Kwa Nini Utimize Ahadi Zako?

“PIGIA kura mtu anayeahidi mambo machache zaidi; hatakutamausha sana,” akasema Bernard Baruch, aliyekuwa mshauri wa rais. Katika ulimwengu wa leo yaonekana kwamba ahadi hutolewa ili zivunjwe. Huenda zikawa nadhiri za ndoa, mapatano ya kibiashara, au ahadi za kutumia wakati mwingi zaidi pamoja na watoto. Maana ya ule msemo wa kimapokeo, “Muungwana ni kitendo,” hupuuzwa sana.

Bila shaka, watu wengi hawanuii kamwe kutimiza ahadi zao. Wengine hutoa haraka-haraka ahadi wasizoweza kutimiza au huvunja ahadi zao kwa sababu tu hilo ndilo jambo rahisi zaidi kufanya.

Ni kweli kwamba, hali zisizotazamiwa zikitokea huenda ikawa vigumu kutimiza ahadi. Lakini je, kwa kweli ahadi iliyovunjwa hutokeza madhara makubwa? Je, yakupasa kuchukua ahadi zako kwa uzito? Kuchunguza kifupi kielelezo cha Yehova Mungu kutatusaidia kuelewa ni kwa nini yatupasa kuzingatia jambo hili kwa uzito.

Yehova Hutimiza Ahadi Zake

Sisi huabudu Mungu ambaye jina lake lenyewe lahusiana sana na kutimizwa kwa ahadi zake. Katika nyakati za Biblia mara nyingi jina lilitoa taarifa fulani kuhusu mtu mwenyewe. Hilo pia ni kweli kuhusu jina Yehova, linalomaanisha “Yeye Husababisha Iwe.” Hivyo, jina la Mungu latia ndani wazo la kwamba Mungu atatimiza ahadi na makusudi yake.

Kwa kupatana na maana ya jina lake, Yehova alitimiza kila ahadi aliyotolea taifa la Israeli. Kuhusu ahadi hizo, Mfalme Solomoni alikiri hivi: “Na ahimidiwe BWANA, aliyewapa watu wake Israeli kustarehe, vile vile kama yote aliyoyaahidi. Halikukosa kupatikana neno lo lote katika ahadi yake njema, aliyoahidi kwa mkono wa Musa, mtumishi wake.”—1 Wafalme 8:56.

Yehova anatumainika kiasi kwamba mtume Paulo angeweza kusababu hivi: “Mungu alipotoa ahadi yake kwa Abrahamu, kwa kuwa hangeweza kuapa kwa yeyote aliye mkubwa zaidi, aliapa kwa yeye mwenyewe.” (Waebrania 6:13) Naam, jina la Yehova lenyewe na utu wake ni uhakikisho kwamba hatavunja ahadi zake, ingawa huenda ikamgharimu sana kuzitimiza. (Waroma 8:32) Ukweli wa kwamba Yehova hutimiza ahadi zake hutupa tumaini ambalo ni nanga ya nafsi yetu, au uhai wetu.—Waebrania 6:19.

Ahadi za Yehova na Wakati Wetu Ujao

Tumaini letu, imani yetu, na uhai wetu wenyewe, hutegemea kutimizwa kwa ahadi za Yehova. Tuna tumaini gani? “Ziko mbingu mpya na dunia mpya ambazo tunangojea kulingana na ahadi [ya Mungu], na katika hizo uadilifu utakaa.” (2 Petro 3:13) Maandiko pia hutupa sababu ya kuwa na imani kwamba “kutakuwa na ufufuo wa waadilifu na wasio waadilifu pia.” (Matendo 24:15) Nasi twaweza kuwa na hakika kwamba kuna mengi zaidi ya uhai wa sasa. Kwa kweli, kile mtume Yohana aitacho “jambo lililoahidiwa” ni “uhai udumuo milele.” (1 Yohana 2:25) Lakini ahadi za Yehova katika Neno lake si za wakati ujao tu. Zafanya maisha yetu ya kila siku yawe na maana hata sasa.

Mtunga-zaburi aliimba: “BWANA yu karibu na wote wamwitao, . . . naye atakisikia kilio chao na kuwaokoa.” (Zaburi 145:18, 19) Mungu pia hutuhakikishia kwamba “huwapa nguvu wazimiao, humwongezea nguvu yeye asiyekuwa na uwezo.” (Isaya 40:29) Na yafariji kama nini kujua kwamba ‘Mungu hatatuacha tushawishiwe kupita vile tuwezavyo kuhimili, bali pamoja na hicho kishawishi ataifanya pia njia ya kutokea’! (1 Wakorintho 10:13) Ikiwa sisi binafsi tumeona kutimizwa kwa yoyote ya ahadi hizo, tunajua kwamba Yehova aweza kutumainiwa kabisa. Kwa kuzingatia manufaa tupatazo kutokana na ahadi nyingi ambazo Mungu hutoa na kutimiza, yatupasa tuoneje ahadi zetu kwake?

Kutimiza Ahadi Zetu kwa Mungu

Bila shaka, kujiweka wakfu kwa Mungu ndiyo ahadi ya maana zaidi tuwezayo kutoa. Kwa kuchukua hatua hiyo, twadhihirisha kwamba twataka kumtumikia Yehova milele. Ingawa amri za Mungu hazilemezi, huenda sikuzote isiwe rahisi kufanya mapenzi yake, tunapoishi katika mfumo huu mwovu wa mambo. (2 Timotheo 3:12; 1 Yohana 5:3) Lakini mara ‘tuwekapo mkono wetu kwenye plau’ na kuwa watumishi waliojiweka wakfu wa Yehova na wanafunzi wa Mwana wake, Yesu Kristo, haitupasi kamwe kutazama mambo ya ulimwengu tuliyoacha nyuma.— Luka 9:62.

Tusalipo kwa Yehova, huenda tukahisi tunachochewa kumwahidi kwamba tutapambana ili kushinda udhaifu fulani, tusitawishe sifa fulani ya Kikristo, au kupanua sehemu fulani ya utendaji wetu wa kitheokrasi. Ni nini kitakachotusaidia tutimize ahadi hizo?—Linganisha Mhubiri 5:2-5.

Ahadi za moyo mweupe hutoka moyoni na akilini pia. Kwa hiyo, acheni tutegemeze ahadi zetu kwa Yehova kwa kumweleza hisia zetu katika sala, tukimweleza kwa unyofu hofu zetu, tamaa zetu, na udhaifu wetu. Kusali kuhusu ahadi kutaimarisha azimio letu la kuitimiza. Tunaweza kuziona ahadi zetu kwa Mungu kuwa deni. Madeni yanapokuwa makubwa, ni lazima malipo yafanywe polepole. Vivyo hivyo, itachukua muda kutimiza ahadi nyingi tunazomtolea Yehova. Lakini tukizitimiza kwa ukawaida kulingana na uwezo wetu, twaonyesha kwamba twamaanisha yale tusemayo, naye atatubariki kwa kufanya hivyo.

Twaweza kudhihirisha kwamba tunachukua ahadi zetu kwa uzito kwa kusali kuzihusu, labda kila siku. Hilo lamwonyesha Baba yetu wa kimbingu kwamba sisi ni wenye moyo mweupe. Pia litakuwa kikumbusha daima. Daudi alituachia kielelezo kizuri kuhusu jambo hilo. Alimwomba Yehova kwa bidii katika wimbo: “Usikie kilio changu, ee Mungu; usikilize sala yangu. . . . nitakuimbia nyimbo za sifa, nikizitekeleza ahadi zangu kila siku.”—Zaburi 61:1, 8, Biblia Habari Njema.

Kutimiza Ahadi Zetu Huimarisha Tumaini

Ikiwa ahadi zetu kwa Mungu hazipaswi kuchukuliwa vivi hivi, hatupaswi pia kuchukua vivi hivi ahadi tunazowatolea Wakristo wenzetu. Hatupaswi kuwatendea ndugu zetu tofauti na vile tunavyomtendea Yehova. (Linganisha 1 Yohana 4:20.) Katika Mahubiri yake ya Mlimani, Yesu alisema: “Acheni tu neno lenu Ndiyo limaanishe Ndiyo, La yenu, La.” (Mathayo 5:37) Njia moja ya ‘kufanya lililo jema kuelekea wale ambao katika imani ni jamaa zetu’ ni kuhakikisha kwamba ahadi yetu ni yenye kutumainika sikuzote. (Wagalatia 6:10) Kila ahadi tutimizayo huimarisha tumaini.

Mara nyingi madhara yanayotokezwa na kuvunja ahadi huwa makubwa inapohusu pesa. Awe analipa mkopo, kutoa huduma fulani, au kutimiza mapatano ya kibiashara, Mkristo apaswa kutimiza ahadi yake. Hilo humpendeza Mungu na huimarisha kutumainiana ambako ni muhimu ikiwa ndugu ‘watakaa pamoja, kwa umoja.’—Zaburi 133:1.

Hata hivyo, kushindwa kufuata mapatano, kwaweza kudhuru kutaniko na vilevile watu wanaohusika moja kwa moja. Mwangalizi mmoja anayesafiri asema: “Migogoro ya kibiashara—ambayo wakati wote husababishwa na mapatano ambayo angalau mshiriki mmoja afikiria kuwa yamevunjwa—mara nyingi hujulikana na wote. Jambo hilo hutokeza mgawanyiko kati ya akina ndugu, na huenda kukawa na hali ya mvutano katika Jumba la Ufalme.” Ni muhimu kama nini kufikiria kwa uangalifu mapatano yoyote tufanyayo na kuyaandika!a

Twapaswa pia kuwa wenye tahadhari tunapouza bidhaa za bei ghali au tunapopendekeza vitega-uchumi, hasa ikiwa sisi binafsi twanufaika na mapatano hayo. Vivyo hivyo, kuna uhitaji wa kuwa waangalifu sana tusitie chumvi manufaa ya bidhaa au dawa fulani au kuahidi faida ambazo kihalisi haziwezi kupatikana kutokana na vitega-uchumi. Upendo wapaswa kuwasukuma Wakristo waeleze kikamili hatari zozote zinazohusika. (Waroma 12:10) Kwa kuwa ndugu wengi hawana uzoefu wa kutosha wa kibiashara, huenda wakatumaini shauri letu kwa sababu tu tuna uhusiano katika imani. Ungekuwa msiba ulioje kama tumaini hilo lingevunjwa!

Tukiwa Wakristo, hatuwezi kuendesha biashara zetu kwa njia zisizo za haki au ambazo hupuuza masilahi halali ya wengine. (Waefeso 2:2, 3; Waebrania 13:18) Ili kupendelewa na Yehova tukiwa ‘wageni-waalikwa katika hema lake,’ yatupasa kuwa wenye kutumainika. ‘Ingawa tumeapa kwa hasara yetu, hatubadili maneno yetu.’—Zaburi 15:1, 4, linganisha NW.

Mwamuzi Yeftha wa Israeli aliweka nadhiri kwamba ikiwa Mungu angempa ushindi dhidi ya Waamoni, angemtoa dhabihu kwa Yehova mtu wa kwanza ambaye angemlaki baada ya kurudi kutoka vitani. Mtu huyo akawa mtoto wa pekee wa Yeftha, lakini yeye hakuvunja ahadi yake. Huku binti yake akiwa amekubali kwa dhati, Yeftha alimtoa atumikie daima kwenye patakatifu pa Mungu—dhabihu ambayo haikosi ilikuwa ghali na yenye kuumiza katika njia nyingi.—Waamuzi 11:30-40.

Waangalizi wa makutaniko hasa wana daraka la kufuata mapatano yao. Kulingana na 1 Timotheo 3:2, mwangalizi anapaswa kuwa “asiyelaumika.” Hiyo ni tafsiri ya neno la Kigiriki limaanishalo “-sioshutumika, -sio na kosa, -sioweza kulaumika.” “Ladokeza kwamba mtu huyo ana sifa nzuri, na pia anaistahili.” (A Linguistic Key to the Greek New Testament) Kwa kuwa mwangalizi apaswa kuwa asiyeshutumika, ahadi zake zapaswa kuwa zenye kutegemeka sikuzote.

Njia Nyingine za Kutimiza Ahadi Zetu

Twapaswa kuzionaje ahadi tunazotolea watu ambao si Wakristo wenzetu? “Acheni nuru yenu ing’ae mbele ya watu,” Yesu akasema, “ili wapate kuona kazi zenu bora na kumpa utukufu Baba yenu aliye katika mbingu.” (Mathayo 5:16) Kwa kuthibitisha kwamba twatimiza ahadi zetu, huenda tukafanya wengine wavutiwe na ujumbe wetu wa Kikristo. Licha ya kushuka kwa viwango vya unyofu ulimwenguni pote, watu wengi bado wanathamini uaminifu-maadili. Kutimiza ahadi zetu ni njia moja ya kuonyesha upendo wetu kwa Mungu na jirani na kuvutia wapenda-uadilifu.—Mathayo 22:36-39; Waroma 15:2.

Katika mwaka wao wa 1998 wa utumishi, Mashahidi wa Yehova walitumia muda wa saa zaidi ya bilioni moja wakitangaza hadharani habari njema za Ufalme wa Mungu. (Mathayo 24:14) Huenda baadhi ya mahubiri yetu yasisikilizwe ikiwa hatutimizi ahadi zetu katika shughuli za biashara au katika mambo mengine. Kwa kuwa tunamwakilisha Mungu wa kweli, kwa kufaa watu wanatarajia tutende kwa unyofu. Kwa kuwa wenye kutumainika na wanyofu, “[tuna]remba fundisho la Mwokozi wetu, Mungu, katika mambo yote.”—Tito 2:10.

Katika huduma yetu, tuna fursa za kutimiza ahadi zetu turudipo kuzuru wale wanaopendezwa na ujumbe wa Ufalme. Tukisema kwamba tutarudi, yatupasa kufanya hivyo. Kurudi vile tulivyoahidi ni njia moja ya ‘kutowanyima watu mema yaliyo haki yao.’ (Mithali 3:27) Dada mmoja alifafanua jambo hilo hivi: “Katika pindi kadhaa, nimekutana na watu wenye kupendezwa waliosema kwamba Shahidi aliwaahidi kurudi, asifanye hivyo. Bila shaka, najua kwamba huenda wenye nyumba hawakuweko nyumbani au huenda hali hazikumwezesha kurudi. Lakini singetaka yeyote aseme hivyo kunihusu, hivyo mimi hujitahidi kabisa kumkuta mtu huyo nyumbani tena. Naamini kwamba nikimtamausha mtu, jambo hilo litaleta sifa mbaya kwa Yehova na ndugu zangu wote.”

Katika visa fulani, huenda tusiwe na mwelekeo wa kurudi kwa sababu tumekata kauli kwamba mtu huyo hapendezwi kikweli. Dada huyohuyo aeleza hivi: “Sijaribu kuamua mtu anapendezwa kadiri gani. Mambo niliyojionea yamenifundisha kwamba mara nyingi mtu anaweza kuwa tofauti na vile aonekanavyo mara ya kwanza. Hivyo, mimi hujaribu kuwa na mtazamo ufaao, nikimwona kila mtu kuwa anaweza kuwa ndugu au dada.”

Katika huduma ya Kikristo na katika maeneo mengine mengi, twahitaji kuonyesha kwamba ahadi zetu zaweza kutumainiwa. Ni kweli kwamba ni rahisi zaidi kusema mambo fulani kuliko kuyafanya. Mwenye-hekima alisema hivi: “Wanadamu hutangaza kila mtu hisani yake mwenyewe; bali mtu aliye mwaminifu, ni nani awezaye kumpata?” (Mithali 20:6) Kwa kuazimia, twaweza kutimiza ahadi zetu.

Baraka Nyingi Kutoka kwa Mungu

Kutoa ahadi isiyo ya kweli kimakusudi ni ukosefu wa unyofu na kwaweza kufananishwa na kutoa hundi bila kuwa na pesa katika benki. Lakini sisi hupata thawabu na baraka iliyoje kwa kutimiza ahadi zetu! Tunapata baraka ya dhamiri njema kwa kuwa wenye kutumainika. (Linganisha Matendo 24:16.) Badala ya hisia zenye kusumbua za majuto, twahisi tumeridhika na wenye amani. Isitoshe, kwa kutimiza ahadi zetu, tunachangia umoja wa kutaniko, unaotegemea kutumainiana. “Usemi [wetu] wenye kweli” pia watupendekeza kuwa wahudumu wa Mungu wa kweli.—2 Wakorintho 6:3, 4, 7.

Yehova hutimiza ahadi zake, naye huchukia “ulimi wa uongo.” (Mithali 6:16, 17) Kwa kumwiga Baba yetu wa kimbingu, tunamkaribia zaidi. Bila shaka basi, tuna sababu ifaayo ya kutimiza ahadi zetu.

[Maelezo ya Chini]

[Picha katika ukurasa wa 10]

Yeftha alitimiza ahadi yake, hata ingawa ilimwumiza kufanya hivyo

[Picha katika ukurasa wa 11]

Ikiwa umeahidi kurudi, jitayarishe vizuri kufanya hivyo