Walifanya Hivyo kwa Sababu ya Upendo

MJANE mmoja mwaminifu, mkaribishaji-wageni katika Kanada aliku- wa akiwalea binti wadogo wanne wawe Wakristo wa kweli. Wazee kutanikoni wakagundua kwamba nyumba yake ilihitaji marekebisho makubwa. Mjane huyo hakuwa na pesa wala ujuzi wa kujifanyia kazi hiyo. Hivyo kulingana na kanuni iliyoko katika 1 Timotheo 5:9, 10, wazee walipanga kwa busara kazi hiyo ifanywe. Jinsi gani?

Mipango ilifanywa ili mjane huyo na watoto wake wasiwepo nyumbani kwa siku tano. Zaidi ya watu 80 kutanikoni waliunga mkono kazi hiyo kwa moyo wote, wakachanga vifaa, pesa, na wakati. Mara tu baada ya familia hiyo kuondoka, wafanyakazi wenye shauku walivamia nyumba hiyo kama nyuki. Nyumba yote ilirekebishwa. Nyufa zikazibwa na kupakwa rangi. Sakafu ilisuguliwa na kufanyizwa upya. Vigae vipya na zulia jipya ziliwekwa. Vifaa vyote vya umeme vikarekebishwa. Viti vipya viliwekwa mahali pa vilivyoharibika. Marekebisho yote yalifanywa kwa siku tano tu!

Mazingira yenye msisimuko na utendaji yalivutia sana majirani. Jirani mmoja mwenye umri wa miaka 80 alivutiwa sana na jitihada za Mashahidi hivi kwamba alikuja na burashi ya kupaka rangi na kusisitiza kwamba anataka kusaidia. Mwajiri wa mmoja wa wajitoleaji alichanga kibadilihewa cha jikoni. Mwajiri mwingine akachanga kabati mpya za jikoni. Mtu mmoja alivutiwa sana hivi kwamba alitaka kujua mengi juu ya Mashahidi wa Yehova. Alikubali kwa shauku kuchukua kichapo Unaweza Kuishi Milele Katika Paradiso Duniani.

Mshangao mkubwa ulionekana wazi kwenye nyuso za mjane huyo na binti zake waliporudi. Machozi yalitiririka, vicheko vilianguliwa, na kukawa na kukumbatiana kwingi—pindi isiyosahaulika ya upendo na hisia za Kikristo. Kwelikweli, upendo na kujali kikweli washiriki wa kutaniko wenye uhitaji ni ishara ya Ukristo wa kweli, kwa kuwa Paulo aliandika hivi: “Kwa hiyo kadiri tupatavyo nafasi na tuwatendee watu wote mema; na hasa jamaa ya waaminio.”—Wagalatia 6:10.