“Mambo Yanayojenga Matarajio Yetu”
ILIKUWA asubuhi ya Jumapili yenye ujotojoto, Septemba 10, wakati watu 4,155 walipokusanyika katika Jumba la Kusanyiko la Mashahidi wa Yehova katika Jiji la Jersey, New Jersey, kwa ajili ya mazoezi ya kuhitimu kwa darasa la 87 la Shule ya Biblia ya Gileadi ya Mnara wa Mlinzi. Katika hudhurio walikuwako wanafunzi 24 na wageni wao walioalikwa pamoja na washirika wa jamaa ya Betheli kutoka Brooklyn na mashamba ya Sosaiti.
Wasikilizaji walitulizwa upesi saa 4:00 asubuhi na Albert Schroeder, aliyetumikia akiwa mwenyekiti kwa siku ile. Baada ya wimbo wa kufungua, sala ilitolewa na John Barr. Ndugu wote wawili ni washirika wa Baraza Linaloongoza. Ndugu Schroeder alitoa habari fupi kuhusu darasa na kusema kwamba wahitimu ‘walitayarishwa kushiriki katika utendaji wa Mashahidi wa Yehova wenye kuhusishwa katika dunia yote, sasa ukifanywa katika mabara 210.” Ndipo akaendelea na kufanya utangulizi wa kukaribisha wanenaji saba.
Robert Wallen, ambaye hufanya kazi katika Ofisi za Utekelezaji kwenye makao makuu ya Brooklyn, alifanya msingi wa kichwa chake, “Mwe na Upendo Mwingi Sana Sana kwa Mmoja na Mwingine,” utegemee 1 Petro 4:8, NW. Alisema kwamba wamisionari wahitaji kusaidiana, na kwa maana wanafunzi wote wa darasa hili walikuwa watu waliofunga ndoa, alielekeza maelezo yake hasa kwa watu waliofunga ndoa. “Ni lazima mke apende mume wake hata ingawa huenda mke akajifunza lugha ya kigeni haraka kuliko yeye,” akashauri. “Mke apaswa kuwa mwenye uelewevu na mwenye huruma. Pia, ni lazima mke ajaribu kumwelewa mume wake wakati mume huyo awapo na siku yake ya kupika kila juma!” (Kwa kawaida, kila mmisionari hugawiwa siku ya ukawaida kutayarisha milo ya siku hiyo kwa ajili ya wote wanaoishi katika kao la kimisionari.) Ndipo mnenaji alipoeleza vivuruga-fikira na matukio ya kuchekesha ambayo hupata waume fulani wanapokuwa wakijifunza kupika, kama lile lililohusu mume aliyetumia soda ya uokaji badala ya poda ya uokaji. Ndugu Wallen pia alionyesha wazi kwamba mume apaswa ‘kuwa mwepesi wa kufahamu mahitaji ya mke wake,’ kwa maana kiasi kikubwa sana cha wakati wa mume huenda kikatumiwa kutunza madaraka ya kundi. Kwa waume na wake pia, yeye alisema hivi: “Sikuzote mwe wenye kujenga; msitamke maneno ya mwelekeo mbaya, hata kwa kuambiana nyinyi kwa nyinyi. Epukeni kujitenga na wengine. Na mfanyapo makosa, yakubalini.”
Mnenaji aliyefuata, Daniel Sydlik, mshirika wa Baraza Linaloongoza, alichagua kichwa: “Endelezeni Moto wa Roho ya Mungu Ukiwa Hai,” msingi wacho ukiwa ni 1 Wathesalonike 5:19. “Moto waweza kupasha watu ujotojoto na pia waweza kuharibu,” yeye akasema. “Nyakati fulani wamisionari hutia moyo na nyakati fulani wao hutisha watu. Wakati mmoja mwanamume mzee wa Kiafrika alisema: ‘Puliza kwa uanana,’ kama vile kupuliza cheche moja ya moto ambayo unajaribu kuiwasha iwe hai! Wakati mnapoongea kuhusu mambo ambayo huenda mkayakuta katika mgawo wenu—mashimo yaliyoachwa wazi yakiwa na maji ya kinyesi, mainzi, magari yenye makelele, nchi mpya, dini msiyozoelea —onyesheni staha. Mtu hunasa mainzi wengi kwa kutumia asali kuliko wale ambao yeye huwanasa kwa kutumia siki (vinegari). Jifunzeni ‘kupuliza kwa uanana’ na mwendeleze moto wa roho ya Yehova ukiwa hai.”
Ndipo kichwa “Mruke-ruke Katika Mgawo Wenu kwa Idili na Tahadhari” kikakuzwa na Kenneth Flodin, mwangalizi wa Kao la Betheli kwenye Mashamba ya Mnara wa Mlinzi. Kwa maana Shule ya Gileadi sasa iko kwenye Mashamba ya Mnara wa Mlinzi, wahitimu wote walizoeana vizuri na Ndugu Flodin. Maeneo mawili ya tahadhari yalikuzwa katika hotuba yake: (1) ufuatiaji wa vitu vya kimwili na (2) maongeo ya mwelekeo mbaya na fikira za mwelekeo mbaya. “Epukeni ubinafsi na mwe wenye kujitoa nafsi” likawa ndilo shauri. “Tazameni mbele kwenye faraja na mambo mazuri yaliyo katika ulimwengu mpya; msiwe mnayatafuta sasa,” yeye akasema. Ili kusaidia wanafunzi waepuke kuwa na maoni ya mwelekeo mbaya-mbaya, mnenaji alinukuu Hesabu 13:28, 32. “Nyakati fulani,” yeye akasema,“watu huona kitu kile kile kimoja, na baadhi yao huwa na maoni ya mwelekeo mbaya, hali wengine huwa na maoni ya mwelekeo mzuri. Kama Kalebu wa zamani, tumainieni Yehova. Ambieni wengine fikira zenu za mwelekeo mzuri. Nanyi mkikabili maongeo ya mwelekeo mbaya, badilini habari ile ili kuepuka fikira za mwelekeo mbaya.”
Lloyd Barry, mshirika wa Baraza Linaloongoza na yeye mwenyewe akiwa mmisionari hapo zamani, alitoa ushauri wenye mafaa. “Upendo, shangwe, na amani ni sifa zenye kuhitajiwa sana na wamisionari wapya,” yeye akasema. “Nyinyi mtatambua wazi udhaifu mbalimbali wa wengine katika kao lenu la kimisionari, lakini kazeni fikira zenu juu ya udhaifu wenu wenyewe.” Yeye alikumbuka siku zake za mapema akiwa katika Japani wakati ambapo wamisionari waliona shangwe ya kula samaki kila siku, lakini ndipo wamisionari wapya walipowasili waliokuwa wakipata madhara mwilini kwa kula samaki. Kwa hiyo ratiba ya mapishi ilibadilishwa kwa sababu ya kuwapenda wapya hao. Pia alishauri hivi: “Endelezeni hisia yenu ya ucheshi; msiache jua lichwee matatizo yoyote mliyo nayo. Endelezeni amani katika kao, nanyi mtakuwa wenye furaha katika maisha yenu ya kimisionari.”—Waefeso 4:26.
Jack Redford, mmoja wa walimu wa Gileadi, ndipo akanena juu ya habari: “Yehova Atamaliza Mazoezi Yenu,” akifanya msingi wa matamko yake uwe 1 Petro 5:10, NW. Alisema hivi: “Yehova aweza kukuzoeza kwa kuruhusu hali zitokee ambazo ni ngumu kushughulika nazo. Sawa na vile alivyozoeza mitume kushughulika na mahitilafiano ya kiutu, ndivyo atakuzoeza wewe. Usikate tamaa wakati kunapokuwa tofauti za maoni. Uwe tayari kurekebisha utu wako. Kiburi hufanya hili liwe jambo gumu, lakini unyenyekevu hufanya liwezekane. Jifunze kuwa mwenye kubadilikana. Yehova atakuzoeza wewe pia uchukuliane vizuri na wengine. Ni kwamba tu ‘wewe usitie moyoni mwako maneno yote ambayo huenda watu wakasema’ juu yako.” (Mhubiri 7:21, 22) Pia mnyanyaso hutumika kuwa mazoezi. Wamisionari ambao wamevumilia mnyanyaso ni wenye furaha na hawana majuto, walicho nacho tu ni shangwe ya kwamba walizoezwa na mnyanyaso.
Ulysses Glass, mwalimu mwingine, ndipo alipotoa maneno yake ya mwisho kwa wahitimu. Alikaza fikira juu ya Waefeso 4:1-3, akipongeza darasa kwa kuonyesha sifa za muungamano zilizoelezwa humo na akawatia moyo waendelee kufanya hivyo, akisema: “Amani ni kiunganishi, nayo yahitajiwa sana kwa ajili ya muungamano.” Ndipo alipoendelea na Waefeso 4:4-6 na kufanya pitio la nguvu za kutia hofu ambazo roho ya Mungu inazo, akiwakumbusha wote kwamba “Yehova ndiye Chanzo cha nishati zote za msukumo. Sisi twapaswa kukaa tukimcha kwa hofu nyingi; ni jambo lenye hofu nyingi kuanguka ndani ya mikono yake.”—Waebrania 10:31.
Matarajio Makuu
Ndipo wote wakamsikiliza kwa upendezi mwingi Theodore Jaracz, mshirika wa Baraza Linaloongoza la Mashahidi wa Yehova, aliyenena kuhusu kichwa kikuu hiki: “Mambo Yanayojenga Matarajio Yetu.” Akisababu kuhusu 1 Wakorintho 2:9, alisema hivi: “Mstari huu hausemi juu ya vitu vya aina ya kimwili, kwa maana mstari ufuatao, 1 Wakorintho 2:10, NW, wanena juu ya ‘mambo [mafumbo, UV] ya Mungu yenye kina kirefu.’ Haya yalihusisha ‘hekima ya Mungu’ kuhusiana na ‘siri takatifu,’ ‘hekima yake,yenye kufichika’ iliyotoka ng’ambo ya huu mfumo wa jua, ndiyo, kutoka kwa Mungu mwenyewe.” (1 Wakorintho 2:7, NW) Ndipo wasikilizaji waliporejezwa kwenye Isaya 64:4, NW, iliyokuwa kikumbusha cha ‘kuendelea kumtarajia’ Mungu na mambo ambayo ametayarisha.
Lo, watu wa Mungu wana matarajio yaliyoje! Ndugu Jaracz alionyesha wazi jambo linalofuata: “Katika 1919 kulikuwako anguko la Babuloni Mkubwa; katika 1922 kukawa na lile himizo la kusisimua juu ya ‘kutangaza Mfalme na Ufalme,’ kuuhubiri ulimwenguni pote Ufalme uliosimamishwa imara; katika 1935 watu wa Mungu wakajifunza umaana wa ‘umati mkubwa’ kwenye Ufunuo 7:9, NW; katika 1943 wakaona Shule ya Gileadi ikianza kupeleka nje wamisionari kwenye miisho ya dunia; leo, katika 1989, nyinyi wahitimu mna pendeleo la kusimulia mambo mema kwa watu walio na hamu ya kusikia katika migawo yenu.”
Baada ya diploma (shahada) kutolewa, mmoja wa wanafunzi alisoma barua ya uthamini wenye kugusa moyo kutoka kwenye darasa hilo.
Alasiri, Lon Schilling, mratibu wa Halmashauri ya Mashamba ya Mnara wa Mlinzi, aliongoza Funzo la Mnara wa Mlinzi lililofupishwa. Ndipo wanafunzi wakatokeza programu ya kimuziki yenye upendezi mwingi na kuigiza baadhi ya mambo waliyoona katika utumishi wa shambani. Baada ya hapo, wahubiri wa huko wakatokeza drama thabiti yenye kichwa: “Kukabiliana na Vitendo vya Kiufundi vya Shetani.” Mwisho, baada ya kusikiliza sita kati ya wahitimu wapya hao wakihojiwa, lile songamano lenye furaha likaimba wimbo wa kumalizia na kufurahi sana kujiunga katika sala pamoja na yule msimamizi wa Shule ya Gileadi mwenye umri wa miaka 96, Frederick Franz.
[Sanduku katika ukurasa wa 23]
TAKWIMU ZA DARASA
Hesabu ya nchi zenye kuwakilishwa: 5
Hesabu ya nchi walizogawiwa: 10
Hesabu ya mwenzi na mwenzi waliofunga ndoa: 12
Hesabu ya jumla ya wanafunzi: 24
Umri wa wastani: 30.9
Miaka ya wastani katika ukweli: 13.4
Miaka ya wastani katika huduma ya wakati wote: 9.2
[Picha katika ukurasa wa 23]
Darasa Lenye Kuhitimu la 87 la Shule ya Biblia ya Gileadi ya Mnara wa Mlinzi
Katika orodha iliyo chini, mistari imepewa namba kutoka mbele kwenda nyuma, na majina yameorodheshwa kutoka kushoto kwenda kulia katika kila mstari.
(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.