Daraka Huandamana na Kuijua Dini ya Kweli

“Heri [wenye furaha ni wale, NW] walisikiao neno la Mungu na kulishika.”—LUKA 11:28.

1. Mara wanapoitambulisha dini ya kweli, ni watu wa aina gani hujenga maisha zao juu yayo?

HAITOSHI tu kutambulisha dini ya kweli. Ikiwa sisi ni wale wapendao mambo manyoofu na ya kweli, mara tunapoipata, tutajenga maisha zetu juu yayo. Dini ya kweli si falsafa ya kiakili; ni njia ya maisha.—Zaburi 119:105; Isaya 2:3; linganisha Matendo 9:2.

2, 3. (a) Yesu alikaziaje umaana wa kufanya mapenzi ya Mungu? (b) Kila mtu ajuaye dini ya kweli ana daraka jipi?

² Yesu Kristo alikazia umaana wa kufanya yale ambayo Mungu amefunua kuwa mapenzi Yake. Katika kumalizia yale ambayo yamekuja kuitwa Mahubiri ya Mlimani, Yesu alijulisha kwamba si wote waliomwita Bwana (hivyo wakidai kuwa Wakristo) ambao wangeingia katika Ufalme; ni wale tu waliofanya mapenzi ya Baba yake ambao wangeingia. Yeye alisema kwamba wengine wangekataliwa mbali kuwa ‘watendao uasi-sheria.’ Kwa nini uasi-sheria? Kwa sababu kama vile Biblia husema, kushindwa kufanya mapenzi ya Mungu ni dhambi, na dhambi ni uasi-sheria. (Mathayo 7:21-23; 1 Yohana 3:4, NW; linganisha Warumi 10:2, 3.) Huenda mtu akaijua dini ya kweli, huenda akawapongeza wale waifundishayo, na kusema mema juu ya wale wanaoizoea, lakini yeye pia ana daraka la kuitumia katika maisha yake mwenyewe. (Yakobo 4:17) Akikubali daraka hilo, yeye atapata kwamba maisha yake yatathawabishwa, naye atapata shangwe ambayo hawezi kupata kwa njia nyingine.

³ Katika makala inayotangulia, tulizungumzia alama sita zinazotambulisha dini ya kweli. Kila moja ya hizo inatusaidia tuitambulishe dini ya kweli na pia hutuonyesha sisi binafsi magumu na fursa zayo. Kwa jinsi gani?

Wewe Huitikiaje Neno la Mungu?

4. (a) Wapya waanzapo kushirikiana na Mashahidi wa Yehova, wao huona nini upesi kuhusiana na matumizi ya Biblia ya Mashahidi? (b) Kulishwa vema kiroho huathirije watumishi wa Yehova?

⁴ Mashahidi wa Yehova wanapojifunza Biblia pamoja na wenye kupendezwa karibuni, wengi wa wapya hao hutambua upesi kwamba yale yanayofundishwa hutoka katika Biblia. Katika kujibu maswali yao, wao hawarejezwi kwenye imani za kanisa, mapokeo ya kibinadamu, au maoni ya watu mashuhuri. Neno la Mungu mwenyewe ndiyo mamlaka. Waendapo kwenye Jumba la Ufalme, wao huona kwamba hapo pia Biblia ndicho kitabu kikuu cha mafundisho. Haichukui muda mrefu kwa watafutaji wa kweli wenye moyo mweupe kung’amua kwamba kisababishi kikuu cha shangwe wanayoona miongoni mwa Mashahidi wa Yehova ni jambo la kwamba wao wanalishwa vema kiroho kutoka kwa Neno la Mungu.—Isaya 65:13, 14.

5. (a) Ni mwito gani unaotolewa kwa wale wanaotazama Mashahidi wa Yehova? (b) Wao wanaweza kushirikije shangwe ya Mashahidi?

⁵ Ikiwa watambua hilo, wewe waitikiaje? Ikiwa wafahamu hilo, huwezi ukawa tu mtazamaji asiyetenda, wala hupaswi utake kuwa hivyo. Biblia huonyesha kwamba wale walio “wasikiaji tu” bali si “watendaji wa neno” ‘wanajidanganya nafsi zao.’ (Yakobo 1:22) Wao hujidanganya kwa sababu wanashindwa kutambua kwamba yajapokuwa yale huenda wakasema, kushindwa kwao kumtii Mungu huonyesha kwamba wao hawampendi kikweli. Imani ambayo haiungwi mkono na matendo ni imani iliyokufa. (Yakobo 2:18-26; 1 Yohana 5:3) Tofauti na hilo, yule anayesukumwa na upendo kwa ajili ya Yehova kuwa “mtendaji wa kazi” atakuwa “heri [mwenye furaha, NW] katika kutenda kwake.” Ndiyo, Yesu Kristo alieleza, “heri [wenye furaha ni wale, NW] walisikiao neno la Mungu na kulishika.”—Yakobo 1:25; Luka 11:28; Yohana 13:17.

6. Ikiwa twathamini kwelikweli Neno la Mungu, tutajitahidi kuwa na fursa zipi kibinafsi?

⁶ Shangwe hiyo itaongezeka unapokua katika ujuzi wa mapenzi ya Mungu na kutumia yale mambo mengine unayojifunza. Utajitahidi kadiri gani ili kujifunza Neno la Mungu? Makumi ya maelfu ya watu wasioweza kusoma wala kuandika wamejitahidi kujifunza kusoma, wakifanya hivyo hasa ili waweze kusoma Maandiko na kuwafundisha watu wengine juu yayo. Wengine huamka mapema kila asubuhi ili waweze kutumia wakati fulani kila siku wakisoma Biblia na misaada ya kujifunza Biblia, kama vile Mnara wa Mlinzi. Unapofanya usomaji wa Biblia wa mfululizo au kusoma maandiko yaliyotajwa katika habari nyingi ya funzo, angalia kwa uangalifu sheria na amri za Yehova, na ujaribu kutambua zile kanuni nyingi zilizopo ili kutuongoza. Tafakari juu ya yale ambayo kila sehemu hufunua kuhusu Mungu, kusudi lake, na kushughulika kwake na jamii ya kibinadamu. Ruhusu wakati ili hayo yafinyange moyo wako. Fikiria kama kuna njia ambazo waweza kutumia shauri la Biblia kikamili zaidi maishani mwako.—Zaburi 1:1, 2; 19:7-11; 1 Wathesalonike 4:1.

Je! Ujitoaji Wako kwa Yehova U Kamili?

7. (a) Fundisho la Utatu limeathirije juhudi za watu za kumwabudu Mungu? (b) Ni nini laweza kutokea mtu ajifunzapo kweli juu ya Yehova?

⁷ Kwa mamilioni ya watu, kujifunza kwamba Mungu wa kweli si Utatu kumekuwa kitulizo. Elezo kwamba “hilo ni fumbo” halikuwatosheleza kamwe. Wangeweza kumkaribiaje Mungu asiyefahamika? Tokeo la fundisho hilo ni kwamba, wao huwa na mwelekeo wa kumpuuza Baba (ambaye hawakupata kulisikia jina lake kanisani) na kumwabudu Yesu kuwa Mungu au kuelekeza ibada yao kwa Mariamu (ambaye walifundishwa kuwa ndiye “Mama wa Mungu”). Lakini mioyo yao iliitikia kwa furaha wakati mmoja wa Mashahidi wa Yehova alipofungua Biblia na kuwaonyesha jina la Mungu la kibinfasi, Yehova. (Zaburi 83:18) Mwanamke mmoja Mvenezuela alisisimuka sana alipoonyeshwa jina la Mungu hivi kwamba alimkumbatia kihalisi yule Shahidi mchanga wa kike aliyeshiriki naye kweli hiyo yenye thamani kubwa naye akakubali kuwa na funzo la Biblia nyumbani. Watu hao wanapojifunza kwamba Yesu alimtaja Baba yake kuwa “Baba yangu naye ni Baba yenu,” na kwamba Yesu alimwita Baba yake “Mungu wa pekee wa kweli,” wao wanang’amua kwamba yale ambayo Biblia hufundisha juu ya Mungu si mambo yasiyofahamika. (Yohana 17:3; 20:17) Wanapopata kujua sifa za Yehova, wanahisi kuvutwa kwake, wanaanza kumwomba, na kutaka kumpendeza. Tokeo ni nini?

8. (a) Kwa sababu ya kumpenda kwao Yehova na tamaa yao ya kumpendeza, mamilioni ya watu wamefanya nini? (b) Kwa nini ubatizo wa Kikristo ni wa maana sana?

⁸ Katika ile miaka kumi ambayo imepita, watu 2,528,524 katika kontinenti sita na katika visiwa vingi sana wameweka wakfu maisha zao kwa Yehova kisha kufananisha wakfu huo kwa ubatizo wa maji. Je! wewe ulikuwa mmoja wao, au unajitayarisha sasa kubatizwa? Ubatizo ni hatua ya maana sana katika maisha ya kila Mkristo wa kweli. Yesu aliwapa wafuasi wake utume wa kufanya wanafunzi wa watu wa mataifa yote na kuwabatiza. (Mathayo 28:19, 20) Yastahili pia kuonwa kwamba ilikuwa baada tu ya ubatizo wa Yesu mwenyewe kwamba Yehova mwenyewe alinena kutoka mbinguni, akisema hivi: “Wewe ni Mwana wangu, mpendwa; nimekukubali wewe.”—Luka 3:21, 22, NW.

9. Ili kudumisha uhusiano wa kukubaliwa na Yehova, ni nini kinachotakwa kwetu?

⁹ Uhusiano wa kukubaliwa na Yehova ni jambo la kuthaminiwa. Ikiwa umeingia katika uhusiano wa jinsi hiyo kwa wakfu na ubatizo, epuka chochote kiwezacho kuuharibu. Usiruhusu wasiwasi wa maisha na hangaiko juu ya mambo ya kimwili yausukume kwenye mahali pa pili. (1 Timotheo 6:8-12) Kwa kweli ishi kulingana na shauri la Mithali 3:6: “Katika njia zako zote mkiri [Yehova], naye atayanyosha mapito yako.”

Upendo wa Kristo Unakuathiri Kadiri Gani?

10. Kwa nini kumwabudu kwetu Yehova hakutufanyi tumpuuze Yesu?

¹⁰ Bila shaka, uthamini ufaao kuelekea Yehova akiwa Mungu wa pekee wa kweli, haumfanyi mtu ampuuze Yesu Kristo. Kinyume cha hilo, Ufunuo 19:10 (NW) lasema: “Kutoa ushahidi kuhusu Yesu ndiko hupulizia kutoa unabii.” Kuanzia Mwanzo hadi Ufunuo, unabii mbalimbali huandaa mambo madogomadogo kuhusu fungu la Yesu Kristo katika kusudi la Yehova. Mtu anapopata kufahamu mambo hayo madogomadogo, wazo lenye kusisimua hutokea bila upotovu wala makosa ambayo yametokana na mafundisho bandia ya Jumuiya ya Wakristo.

11. Kujifunza yale ambayo kwa kweli Biblia hufundisha juu ya Mwana wa Mungu kulimwathirije mwanamke katika Polandi?

¹¹ Kupata kuelewa kweli kuhusu Mwana wa Mungu kwaweza kumwathiri mtu sana. Ndivyo ilivyokuwa kwa habari ya Danuta, mwanamke katika Polandi. Yeye alikuwa amewasiliana na Mashahidi wa Yehova kwa miaka minane, akafurahia yale waliyofundisha, lakini hakufanya ibada ya kweli iwe njia yake ya maisha. Kisha akapokea nakala ya kitabu Yule Mtu Mkuu Zaidi Aliyepata Kuishi, kinachosimulia maisha ya Kristo kwa njia iliyo rahisi kuelewa.a Jioni sana, yeye alifungua kitabu hicho, akiwa na nia ya kusoma sura moja pekee. Hata hivyo yeye hakukiweka kando hadi alfajiri alipomaliza kukisoma. Yeye akalia machozi. “Yehova, nisamehe,” akasihi. Kwa sababu ya yale aliyosoma, aliona kwa wazi zaidi ya wakati mwingine wowote ule upendo ulioonyeshwa na Yehova na Mwana wake. Aling’amua kwamba kwa miaka minane alikuwa amegeukia mbali na msaada ambao Mungu alikuwa akimtolea kwa subira. Katika 1993 alibatizwa ukiwa ufananisho wa wakfu wake kwa Yehova kwa msingi wa imani katika Yesu Kristo.

12. Ujuzi wetu sahihi juu ya Yesu Kristo unaathirije maisha zetu?

¹² “Ujuzi sahihi wa Bwana wetu Yesu Kristo” unahusianishwa na kuwa Mkristo mwenye bidii na mwenye kuzaa matunda. (2 Petro 1:8, NW) Wewe utashiriki kwa kadiri gani katika utendaji huo, kushiriki ujumbe wa Ufalme pamoja na wengine? Kiasi ambacho watu mmoja-mmoja waweza kufanya kinaathiriwa na hali nyingi. (Mathayo 13:18-23) Hatuwezi kubadili hali nyingine; twaweza kubadili nyingine. Ni nini kitakachotusukuma tutambulishe na kufanya mabadiliko yawezayo kufanywa? Mtume Paulo aliandika hivi: “Upendo wa Kristo watubidisha”; yaani, upendo alioonyesha kwa kutoa uhai wake kwa ajili yetu ni wenye kutokeza sana hivi kwamba uthamini wetu kuelekea upendo huo unapokua, mioyo yetu wenyewe itavutiwa sana. Kwa sababu hiyo, twang’amua kwamba isingefaa hata kidogo kwetu sisi kuendelea kufuatia miradi ya kibinafsi na kuishi hasa ili kujiridhisha wenyewe. Badala ya hivyo, tunarekebisha mambo yetu ili kuipa mahali pa kwanza ile kazi ambayo Kristo aliwafundisha wanafunzi wake wafanye.—2 Wakorintho 5:14, 15.

Kutengwa na Ulimwengu —Kwa Kadiri Gani?

13. Kwa nini tusitake kuwa sehemu ya dini ambayo imejifanya yenyewe kuwa sehemu ya ulimwengu?

¹³ Si vigumu kuona sifa ambayo Jumuiya ya Wakristo na dini nyingine zimejipatia kwa sababu zinataka kuwa sehemu ya ulimwengu. Fedha za kanisa zimetumiwa ili kulipa gharama za utendaji wa kimapinduzi. Mapadri wamekuwa wapiganaji wa kuvizia. Siku baada ya siku, magazeti ya habari yanasimulia ripoti juu ya vikundi vya kidini katika sehemu mbalimbali za dunia zinazopigana. Mikono yao inatiririka damu. (Isaya 1:15) Na ulimwenguni pote makasisi wanaendelea kujaribu kuongoza hali ya kisiasa kwa faida yao. Waabudu wa kweli hawashiriki hata kidogo katika hayo.—Yakobo 4:1-4.

14. (a) Ni lazima sisi binafsi tuepuke nini ikiwa tutaendelea kujitenga na ulimwengu? (b) Ni nini chaweza kutusaidia tuepuke kutegwa na mitazamo na mazoea ya kilimwengu?

¹⁴ Lakini kujitenga na ulimwengu huhusisha mengi zaidi ya hayo. Ulimwengu una sifa ya kupenda fedha na vitu ambavyo fedha zaweza kununua, tamaa ya kupata umashuhuri wa kibinafsi, na kufuatia anasa daima, pamoja na mambo kama vile kutohangaikia wengine kikweli, usemi wa uwongo na wa kutukana, uasi dhidi ya mamlaka, na kushindwa kujidhibiti. (2 Timotheo 3:2-5; 1 Yohana 2:15, 16) Kwa sababu ya kutokamilika kwetu wenyewe, nyakati nyingine huenda tukaonyesha kwa njia fulani baadhi ya vitabia hivyo. Ni nini chaweza kutusaidia katika shindano letu la kuepuka mitego ya jinsi hiyo? Twahitaji kujikumbusha ni nani aliye chanzo cha hayo yote. “Dunia yote pia hukaa katika yule mwovu.” (1 Yohana 5:19) Haidhuru mwendo fulani ni wenye kushawisha kadiri gani, haidhuru ni watu wengine wengi kadiri gani wanaoishi njia hiyo, tunapoona mpinzani mkuu wa Yehova, Shetani Ibilisi, kuwa ndiye chanzo cha hayo, tunang’amua jinsi hayo ni mambo ya kuchukiza kwelikweli.—Zaburi 97:10.

Upendo Wako Wafikia Kiwango Gani?

15. Ule upendo usio na ubinafsi ambao wewe uliona ulikusaidiaje utambulishe dini ya kweli?

¹⁵ Ulipoanza kushirikiana na Mashahidi wa Yehova kwa mara ya kwanza, bila shaka ule upendo unaodhihirishwa miongoni mwao ulikuvutia kwa sababu ya jinsi ulivyo tofauti na roho ya ulimwengu. Kukazia upendo hufanya ibada ya Yehova iwe tofauti na namna za ibada nyingine zote. Huenda ikawa hilo ndilo lilikusadikisha kwamba Mashahidi wa Yehova kwa kweli ndio wanaozoea dini ya kweli. Yesu Kristo mwenyewe alisema hivi: “Hivyo watu wote watatambua ya kuwa ninyi mmekuwa wanafunzi wangu, mkiwa na upendo ninyi kwa ninyi.”—Yohana 13:35.

16. Huenda kukawa fursa zipi kwa sisi mmoja-mmoja kupanuka katika upendo wetu?

¹⁶ Je! sifa hiyo inakutambulisha wewe pia kuwa mmoja wa wanafunzi wa Kristo? Je! kuna njia ambazo wewe waweza kupanuka katika kuonyesha kwako upendo? Bila shaka sisi sote twaweza. Hilo latia ndani mengi zaidi ya kuwa na urafiki kwa wengine kwenye Jumba la Ufalme. Na ikiwa tungeonyesha upendo kwa wale tu wanaotupenda, je, tungetofautiana na ulimwengu kwa njia yoyote? “Zaidi ya yote iweni na juhudi nyingi katika kupendana,” Biblia husihi. (1 Petro 4:8) Twapaswa kuonyesha upendo mwingi zaidi kwa nani? Je! ni kwa ndugu au dada wa Kikristo ambaye malezi yake ni tofauti na yetu na ambaye njia zake za kufanya mambo fulani hutuudhi? Je! ni kwa mtu ambaye, kwa sababu ya ugonjwa fulani au uzee, hajaweza kuhudhuria mikutano kwa ukawaida? Je! ni kwa mwenzi wetu wa ndoa? Au, labda ni kwa wazazi wetu wanaozeeka? Wengine waliokuwa wakifanya vema katika kudhihirisha matunda ya roho, kutia na upendo, walihisi kana kwamba walikuwa wakijifunza hayo kuanzia mwanzo tena walipokabiliwa na hali ngumu sana ziwezazo kutokea katika kutoa karibu utunzaji wa wakati wote kwa mshiriki mmoja wa familia ambaye amekuja kuwa hajiwezi hata kidogo. Bila shaka, hata tunapokabili hali hizo, upendo wetu wapasa pia kufikia wengine zaidi ya watu wa nyumbani mwetu.

Kutoa Ushahidi wa Ufalme —Ni Jambo la Maana Kadiri Gani Kwako?

17. Ikiwa sisi binafsi tumenufaika kutokana na ziara za Mashahidi wa Yehova, twapaswa sasa kuhisi kuwa twasukumwa kufanya nini?

¹⁷ Njia ya maana ambayo sisi huonyesha upendo kwa wanadamu wenzetu ni kwa kuwatolea ushahidi juu ya Ufalme wa Mungu. Ni kikundi kimoja tu cha watu kinachofanya kazi hiyo iliyotabiriwa na Yesu. (Marko 13:10) Hao ni Mashahidi wa Yehova. Tumenufaika kibinafsi na hilo. Sasa ni pendeleo letu kuwasaidia wengine. Tukishiriki maoni ya Mungu juu ya jambo hilo, kazi hiyo itakuwa jambo la maana maishani mwetu.

18. Kusoma kwetu kitabu Jehovah’s Witnesses—Proclaimers of God’s Kingdom kwaweza kuathirije kushiriki kwetu binafsi katika kutoa ushahidi wa Ufalme?

¹⁸ Ile habari yenye kusisimua juu ya jinsi ujumbe wa Ufalme umechukuliwa hadi sehemu za mbali zaidi za dunia katika siku hizi za mwisho inasimuliwa katika kile kitabu Jehovah’s Witnesses—Proclaimers of God’s Kingdom (Mashahidi wa Yehova—Wapiga-Mbiu ya Ufalme wa Mungu). Ikiwa wajua Kiingereza, usikose kukisoma. Na unapokisoma, tolea uangalifu wa pekee zile njia zote ambazo watu mmoja-mmoja wameshiriki katika kutoa ushahidi juu ya Ufalme. Je! kuna wengine ambao wewe waweza kuiga kielelezo chao? Kuna fursa nyingi ambazo zimefunguliwa kwetu. Upendo wetu kuelekea Yehova na utusukume kuzitumia vizuri.

19. Tunanufaishwaje tunapokubali daraka linaloandamana na kuijua dini ya kweli?

¹⁹ Tunapojitahidi hivyo kufanya mapenzi ya Yehova, tunapata jibu kwa swali hili, Ni nini maana ya uhai? (Ufunuo 4:11) Hatupapasipapasi tena, tukiwa na hisia ya utupu. Hakuna kazi-maisha ambayo wewe waweza kujitolea kufanya itakayokuletea uradhi mwingi kuliko kujitahidi mwenyewe kwa moyo wote katika utumishi wa Yehova Mungu. Na hilo latoa wakati ujao mtukufu kama nini! Umilele wa maisha yenye kuridhisha katika ulimwengu wake mpya, ambako tutaweza kutumia uwezo wetu kikamili kwa kupatana na lile kusudi lenye upendo ambalo Mungu aliumba jamii ya kibinadamu itimize.

[Maelezo ya Chini]

Ungejibuje?

◻ Kwa nini ni muhimu kwa dini kukubali Biblia kuwa Neno la Mungu na kumheshimu Yehova kuwa ndiye Mungu wa kweli?

◻ Dini ya kweli hufundisha nini kuhusu fungu la Yesu akiwa Mfidi?

◻ Kwa nini Wakristo waendelee kujitenga na ulimwengu na kuzoea upendo usio na ubinafsi?

◻ Kutoa ushahidi wa Ufalme kuna fungu jipi katika dini ya kweli?

[Picha katika ukurasa wa 16]

Ubatizo ni hatua muhimu katika kukubali madaraka ya ibada ya kweli. Kila mwezi watu wapatao 25,000 ulimwenguni pote huchukua hatua hiyo

Urusi

Senegal

Papua New Guinea

U.S.A.

[Picha katika ukurasa wa 17]

Kushiriki kweli ya Biblia pamoja na wengine ni sehemu ya dini ya kweli

U.S.A.

Brazili

U.S.A.

Hong Kong