Kupata Nguvu Mpya, Si Kuchoka

“Huwapa nguvu wazimiao, humwongezea nguvu yeye asiyekuwa na uwezo.”​—ISAYA 40:29.

 1, 2. Wewe ungetoa mfano gani kuonyesha hali za Wakristo zinazofanana na za wakimbiaji wa shindano la mwendo mrefu?

ASUBUHI moja ya Oktoba 1984 washindanaji wapatao 16,000 walifurika katika barabara mbalimbali ili kuanza Shindano la Mwendo Mrefu Mjini New York. Mstari wa kumalizia ulikuwa kilometa zipatazo 42.2 kutoka hapo. Siku hiyo ilikuwa na joto lenye kusonga pumzi lisilo la kawaida katika majira hayo ya vuli, likawamalizia nishati wakimbiaji haa na kuujaribu uvumilivu wao. Shindano hilo la mbio likawa mng’ang’ano wenye kuwachosha sana hata wanariadha walio hodari zaidi. Wakimbiaji wengi walichoka wakajiondoa katika shindano karibu 2.000 hawakumaliza. Waliomaliza walifanya hivyo baada ya kuzishinda hali zenye magumu makubwa.

² Wakristo, pia, wamo katika shindano la mbio. Zawadi ni nini?Uzima wa milele. Nao ni lazima wang’ang’ane mpaka mwisho kama mkimbiaji wa shindano la mwendo mrefu. Uvumilivu unahitajiwa. Ni lazima wadumishe nguvu zao kisha waepuke uchovu. Shindano letu la mbio ya uzima si kama kukimbia mwendo mfupi, bali mrefu. Paulo aliambia Wakristo wenzake hivi katika Korintho: “Je! hamjui, ya kuwa wale washindanao kwa kupiga mbio, hupiga mbio wote, lakini apokeaye tuzo ni mmoja? Pigeni mbio namna hiyo, ili mpate.” (1 Wakorintho 9:24) Wakristo. wanapiga mbio kwa kujitahidi sana.​—Luka 13:24.

 3. Ni kwa njia gani peke yake Wakristo wanaweza kudumisha mwendo wa kujikaza mpaka watakapolimaliza shindano?

³ Lakini huenda wewe ukataka kujua: ‘Ni nani anayeuweza mwendo huo akalimalize shindano?’ Hakuna wo wote kati yetu tunaoweza kufanya hivyo kwa nguvu zetu wenyewe. Ili kupata tuzo, ni lazima tuchote nguvu zetu kwa aliye Chanzo cha nishati zenye msukumo, Yehova Mungu,—Ayubu 36:22; Zaburi 103:13.

Yehova—Chanzo cha Nishati Zenye Msukumo

 4. Kulingana na nabii Isaya, kwa sababu gani tunaweza kuwa na tumaini hakika kwamba Yehova anaweza kututegemeza?

⁴ Pasipo shaka Yehova anaweza kutegemeza watumishi wake. Kwa kinywa cha Isaya nabii wake, Mwenye Nguvu Zote alisema kwamba uwezo Wake hauna mipaka wala kazi Zake zenye nguvu hazina kifani. “Inueni macho yenu juu, mkaone,” Yeye akasema. “Ni nani aliyeziumba hizi; aletaye nje jeshi lao kwa hesabu; aziita zote kwa majina; kwa [sababu ya wingi wa nishati zenye msukumo, NW], na kwa kuwa yeye ni hodari kwa nguvu zake; hapana moja isiyokuwapo mahali pake. . . . Je! wewe hukujua? hukusikia? Yeye Mungu wa milele, [Yehova]. Muumba miisho ya dunia hazimii, wala hachoki; akili zake hazichunguziki.”​—Isaya 40:26-28.

 5, 6. Toa mifano ya kuonyesha nishati zenye msukumo za Yehova?

⁵ Kuanzia vitu vyenye mipaka hadi visivyo na mipaka, wonyesho wa nguvu za Yehova za kuumba ni wa kuogopesha sana! Kwa mfano, vifikirie visehemu vile vidogo vinavyojumlika kufanyiza mata (kianzio cha kitu cho chote kilichopo), kutia na sisi, yaani, atomi. Hivyo ni vitu vidogo sana hivi kwamba tone la maji lina atomi bilioni bilioni 100. Ingawa hivyo, jambo la kustaajabisha ni kwamba katika sehemu ya kati ya atomi moja moja mna nishati za kutosha kutokeza, katika kisa kimoja, mlipuko unaoweza kupasua katika ardhi shimo kubwa lenye kina kinacholingana na ghorofa 32 na upana wa robo maili.

⁶ Upande mwingine wa mizani ya ukubwa, fikiria jua. Tanuri hilo kubwa sana la nyukilia lenye uzito wa mabilioni ya tani linaupasha moto mfumo wetu wa jua. Linatiwa moto na nishati kutoka atomi zilizo ndogo sana. Ingawa uhai wote duniani​—mimea, wanyama, na wanadamu​—unategemea nishati zinazotolewa na kiwanda hicho kikubwa sana cha nguvu za angani, ni kiasi kidogo sana cha nishati za jua kinachoifikia dunia. Hata hivyo, kiasi hicho kinatosha kutegemeza uhai. Katika kitabu chake Astronomy, Fred Hoyle aliye mchunguzi wa anga za juu anaandika hivi: “Kijipande kilicho kidogo sana cha nishati za Jua ambacho kinaanguka juu ya Dunia​—kinachokadiriwa kuwa karibu sehemu tano katika kila milioni milioni mia moja​—ni kikubwa karibu mara 100.000 kuliko nishati zote zinazotumiwa katika maeneo ya viwanda vya ulimwengu.”

 7. Inatupasa tujisikieje juu ya Yehova baada ya kuufikiria uwezo unaoonekana katika uumbaji wake?

⁷ Hata hivyo, jua ni moja tu ya mabilioni ya nyota zilizo katika galaksi yetu (kundi la nyota) ya Njia ya Kimaziwa​—nalo ni nyota yenye ukubwa wa kadiri tu likilinganishwa na nyingine. Tena, wachunguzi wa anga za juu wanakadiri kwamba kuna karibu magalaksi bilioni 100 katika ulimwengu unaojulikana. Hilo ni jambo la kustaajabisha sana kulifikiria, au sivyo? Si ajabu kwamba, baada ya kufikiria jinsi Yehova ‘ni mwenye kuzitandika mbingu akiwa peke yake,’ yule mwanamume Ayubu alisema Mungu ‘anatenda mambo makuu yasiyotafutikana; naam, mambo ya ajabu yasiyohesabika.’​—Ayubu 9:8-10.

Yehova Anaweza Kukutia Nguvu

 8. (a) Ni nani peke yake anayeweza kuchota nguvu za Yehova, na kwa sababu gani? (b) Ahadi iliyo katika Isaya 40:29-31 inatiaje imani nguvu?

⁸ Waabudu wa kweli wa Yehova wanaweza kuchota nguvu kwa uhuru na ukamili katika Chemchemi hiyo ya nishati zenye msukumo iliyouumba ulimwengu wote kisha kuuendeleza. Watumishi wa Yehova wanaweza ‘kufanywa imara kwa nguvu, kwa roho takatifu yake.’ bila kuogopa kuishiwa na nguvu. (Waefeso 3:16; Zaburi 84:4, 5) Kwa kweli, kushinda kwetu mbio ya uzima kunategemea kama tunatumaini kabisa kwamba mkono hodari wa Mungu unaweza kutusukuma tukaupite ule mstari wa kumalizia. Yeye anaweza kututia nguvu. Ni kama vile nabii Isaya anavyosema juu ya Yehova: “Huwapa nguvu wazimiao, humwongezea nguvu yeye asiyekuwa na uwezo. Haya vijana watazimia na kuchoka, na wanaume vijana wataanguka; bali wao wamngojeao [Yehova] watapata nguvu mpya; watapanda juu kwa mbawa kama tai; watapiga mbio, wala hawatachoka; watakwenda kwa miguu, wala hawatazimia.” (Isaya 40:29-31) Hata kusoma tu maneno hayo kunaweza kuiamsha roho yetu!

 9. Yehova anaweza kukusaidiaje na matatizo yaliyo kama ‘milima’?

⁹ Unapokabiliwa na matatizo yanayoelekea kuwa makubwa sana ambayo yanatisha kukuzuia usiwe na bidii katika ibada ya kweli, huenda ukajisikia kuwa mdogo na duni. Usikate tamaa. Mgeukie Baba yako wa kimbingu anayeyaweza yote. Yeye anawatia nguvu wote wamngojeao yeye Je, Muumba wa atomi asiweze kuingiza ndani ya watu wake nishati zenye msukumo zinazoweza kuhamisha ‘milima’? Hakika anaweza!—Marko 11:23.

10. Ni mambo gani yanayoweza kuwachosha wakimbiaji Wakristo hata waache? (b) Shetani anakutaka wewe ufanye nini?

¹⁰ Kwa upande mwingine, huenda Wakristo fulani wakawa wamechoshwa sana na pigano la kila siku dhidi ya mikazo inayotoka kwenye ulimwengu unaoonyesha madharau kwa kanuni za Kikristo mpaka wanajisikia wakitaka kupunguza mwendo au hata kuiacha mbio ya uzima. Magonjwa, mabadiliko ya hali za kifedha, matatizo ya kijamaa, upweke, au magumu mengine yanaweza pia kuvunja mtu moyo. Na kuvunjika moyo kunaweza kwa urahisi kupunguza nguvu za Mkristo, kama vile ilivyo rahisi joto jingi la mchana kumaliza nishati za mkimbiaji wa shindano la mwendo mrefu. Yule Adui mkuu, Shetani Ibilisi, anatumia mambo kama hayo ajaribu kuvunja ukamilifu wako wa kuwa mtumishi wa Yehova. (1 Petro 5:8) Usimwache Ibilisi afanye hivyo! Mtegemee Muumba wa yale makumi ya maelfu ya magalaksi ya kimbingu ili ajazie akiba ya nishati zako za kiroho. Yehova anaweza kukutegemeza.​—Zaburi 37:17; 54:4.

11. Tunaweza kujifunza nini kutokana na njia ya Daudi ya kukabiliana na vipingamizi?

¹¹ Alipokabiliwa na vipingamizi, sikuzote Daudi alimwona Yehova kuwa chanzo cha nguvu mpya. Kwa kutiwa nguvu mpya na roho takatifu, Daudi aliweza ‘kupanda aupite’ upinzani wo wote. Yeye alisema: “Kwa kukutegemea wewe mimi naweza kukabiliana na kikosi cha washambulizi; na kwa kutegemea Mungu wangu mimi naweza kupanda ukuta.” Daudi alitangaza hivi pia: “Kwa kutegemea Mungu sisi tutapata nishati za uzima, na yeye mwenyewe atawakanyagia chini adui zetu.” (Zaburi 18:29; 60:12, NW) Yehova anaweza kukutegemeza wewe pia.

Pigana na Uchovu wa Kiroho

12. (a) Kwa sababu gani ni lazima uchovu wa kiroho uondolewe upesi? (b) Ni dalili gani za uchovu wa kiroho? (c) Yehova amewafanyia uandalizi gani wale waliochoka kiroho?

¹² Ni lazima tuwe wepesi kuona ishara za uchovu wa kiroho, kisha tuwe wepesi pia kushughulika nazo. Kwa sababu gani? Kwa sababu wachache ‘watakaojitahidi kuingia wapitie ule mlango mwembamba,’ au wakimbiaji wale watakaoupita mstari wa kumalizia, ndio watakaoipata tuzo ya uzima wa milele. (Luka 13:24, NW; Wafilipi 3:12, 13, UV) Chunguza sanduku linalofuatana na makala hii lenye kusema “Jinsi ya Kupigana na Uchovu wa Kiroho.” Je, wewe unatambua baadhi ya dalili hizo ndani yako mwenyewe au ndani ya mshiriki wa jamaa? Ikiwa ndivyo, chukua hatua za haraka ufanye marekebisho. Huisha hali ya kiroho yako kwa kuchota nguvu kutokana na maandalizi ya Yehova yaliyoorodheshwa.

13, 14. (a) Ni mifano gani inayoweza kusaidia kutupatia nguvu mpya za kiroho? (b) Maoni yenye mafaa kutoka kwa mtumishi mmoja aliyetumikia Yehova muda mrefu yanaweza kutusaidiaje tubaki katika shindano?

¹³ Unaweza kuyapinga maelekeo ya kuchoka na kuacha kwa kuiga mifano ya watumishi wa Mungu walioshinda ambao wameandikwa katika Biblia. Kulikuwako wanaume na wanawake, vijana na wazee wengi, waliovumilia mpaka mwisho. Soma juu yao katika maandiko kama Waebrania 11:4-40, Vivyo hivyo, katika nyakati za kisasa tuna ndugu na dada wengi wapendwa wanaoendelea kumtumikia Yehova bila kuchoka.

¹⁴ George, anayeishi katika sehemu ya kusini ya United States, ni mfano wa mkimbiaji Mkristo ambaye hajachoka. Baada ya kuwa katika mashindano ya mbio ya uzima kwa zaidi ya miaka 50, bado yeye anaendelea kuwa mwenye nguvu. Anatupa sisi nasaha (shauri) gani?

“Mimi ningesema kwa mkazo, shikamana na tengenezo. Kumbuka kwamba Yesu Kristo. akiwa Mwekwa wa Yehova, ndiye anayeliendesha tengenezo. Kwa hiyo usivunjike moyo ikiwa mtu aliye na uhusiano wa karibu sana nawe anaacha kuwa mwaminifu. Ikiwa kuna jambo fulani usilolielewa kwa ukamili au unaloliona kuwa gumu kukubali. tumaini kwamba baada ya muda fulani litanyooshwa. Tengenezo la Yehova ndilo limetufikisha hapa tulipofika. Litumaini lituongoze kutuingiza ndani ya Mfumo Mpya.”​—Yohana 6:66-68.

15. Ili walio mifano mizuri waburudishe roho yetu, ni lazima tufanye nini?

¹⁵ Bila shaka katika kundi lenu kuna baadhi ya watu wa namna hiyo wenye kufaidi sana, au unaweza kukutana nao kwenye makusanyiko ya mizunguko. Sema nao. Jifunze kutokana nao. Tena, mifano ya waaminifu wengine inapatikana katika Kitabu cha Mwaka na Mnara wa Mlinzi, na pia katika vichapo vya Sosaiti ya Mnara wa Mlinzi. Soma masimulizi hayo. Ona jinsi unavyoweza kuchota nguvu kutokana na hayo mambo yaliyoonwa.

Wazee—Mwe ‘Misaada Yenye Kutia Nguvu’

16. (a) Wazee wanaweza kusaidiaje Wakristo wenzao wapate nguvu mpya? (b) Ni tahadhari gani ambayo wazee wanahitaji kuwa nayo wanapotolea watu kitia-moyo na shauri?

¹⁶ Hasa wazee wa makundi wanapaswa wawe macho kusaidia washiriki wanaoonyesha ishara za kuyumbayumba. Isaya 35:3 linatoa shauri zuri kwa kusema: “Itieni nguvu mikono iliyo dhaifu, yafanyeni imara magoti yaliyolegea.” Lakini ninyi wazee mnaweza, kutimizaje sehemu yenu katika jambo hilo? Kwanza fungueni macho mwone mambo. Gundueni jambo lile hasa linalofanya mtu aelekee kupunguza mwendo. Toeni madokezo yanayofaa ya Kimaandiko yanayofaana kabisa na hali za mtu huyo. Lakini jihadharini. Mnataka kumtia moyo, si kumvunja moyo, ndugu yenu.a Basi, msitake kumfanya mtu mwingine afanye mambo kulingana na dhamiri yenu, wala kumkaza afuate njia yenu ya kutatua jambo, wala kumbandika jina la kuwa Mkristo asiyekomaa ikiwa hataki kufuata maoni yenu binafsi. Ni lazima wazee wategemeze mashauri na kitia-moyo chao juu ya Biblia. Hawangetaka kupunguza mwendo wa wakimbiaji wenzao kwa kurundika juu yao sheria za kundi zisizo za lazima.​—Tofautisha Mathayo 11:28, 29 na Mathayo 23:2-4.

17 Wazee wanaweza kukabilianaje na mbinu za Shetani zilizokusudiwa kupunguza mwendo wa Wakristo wenzao?

¹⁷ Wazee wanaweza kuweka mifano mizuri wakiwa wafuasi wa Kristo kwa kuwa wenye haraka kusifu washiriki wa kundi. Wafanyeni wahisi wanatakiwa na kuhitajiwa kwa moyo mweupe! Sikuzote mfumo wa Shetani unakuwa na haraka nyingi ya kumfanya Mkristo ajisikie hafai sana. Hapo tulipofika katika shindano la mbio ya uzima, ndipo ndugu zetu wasipohitaji watu wa kuwalaumu-laumu, bali. rafiki wa kuwapigia vigelegele wakaupate ushindi. Kwa mfano? wakati dada wa makamo alipolazimika kuacha upainia, moyo wake uliwaka tamaa ya kurudia utumishi wa wakati wote. Lakini hakuweza kwa sababu ya hali za kifedha. Ingawa mzee mmoja hakuwa na kusudi baya, alimuuliza dada hivi kwa njia ambayo kidogo ilikuwa ya kulaumu: “Utarudia upainia wakati gani?” Mzee alishangazwa na jibu fupi la dada huyo: “Mume wangu atakapoweza kulipa kodi ya nyumba.” Jambo ambalo mzee huyo alikosa kutambua, lakini baadaye akalijua, ni kwamba kupainia kwa dada huyo kuliendelezwa kifedha hasa na mapato ya kazi ya mume wake. Lakini wakati tajiri wa mume alipozidi kuleta-leta kazi yenye mashaka kwa Mkristo, dhamiri ya mume wake ilimsukuma atafute kazi nyingine. Haikuwa rahisi watu wa umri wake kupata kazi. Kwa hiyo akalazimika kukubali kazi yenye mshahara wa chini; kwa hiyo kukawa na ulazima wa kwamba mke wake afanye kazi ya wakati wote.

18. Ni kwa njia gani wazee wanaweza kuwa “msaada wenye kutia nguvu”?

¹⁸ Kutokana na hilo jambo lililoonwa, je, tuelewe kwamba wazee wanapaswa kusitasita wasishauri Wakristo wenzao? Hapana. Bali, wakati shauri au kitia-moyo kinapohitajiwa. inawapasa wazee wafahamu hali ambazo hasa ndugu zao wanazo, wala si kutazama jinsi mambo yanavyoonekana kijuujuu tu.’ (Yakobo 2:15, 16) Kwa njia hiyo, wazee wanaweza kuwa “msaada wenye kutia nguvu” kundi lao.​—Wakolosai 4:11, NW.

19. Wewe unaweza kufanya nini usaidie mapainia wasichoke na kuacha?

¹⁹ Hesabu inayoongezeka ya wahubiri wa Ufalme wamerudia mwendo waliokuwa nao zamani na sasa ni mapainia wa kawaida. Mngurumo wa umati mkubwa wenye kushangilia wakimbiaji washindano la mwendo mrefu unaweza kuwatia moyo wapate nguvu mpya. Kwa hiyo wewe unafanya nini kuwapigia vigelegele vya kutia moyo wapate ushindi wale mapainia walio katika kundi lenu? Doug na Joanne wameufanya utumishi wa wakati wote uwe kazi yao ya maisha. Linaweza kuwa jambo la kuvunja moyo wakati wengine wanapowauliza, “Mtapata watoto siku gani?” au “Mtatulia wakati gani?” Lakini, inakuwaje wakati Mashahidi wenzao wanapowaunga mkono sana kwa kwa kuwaambia, “Endeleeni na kazi nzuri mnayofanya. Sisi tunafurahi kuwa nanyi mapainia katika kundi letu”? Kwa njia hiyo wanaepuka uchovu wa kiroho, na pia wanasaidiwa wainuke katika utumishi wao wa painia kama tai wanaoruka juu zaidi hewani!​—Linganisha Isaya 40:31.

Jinsi Mapainia Wanavyoweza Kupata Nguvu Mpya

20, 21. Wengine walio katika utumishi wa wakati wote wamepataje nguvu mpya?

²⁰ Sikiliza yanayosemwa na mume na mke hawa waliooana, Frederick na Marian. Wao wanajua jinsi ya kupatia nguvu mpya. Wote wawili ni wamisionari wanaotumikia katika nchi moja ya Amerika ya Kati, na wote wawili wana umri wa miaka 70 na kitu. Mume alianza utumishi wake wa misionari mwaka 1946, na mke mwaka 1950. Ni jambo gani linalowafanya waendelee katika utumishi wa Yehova? Frederick anajibu hivi: “Kuongezea kumpenda Yehova na kusaidia watu wale wengine, ni kufikiria daima mradi wa uzima wa milele.” Mke wake anajibu kwamba ‘ahadi za Mungu ndizo zimetufanya tuendelee.’ Wanajizuiaje wasichoke na kuacha? “Hata mgawo wako uwe nini,” mume huyo anashauri, “jishughulishe katika huo.” Naye mke anapendekeza ‘kudumu kafika kazi ya kitheokrasi,’ kisha anaongeza: “Unapozidi kuzeeka, huwezi kufanya yote unayotaka. Hilo lingeweza kuniudhi, lakini mimi nasema na Yehova juu ya jambo hilo katika sala.” Frederick anamalizia kwa maoni haya yenye mafaa: “Sisi tunasali kila usiku na kumwomba Yehova atusaidie.”​—1 Petro 4:7.

²¹ Lavonia ana umri wa miaka 67 na amekuwa painia wa kawaida kwa miaka 20 iliyopita. Katika muda wa mwaka mmoja uliopita, yeye alikaa siku 15 hospitalini na sasa anatumia dawa za kusaidia moyo wake. Kufa kwa washiriki kadha wa jamaa yake kutia na mume wake na baba yake, kumemkamua sana nguvu za maoni yake ya moyoni. Hata hivyo anaendelea kujitahidi. Amepataje nguvu mpya? “Kuweza kushiriki kwa ukamili zaidi katika kazi ya kuhubiri kumenisaidia kweli kweli.” yeye, anasema, “kwa sababu ninapoweza kuambia wengine juu ya Yehova. matatizo yangu yanaondolewa akilini kisha napata amani ya akili na furaha inayofanya nistahili kuwa hai. Hata yeye hapangi kuacha kupainia bali anasema: “Ninapowaona wengine wakijua habari za Yehova na makusudi yake ya ajabu ninapata furaha kubwa hivi kwamba siwezi hata kufikiria kuuacha utumishi wa painia.”​—Matendo 20:35.

22. Ili kushinda shindano la mbio ya uzima wa milele, ni lazima tuendelee kufanya nini?

²² Hapo tulipofika maishani, tuwe au tusiwe tunaweza kujitahidi tukiwa mapainia, sisi sote tunaweza kubaki karibu na aliye Chanzo cha nishati zenye msukumo. Yehova na tengenezo lake. Acheni tuendelee kupata nguvu mpya kwa kumtumikia Mungu wetu kwa ushikamanifu. Halafu, kama Habakuki, tunaweza kusema: “Yehova Bwana Mwenye Enzi Kuu ndiye nishati zangu za uzima; naye atafanya miguu yangu kama ile ya paa majike.” (Habakuki 3:19, NW) Hivyo hatutachoka wala kunyong’onyea. Kumbuka kwamba shindano la mbio ni kama limekwisha. Tunaukaribia mradi!

[Maelezo ya Chini]

Maulizo ya Kurudia

◻ Ni nani peke yake anayeweza kuchota kwa uhuru nishati zenye msukumo za Yehova?

◻ Ni nini baadhi ya ishara za uchovu wa kiroho?

◻ Ni maandalizi gani ya Yehova yanayoweza kutusaidia tupate nguvu mpya?

◻ Wazee na wengine kundini wanaweza kusaidiaje mapainia wabaki katika “mbio”?

[Sanduku katika ukurasa wa 19]

Njia Fulani za Kupigana na Uchovu wa Kiroho

Dalili za Uchovu

◻ Ukosefu wa kujiweza katika kula, kunywa, na ufuatiaji wa anasa

◻ Ukosefu wa shauku kwa ajili ya ukweli, roho ya kinaya

◻ Kufungia moyoni mashaka mazito na yenye kukaa-kaa kwa muda fulani

◻ Kutokujali sana ushirika kwenye mikutano ya kundi

◻ Ukosefu wa bidii na furaha katika huduma ya shambani

◻ Kuwa mwenye kulaumu-laumu mno wazee na tengenezo

Misaada ya Kuvumilia

◻ Sala ya kuomba msaada wa roho takatifu​—Luka 11:13; Wagalatia 5:22,23; 1 Petro 4:7

◻ Funzo la kibinafsi​—Zaburi 1:1,2

◻ Kutafakari juu ya mambo ya Kimaandiko​—Zaburi 77:12

◻ Kuhudhuria mikutano na makusanyiko kwa ukawaida​—Nehemia 8:1-3, 8, 10; Waebrania 10:23-25

◻ Ushiriki wa kawaida katika utumishi wa shambani​—Matendo 20:18-21

◻ Msaada wa kiroho kutoka kwa wazee wa kundi waangalizi wanaosafiri​—Warumi 1:11 12; Waebrania 13:17

[Picha katika ukurasa wa 17]

Yehova, Muumba wa ulimwengu wote, anasaidia mashahidi wake wapate nguvu mpya

[Hisani]

NASA photo