Wingu Kubwa Sana la Mashahidi!

“Kwa sababu sisi tuna wingu kubwa sana la mashahidi kuzunguka sisi, . . . acheni sisi tukimbie kwa uvumilivu katika shindano la mbio ambalo limewekwa mbele yetu sisi.”—WAEBRANIA 12:1, NW.

1, 2. (a) Ni mazingira gani ya mfano ambayo huenda Paulo akawa alikuwa akifikiria alipokuwa akiandikia Wakristo Waebrania? (b) Kwa sababu gani Waebrania waamini wenzake walihitaji imani imara?

PIGA picha ujione mwenyewe ukiwa mpiga mbio katika uwanja wa michezo. Unajikaza kuelekea mbele, ukikakamiza kila musuli wa mwili, macho yako yamekazwa juu ya mradi. Lakini namna gani watazamaji? Wote wamekuwa wakimbiaji wenye kushinda mbio! Wao wamekuwa si watazamaji tu bali mashahidi watendaji katika neno na hata tendo.

² Huenda ikawa mtume Paulo alikuwa akifikiria mazingira hayo ya mfano alipoandikia Wakristo Waebrania (karibu na 61 W.K.). Wao walihitaji imani imara. (Waebrania 10:32-39) Ni kwa imani tu wangeweza kutii amri ya Yesu wakimbie wakati Yerusalemu ungezungukwa na majeshi yenye kupiga kambi (katika 66 W.K.) miaka michache kabla haujaharibiwa mikononi mwa Waroma (katika 70 W.K.). Imani ingewategemeza pia wakati ‘wangeteswa kwa ajili ya uadilifu.’—Luka 21:20-24; Mathayo 5:10, NW.

 3. Kwenye Waebrania 12:1, ni nini ile “dhambi hutatanisha kwa urahisi,” na Wakristo wanahimizwa wa pige mbio gani kwa uvumilivu?

³ Baada ya kurudia kutaja vitendo vya imani vya nyakati zilizotangulia Ukristo (katika Waebrania sura ya 11), Paulo alihimiza hivi: “Kwa sababu sisi tuna wingu kubwa sana la mashahidi kuzunguka sisi, acheni sisi pia tuvue kila uzito [ambao ungetulemea kiroho] na dhambi [ukosefu wa imani] ambayo hutatanisha sisi kwa urahisi, na acheni sisi tukimbie kwa uvumilivu katika shindano la mbio [ya uzima wa milele] ambalo limewekwa mbele yetu sisi.” (Waebrania 12:1, NW) Kwamba sisi ni Wakristo wapakwa-mafuta wanaopiga mbio ya kupata kutokufa katika mbingu au sisi ni sehemu ya “mkutano mkubwa” wenye mradi wa uzima usio na mwisho katika dunia-paradiso, rudio la Paulo juu ya imani yenye matendo linakazia pande mbalimbali za imani hiyo nalo litatusaidia (Ufu. 7:4-10; Luka 23:43, NW; Warumi 8:16, 17) Lakini imani ni nini hasa? Ni nini nyingine za nyuso za kito hicho cha kiroho chenye thamani? Nasi tutatendaje ikiwa tuna imani? Unapotafuta majibu kwa maulizo hayo, tafadhali soma mistari iliyoonyeshwa ya Waebrania sura 11 na 12 wakati wa funzo la faragha na la kundi.

Imani Ilivyo

 4. Imani ni nini?

⁴ Kwanza Paulo alitoa fasili juu ya imani. (Soma Waebrania 11:1-3, NW.) Kwa sehemu, imani ni “taraja lililohakikishwa la mambo yanayotumainiwa.” Mtu aliye na imani ana uthibitisho kamili kwamba kila jambo ambalo Mungu anaahidi ni kama limekwisha kutimizwa. Pia imani ni “wonyesho dhahiri wa mambo ya hakika ijapokuwa hayaonwi.” Uthibitisho wenye kusadikisha wa mambo ya hakika yasiyoonwa una nguvu nyingi sana hivi kwamba imani inasemwa kuwa iko sawasawa na ushuhuda huo ulio dhahiri.

 5. Tukiwa na imani tunafahamu nini?

⁵ Kupitia imani “watu wa nyakati za kale walitolewa ushahidi” kwamba wao walifurahisha Mungu. Pia, “kwa imani tunafahamu kwamba mifumo ya mambo”—dunia, jua, mwezi, na nyota—“iliwekwa katika utaratibu kwa neno la Mungu, hivi kwamba kinachoonekana kimekuja kuwa kutokana na vitu ambavyo havitokei.” Sisi tunasadiki kwamba Yehova ndiye Muumba wa vitu hivyo, ingawa hatuwezi kumwona kwa sababu yeye ni Roho asiyeonekana.—Mwanzo 1:1; Yohana 4:24; Warumi 1:20.

Imani na “Ulimwengu wa Kale”

 6. Kwa sababu gani Abeli alikuwa na “taraja lililohakikishwa” kwamba maneno ya kiunabii ya Yehova juu ya ‘uzao wa mwanamke’ yangetimia?

⁶ Mmoja wa nyuso nyingi za imani ni uthamini kwa uhitaji wa kupata dhabihu iliyo kwa ajili ya dhambi. (Soma Waebrania 11:4, NW.) Katika “ulimwengu wa kale,” imani katika dhabihu ya damu ilionyeshwa na Abeli, yule mwana wa pili wa watu wawili wa kwanza, Adamu na Hawa. (2 Petro 2:5) Bila shaka Abeli alitambua ndani yake mwenyewe matokeo yenye kufisha ya dhambi iliyorithiwa. (Mwanzo 2:16, 17; 3:6, 7; Warumi 5:12) Pia ni dhahiri kwamba yeye aliona utimizo wa uamuzi wa Mungu ulioleta kazi ya jasho juu ya Adamu na maumivu ya kutosha kwa Hawa wakati wa mimba. (Mwanzo 3:16-19) Kwa hiyo Abeli alikuwa na “taraja lililohakikishwa” kwamba mambo yale mengine yaliyonenwa na Yehova yangetimia. Hayo yalikuwa ni kutia ndani maneno ya kiunabii aliyoelekezewa Shetani yule mdanganyi mkuu wakati Mungu alipomwambia nyoka hivi: “Nami nitaweka uadui kati yako na huyo mwanamke, na kati ya uzao wako na uzao wake; huo utakuponda kichwa, na wewe utamponda kisigino.”—Mwanzo 3:15.

 7. (a) Abeli alionyeshaje uthamini kwa uhitaji wa dhabihu fulani kwa ajili ya dhambi? (b) Ni kwa njia gani Mungu ‘alitoa ushahidi kuhusu zawadi za Abeli”?

⁷ Abeli alionyesha imani katika Uzao ulioahidiwa kwa kumtolea Mungu dhabihu ya mnyama ambayo ingeweza kwa njia ya mfano kuwa badala ya uhai wa Abeli mwenyewe. Lakini Kaini ndugu yake mkubwa asiye na imani alifanya toleo la mboga zisizo na damu. Baada ya hapo Kaini alimwaga damu ya Abeli akiwa muuaji. (Mwanzo 4:1-8) Hata hivyo Abeli alikufa akijua kwamba Yehova alimhesabu kuwa mwadilifu, “Mungu akitoa ushahidi kuhusu zawadi zake.” Jinsi gani? Kwa kukubali dhabihu ya Abeli iliyotolewa kwa imani. Kwa sababu ya imani yake na kibali cha Mungu, ambacho Maandishi Yaliyoongozwa na Mungu yanaendelea kutoa ushahidi, ‘ingawa Abeli alikufa, bado yeye anasema.’ Yeye aliuona uhitaji wa dhabihu kwa ajili ya dhambi. Je! wewe una imani katika dhabihu ya ukombozi ya Yesu Kristo iliyo na umaana zaidi?—1 Yohana 2:1, 2; 3:23.

 8. (a) Ni jambo gani ambalo sisi tunajifunza juu ya imani kutokana na ushahidi wa ushujaa wa Enoki? (b) Enoki ‘alihamishwaje ili asione kifo’?

⁸ Imani itatusukuma tuseme ujumbe wa Mungu kwa ujasiri. (Soma Waebrania 11:5, 6, NW.) Enoki shahidi wa kwanza-kwanza wa Yehova alitabiri kwa ushujaa utekelezi wa kimungu wa hukumu juu ya watu wenye kukana Mungu. (Yuda 14, 15) Bila shaka adui za Enoki walitafuta kumuua, lakini Mungu “alimchukua” hivi kwamba hakupatwa na maumivu makali ya kifo. (Mwanzo 5:24, NW) Ijapokuwa hivyo, kwanza, “yeye alipata ushahidi kwamba yeye alikuwa amependeza Mungu vizuri.” Jinsi gani? “Kwa imani Enoki alihamishwa ili asione kifo.” Vivyo hivyo, Paulo alihamishwa, au ‘akanyakuliwa kuingia katika paradiso,’ hiyo ikionyesha dhahiri kwamba ajipokea njozi ya paradiso ya kiroho ya wakati ujao ya kundi la Kikristo. (2 Wakorintho 12:1-4, NW) Kwa hiyo inaonekana kwamba Enoki alikuwa akifurahia njozi ya Paradiso ya kidunia inayokuja wakati Yehova alipomlaza usingizi katika kifo, awe salama mbali na mikono ya adui. Ili sisi, kama Enoki, tuwe tukipendeza Mungu vizuri ni lazima tuseme ujumbe wa Mungu kwa ujasiri. (Matendo 4:29-31) Ni lazima pia tuamini kwamba Mungu yuko na “huwa mthawabishaji wa wale wanaomtafuta yeye kwa bidii.”

 9. Mwendo wa Noa ulionyeshaje kwamba kufuata maagizo ya Mungu kwa ukaribu ni uso mwingine wa imani?

⁹ Kufuata maagizo ya Mungu kwa ukaribu ni uso mwingine wa imani. (Soma Waebrania 11:7, NW.) Akitenda kwa imani, Noa alifanya ‘sawasawa na vile Mungu alivyoamuru.’ (Mwanzo 6:22; 7:16) Noa alipokea “onyo la Mungu juu ya mambo yasiyoonekana bado,” naye akaamini taarifa ya Yehova kwamba gharika ya duniani pote ingetukia. Akiwa na imani na woga wa kumheshimu sana Mungu. Noa “alijenga safina kwa ajili ya kuokoa watu wa nyumba yake.” Kwa utii na kwa vitendo vya uadilifu, yeye aliuhukumu ulimwengu usioamini kwa kazi zao mbovu na akaonyesha kwamba ulistahili uharibifu.—Mwanzo 6:13-22.

10. Ingawa Noa alikuwa akijenga safina, yeye alitafuta wakati kwa ajili ya utendaji gani mwingine?

¹⁰ Pia Noa alikuwa mmoja wa mashahidi wa Yehova katika maana ya kwamba yeye alikuwa “mhubiri wa uadilifu.” (2 Petro 2:5, NW) Ingawa alikuwa mwenye shughuli nyingi akiijenga safina, yeye alitumia wakati fulani ili kuhubiri, kama vile Mashahidi wa Yehova wanavyofanya leo. Kweli kweli, Noa alisema mambo wazi kwa ujasiri akiwa mpeleka-habari wa onyo la Mungu kwa wale watu walioishi kabla ya gharika, lakini “hawakujali mpaka gharika ikaja na kuwafagilia mbali wote.”—Mathayo 24:36, NW.

Imani Miongoni mwa Wazee wa Ukoo wa Baada ya Gharika

11. (a) Abrahamu alionyeshaje kwamba imani inatia ndani uhakika kamili katika ahadi za Yehova? (b) Kwa imani, Abrahamu alikuwa akingojea “mji” gani?

¹¹ Imani inatia ndani uhakika kamili katika ahadi za Yehova. (Soma Waebrania 11:8-12, NW.) Kwa imani Abrahamu (Abramu) alitii amri ya Mungu akaondoka Uru wa Wakaldayo, mji uliokuwa na vitu vingi vya kutolea mtu kwa njia ya kimwili. Yeye aliamini ahadi ya Yehova kwamba “jamaa zote za dunia” zingejibariki kupitia kwake na kwamba uzao wake ungepewa nchi fulani. (Mwanzo 12:1-9; 15:18-21) Isaka mwana wa Abrahamu na Yakobo mjukuu wake walikuwa “warithi pamoja naye wa ahadi ile ile.” Kwa imani Abrahamu “alikaa kama mgeni katika nchi ya ahadi kama katika nchi ya kigeni.” Yeye alitazama mbele kwenye “mji ulio na misingi ya kikweli, ambao mjenzi na mfanyi wa mji huo ni Mungu.” Ndiyo, Abrahamu alingojea Ufalme wa Mungu wa kimbingu ambao chini yao yeye angefufuliwa kwenye uzima duniani. Je! Ufalme huo una mahali pa maana hivyo katika maisha yako?—Mathayo 6:33.

12. Ni jambo gani lililotukia kwa sababu Sara alikuwa na imani katika ahadi za Yehova?

¹² Wake za wazee wa ukoo wenye kumwogopa Mungu walikuwa pia na imani katika ahadi za Yehova. Kwa mfano, kwa imani Sara mke wa Abrahamu, angawa tasa mpaka karibu na umri wa miaka 90 na “akiwa amepita kikomo cha umri,” alipewa nguvu za “kuchukua mimba ya uzao, . . . kwa kuwa yeye alimhesabia [Mungu] heshima ya kuwa ni mwaminifu ambaye alikuwa ameahidi.” Baada ya muda fulani, Sara akamzaa Isaka. Hivyo kutokana na Abrahamu mwenye umri wa miaka 100, ambaye alikuwa “ni kama mfu” kwa habari ya kuzaa, hatimaye “kulizaliwa watoto sawasawa na nyota za mbinguni kwa wingi.”—Mwanzo 17:15-17; 18:11; 21:1-7.

13, 14. (a) Ingawa Abrahamu, Isaka, na Yakobo ‘hawakupata utimizo wa zile ahadi,’ wao waliitikiaje jambo hilo? (b) Sisi tunaweza kunufaikaje na kufikiria ushikamanifu wa wazee wa ukoo kwa Yehova hata ikiwa hatuoni utimizo wa mara hiyo wa ahadi zake?

¹³ Imani itatufanya tuendelee kuwa washikamanifu kwa Yehova hata ikiwa hatuuoni utimizo wa mara hiyo wa ahadi zake. (Soma Waebrania 11:13-16, NW.) Wale wazee wa ukoo waaminifu wote walikufa bila kuona utimizo kamili wa ahadi za Mungu kwao. Lakini “wao waliona [mambo yaliyoahidiwa] yakiwa mbali sana na wakayakaribisha na kutangaza peupe kwamba wao walikuwa ni wageni na wakaaji wa muda katika ile nchi.” Ndiyo, wao walimalizia maisha yao yote katika imani, kwa maana vizazi vilipita kabla Nchi ya Ahadi haijawa mali ya wazao wa Abrahamu.

¹⁴ Jambo la kwamba wao hawakupata utimizo wa ahadi ya Mungu katika muda wa maisha yao halikutia uchungu Abrahamu, Isaka, na Yakobo wala kuwafanya wawe waasi-imani. Wao hawakumwacha Yehova, wakarudi Uru, na kujiingiza sana katika utendaji mbalimbali wa kilimwengu. (Linganisha Yohana 17:16; 2 Timotheo 4:10; Yakobo 1:27; 1 Yohana 2:15-17.) La, hao wazee wa ukoo ‘walijitahidi kufikia’ mahali palipo bora kuliko Uru, “yaani, pamoja ambapo ni pa mbinguni.” Kwa hiyo Yehova ‘haoni aibu kuitwa kuwa Mungu wao.’ Wao walidumisha imani katika Aliye Juu Zaidi Sana mpaka kifo na karibuni watafufuliwa kwenye uzima duniani, wakiwa sehemu ya makao ya ule “mji,” Ufalme wa Kimasihi ambao Mungu aliwatayarishia. Lakini namna gani wewe? Hata ikiwa ‘umetembea katika ukweli’ kwa miaka mingi, na unaendelea kuzeeka katika utumishi wa Yehova, ni lazima udumishe uhakika wako katika mfumo mpya wake ulioahidiwa. (3 Yohana 4; 2 Petro 3:11-13, NW) Wewe na wazee wale wa ukoo waaminifu mtapokea thawabu iliyoje kwa kufanya hivyo!

15. (a) Ni jambo gani lililomwezesha Abrahamu akaribie sana kumtoa Isaka dhabihu? (b) Lile tukio lililohusu Abrahamu na Isaka linapasa liwe na matokeo gani juu ya imani yetu? (c) Ni jambo gani lililoonyeshwa kwa unabii na tukio hilo?

¹⁵ Kutii Mungu bila kutia shaka ni uso muhimu wa imani. (Soma Waebrania 11:17-19, NW.) Kwa sababu Abrahamu alimtii Yehova bila kutia shaka, yeye “alikuwa ni kama ametoa Isaka awe toleo,” “mwana-mzaliwa pekee” wake—mwana mmoja tu ambaye alipata kuwa naye kupitia Sara. Abrahamu angewezaje kufanya hivyo? Ni kwa sababu “yeye alihesabu kwamba Mungu alikuwa na uwezo wa kumwinua [Isaka] hata kutoka kwa wafu,” ikihitajiwa kabisa, ili aitimize ahadi ya uzao kupitia yeye. Kwa dakika moja kile kisu katika mkono wa Abrahamu kingalimaliza uhai wa Isaka, lakini sauti ya malaika ilizuia jambo hili.Kwa sababu hiyo, Abrahamu alimpokea Isaka kutoka kifo “kwa njia ya mfano.” Sisi tunapaswa vilevile kuvutwa na moyo kumtii Mungu kwa imani hata ikiwa uhai wetu au ule wa watoto wetu umo hatarini, (1 Yohana 5:3) Inastahili kuangaliwa, pia, kwamba wakati huu Abrahamu na Isaka walifahanisha kwa unabii jinsi Yehova Mungu angeandaa Mwanaye mzaliwa-pekee, Yesu Kristo, awe ukombozi ili kwamba wanaojizoeza imani katika yeye waweze kuwa na uzima wa milele.—Mwanzo 22:1-19; Yohana 3:16.

16. Kwa habari ya watoto wetu na imani katika ahadi za Mungu, ni mfano gani ambao wazee wa ukoo walitoa?

¹⁶ Ikiwa tuna imani, tutasaidia wazao wetu waweke tumaini lao juu ya mambo ambayo Mungu anaahidi kwa wakati ujao. (Soma Waebrania 11:20-22, NW.) Imani ya wazee wa ukoo ilikuwa na nguvu nyingi sana hata ikawa kwamba ingawa hawakutimiziwa kwa ukamili ahadi za Yehova katika muda wa maisha yao, wao walipitishia watoto wao ahadi hizo kama urithi wenye kuthaminiwa sana. Hivyo, “Isaka alibariki Yakobo na Esau kuhusu mambo ambayo yangekuja,” na Yakobo mwenye kufa alitamka baraka juu ya Efraimu na Manase wana wa Yusufu. Kwa sababu Yusufu mwenyewe alikuwa na imani yenye nguvu kwamba Waisraeli wangeondoka Misri waende kwenye nchi ya ahadi, yeye aliwafanya ndugu zake waape ili waende na mifupa yake wakati ambao wangeondoka. (Mwanzo 27:27-29, 38-40; 48:8-22; 50:24-26) Je! wewe unasaidia jamaa yako isitawishe imani inayolingana na hiyo katika mambo ambayo Yehova ameahidi?

Imani Inatufanya Tumtangulize Mungu Kwanza

17. Wazazi wa Musa walitendaje kwa imani?

¹⁷ Imani inatusukuma sisi tutangulize Yehova na watu wake mbele ya kitu cho chote ambacho ulimwengu huu unatutolea. (Soma Waebrania 11:23-26, NW.) Waisraeli walikuwa watumwa wenye kuhitaji kukombolewa kutoka utumwa wa Misri wakati wazazi wa Musa walipotenda kwa imani. ‘Wao hawakuogopa agizo la mfalme’ la kuua watoto wa kiume wa Waebrania walipozaliwa. Bali, walimficha Musa kwa muda wa miezi mitatu, mwishowe wakamweka katika kisafina cha mafunjo miongoni mwa matete karibu na ukingo wa Mto Naili. Alipoonwa na binti ya Farao, yeye ‘alilelewa kama mwana wake mwenyewe.’ Ijapokuwa hivyo, kwanza Musa alinyonyeshwa na kupewa malezi kiroho katika nyumba ya baba na mama yake. Amramu na Yokebedi. Ndipo, akiwa mshiriki wa watu wa nyumba ya Farao, yeye “alifundishwa katika hekima yote ya Wamisri” na akawa “mwenye nguvu nyingi katika maneno na matendo yake,” hodari katika uwezo wake wa kiakili na kimwili.—Matendo 7:20-22; Kutoka 2:1-10; 6:20.

18. Kwa sababu ya imani yake, ni msimamo gani ambao Musa alichukua kwa habari ya ibada ya Yehova?

¹⁸ Hata hivyo, elimu ya Wamisri na fahari ya vitu vya kimwili vya nyumba ya kifalme havikumfanya Musa aache ibada ya Yehova na kuwa mwasi-imani. Bali, “kwa imani Musa, alipokuwa mtu mzima, alikataa kuitwa mwana wa binti Farao,” na mwendo huo ulidokezwa wakati yeye alipotetea ndugu Mwebrania. (Kutoka 2:11, 12) Musa alichagua “kutendwa vibaya pamoja na watu wa Mungu [Waisraeli wenzake wenye kumwabudu Yehova] badala ya kuwa na furahio la muda la dhambi.” Ikiwa wewe ni mtumishi aliyebatizwa wa Yehova mwenye msingi mgumu wa malezi ya kiroho yanayofaa, je! wewe utafuata mfano wa Musa na kusimama imara kwa ajili ya ibada ya kweli?

19. (a) Inaonekanaje dhahiri kwamba Musa alitanguliza Yehova na watu Wake kwanza maishani? (b) Musa alitazamia malipo ya thawabu gani?

¹⁹ Musa aliamua kujiunga pamoja na watu wa Yehova “kwa sababu yeye alikadiria suto la yule Kristo kuwa ni mali zilizo kubwa zaidi ya hazina za Misri.” Inaelekea zaidi kuwa Musa ‘alikadiria suto la kuwa mfananishi wa kale wa Kristo, au Mpakwa-Mafuta wa Mungu, kuwa ni mali zilizo kubwa zaidi ya hazina za Misri.’ Akiwa mshiriki wa nyumba hiyo ya kifalme, yeye angaliweza kufurahia utajiri na sifa katika Misri. Lakini yeye alijizoeza imani na ‘kutazama kwa mkazo sana kuelekea malipo ya ile thawabu’—uzima wa milele kupitia ufufuo duniani katika mfumo mpya wa Mungu.

20. Kuna nini juu ya yaliyompata Musa linaloonyesha kwamba imani inatufanya tuwe watumishi wa Yehova wasio na woga?

²⁰ Imani inatufanya sisi tuwe wasioogopa kwa sababu tuna uhakika katika Yehova kuwa mkombozi. (Soma Waebrania 11:27, 29, NW.) Baada ya kusikia kwamba Musa alikuwa ameua Mmisri, Farao alitafuta kumuua yeye. “Lakini Musa akakimbia mbele ya Farao, akakaa katika nchi ya Midiani.” (Kutoka 2:11-15) Kwa hiyo inaonekana kama Paulo anagusia kule kutoka kwa Waebrania baadaye katika Misri anaposema hivi: “Kwa imani [Musa] aliondoka Misri, lakini bila kuogopa hasira ya mfalme [aliyemtisha na kifo kwa kuwakilisha Mungu kwa ajili ya Israeli], kwa maana yeye aliendelea kuwa thabiti kama kwamba anaona Yeye asiyeonekana.” (Kutoka 10:28, 29) Ingawa Musa hakumwona Mungu kihalisi kamwe, matendo ya Yehova ya kushughulika naye yalikuwa ya halisi sana hata yeye akatenda kama kwamba alimwona ‘Yeye asiyeonekana.’ (Kutoka 33:20) Je! uhusiano wako pamoja na Yehova ni wenye nguvu kadiri hiyo?—Zaburi 37:5; Mithali 16:3.

21. Kwa habari ya kuondoka kwa Israeli katika Misri, ni jambo gani lililotukia “kwa imani”?

²¹ Kabla tu ya Waisraeli kuondoka Misri, “kwa imani [Musa] alikuwa amesherehekea kupitwa na mrusho wa damu, kwamba yule mharabu asipate kugusa wazaliwa wa kwanza [wa Waisraeli].” Ndiyo, imani ilihitajiwa ili kuadhimisha Kupitwa kwa usadiki wa kwamba wazaliwa wa kwanza wa Israeli wangeachiliwa wakati wale Wamisri wangekufa, na imani hiyo ilithawabishwa. (Kutoka 12:1-39) Pia “kwa imani [watu wa Israeli] walipita katika Bahari Nyekundu kama katika nchi kavu, lakini Wamisri walipojasiria juu yayo wakamezwa kabisa.” Mungu alithibitika kuwa mkombozi mzuri ajabu! Na kwa sababu ya ukombozi huo, Waisraeli “walianza kumwogopa Yehova na kutia imani katika Yehova na katika Musa mtumishi wake.”—Kutoka 14:21-31, NW.

22. Kwa habari ya imani, ni maulizo gani yanayobaki kufikiriwa?

²² Kweli kweli imani ya Musa na wazee wa ukoo ni kiolezo kwa Mashahidi wa Yehova leo. Lakini ni jambo gani lililotukia wakati Mungu aliposhughulika zaidi na wazaliwa waliotokana na Abrahamu wakiwa taifa lililotengenezwa kitheokrasi? Sisi twaweza kujifunza nini kutokana na vitendo zaidi vya imani katika nyakati za kale?

Wewe Ungejibuje?

◻ Imani ni nini?

◻ Mfano wa Enoki unatufundisha sisi nini juu ya imani?

◻ Wazee wa ukoo wenye kumwogopa Mungu walionyeshaje kwamba imani inatia ndani uhakika kamili katika ahadi za Yehova?

◻ Ni kitendo gani kilichofanywa na Abrahamu kinachoonyesha kwamba kutii Mungu bila kutia shaka ni uso muhimu wa imani?

◻ Ni vitendo gani vilivyofanywa na Musa vinavyoonyesha kwamba imani inamaanisha kutanguliza Yehova na watu Wake mbele ya kitu cho chote ambacho ulimwengu unacho kutoa?