na maisha yenye furaha. Tumaini lao jangavu lenye kuchangamsha hufanya maisha yastahili kuishi. Nao hawanyimi wengine tumaini hilo lenye shangwe. La, wana tamaa ya kulishiriki na wengine. (2 Wakorintho 3:12) Hivyo, wale wanaokubali tumaini la Ufalme ni watu wenye uhakika, wanajaribu kutia wengine moyo kwa kuwaambia habari njema kutoka kwa Mungu. Hilo linajaza maisha ya wale wanaoukubali ujumbe huo wenye tumaini ambalo ndilo zuri kabisa lililopata kupewa ainabinadamu kwa ujumla wakati wowote—tumaini la Ufalme utakaorudisha Paradiso duniani. Ikiwa watu hawalikubali, sisi bado huendelea kushangilia kwa sababu tuna tumaini hilo. Wale wanaokataa kusikiliza ndio wanaopata hasara; si sisi.—2 Wakorintho 4:3, 4.

21. Ni nini kilicho karibu, na twapaswa kulikadiria tumaini letu thamani gani?

²¹ Ahadi ya Mungu ni: “Tazama, nayafanya yote kuwa mapya.” (Ufunuo 21:5) Ulimwengu mpya pamoja na mibaraka yao yote yenye kusisimua na isiyo na mwisho u karibu. Tumaini letu—la uhai mbinguni au kwenye dunia-paradiso—ni la thamani kubwa; lishikilie kweli kweli. Katika siku hizi za mwisho za hatari, zaidi ya wakati mwingine wowote, lione tumaini kuwa “nanga ya roho [nafsi, NW], yenye salama, yenye nguvu.” Tumaini letu likifungwa nanga katika Yehova, “mwamba wa milele—Mwamba wa zamani za kale,” kwa hakika tuna sababu yenye nguvu na yenye kuchochea sasa hivi ili “kushangilia katika tumaini” lililowekwa mbele yetu.—Waebrania 6:19; Isaya 26:4, The Amplified Bible.

[Maelezo ya Chini]

Maswali ya Kupitia

◻ Ni nini tumaini kubwa la ainabinadamu?

◻ Shangwe ya kweli ni nini?

◻ Maponyo ya kimuujiza ya waokokaji wa Har–Magedoni yaelekea kutukia wakati gani?

◻ Kwa nini tusiruhusu mizigo ya maisha isukume kando tumaini letu?

◻ Ni shangwe gani ambazo wewe unatazamia katika ulimwengu mpya?

[Picha katika ukurasa wa 9]

Je! kushuhudia aina za maponyo ambazo Yesu alifanya kusingeujaza moyo wako shangwe?

[Picha katika ukurasa wa 10]

Wale wanaoshangilia katika Ufalme hutia moyo wengine kwa kushiriki tumaini lao