Maswali Kutoka kwa Wasomaji

Manufaa za utumishi mbalimbali wa ukuhani wa cheo cha juu wa Kristo Yesu zinazotajwa kwenye Waebrania 4:15, 16, hutumikaje kwa “kondoo wengine” sasa?

Ingawa fungu la Yesu akiwa Kuhani wa Cheo cha Juu lina umaana hasa kwa wale watakaokuwa naye mbinguni, Wakristo wenye tumaini la kidunia hunufaika hata sasa kutokana na utumishi wa kikuhani wa Yesu.“

Tangu Adamu, wanadamu wametwikwa dhambi. Tunapatwa na kutokamilika kulikorithiwa, kama ilivyokuwa na Waisraeli. Wao waligeukia mfuatano mrefu wa makuhani wa cheo cha juu na makuhani washiriki, waliotoa dhabihu kwa ajili yao wenyewe na kwa ajili ya watu. Baadaye, Yesu alitiwa mafuta “kwa mfano wa Melkizedeki.” Baada ya kufufuliwa, Yesu alitokea mbele ya Yehova ili kutoa thamani ya dhabihu yake ya kibinadamu iliyo kamilifu.—Zaburi 110:1, 4.

Hilo lamaanisha nini kwetu leo? Katika barua yake kwa Waebrania, Paulo alizungumzia utumishi wa Yesu akiwa Kuhani wa Cheo cha Juu. Kwenye Waebrania 5:1, twasoma hivi: “Kila kuhani mkuu [“kuhani wa cheo cha juu,” NW] aliyetwaliwa katika wanadamu amewekwa kwa ajili ya wanadamu katika mambo yamhusuyo Mungu, ili atoe matoleo na dhabihu kwa ajili ya dhambi.” Halafu, katika mstari wa 5 na 6, Paulo alionyesha kwamba Yesu alikuja kuwa kuhani wa cheo cha juu, hilo likiweza kuleta manufaa kwetu.

Kwa njia gani? Paulo aliandika: “Ingawa ni Mwana, alijifunza kutii kwa mateso hayo yaliyompata; naye alipokwisha kukamilishwa, akawa sababu ya wokovu wa milele kwa watu wote wanaomtii.” (Waebrania 5:8, 9) Mara ya kwanza, mstari huo waweza kutufanya tufikiri jinsi tutakavyonufaika katika ulimwengu mpya, wakati ambapo wale walio waaminifu-washikamanifu kwa Mungu na Yesu wataondolewa hali yao ya dhambi na kupata uhai wa milele. Hilo ni taraja halali, lenye msingi wa thamani ya ukombozi ya dhabihu ya Yesu na utumishi wake akiwa Kuhani wa Cheo cha Juu.

Lakini, kwa kweli twaweza kunufaika sasa kutokana na fungu lake au utumishi wake akiwa Kuhani wa Cheo cha Juu. Angalia Waebrania 4:15, 16, NW; “Tuna kuhani wa cheo cha juu, si mmoja asiyeweza kushiriki hisia za udhaifu wetu mbalimbali, bali mmoja ambaye amejaribiwa katika mambo yote kama sisi wenyewe, lakini bila kufanya dhambi. Kwa hiyo, na tukaribie kwa uhuru wa usemi kwenye kiti cha ufalme cha fadhili isiyostahiliwa, ili tuweze kupokea rehema na kupata fadhili isiyostahiliwa kwa msaada wakati ufaao.” Huo “wakati ufaao” ungekuwa wakati gani? Ni wakati tunapohitaji rehema na fadhili isiyostahiliwa. Kwa sababu hatujakamilika, sisi sote twapaswa kuhisi uhitaji huo sasa.

Waebrania 4:15, 16 lakazia kwamba Yesu—sasa akiwa kuhani mbinguni—pia amepata kuwa binadamu, kwa hiyo aweza kuwa mwenye hisia-mwenzi. Kuelekea nani? Kutuelekea. Wakati gani? Sasa. Alipokuwa binadamu, Yesu aliona mikazo na mibano iliyo kawaida kwa binadamu. Pindi kwa pindi, Yesu aliona njaa na kiu. Na ajapokuwa mkamilifu, yeye alichoka. Hilo lapasa litutie moyo. Kwa nini? Kwa sababu Yesu aliona uchovu wa asili, yeye aweza kuelewa vile tunavyohisi mara nyingi. Kumbuka, pia, kwamba ilimbidi Yesu akabili mabishano ya kuoneana wivu miongoni mwa mitume wake. (Marko 9:33-37; Luka 22:24) Ndiyo, yeye alitamaushwa. Je, hilo halipasi kutupa uhakika kwamba yeye aweza kuelewa wakati tunapotamauka, au kuvunjika moyo? Kwa kweli ndiyo.

Unapokuwa umevunjika moyo, waweza kufanya nini? Je, Paulo alisema kwamba ungoje tu hadi Kuhani wako wa Cheo cha Juu, Yesu, akusaidie uwe mkamilifu katika akili na mwili? La. Paulo alisema hivi: “Ili tuweze kupokea rehema na kupata fadhili isiyostahiliwa kwa msaada wakati ufaao,” na hiyo yatia ndani wakati huu. Na zaidi, Yesu alipokuwa binadamu, yeye alipatwa na mateso na magumu, ‘akijaribiwa katika mambo yote kama sisi wenyewe.’ Kwa hiyo tunapokabili mambo hayo, yeye yuko tayari kutusaidia, kwa kutegemea uelewevu wake wa yale yanayotupata. Je, hilo halikuvuti kwake?

Sasa angalia mstari wa 16. Paulo asema kwamba sisi—na hii yatia ndani watiwa-mafuta na pia wale wa kondoo wengine—twaweza kumkaribia Mungu kwa uhuru wa usemi. (Yohana 10:16) Mtume hakumaanisha kwamba twaweza kusema lolote lile tutakalo katika sala, hata kusema mambo ya hasira au yasiyofaa. Badala ya hivyo, kwa msingi wa dhabihu ya Yesu na fungu lake akiwa Kuhani wa Cheo cha Juu, twaweza kumkaribia Mungu hata ingawa sisi ni watenda-dhambi.

Njia nyingine ambayo twaweza kunufaika hata sasa kutokana na Kuhani wetu wa Cheo cha Juu, Yesu Kristo, yahusu dhambi, au makosa yetu. Kwa wazi hatutazamii kwamba katika mfumo huu wa sasa Yesu angetumia kwetu ustahili kamili wa dhabihu yake. Hata kama angefanya hivyo, bado hatungepata uhai wa milele. Wakumbuka kile kisa kilichorekodiwa kwenye Luka 5:18-26, kilichohusu yule mtu aliyepooza ambaye kitanda chake kiliteremshwa kupitia sehemu iliyo wazi darini? Yesu alimwambia hivi: “Ee, rafiki, umesamehewa dhambi zako.” Hilo halikumaanisha dhambi fulani hususa zilizosababisha kule kupooza. Ni lazima iwe lilimaanisha dhambi za mtu huyo kwa ujumla, na kwa kadiri fulani hiyo ingeweza kutia ndani kutokamilika kwake kulikorithiwa, kunakosababisha misononeko.

Kwa kutegemea dhabihu ambayo angetoa, Yesu angeweza kupeleka mbali dhambi za mwanadamu, kama vile mbuzi wa Azazeli alivyopeleka mbali dhambi za Israeli katika Siku ya Upatanisho. (Mambo ya Walawi 16:7-10) Lakini, yule mtu aliyepooza alikuwa angali binadamu. Angetenda dhambi tena, na baadaye alikufa, kama ilivyo lazima kwa watenda dhambi. (Warumi 5:12; 6:23) Yale ambayo Yesu alisema hayakumaanisha kwamba mtu huyo alipata uhai wa milele mara hiyo. Bali mtu huyo alibarikiwa na kadiri fulani ya msamaha wakati huo.

Sasa fikiria hali yetu. Tukiwa wasiokamilika, sisi hukosea kila siku. (Yakobo 3:2) Twaweza kufanya nini juu ya hilo? Mbinguni, tuna Kuhani wa Cheo cha Juu mwenye rehema ambaye kupitia kwake, twaweza kumkaribia Yehova katika sala. Ndiyo, kama vile Paulo alivyoandika, sisi sote twaweza ‘kukaribia kwa uhuru wa usemi kwenye kiti cha ufalme cha Mungu cha fadhili isiyostahiliwa, ili tuweze kupokea rehema na kupata fadhili isiyostahiliwa kwa msaada wakati ufaao.’ Kwa hiyo, wote leo ambao ni wa wale kondoo wengine kwa kweli wanapata manufaa nzuri ajabu, kutia na dhamiri safi, kutokana na utumishi wa ukuhani wa cheo cha juu cha Kristo.

Wakristo wote wenye tumaini la kidunia waweza kutazamia manufaa zenye utukufu zaidi katika ulimwengu mpya unaokuja. Kisha Kuhani wetu wa Cheo cha Juu wa kimbingu atatumia kikamili ustahili wa dhabihu yake, utakaotokeza msamaha kabisa wa dhambi. Pia atatokeza manufaa zilizo kubwa zaidi kwa kutunza afya ya kimwili na kiroho ya watu. Na Yesu atapanua sana elimu ya watu wa Mungu duniani, kwa kuwa kufundisha Sheria kulikuwa daraka kubwa la makuhani katika Israeli. (Mambo ya Walawi 10:8-11; Kumbukumbu la Torati 24:8; 33:8, 10) Kwa hiyo, tujaponufaika kutokana na utumishi wa kikuhani wa Yesu sasa, mengi zaidi yatungoja!