“Ghadhabu Yangu Kali Itawaka”

1-3. (a) “Ghadhabu kali” ya Yehova itakuwa na matokeo gani? (Tazama picha mwanzoni mwa sura hii.) (b) Sasa tutazungumzia nini?

WANAUME, wanawake, na watoto wamesimama wakiimba pamoja wimbo wa Ufalme. Kisha mzee anatoa sala inayotoka moyoni, akimsihi Yehova awalinde. Wote katika kutaniko hilo wana hakika kwamba Yehova atawatunza, lakini bado wanahitaji kufarijiwa na kutiwa moyo. Wanasikia kelele za vita huko nje. Har–Magedoni imeanza!—Ufu. 16:14, 16.

² Ingawa Yehova atakuwa na ‘ghadhabu kali’ wakati wa vita vya Har–Magedoni hataangamiza watu wote. (Soma Ezekieli 38:18.) Hataelekeza hasira yake kali kwa jeshi moja au taifa moja tu, bali ataielekeza kwa mamilioni ya watu ulimwenguni kote. Siku hiyo, wale waliouawa na Yehova “watatapakaa kutoka mwisho mmoja wa dunia mpaka mwisho wa pili wa dunia”—Yer. 25:29, 33.

³ Ni nini kitakachomfanya Yehova, Mungu mwenye upendo, anayefafanuliwa kuwa “mwenye rehema na huruma” na asiye “mwepesi wa hasira,” achukue hatua hiyo, na kutenda ghafla kwa ‘ghadhabu kali’? (Kut. 34:6; 1 Yoh. 4:16) Acheni tuone jinsi jibu la swali hilo linavyoweza kutufariji sana, kutufanya tuwe jasiri, na kutuchochea leo katika kazi yetu ya kuhubiri.

4, 5. Hasira ya Mungu inatofautianaje na hasira ya wanadamu wasio wakamilifu?

⁴ Kwanza, tunapaswa kutambua kwamba hasira ya Yehova ni tofauti na hasira ya wanadamu wasio wakamilifu. Mwanadamu anapotenda kwa hasira kali, mara nyingi matokeo yake hayawezi kudhibitiwa na yanakuwa mabaya. Kwa mfano, Kaini, mwana wa kwanza wa Adamu, aliwaka “hasira kali” kwa sababu Yehova alikataa dhabihu yake na kukubali dhabihu ya Abeli. Matokeo yalikuwaje? Kaini alimuua ndugu yake aliyekuwa mwadilifu. (Mwa. 4:3-8; Ebr. 11:4) Vilevile, mfikirie Daudi, aliyefafanuliwa kuwa mtu aliyeupendeza moyo wa Yehova. (Mdo. 13:22) Hata Daudi alikuwa karibu kutenda kosa zito aliposikia kwamba tajiri aliyeitwa Nabali alikuwa amemtukana yeye na wanaume wake. Daudi na wanajeshi wake waliwaka hasira “wakajifunga panga zao,” wakikusudia kumuua Nabali na pia kila mwanamume katika nyumba yake. Hata hivyo, Abigaili, mke wa Nabali, alifaulu kumsadikisha Daudi na wanajeshi wake wasilipize kisasi. (1 Sam. 25:9-14, 32, 33) Yehova alimwongoza Yakobo kuandika hivi: “Hasira ya mwanadamu haitokezi uadilifu wa Mungu.”—Yak. 1:20.

⁵ Tofauti na hasira ya mwanadamu, ambayo mara nyingi haiwezi kudhibitiwa, sikuzote Yehova hujidhibiti na huwa na sababu iliyo wazi ya kukasirika. Hata anapokuwa na ghadhabu kali, Yehova hutenda kwa uadilifu. Anapopigana na adui, sikuzote hamfagilii mbali “mwadilifu pamoja na mwovu.” (Mwa. 18:22-25) Isitoshe, Yehova hukasirika kwa sababu za uadilifu. Fikiria sababu mbili na masomo tunayoweza kujifunza.

 6. Yehova hutendaje jina lake linapochafuliwa?

⁶ Sababu: Jina la Yehova linapochafuliwa. Wale wanaodai kwamba wanamwakilisha Yehova ingawa wanatenda uovu humletea suto na kumfanya akasirike. (Eze. 36:23) Kama ilivyozungumziwa katika sura zilizotangulia za kitabu hiki, taifa la Israeli lililetea suto kubwa jina la Yehova. Kwa kweli, mtazamo na matendo ya taifa hilo yalimkasirisha Yehova. Lakini sikuzote alidhibiti hasira yake—aliwaadhibu watu wake kwa kiwango kinachofaa, hakuzidisha. (Yer. 30:11) Na baada ya kutimiza lengo la hasira yake, hakuendelea kukasirika.—Zab. 103:9.

7, 8. Tunajifunza nini kutokana na jinsi Yehova alivyoshughulika na Waisraeli?

⁷ Masomo: Tunapata onyo kali kutokana na jinsi Yehova alivyoshughulika na Waisraeli. Kama Waisraeli wa kale, tuna pendeleo la kuitwa kwa jina la Yehova. Sisi ni Mashahidi wa Yehova. (Isa. 43:10) Maneno na matendo yetu yanaathiri maoni ya watu kumhusu Mungu. Hatungependa kamwe kutenda makosa kwa ukaidi na kuliletea suto jina la Yehova. Unafiki kama huo utafanya hasira ya Yehova iwake, na hatimaye, atachukua hatua ili kutetea jina lake.​—Ebr. 3:13, 15; 2 Pet. 2:1, 2.

⁸ Je, onyo kwamba Yehova anaweza kuwa na ‘ghadhabu kali’ linapaswa kutuzuia tusimkaribie? Hapana. Tunajua kwamba Yehova ni mwenye subira na anasamehe. (Isa. 55:7; Rom. 2:4) Lakini pia tunajua kwamba yeye hutoa nidhamu inapohitajika. Kwa kweli, hilo linafanya tumheshimu sana, kwa kuwa tunajua hasira yake itawaka dhidi ya wale wanaoendelea kutenda dhambi na hataruhusu waendelee kuwa kati ya watu wake. (1 Kor. 5:11-13) Yehova ametuambia waziwazi mambo yanayomkasirisha. Tunapaswa kuepuka mitazamo na matendo yanayomkasirisha.—Yoh. 3:36; Rom. 1:26-32; Yak. 4:8.

9, 10. Yehova hutendaje watu wake waaminifu wanapotishwa? Toa mifano.

⁹ Sababu: Waabudu waaminifu wa Yehova wanapotishwa. Yehova hukasirika maadui wanapowashambulia wale wanaotafuta kimbilio kwake. Kwa mfano, baada ya Waisraeli kuondoka Misri, Farao na jeshi lake lenye nguvu waliwafuatilia watu walioonekana hawana ulinzi kando ya Bahari Nyekundu. Lakini jeshi hilo lilipowafuatilia Waisraeli kwenye bahari kavu, Yehova aling’oa magurudumu ya magari yao ya vita na kuwaangamiza Wamisri baharini. “Hakuna hata mmoja wao aliyeokoka.” (Kut. 14:25-28) Hasira ya Yehova iliwaka dhidi ya Wamisri kwa sababu ya ‘upendo wake mshikamanifu’ kuelekea watu wake.—Soma Kutoka 15:9-13.

¹⁰ Vivyo hivyo, upendo wa Yehova kuelekea watu wake ulimchochea achukue hatua katika siku za Mfalme Hezekia. Waashuru, waliokuwa na jeshi lenye nguvu na ukatili zaidi siku hizo, walikuwa wamefika ili kushambulia Yerusalemu. Waabudu washikamanifu wa Yehova walitishwa kwamba jiji lao lingezingirwa na wangekufa polepole kwa uchungu. (2 Fal. 18:27) Yehova alichukua hatua kwa kumtuma malaika mmoja tu; ambaye aliwaua wanajeshi 185,000 kwa usiku mmoja tu! (2 Fal. 19:34, 35) Wazia hali ilivyokuwa katika kambi ya Waashuru siku iliyofuata. Mikuki, ngao, na mapanga yalitapakaa kila mahali. Wanaume hao hawakuamshwa na mlio wa tarumbeta. Wanajeshi hao hawangeweza kupewa amri. Kulikuwa na kimya kingi kwenye mahema na kambi ilijaa maiti.

11. Tunapataje faraja na ujasiri kutokana na mifano ya Kimaandiko inayoonyesha jinsi Yehova anavyotenda watu wake wanapotishwa?

¹¹ Somo: Mifano hiyo inayoonyesha jinsi Yehova anavyotenda watu wake wanapotishwa, inawatolea adui zetu onyo kali: “Ni jambo lenye kuogopesha kuanguka mikononi mwa Mungu aliye hai” anapokasirika. (Ebr. 10:31) Tunapata faraja na ujasiri kutokana na mifano hiyo. Tunafarijika kujua kwamba adui yetu mkuu, Shetani, hatafanikiwa. Hivi karibuni, ‘kipindi chake kifupi’ cha utawala kitakwisha! (Ufu. 12:12) Kabla ya wakati huo kufika, tunaweza kumtumikia Yehova kwa ujasiri, tukiwa na hakika kwamba hakuna mtu, shirika, wala serikali inayoweza kutuzuia kufanya mapenzi yake. (Soma Zaburi 118:6-9.) Mtume Paulo alieleza usadikisho wetu kwa maneno haya: “Ikiwa Mungu yuko upande wetu, ni nani atakayekuwa dhidi yetu?”—Rom. 8:31.

12. Wakati wa dhiki kuu, ni nini kitakachofanya ghadhabu ya Yehova iwake?

¹² Wakati wa dhiki kuu inayokuja, Yehova atatulinda, kama alivyowalinda Waisraeli walionaswa na Wamisri na pia Wayahudi waliozingirwa na Waashuru huko Yerusalemu. Adui zetu watakapojaribu kutuangamiza, upendo mwingi wa Yehova kutuelekea utafanya ghadhabu yake iwake. Wale watakaotenda kwa upumbavu kwa kutushambulia, kwa kweli watakuwa wakigusa mboni ya jicho la Yehova. Atachukua hatua haraka na kuwaangamiza. (Zek. 2:8, 9) Watu wengi sana watauawa kuliko wakati mwingine wowote. Lakini adui za Mungu hawatashangaa Yehova atakapowatendea kwa ghadhabu. Kwa nini?

13. Yehova ametoa maonyo gani?

¹³ Yehova “si mwepesi wa hasira” na ametoa maonyo ya kutosha kwamba atawaangamiza wale wanaompinga yeye na kuwatisha watu wake. (Kut. 34:6, 7) Yehova aliwatumia manabii kama vile Yeremia, Ezekieli, Danieli, Kristo Yesu, na mitume Petro, Paulo, na Yohana kuonya kuhusu vita vikubwa vya mwisho.—Tazama sanduku “Yehova Aonya Kuhusu Vita Vikubwa Vinavyokaribia.”

14, 15. Yehova amefanya kazi gani, na kwa nini?

¹⁴ Yehova aliagiza maonyo hayo yaandikwe katika Neno lake. Pia, alihakikisha kwamba Biblia ingekuwa kitabu kilichotafsiriwa na kusambazwa kwa wingi zaidi katika historia. Duniani kote, ametokeza jeshi kubwa la wajitoleaji wanaowasaidia wengine wajifunze jinsi ya kuwa na uhusiano mzuri na Mungu na kutoa onyo kuhusu “siku kuu ya Yehova” inayokuja. (Sef. 1:14; Zab. 2:10-12; 110:3) Amewaongoza watu wake watafsiri machapisho ya kujifunzia Biblia katika mamia ya lugha na kutumia mamia ya mamilioni ya saa kila mwaka kuhubiri kuhusu ahadi na maonyo yaliyo katika Neno lake.

¹⁵ Yehova amehakikisha kazi hii yote imefanywa “kwa sababu hataki yeyote aangamizwe bali hutaka wote wafikie toba.” (2 Pet. 3:9) Tuna pendeleo kubwa sana la kumwakilisha Mungu wetu mwenye upendo na subira na kushiriki kwa kadiri fulani kutangaza ujumbe wake! Hata hivyo, hivi karibuni wale ambao hawasikilizi maonyo hayo hawatakuwa na muda wa kufanya mabadiliko.

16, 17. Je, Yehova amepanga siku kwa ajili ya vita vya mwisho? Eleza.

¹⁶ Yehova amepanga siku ya vita vya mwisho. Tayari anajua wakati ambao watu wake watashambuliwa. (Mt. 24:36) Yehova anajuaje wakati ambao adui zake watashambulia?

¹⁷ Kama tulivyoona katika sura zilizotangulia za kitabu hiki, Yehova anamwambia hivi Gogu: “[Nitatia] kulabu katika mataya yako.” Atayaongoza mataifa kwenye vita vya mwisho. (Eze. 38:4) Haimaanishi kwamba Yehova ndiye anayeanzisha pigano hilo; wala hawanyimi wale wanaompinga uhuru wa kuchagua. Badala yake, hilo linaonyesha kwamba Yehova anaweza kusoma mioyo na kujua jinsi adui zake watakavyotenda katika hali fulani.—Zab. 94:11; Isa. 46:9, 10; Yer. 17:10.

18. Kwa nini wanadamu wataanzisha vita dhidi ya Mweza Yote?

¹⁸ Ikiwa Yehova hataanzisha pambano hilo au kuwalazimisha adui zake wapigane naye, kwa nini wanadamu duni watafikia hatua ya kupigana na Mweza Yote? Sababu moja ni kwamba kufikia wakati huo, inaelekea watakuwa wamejisadikishia kwamba hakuna Mungu au haingilii mambo ya wanadamu. Labda watafikiria hivyo kwa sababu tayari watakuwa wamefagilia mbali mashirika yote ya dini ya uwongo duniani. Basi, huenda watafikiria kwamba ikiwa kuna Mungu, kwa kweli angeyalinda mashirika hayo yanayodai kumwakilisha. Hawatatambua kwamba Mungu ndiye aliyeweka katika mioyo yao wazo la kuangamiza dini ambazo zimemletea suto kwa kiwango kikubwa.—Ufu. 17:16, 17.

19. Ni nini ambacho huenda kikatokea baada ya dini ya uwongo kuangamizwa?

¹⁹ Muda fulani baada ya dini ya uwongo kuangamizwa, huenda Yehova ataagiza watu wake watangaze ujumbe mzito, ambao kitabu cha Ufunuo kinaulinganisha na mvua ya mawe, kila jiwe likiwa na uzito wa kilo 20 hivi. (Ufu. 16:21, maelezo ya chini.) Ujumbe huo, yaelekea ni tangazo kwamba mifumo ya kisiasa na kibiashara inakaribia kuangamizwa, utawatesa wale watakaousikia hivi kwamba watamkufuru Mungu. Inaelekea ujumbe huo ndio utakaoyafanya mataifa yawashambulie vikali watu wa Mungu, ili kuwanyamazisha kabisa. Watafikiria kwamba hawana ulinzi, na wanaweza kuangamizwa kwa urahisi. Watakuwa wamekosea sana!

20, 21. Gogu ni nani, na nini kitakachompata?

²⁰ Kama tulivyoona kwenye Sura ya 17 ya kitabu hiki, Ezekieli anatumia jina la kinabii, “Gogu wa nchi ya Magogu,” kuutambulisha muungano wa mataifa utakaotushambulia. (Eze. 38:2) Lakini muungano huo wa mataifa hautakuwa imara. Ingawa itaonekana wanashirikiana, bado watakuwa na roho ya kushindana, kiburi, na hisia za kizalendo. Itakuwa rahisi kwa Yehova kufanya “upanga wa kila mtu [umshambulie] ndugu yake mwenyewe.” (Eze. 38:21) Lakini kuangamizwa kwa mataifa hayo si msiba utakaosababishwa na wanadamu.

²¹ Kabla adui zetu hawajaangamizwa, wataona ishara ya Mwana wa binadamu, inaelekea ni wonyesho wa kustaajabisha wa nguvu za Yehova na Yesu. Maadui hao wataona mambo yatakayowaletea wasiwasi mkubwa. Kama Yesu alivyotabiri, “watu watazimia kwa woga wakitarajia mambo yatakayotokea juu ya dunia inayokaliwa.” (Luka 21:25-27) Watagundua kwamba walikosea sana walipowashambulia watu wa Mungu. Watalazimika kuona Muumba akitenda akiwa kamanda wa jeshi, Yehova wa majeshi. (Zab. 46:6-11; Eze. 38:23) Bila shaka, Yehova atatumia majeshi ya mbinguni na nguvu za asili ili kuwalinda watumishi wake washikamanifu na wakati huohuo kuwaangamiza adui zake.—Soma 2 Petro 2:9.

22, 23. Ni nani watakaowalinda watu wa Mungu, na watakuwa na maoni gani kuhusu jukumu lao?

²² Wazia jinsi Yesu atakavyoongoza kwa bidii vita dhidi ya adui za Mungu na kuwalinda wale wanaompenda na kumtumikia Baba yake. Wazia pia hisia ambazo watiwa mafuta watakuwa nazo. Muda fulani kabla ya Har–Magedoni kuanza, watiwa mafuta waliobaki duniani watainuliwa na kupewa uhai mbinguni ili 144,000 wote waambatane na Yesu katika vita. (Ufu. 17:12-14) Bila shaka, watiwa mafuta wengi watakuwa wamesitawisha uhusiano wa karibu na kondoo wengine kwa sababu ya kufanya kazi pamoja nao katika siku za mwisho. Sasa watiwa mafuta watakuwa na mamlaka na nguvu za kuwalinda wale waliowaunga mkono kwa ushikamanifu walipoteswa.—Mt. 25:31-40.

²³ Malaika pia watakuwa katika jeshi la Yesu la kimbingu. (2 The. 1:7; Ufu. 19:14) Tayari walimsaidia Yesu kumwondoa Shetani na roho waovu mbinguni. (Ufu. 12:7-9) Na wameshiriki kuwakusanya wale wanaomwabudu Yehova duniani. (Ufu. 14:6, 7) Inapendeza kwamba Yehova atawatumia malaika kuwalinda washikamanifu hao! Jambo muhimu zaidi, wote katika jeshi la Yehova watafurahia kupata pendeleo la kulitakasa na kulitetea jina lake, kwa kushiriki kuwaangamiza adui zake.—Mt. 6:9, 10.

24. Umati mkubwa wa kondoo wengine utatendaje?

²⁴ Umati mkubwa wa kondoo wengine hautakuwa na sababu ya kuogopa kwa kuwa watalindwa na jeshi hilo lenye nguvu sana na lenye bidii. Kwa kweli, ‘watasimama wima na kuinua vichwa vyao, kwa sababu ukombozi wao umekaribia.’ (Luka 21:28) Basi, kabla siku ya Yehova haijafika, tunapaswa kuwasaidia wengi iwezekanavyo kumjua na kumpenda Baba yetu mwenye rehema na anayetulinda!—Soma Sefania 2:2, 3.

25. Sasa tutazungumzia nini?

²⁵ Vita vya wanadamu hutokeza machafuko na kuteseka. Kinyume chake, baada ya Har–Magedoni kutakuwa na utaratibu na furaha. Hali itakuwaje baada ya hasira ya Yehova kupita, wanajeshi wake kuweka silaha zao, na kelele za mwisho za vita kwisha? Katika sura inayofuata, tutazungumzia wakati huo ujao wenye kupendeza.