Vijana—Wekeni Msingi Mzuri kwa Ajili ya Wakati Ujao
1 Unakazia nini akilini mwako? Unafikiria nini? Je, unahangaikia tu mambo ya sasa, au ya wakati ujao na kukazia fikira ahadi za Mungu? (Mt. 6:24, 31-33; Luka 8:14) Imani yenye nguvu inahitajika ili utende kupatana na ahadi za Mungu, kama Abrahamu na Musa walivyofanya. (Ebr. 11:8-10, 24-26) Unawezaje kujenga imani kama hiyo na kuweka “msingi bora kwa ajili ya wakati ujao”?—1 Tim. 6:19.
2 Mtafute Yehova: Ikiwa unashiriki mambo ya kiroho kwa ukawaida pamoja na familia yako, unastahili pongezi. Lakini usifikiri kwamba utakuwa na imani yenye nguvu kwa sababu tu ya kufanya hivyo. Ili upate “kumjua Mungu,” wewe mwenyewe unapaswa kumtafuta Yehova. (Mit. 2:3-5; 1 Nya. 28:9) Mfalme Yosia alifanya hivyo akiwa kijana. Ijapokuwa alilelewa katika mazingira mabaya kiroho, “alianza kumtafuta Mungu wa Daudi babaye” alipokuwa na umri wa miaka 15.—2 Nya. 34:3.
3 Unawezaje kumtafuta Yehova? Kwa kuchunguza kinaganaga imani yako na ‘kujithibitishia mwenyewe’ kwamba ni ya kweli. (Rom. 12:2) Kwa mfano, je, unaweza kueleza yale ambayo Biblia inasema kuhusu damu au kuthibitisha kwamba Ufalme wa Mungu ulianza kutawala mbinguni mwaka wa 1914? Kupata “ujuzi sahihi wa kweli” ni muhimu katika kuweka msingi mzuri kwa ajili ya wakati ujao.—1 Tim. 2:3, 4.
4 Yosia alimtafuta Mungu na akafanikiwa. Kabla hajafikia umri wa miaka 20, aliondoa kwa ujasiri ibada ya uwongo nchini. (2 Nya. 34:3-7) Vivyo hivyo, matendo yako yatafanya maendeleo yako ya kiroho yawe dhahiri. (1 Tim. 4:15) Ikiwa wewe ni mhubiri asiyebatizwa, jitahidi kuboresha huduma yako. Usiridhike tu kutoa vichapo. Jiwekee mradi wa kutumia Biblia, kuwasadikisha watu, na kusitawisha upendezi. (Rom. 12:7) Hilo litakusaidia kukua kiroho.
5 Mpe Yehova Yaliyo Bora: Unapoonyesha wakfu wako kwa Yehova kwa kubatizwa, unakuwa mhudumu aliyewekwa rasmi wa Mungu. (2 Kor. 3:5, 6) Hivyo, unakuwa na fursa nyingi za kumtumikia Yehova wakati wote, kama vile kufanya upainia, kutumikia Betheli, kuwa mishonari au mtumishi wa kimataifa. Pia unaweza kuongeza huduma yako kwa kujifunza lugha nyingine au kwa kuhamia mahali penye uhitaji mkubwa.
6 Bila shaka, si wote wanaoweza kushiriki mapendeleo hayo ya utumishi, lakini kila mmoja wetu anaweza kumpa Yehova yaliyo bora. (Mt. 22:37) Hata hali zako ziweje, fanya kumtumikia Yehova kuwe jambo kuu maishani mwako. (Zab. 16:5) Kwa kufanya hivyo, utakuwa ukijiwekea msingi mzuri kwa ajili ya wakati ujao.
[Maswali ya Funzo]
1. Kwa nini vijana Wakristo wanahitaji kujenga imani yenye nguvu?
2. Twajifunza nini kutokana na Mfalme Yosia?
3. Vijana Wakristo leo wanawezaje kumtafuta Yehova?
4. Wahubiri wasiobatizwa wanawezaje kufanya maendeleo yao yawe dhahiri?
5. Wakristo waliobatizwa wana fursa zipi za kuongeza huduma yao?
6. Sote twawezaje kujiwekea msingi mzuri kwa ajili ya wakati ujao?