Ukamilifu Katika Kumtumikia Mungu wa Ukweli

“Ee [Yehova], unifundishe njia yako; nitakwenda katika kweli yako.”—ZABURI 86:11.

 1, 2. (a) Ni mfano gani unaoweza kutolewa kuhusiana na uandalizi wa Mungu kwa wanadamu? (b) Maandiko yanaelezaje juu ya kazi ya mikono ya Mungu na upotovu wa wanadamu?

EBU wazia ukitembea katika jangwa kavu, lisilo na uhai. Kwa ghafula unafika kwenye nyumba nzuri ajabu. Ina kipepea-hewa na kipasha-joto, maji katika mabomba, na taa za umeme. Friji na kabati zake zimejaa chakula. Ghala lake lina mafuta na wingi wa vitu vingine. Je! wewe ungesema vyote hivyo vilijitokeza kwa bahati tu? Je, ungeshukuru kama mwenyewe angekuomba ukae katika nyumba hiyo uifurahie?

² Basi, dunia hii ya kufurahisha sana tunayoishi iko sawa na nyumba hiyo. Muda mrefu kabla wanadamu hawajaumbwa, Mungu wetu mwenye upendo aliitayarisha dunia hii iwe makao yetu na kuandaa kila kitu ambacho tungekihitaji ili kitufurahishe. (Isaya 45:12,18) Je, hatupaswi kumshukuru Mwandalizi huyo mkarimu? Yeye ndiye aliyeongoza kwa roho yake uandikaji wa maneno ya Biblia yaliyo kwenye Waebrania 3:4, HNWW: “Kila nyumba hujengwa na mjenzi fulani​—na Mungu ndiye mjenzi wa vitu vyote.” Jambo la kusikitisha ni kwamba wanadamu wachoyo wamebomoa-bomoa na wanaiharibu kazi ya mikono ya Mungu hapa duniani.​—Kumbukumbu la Torati 32:3-5.

 3. Biblia inasema nini juu ya ukarimu wa Yehova kuhusu sasa na wakati ujao?

³ Hata alipokuwa akisema na wenye kuupinga ukweli, mtume Paulo angeweza kusema hivi kuhusu Mungu: “Hakujiacha pasipo ushuhuda, kwa kuwa alitenda mema, akiwapeni mvua kutoka mbinguni, na nyakati za mavuno, akiwashibisha mioyo mioyo yenu chakula na furaha.” (Matendo 14:17) Si zaidi sana Yehova anavyoweza kubariki wale wanaomtumikia kwa ukamilifu! Ingawa huenda magumu na mizigo ya “siku za mwisho” hizi yakatusonga, kuna tumaini tukufu la kwamba karibuni Bwana Mwenye Enzi Kuu Yehova hakika ataandaa karamu ya vitu vizuri kweli kweli kwa ajili ya wale wanaompenda, afute machozi kutoka nyuso zote.​—2 Timotheo 3:1; Isaya 25:6-8.

Ajabu ya Akili ya Kibinadamu

 4. (a) Ni tatizo gani linalokabili wanasayansi fulani wa kompyuta? (b) Andiko la Yeremia 33:2, 3 linasema nini juu ya Mfanyi wa ubongo wa kibinadamu?

⁴ Kwa miaka fulani, wanasayansi wamekuwa wakijaribu kutengeneza kompyuta zinazoweza kufikiri. Lakini sasa wanakubali kwamba wanakabili kizuizi wakiwa katika hatua ile ile ya kwanza. Kwa sababu gani? Wanaungama kwamba muundo wa jicho la kibinadamu umewashinda. Ikiwa hawawezi kuiga jicho, wawezeje kuanza kuiga ubongo, nao watawezaje kweli kuiga uwezo wa akili? Ubongo wa kibinadamu unastaajabisha kama nini! Kila sekunde moja, vihabari milioni 100 vinaingia katika kiungo hicho, ili vichujwe na kutofautishwa na kutumiwa katika maisha ya kutenda kwa njia ya akili. Kompyuta iliyo ya hali ya juu zaidi haiwezi hata kukaribia kulingana na hayo. Huo ni ushuhuda bora kama nini kuonyesha hekima isiyo na kifani aliyoitumia Mungu mwenye upendo kutufanya! Tunaweza kuwa na furaha kwamba Mfanyi na Muumbaji wetu, Yehova Mungu, alitupa sisi akili ya kupambanua mambo, na kwamba tunaweza kutumia bongo zetu kujifunza ‘mambo makubwa na yaliyo magumu kujulikana’ ambayo anatufunulia katika wakati na njia yake mwenyewe.​—Yeremia 33:2, 3.

 5. (a) Ni muujiza gani wa ukuzi unaotukia katika wanadamu peke yao? (b) Maneno ya Elihu yanafaaje?

⁵ Muujiza wa ubongo wa kibinadamu unaanza katika tumbo la uzazi, chembe za ubongo zikiwa zinafanyizwa majuma matatu tu baada ya mimba kutungwa. Chembe hizo zinaongezeka haraka sana, nyakati nyingine kufikia chembe robo milioni kwa dakika moja. Baada ya kuzaliwa, ubongo wa mtoto unaongezeka ukubwa mara tatu katika mwaka wa kwanza, kuonyesha kwamba huo ni tofauti sana sana na ubongo wa mnyama ye yote, kutia na nyani. Baada ya muda mfupi mtoto wa kibinadamu anaweza kuelewa lugha mbalimbali, kuona sababu za mambo, kuthamini masuala ya adili na viwango vya kiroho. Uwezo huo mbalimbali ungaliwezaje kutokea kwa mageuzi ya wanyama wasio na akili? Kwa kufaa, Elihu alisema hivi: kuhusu Mungu na Mfanyi Mkuu wetu: “Atufundishaye zaidi ya hayawani wa nchi, na kutufanya wenye hekima kuliko ndege za angani.”​—Ayubu 35:10, 11.

 6. (a) Maandiko yanatoa sababu gani ya muundo wenye kustaajabisha wa mwanadamu? (b) Ni kwa njia gani tunaweza kutumia kwa upendo nguvu zetu tulizopewa na Mungu?

⁶ Ajabu hiyo, akili ya kibinadamu, inapatana na Mwanzo 1:27, panaposema: “Mungu akaumba mtu kwa mfano wake, kwa mfano wa Mungu alimwumba, mwanamume na mwanamke aliwaumba.” Je! hatupaswi kushukuru kwa ajili ya jinsi Mungu ametuumba? Daudi alishukuru. Alimsifu Yehova akisema: “[Nitakuhimidi] kwa kuwa nimeumbwa kwa jinsi ya ajabu ya kutisha. Matendo yako ni ya ajabu.” (Zaburi 139:14) Je sisi pia hatumhimidi Mungu kwa sababu iyo hiyo? Zaidi ya hilo, na tutumie ubongo na miili yetu tuliyopewa na Mungu tulikabili shtaka ambalo Shetani amemrushia Mungu wetu. Tunaweza kumtumikia Yehova tukiwa washika-ukamilifu.​—Mithali 27:11.

Shika Ukweli kwa Imara

 7, 8. (a) Ni tofauti gani zinazopasa kuonwa kati ya ukweli na nadharia? (b) Kwa habari ya mageuzi, watu wenye maarifa wanasema nini sasa? (c) Kwa sababu gani ni lazima mageuzi yahusianishwe na kuamini kipumbavu wala si imani halisi?

⁷ Ni lazima ukweli ushinde! Ni lazima sisi wapenda Yehova tushike ukweli kwa imara tunapotumia nguvu zetu za akili kuuchagua mwendo wa ukamilifu. Ukweli juu ya uumbaji umethibitishwa. Ni thabiti. Umestahimili jaribu la maelfu ya miaka. Baada ya kuwapo muda unaozidi kidogo karne moja, ule uwongo mkubwa, nadharia ya mageuzi, uko tayari kutupiliwa mbali. Hayo si maoni yetu tu. Ndiyo maoni ya wanasayansi wengi wenye akili zilizofunguka, wanasheria, wachunguzi, na watu wengine wenye maarifa. Likisema juu ya shambulio kwa “kanuni za mageuzi, kama zilivyowekwa na Darwin na wengine,” gazeti The New York Times lilijumlisha hali hiyo kwa kusema: “Uwanda huo umo katika vurugu.” Mwanasayansi mwenye maarifa aliandika hivi: “Tunakubali kuna mapengo makubwa katika ushuhuda wa mageuzi. . . . Ndiyo, mageuzi ni nadharia tu. Basi, kuamini mageuzi ni tendo la imani.”

⁸ Lakini je, kweli kuamini mageuzi ni tendo la imani? Badala ya kuwa hivyo, tungesema ni tendo la kuamini kipumbavu. Imani ina msingi imara. Andiko la Waebrania 11:1 (NW) linatuambia kwamba ni “wonyesho dhahiri wa mambo ya hakika.” Kuna ushuhuda mwingi sana kwamba msingi wa maandishi ya Biblia ni mambo ya hakika, na ni ukweli. (2 Timotheo 3:16, 17; Warumi 15:4) Kwa upande mwingine, kwa kadiri ambavyo wanamageuzi wanazidi kuchunguza mambo, ndivyo wanavyozidi kuvumbua mambo yenye kupingana ambayo wanajaribu kutetea kwa wenye kuamini kipumbavu.

Je! Nyani-Watu Walikuwako?

 9. Masalio ya nyani-mtu yanapatikana kwa wingi kadiri gani, nayo yanafaa kuwa wapi?

⁹ Katika miaka 130 ya kutafuta masalio yaliyo ndani ya ardhi ya kiunganishi chenye kukosekana kati ya nyani na mtu, wanamageuzi wamepata safu ya mifupa iliyo ya kusikitisha kwa udogo. Kulingana na gazeti Science Digest, “ushuhuda wote halisi tulio nao wa mageuzi ya binadamu ungali unaweza kutiwa ndani ya jeneza moja tu, na nafasi ibaki!” Bila shaka, humo ndimo unamofaa kuwekwa ule unaoitwa ushuhuda wa mageuzi ati, kisha kifuniko cha jeneza hilo kipigiliwe misumari ikazike kikiki!

10. Miundo mipya ya wachoraji juu ya nyani-watu ni ya unyofu wa kadiri gani?

¹⁰ Zile picha za magazeti za nyani-watu zinazotumiwa kukazia nadharia ya mageuzi ambayo msingi ni mawazo ya kujitungia tu, ambayo msingi wake ni vipande vichache vya fuvu la kichwa au taya. Kwa mfano, katika ukurasa wa kwanza wa gazeti The New York Times la Agosti 16. 1985, ilionekana “picha iliyochorwa na mchoraji kuhusu Amfipitheko, nyani wa hali ya juu anayesemekana kuwa ndiye wa zamani zaidi . . . ambaye kutokana naye wanadamu waligeuka wakawa walivyo.” Picha hiyo ilimwonyesha akiwa na kichwa na mikono yenye nywele-nywele. Picha hiyo iliundwa upya kutokana na nini? Makala iliyoambatanishwa nayo inasema: “Kutokana na sehemu ya nyuma ya taya la chini . . . pamoja na kipande cha taya la mbele kilichopatikana nusu-karne iliyopita.” Lakini je, kichwa kamili, nywele na vitu vinginevyo, vinaweza kweli kuundwa upya kwa kutegemea vipande hivyo viwili tu? Makala hiyo ilimtaja mchunguzi wa mianzo ya binadamu katika Chuo Kikuu cha Harvard akiyaita masalio hayo kuwa ni “kidimbwi cha nuru katika ekari nyingi zenye giza.” Lakini je, yanafaa kweli kulinganishwa na nuru?

11. Andiko la Isaya 59:15 linaweza kutumiwaje kuhusiana na wale wanaoitwa nyani-watu?

¹¹ Linaloweza kuitwa na wengine “kidimbwi cha nuru” ni fuvu la kichwa la yule “mtu” wa Piltdown. Fuvu hilo lilifanyiwa mazungumzo makuu na wanamageuzi kwa miaka 40 hivi, lakini mwaka 1953 likafunuliwa kuwa mkusanyo wa vipande vya mifupa, mingine ikiwa ni mifupa ya mnyama na mingine mifupa ya mwanadamu, iliyounganishwa pamoja kwa hila ili kudanganya! Kwa maneno ya nabii Isaya, inaweza kusemwa hivi juu ya nyani-watu hao wa nadharia: “Ukweli unathibitika kuwa unakosekana.”​—Isaya 59:15, NW.

Ulinganifu wa Kiunabii

12. Ezekieli aliona machukizo gani?

¹² Jumuiya ya Wakristo ya leo inayomkana Mungu ilitangulia kufananishwa na Yerusalemu wa nyakati za kale usio mwaminifu. Mwaka 612 K.W.K. ndipo Bwana Mwenye Enzi Kuu Yehova alipompa Ezekieli njozi ambamo Yeye alimsafirisha nabii wake kutoka Babuloni mpaka Yerusalemu. Huko, katika ua wa hekalu, Ezekieli aliona mfano wenye kuchukiza wa ibada ya sanamu. Ndipo Yehova alipomwagiza atoboe tundu ukutani kisha alipanue. Halafu akamwambia Ezekieli: “Ingia uyaone machukizo mabaya wanayoyafanya hapa.” Yeye aliona nini? Katika vyumba vya ndani-ndani vya nyumba ya ibada ya Yehova, “kila namna ya wadudu, na wanyama wachukizao, na taswira za vinyago vyote vya nyumba ya Israeli, zimepigwa ukutani pande zote.”​—Ezekieli 8:1, 7-10.

13. (a) Ni ulinganifu gani ulio katika Jumuiya ya Wakristo leo? (b) Yesu alikuwa na maoni gani juu ya masimulizi ya Biblia kuhusu uumbaji?

¹³ Kwa ulinganifu wa njozi hiyo, tunakuta hali ya kushtua kati ya makasisi wa Jumuiya ya Wakristo leo. Kwa sehemu kubwa, huyo “mtu wa kuasi” ameyaacha masimulizi ya Biblia juu ya uumbaji. (2 Wathesalonike 2:3) Au, kama wale waasi-imani wa siku za Ezekieli, makasisi wanajitahidi kuchanganya mageuzi na Biblia, wakisema kwamba sura zinazofungua kitabu cha Mwanzo ni hadithi tu au dhana. Kwa kuipuuza ile kanuni ya kisayansi inayodai kwamba jambo linaloelezwa kwa urahisi zaidi ndilo mara nyingi huwa la kweli, wanasema kwamba masimulizi ya Biblia ni rahisi mno kwao. Akili zao za kujitutumia kwa majivuno zinataka jambo lisiloelezeka kwa urahisi na lenye kutatiza. Wanajiinua juu ya Yesu Kristo, aliyeyataja masimulizi halisi ya Mwanzo kuwa “kweli.”​—Mathayo 19:4-6; Yohana 17:17.

14. Watu walio “wazee” wanashindwaje sasa kuongoza makundi yao, na matokeo yatakuwa nini?

¹⁴ Katika njozi yake, Ezekieli aliona “watu sabini wa wazee wa [nyumba ya] Israeli” wakiabudu mbele ya vile vifananishi vya “wadudu, na wanyama wachukizao.” (Ezekieli 8:10, 11) Jambo hilo linalinganika na wale makasisi wa kisasa wanaodai waziwazi kwamba wanadamu waligeuka kutokana na wanyama wa namna hiyo! “Wazee” hao wanapaswa kuwa wakiongoza makundi yao katika njia ya ukweli. Lakini je, maelezo ya Yesu katika Mathayo 15:14 hayawahusu wao? Yesu alisema: “Hao ni viongozi vipofu wa vipofu. Na kipofu akimwongoza kipofu mwenzake, watatumbukia shimoni wote wawili.” Wanaweza kulipata shimo hilo katika zile “ekari nyingi zenye giza” ambamo wanamageuzi wanapapasa-papasa wakitafuta njia.

15. Makasisi wanaounga mkono nadharia ya mageuzi wanatoaje uthibitisho zaidi wa kwamba wao ni sehemu ya “mtu wa kuasi”?

¹⁵ Ndipo Yehova alipomuuliza Ezekieli: “Mwanadamu, umeyaona wanayotenda wazee wa nyumba ya Israeli gizani, kila mtu ndani ya vyumba vyake vya sanamu? maana husema, [Yehova] hatuoni; [Yehova] ameiacha nchi hii.” (Ezekieli 8:12) Makasisi wanaounga mkono falsafa za kibinadamu wanathibitisha kwa njia inayofanana na hiyo kwamba wao ni sehemu ya “mtu wa kuasi.” Wanaiacha sheria ya Mungu, ambayo ni pamoja na kitabu cha Mwanzo. (Matendo 7:53) Wanaongoza makundi yao ndani ya giza la mawazo ya kilimwengu, kama yanavyoonyeshwa na nadharia ya mageuzi isiyothibitishwa na isiyoweza kuthibitishwa. Wao ‘wamependa giza kuliko nuru’ ya ukweli.​—Yohana 3:19.

16. Ni ufanani gani unaoonwa kati ya “wazee” wa siku za Ezekieli na makasisi wengi leo?

¹⁶ Sawa na vile wazee hao Wayahudi walivyoingiza ibada yao ya uwongo hekaluni Yerusalemu, ndivyo viongozi wa dini ya uwongo wanavyojaribu leo kulishikilia jina “Wakristo.” Lakini kuamini mageuzi si jambo la Kikristo. Kukubaliwa kwa nadharia hiyo kumefanya wengi wamwache Mungu. Kumeshiriki sana kuleta hali ya kujitegemea, jeuri, na uharamia katika karne yetu ya 20, huku mataifa na watu mmoja mmoja wakiuunga mkono msemo wa wanamageuzi wa “kusalimika kwa vilivyo bora na vyenye uwezo zaidi” tu. Nadharia ya mageuzi imefundisha kwamba mwanadamu hana daraka la kumjibu Muumba kwa matendo yake. (Warumi 9:28) Basi watu wamejiona huru kufanya mambo ki-vyao, bila fikira yo yote juu ya Mungu.

17. Ni katika mambo gani makasisi wanaounga mkono nadharia ya mageuzi wameanguka kosa kubwa?

¹⁷ Viongozi wa kidini wanaoyakubali mageuzi wanakuwa ni kama wanasema: “[Yehova] hatuoni; [Yehova] ameiacha nchi hii.” Kwa sababu ya kuishika sana falsafa hiyo wao hawajioni wakiwa na wajibu wo wote kwake. Kwa kweli, wazo lao juu ya Mungu linakosa ufahamu ulio wazi kwa sababu ya kuamini utatu wa miungu wa kifumbo, usioelezeka. Kupatana na maoni hayo, wangependa kuliondolea mbali jina lile lile la Mungu mmoja tu wa kweli, Yehova, bila kulitaja kamwe jina hilo kisha kuliondoa katika tafsiri zao za Biblia. Wanaogopa kwenda kinyume cha fundisho lao la kilimwengu linalopendwa sana la mageuzi.

18. Ni kutozwa hesabu gani kunakongojea nadharia ya mageuzi na wenye kuiunga mkono?

¹⁸ Kwa kufaa, Yehova anasema hivi kupitia nabii mwingine: “Kwa kuwa watu hawa hunikaribia na kuniheshimu kwa vinywa vyao, bali mioyo yao wamefarakana nami, na kicho chao walicho nacho kwangu ni maagizo ya wanadamu waliyofundishwa; kwa sababu hiyo mimi nitafanya tena kazi ya ajabu kati ya watu hawa, kazi ya ajabu na mwujiza; na akili za watu wao wenye akili zitapotea, na ufahamu wa wenye busara wao utafichwa.” (Isaya 29:13, 14) Karibuni sana nadharia ya mageuzi inayomdharau Mungu na pia wale wanaojiita Wakristo wenye kuifuata watakiona chamtemakuni wakati wa kutozwa hesabu katika siku ya hasira kali ya Yehova.​—Sefania 3:8.

Kutumikia kwa Ajili ya Ukweli

19. (a) Kwa sababu gani watu wengi wamefuata sana wazo la mageuzi? (b) Watu wapole wanaweza kufurahia nini sasa?

¹⁹ Hakika huu ni ulimwengu unaomkana Mungu! Dini ya uwongo na kiburi cha kisayansi chenye kuelekezwa vibaya ni mambo ambayo yameshiriki kuufanya ulimwengu uwe hivyo. Mambo yasiyo ya kiakili yaliyo katika mafundisho ya “mtu wa kuasi,” wale makasisi wa Jumuiya ya Wakristo, yamegeuza watu wengi waiache dini. Wengine wao wameyashikilia sana mageuzi, sawa na vile mtu anayekufa maji anavyoshikilia unyasi. Wengine wameifuata sana imani ya mageuzi kwa sababu kumkana Mungu kunawaondolea daraka la kumjibu Mungu-Muumba kwa matendo yao. (Linganisha Warumi 1:21-23.) Lakini walio wanyenyekevu na wapole kati ya wanadamu wanafurahi sana sasa kujua habari za Bwana Mwenye Enzi Kuu Yehova, habari za Mfalme Yesu Kristo anayetawala, na habari za makusudi ya Ufalme wa Mungu yatakayotimizwa kwa njia tukufu hivi karibuni,—Warumi 16:20; 1 Wakorintho 15:25, 26.

20. (a) Ni ahadi gani bora inayotimizwa hata sasa? (b) Ushuhuda wa jambo hilo ulionekanaje mwaka 1985? (c) Unaweza kuonyeshaje ukamilifu katika kumtumikia Mungu wa ukweli?

²⁰ Sisi Mashahidi wa Yehova tunafurahi kama nini kwamba tumeungana duniani pote katika kuutangaza ukweli! Roho ya Mungu inafanya kazi kwa nguvu nyingi pamoja na tengenezo lake, hivi kwamba tayari tunauona utimizo wa ahadi hii: “Dunia itajawa na kumjua [Yehova], kama vile maji yanavyoifunika bahari.” (Isaya 11:9) Ushahidi wa ulimwenguni pote uliotolewa na watu wa Yehova katika mwaka 1985 umetokeza mwenezo wa Biblia na vichapo 339,351,170 vinavyoeleza juu ya Biblia, katika lugha zaidi ya 200. Lilikuwa pendeleo la watu zaidi ya milioni tatu kati yetu kuishiriki kazi hiyo kubwa ya kuhubiri duniani pote, “peupe na nyumba kwa nyumba.” (Matendo 20:20, NW) Na tuendelee kubarikiwa sana na Yehova tunapojitahidi kushika ukamilifu katika kumtumikia yule Mungu wa ukweli.

Wewe Una Elezo Gani?

◻ Ni maajabu gani ya ubongo wa kibinadamu yanayoonyesha kuna Mfanyi mwenye hekima yote?

◻ Kwa sababu gani kosa kusema kwamba kuamini mageuzi ni tendo la imani?

◻ Kuna ushuhuda wa kadiri gani kwamba kweli walikuwako nyani-watu?

◻ Andiko la Ezekieli 8:7-12 linaweza kutumiwaje kuhusu viongozi fulani wa kidini leo?

◻ Ukamilifu katika kumtumikia Mungu wa ukweli unaleta matokeo gani?

[Sanduku katika ukurasa wa 21]

Life​—How Did It Get Here? By Evolution or by Creation?

Kitabu kinachoitwa hivyo kilitolewa mwaka 1985 na 1986 kwenye mingi ya “Washika Ukamilifu” Mikusanyiko ya Mashahidi wa Yehova duniani kote. Sasa kimetangazwa katika lugha zinazofuata: Kiingereza, Kichina, Kideni, Kiholanzi, Kifini, Kifaransa, Kijeremani, Kiitalia, Kijapani, Kireno na Kispania.

[Picha katika ukurasa wa 19]

Je! ni jambo la unyofu kwa wachoraji kuunda upya nyani-watu kutokana na vipande vichache vya mifupa?

[Picha katika ukurasa wa 20]

Mashahidi wa Yehova ‘wameijaza dunia’ maarifa ya Yehova