Usife Moyo Katika Shindano la Mbio la Kupata Uhai!
“Acheni tukimbie kwa uvumilivu shindano la mbio lililowekwa mbele yetu.”—WAEBRANIA 12:1.
1, 2. Ni matukio gani yenye kusisimua ambayo yamesisimua watumishi wa Yehova katika siku hizi za mwisho?
TWAISHI katika nyakati zenye kusisimua na zilizo ngumu. Mwaka wa 1914, miaka zaidi ya 80 iliyopita, Yesu alitawazwa kuwa Mfalme wa Ufalme wa kimbingu wa Mungu. “Siku ya Bwana” pamoja na “wakati wa mwisho” wa mfumo huu wa mambo zilianza. (Ufunuo 1:10; Danieli 12:9) Tangu wakati huo shindano la mbio la kupata uhai la Mkristo limepata kuwa na hima yenye kuongezeka. Watumishi wa Mungu wamejikakamua kisulubu ili kwenda sambamba na gari la kimbingu la Yehova, tengenezo lake la kimbingu, linalosonga mbele bila kuzuilika ili kutimiza makusudi ya Yehova.—Ezekieli 1:4-28; 1 Wakorintho 9:24.
2 Je, watu wa Mungu wamepata shangwe ‘wakimbiapo katika shindano la mbio’ kuelekea uhai udumuo milele? Kwa kweli, ndiyo! Wamesisimuka kuona kukusanywa kwa wanaobaki wa ndugu za Yesu, nao washangilia kung’amua kwamba kutiwa muhuri kwa mwisho kwa wanaobaki wa wale 144,000 kunakaribia kukamilika. (Ufunuo 7:3, 4) Isitoshe, wasisimuka kufahamu kwamba Mfalme aliyewekwa rasmi wa Yehova ametia mundu wake ndani ili avune “mavuno ya dunia.” (Ufunuo 14:15, 16) Nayo ni mavuno yaliyoje! (Mathayo 9:37) Kufikia sasa, nafsi zaidi ya milioni tano zimekusanywa—“umati mkubwa, ambao hakuna mtu aliyeweza kuuhesabu, kutoka katika mataifa yote na makabila na vikundi vya watu na lugha.” (Ufunuo 7:9) Hakuna mtu awezaye kusema umati huo utakuwa mkubwa kadiri gani hatimaye, kwa kuwa hakuna mtu awezaye kuuhesabu.
3. Lazima sikuzote tujaribu kusitawisha roho ya shangwe kujapokuwako nini?
3 Ni kweli, Shetani hujaribu kutufanya tujikwae au tupunguze mwendo tukimbiapo kasi katika hilo shindano la mbio. (Ufunuo 12:17) Wala haijawa rahisi kufuliza kukimbia kujapokuwako vita, njaa kuu, magonjwa ya kuambukiza, na shida nyingine zote ambazo hutia alama wakati wa mwisho. (Mathayo 24:3-9; Luka 21:11; 2 Timotheo 3:1-5) Bado, mioyo yetu yaruka kwa shangwe mwisho wa shindano la mbio ukaribiapo zaidi. Twajitahidi kuidhihirisha roho ambayo Paulo aliwahimiza Wakristo wenzake katika siku yake wawe nayo: “Sikuzote shangilieni katika Bwana. Mara moja tena hakika nitasema, Shangilieni!”—Wafilipi 4:4.
4. Wakristo Wafilipi walidhihirisha roho ya aina gani?
4 Hapana shaka kwamba Wakristo ambao Paulo aliandikia maneno hayo walikuwa wakipata shangwe katika imani yao, kwa kuwa Paulo aliwaambia hivi: “Endeleeni kushangilia katika Bwana.” (Wafilipi 3:1) Wafilipi walikuwa kutaniko lenye ukarimu, na lenye upendo ambalo lilitumikia kwa bidii na kwa idili. (Wafilipi 1:3-5; 4:10, 14-20) Lakini si Wakristo wote wa karne ya kwanza waliokuwa na roho hiyo. Kwa kielelezo, baadhi ya Wakristo Wayahudi ambao Paulo aliandikia kitabu cha Waebrania walikuwa wenye kuhangaisha.
“Kukazia Uangalifu Zaidi Kuliko Ilivyo Kawaida”
5. (a) Wakristo Waebrania walikuwa na roho gani kutaniko la kwanza la Kikristo lilipofanyizwa? (b) Fafanua roho ya Wakristo fulani Waebrania wapata mwaka wa 60 W.K.
5 Kutaniko la kwanza la Kikristo katika historia ya ulimwengu lilifanyizwa na Wayahudi wa asili na wageuzwa-imani na lilianzishwa katika Yerusalemu mwaka wa 33 W.K. Lilikuwa na roho ya aina gani? Mtu ahitaji tu kusoma sura za kwanza za kitabu cha Matendo ili ajue juu ya idili na shangwe ya kutaniko hilo, hata lilipokabiliwa na mnyanyaso. (Matendo 2:44-47; 4:32-34; 5:41; 6:7) Hata hivyo, miongo ilipopita, hali ilibadilika, na kwa wazi Wakristo wengi walio Wayahudi walipunguza mwendo katika shindano la mbio la kupata uhai. Kitabu kimoja cha marejezo chasema hivi juu ya hali yao kama vile ilivyokuwako wapata mwaka wa 60 W.K.: “Hali ya ugoigoi na unyong’onyevu, ya matarajio ambayo hayakutimizwa, matumaini yaliyoahirishwa, kushindwa kimakusudi na kukosa uaminifu katika mambo ya kila siku. Walikuwa Wakristo lakini walikuwa na uthamini mdogo kwa utukufu wa mwito wao.” Wakristo watiwa-mafuta wangewezaje kuwa hivyo? Uchunguzi wa sehemu za barua ya Paulo kwa Waebrania (iliyoandikwa wapata mwaka wa 61 W.K.) watusaidia kujibu swali hilo. Uchunguzi wa namna hiyo utatusaidia sisi sote leo kuepuka kuzama katika hali hiyohiyo ya kiroho iliyo dhaifu.
6. Ni zipi baadhi ya tofauti kati ya ibada chini ya Sheria ya Musa na ibada itegemezwayo juu ya imani katika Yesu Kristo?
6 Wakristo Waebrania walitoka katika Dini ya Kiyahudi, mfumo uliodai kuitii Sheria ambayo Yehova alitoa kupitia Musa. Sheria hiyo yaonekana ilikuwa imeendelea kuwa yenye kuvutia kwa Wakristo wengi walio Wayahudi, labda kwa sababu kwa karne nyingi ilikuwa imekuwa njia ya pekee ya kumkaribia Yehova, na ilikuwa mfumo wa ibada wenye kuvutia, ukiwa na ukuhani, dhabihu za kawaida, na hekalu lenye kujulikana ulimwenguni kote lililokuwa Yerusalemu. Ukristo ni tofauti. Huo wadai kuwa na maoni ya kiroho kama yale ya Musa, “ali[ye]kaza macho kuelekea malipo ya thawabu [yaliyokuwa bado ya wakati ujao]” na “[ku]endelea akiwa imara kama ambaye anaona Yeye asiyeonekana.” (Waebrania 11:26, 27) Kwa wazi Wakristo wengi walio Wayahudi walikosa maoni ya kiroho ya namna hiyo. Walikuwa wachechemea badala ya kukimbia katika njia yenye kusudi.
7. Huenda mfumo ambao tumetoka kwake ukaathirije jinsi tukimbiavyo katika shindano la mbio la kupata uhai?
7 Je, kuna hali kama hiyo leo? Bila shaka, hali leo haziko vivyo hivyo kabisa. Hata hivyo, Wakristo hutoka katika mfumo wa mambo ambao hujisifu sana. Ulimwengu hutoa fursa mbalimbali zenye kusisimua, lakini wakati uleule, huweka juu ya watu madaraka yenye kulemea. Kwa kuongezea, wengi wetu huishi katika nchi ambamo mtazamo wenye kutilia shaka ni wa kawaida na ambamo watu wana mtazamo wenye ubinafsi, wa kujitanguliza katika mambo. Tukijiruhusu tuathiriwe na mfumo kama huo, ‘macho ya moyo wetu’ yangeweza kutiwa giza kwa urahisi. (Waefeso 1:18) Tutakimbiaje vizuri katika shindano la mbio la kupata uhai ikiwa hatuwezi tena kufahamu waziwazi tunakokwenda?
8. Ni zipi baadhi ya njia ambazo katika hizo Ukristo ni mkuu kuliko ibada chini ya Sheria?
8 Ili kuwachochea Wakristo walio Wayahudi, Paulo aliwakumbusha juu ya ubora wa mfumo wa Kikristo uliopita Sheria ya Kimusa. Ni kweli, wakati taifa la Israeli la kimwili lilipokuwa ni watu wa Yehova chini ya Sheria, Yehova alisema nalo kupitia manabii waliopuliziwa. Lakini, asema Paulo, leo yeye husema “kwa njia ya Mwana, aliyemweka rasmi kuwa mrithi wa vitu vyote, na ambaye kupitia yeye aliifanya mifumo ya mambo.” (Waebrania 1:2) Zaidi, Yesu ni mkuu zaidi ya wafalme wote wa nasaba ya Daudi, “wenzake.” Yeye hata yuko juu zaidi ya malaika.—Waebrania 1:5, 6, 9.
9. Kwa nini sisi, kama vile Wakristo walio Wayahudi wa siku ya Paulo, twahitaji “kukazia uangalifu zaidi kuliko ilivyo kawaida” yale Yehova asemayo?
9 Kwa hiyo, Paulo aliwashauri Wakristo walio Wayahudi hivi: “Ni lazima kwetu kukazia uangalifu zaidi kuliko ilivyo kawaida mambo yaliyosikiwa nasi, ili tusipate kamwe kupeperushwa mbali.” (Waebrania 2:1) Ijapokuwa kujifunza juu ya Kristo kulikuwa baraka ya ajabu sana, mengi zaidi yalihitajiwa. Walihitaji kukazia uangalifu sana Neno la Mungu ili kukinza uvutano wa ulimwengu wa Wayahudi uliowazingira. Sisi pia twahitaji “kukazia uangalifu zaidi kuliko ilivyo kawaida” yale Yehova asemayo kwa sababu ya propaganda ya daima ambayo sisi huwekwa wazi kwayo kutoka katika ulimwengu huu. Hilo lamaanisha kusitawisha mazoea mazuri ya kujifunza na kudumisha ratiba nzuri ya usomaji wa Biblia. Kama vile Paulo asemavyo baadaye katika barua yake kwa Waebrania, hilo pia lamaanisha kuwa wa kawaida kwenye mikutano na katika kutangazia wengine imani yetu. (Waebrania 10:23-25) Utendaji huo utatusaidia kuendelea kuwa chonjo kiroho ili tusisahau tumaini letu lenye utukufu. Tukijaza akili zetu mawazo ya Yehova, hatutashindwa au kukosa usawaziko kwa sababu ya chochote ambacho ulimwengu huu waweza kutufanyia.—Zaburi 1:1-3; Mithali 3:1-6.
“Fulizeni Kuhimizana kwa Bidii Mtu na Mwenzake”
10. (a) Ni nini kiwezacho kumpata mtu asiyekazia Neno la Yehova uangalifu zaidi kuliko ilivyo kawaida? (b) Twaweza ‘kufulizaje kuhimizana kwa bidii mmoja na mwenzake’?
10 Tusipokazia uangalifu sana mambo ya kiroho, huenda ahadi za Mungu zikaja kuonekana sana kuwa zisizo halisi. Jambo hilo lilitukia hata katika karne ya kwanza wakati ambapo makutaniko yalifanyizwa na Wakristo watiwa-mafuta peke yao na baadhi ya mitume walikuwa bado hai. Paulo aliwaonya Waebrania hivi: “Jihadharini, akina ndugu, kwa kuhofu kusije kamwe kukasitawi katika yeyote kati yenu moyo mwovu unaokosa imani kwa kujiondoa kwa Mungu aliye hai; lakini fulizeni kuhimizana kwa bidii mtu na mwenzake kila siku, maadamu yaweza kuitwa ‘Leo,’ kwa kuhofu yeyote kati yenu asije akafanywa kuwa mgumu kwa nguvu ya udanganyifu ya dhambi.” (Waebrania 3:12, 13) Usemi wa Paulo “jihadharini” wakazia uhitaji wa kuwa chonjo. Hatari yatisha! Ukosefu wa imani—“dhambi”—huenda ikasitawi mioyoni mwetu, nasi tungeweza kujiondoa kwa Mungu badala ya kumkaribia zaidi. (Yakobo 4:8) Paulo atukumbusha ‘tufulize kuhimizana kwa bidii mtu na mwenzake.’ Twahitaji uchangamshi wa ushirika wa kidugu. “Ajitengaye na wenzake hutafuta matakwa yake mwenyewe; hushindana na kila shauri jema.” (Mithali 18:1) Uhitaji wa ushirika wa namna hiyo huwasukuma Wakristo leo kuwa wa kawaida katika kuhudhuria mikutano ya kutaniko, makusanyiko, na mikusanyiko.
11, 12. Kwa nini hatupaswi kutosheka na kujua tu mafundisho ya msingi ya Kikristo?
11 Baadaye katika barua yake, Paulo atoa shauri hili zaidi lenye thamani sana: “Kwa maana, kwa kweli, ijapokuwa mwapaswa kuwa walimu kwa kufikiria wakati, nyinyi mwahitaji tena mtu fulani awafundishe tangu mwanzo mambo ya msingi ya matamko matakatifu ya Mungu; nanyi mmekuwa kama wahitajio maziwa, si chakula kigumu. . . . Chakula kigumu ni cha watu wakomavu, cha wale ambao kupitia utumizi, nguvu zao za ufahamu zimezoezwa kutofautisha lililo sahihi na lililo kosa pia.” (Waebrania 5:12-14) Kwa wazi, Wakristo fulani Wayahudi walikuwa wameshindwa kuongeza nguvu zao za ufahamu. Hawakuwa wepesi wa kukubali nuru iliyoongezeka kuhusiana na Sheria na tohara. (Matendo 15:27-29; Wagalatia 2:11-14; 6:12, 13) Huenda baadhi yao wakawa bado walithamini mazoea ya kidesturi kama vile Sabato ya kila juma na Siku ya Kufunika ya kila mwaka iliyokuwa rasmi.—Wakolosai 2:16, 17; Waebrania 9:1-14.
12 Kwa sababu hiyo, Paulo asema hivi: “Kwa kuwa sasa tumeacha fundisho la msingi juu ya Kristo, acheni tuzidi kusonga mbele kwenye ukomavu.” (Waebrania 6:1) Mkimbiaji wa mbio za masafa marefu ambaye hukazia uangalifu sana mlo wake aweza kuvumilia vizuri zaidi katika shindano la mbio lililo refu, lenye kuchosha. Vivyo hivyo, Mkristo ambaye hukazia uangalifu sana lishe la kiroho—si ‘mafundisho ya msingi’ tu—aweza kuendelea katika mbio vizuri zaidi na kuzimaliza. (Linganisha 2 Timotheo 4:7.) Hilo lamaanisha kusitawisha upendezi katika “upana na urefu na kimo na kina,” wa kweli, hivyo kufanya maendeleo hadi kufikia ukomavu.—Waefeso 3:18.
“Mna Uhitaji wa Uvumilivu”
13. Wakristo Waebrania walikuwa wamedhihirishaje imani yao nyakati zilizopita?
13 Katika kipindi cha baada tu ya Pentekoste 33 W.K., Wakristo Wayahudi walisimama imara kujapokuwa na upinzani mkali. (Matendo 8:1) Labda Paulo alikuwa akifikiria hilo alipoandika hivi: “Fulizeni kukumbuka siku za hapo zamani ambazo katika hizo, baada ya nyinyi kutiwa nuru, mlivumilia shindano kubwa chini ya mateso.” (Waebrania 10:32) Uvumilivu huo mwaminifu ulidhihirisha kumpenda kwao Mungu, na uliwapa uhuru wa usemi mbele ya Mungu. (1 Yohana 4:17) Paulo awahimiza kwa bidii wasitupilie mbali uhuru huo wa usemi kwa sababu ya ukosefu wa imani. Awahimiza hivi: “Mna uhitaji wa uvumilivu, ili kwamba, baada ya nyinyi kuwa mmefanya mapenzi ya Mungu, mpate kupokea utimizo wa ahadi. Kwa maana bado ‘muda kidogo sana,’ na ‘yeye anayekuja atawasili na hatakawia.’”—Waebrania 10:35-37.
14. Ni mambo gani ya hakika yapaswayo kutusaidia kuvumilia hata baada ya kumtumikia Yehova kwa miaka mingi?
14 Namna gani sisi leo? Wengi wetu tulikuwa wenye bidii tulipojifunza kweli ya Kikristo kwa mara ya kwanza. Je, bado tuna bidii hiyo? Au ‘tumeacha upendo tuliokuwa nao hapo kwanza’? (Ufunuo 2:4) Je, tumepoa, labda tukapata kutamauka kidogo au kuchoka kungojea Har–Magedoni? Hata hivyo, tua, na ufikirie. Kweli bado ni ya ajabu kama vile ilivyokuwa hapo awali. Yesu bado ndiye Mfalme wetu wa kimbingu. Bado twatumaini kupata uhai udumuo milele katika dunia iliyo paradiso, na bado tuna uhusiano wetu na Yehova. Na tusisahau kamwe kwamba: “Yeye anayekuja atawasili na hatakawia.”
15. Kama Yesu, Wakristo fulani wamevumiliaje mnyanyaso mkali?
15 Kwa sababu hiyo, maneno haya ya Paulo yaliyorekodiwa kwenye Waebrania 12:1, 2 yafaa sana: “Acheni sisi pia tuondoe kila uzito na dhambi [ukosefu wa imani] ambayo hututatanisha kwa urahisi, na acheni tukimbie kwa uvumilivu shindano la mbio lililowekwa mbele yetu, tumkaziapo macho Wakili Mkuu na Mkamilishaji wa imani yetu, Yesu. Kwa ajili ya shangwe iliyowekwa mbele yake alivumilia mti wa mateso, akidharau aibu, na ameketi kwenye mkono wa kuume wa kiti cha ufalme cha Mungu.” Kuna mambo mengi ambayo watumishi wa Mungu wamevumilia katika siku hizi za mwisho. Kama Yesu, ambaye alikuwa mwaminifu kufikia hatua ya kifo chenye maumivu makali, baadhi ya ndugu na dada zetu wamevumilia kwa uaminifu mnyanyaso ulio mkali zaidi—kambi za gereza, mateso, ubakaji, hata kifo. (1 Petro 2:21) Je, moyo wetu haufuriki kwa upendo kuwaelekea tufikiriapo uaminifu-maadili wao?
16, 17. (a) Wakristo walio wengi hukabili magumu gani kuelekea imani yao? (b) Kukumbuka nini kutatusaidia tufulize kukimbia katika shindano la mbio la kupata uhai?
16 Hata hivyo, kwa Wakristo walio wengi, maneno ya Paulo ya ziada yatumika: “Katika kuendelea na shindano lenu dhidi ya dhambi hiyo bado hamjakinza kamwe hadi damu.” (Waebrania 12:4) Hata hivyo, katika mfumo huu njia ya kweli si rahisi kwa yeyote kati yetu. Baadhi yetu huvunjwa moyo na ‘maongezi yaliyo kinyume yenye kufanywa na watenda-dhambi’ kwenye kazi za kimwili au shuleni, wakivumilia dhihaka au kukinza mkazo wa kufanya dhambi. (Waebrania 12:3) Kishawishi chenye nguvu kimemomonyoa azimio la wengine la kudumisha viwango vya juu vya Mungu. (Waebrania 13:4, 5) Waasi-imani wameathiri usawaziko wa kiroho wa wachache ambao husikiliza propaganda zao zenye sumu. (Waebrania 13:9) Tofauti za utu zimewapokonya wengine shangwe. Kukazia mno vitumbuizo na utendaji mbalimbali wa wasaa kumedhoofisha Wakristo fulani. Na walio wengi wahisi wamekazwa na matatizo ya kuishi katika mfumo huu wa mambo.
17 Ni kweli, hakuna yoyote ya hali hizo ambayo hutokeza ‘ukinzani hadi damu.’ Na huenda baadhi yazo zikatokana na maamuzi mabaya ambayo sisi wenyewe hufanya. Lakini hayo yote hutokeza magumu kwa imani yetu. Hiyo ndiyo sababu twapaswa kufuliza kuangalia kielelezo chenye fahari cha uvumilivu wa Yesu. Na tusisahau kamwe jinsi tumaini letu lilivyo la ajabu. Na tusipoteze kamwe usadikisho wetu kwamba Yehova “huwa mthawabishaji wa wale wanaomtafuta kwa bidii.” (Waebrania 11:6) Kisha, tutakuwa na nguvu za kiroho za kufuliza kukimbia katika shindano la mbio la kupata uhai.
Twaweza Kuvumilia
18, 19. Ni matukio gani ya historia yadokezayo kwamba Wakristo Waebrania katika Yerusalemu walitii shauri la Paulo lililopuliziwa?
18 Wakristo Wayahudi waliitikiaje barua ya Paulo? Miaka ipatayo sita baada ya hiyo barua kwa Waebrania kuandikwa, Yudea ilikuwa vitani. Mwaka wa 66 W.K., jeshi la Roma lilizingira Yerusalemu, likitimiza maneno haya ya Yesu: “Wakati mwonapo Yerusalemu limezingirwa na majeshi yaliyopiga kambi, ndipo jueni kwamba kufanywa ukiwa kwalo kumekaribia.” (Luka 21:20) Hata hivyo, kwa manufaa ya Wakristo ambao wangekuwa katika Yerusalemu wakati huo, Yesu alisema hivi: “Ndipo waacheni wale walio katika Yudea waanze kukimbia hadi kwenye milima, na waacheni wale walio katikati yalo waondoke, na waacheni wale walio katika sehemu za mashambani wasiingie ndani yalo.” (Luka 21:21) Kwa sababu hiyo, vita pamoja na Roma ilitokeza mtihani huu: Je, hao Wakristo Wayahudi wangeacha Yerusalemu, kitovu cha ibada ya Kiyahudi na mahali pa hekalu lenye utukufu?
19 Kwa ghafula, na kwa sababu isiyojulikana, Waroma waliondoka. Yaelekea, Wayahudi wa kidini waliona jambo hilo kuwa ithibati ya kwamba Mungu alikuwa akihami jiji lao takatifu. Namna gani Wakristo? Historia yatuambia kwamba walikimbia. Kisha, mwaka wa 70 W.K., Waroma wakarudi na kuharibu kabisa Yerusalemu kukiwa na mauaji yenye kuogofya. “Siku ya BWANA” iliyotabiriwa na Yoeli ilikuwa imefika juu ya Yerusalemu. Lakini Wakristo waaminifu hawakuwa hapo tena. ‘Waliponywa.’—Yoeli 2:30-32; Matendo 2:16-21.
20. Kujua kwamba “siku ya BWANA” iliyo kubwa yakaribia kwapaswa kutusukuma katika njia zipi?
20 Leo, twajua kwamba ‘siku nyingine ya BWANA’ iliyo kubwa karibuni itaathiri mfumo huu wote wa mambo. (Yoeli 3:12-14) Hatujui siku hiyo itakuja wakati gani. Lakini Neno la Mungu latuhakikishia kwamba bila shaka itakuja! Yehova asema kwamba haitachelewa. (Habakuki 2:3; 2 Petro 3:9, 10) Kwa sababu hiyo, acheni ‘tukazie uangalifu zaidi kuliko ilivyo kawaida mambo yaliyosikiwa.’ Tuepuke ukosefu wa imani, “dhambi ambayo hututatanisha kwa urahisi.” Tuazimie kuvumilia kwa muda wote ambao tutahitaji kufanya hivyo. Kumbuka, tengenezo la Yehova la kimbingu lililo kama gari kubwa liko mwendoni. Litatimiza kusudi lake. Kwa hiyo na tufulize kukimbia na tusife moyo katika shindano la mbio la kupata uhai!
Je, Wakumbuka?
◻ Ni kwa kutii himizo gani la Paulo kwa Wafilipi ambako kutatusaidia kuvumilia katika shindano la mbio la kupata uhai?
◻ Ni nini kitakachotusaidia tukinze mwelekeo wa ulimwengu huu wa kutukengeusha?
◻ Twaweza kusaidianaje kuvumilia katika shindano la mbio?
◻ Ni yapi baadhi ya mambo yawezayo kufanya Mkristo apunguze mwendo?
◻ Kielelezo cha Yesu chaweza kutusaidiaje kuvumilia?
[Picha katika ukurasa wa 8, 9]
Wakristo, kama wakimbiaji, hawapaswi kuruhusu kitu kiwakengeushe fikira
[Picha katika ukurasa wa 10]
Hakuna kitu kiwezacho kulizuia gari kubwa la kimbingu la Yehova lisitimize kusudi la Mungu