Sababu Tunahitaji Imani na Hekima
Mambo Makuu Kutoka Yakobo
WATUMISHI wa Yehova wanahitaji uvumilivu wanapokuwa chini ya jaribu. Pia ni lazima waepuke mwenendo ambao ungetokeza kutokubaliwa kwa kimungu. Mambo kama hayo yanakaziwa katika barua ya Yakobo, na kufanya kitu chanya kuyahusu kwahitaji imani ya matendo na hekima ya kimbingu.
Mwandikaji wa barua hii hajitambulishi kama mmoja wa mitume wawili wa Yesu walioitwa Yakobo bali kama ‘mtumwa wa Mungu, na wa Kristo.’ Vivyo hivyo, Yuda ndugu-nusu wa Yesu asema yeye ni “mtumwa wa Yesu Kristo, ndugu yake Yakobo.” (Yakobo 1:1; Yuda 1; Mathayo 10:2, 3) Hivyo, Yakobo ndugu-nusu wa Yesu kwa wazi ndiye aliandika barua iliyo na jina lake.—Marko 6:3.
Barua hii haitaji uharibifu wa Yerusalemu katika 70 W.K., na mwanahistoria Yosefu aonyesha kwamba Yakobo aliuawa kwa ajili ya imani yake muda mfupi baada ya kifo cha wakili Mroma Festo katika 62 W.K. hivi. Kwa hiyo, yaonekana barua hiyo iliandikwa kabla ya 62 W.K. Iliandikwa kwa “kabila kumi na mbili” za Israeli wa kiroho kwa kuwa ilielekezwa kwa wale wanaoshikilia “imani ya Bwana wetu Yesu Kristo.”—Yakobo 1:1; 2:1; Wagalatia 6:16.
Yakobo atumia vielezi ambavyo vyaweza kutusaidia tukumbuke shauri lake. Kwa mfano, yeye aonyesha kwamba mtu aombaye Mungu hekima apaswa asiwe na shaka, “maana mwenye shaka ni kama wimbi la bahari lililochukuliwa na upepo, na kupeperushwa huku na huku.” (1:5-8) Ulimi wetu wapaswa kudhibitiwa kwa sababu waweza kuongoza mwendo wetu kama vile usukani huongoza merikebu. (3:1, 4) Na kukabiliana na majaribu, tunahitaji kuonyesha uvumilivu wenye saburi kama vile mkulima angojapo mavuno.—5:7, 8.
Imani, Majaribu na Matendo
Yakobo aonyesha kwanza kwamba tunaweza kuwa na furaha tukiwa Wakristo ijapokuwa majaribu yetu. (1:1-18) Baadhi ya matatizo haya, kama magonjwa, ni ya kawaida kwa wanadamu wote, lakini Wakristo huteseka pia kwa ajili ya kuwa watumwa wa Mungu na wa Kristo. Yehova atatupa hekima inayohitajiwa ili kuvumilia ikiwa tunaendelea kuiomba katika imani. Yeye hatujaribu kamwe kwa mambo maovu, na tunaweza kutegemea yeye kuandaa yaliyo mema.
Ili kupokea msaada wa Mungu, ni lazima tumtolee ibada kupitia matendo yanayoonyesha imani yetu. (1:19–2:26) Hilo lataka kwamba tuwe “watendaji wa neno” si wasikiaji tu. Ni lazima tudhibiti ulimi, kuwatazama yatima na wajane, na kubaki bila waa kutoka kwa ulimwengu. Kama tungewapendelea matajiri na kuwadharau maskini, tungeinajisi “sheria ya kifalme” ya upendo. Tunahitaji pia kukumbuka kwamba imani inaonyeshwa kwa matendo kama mifano ya Abrahamu na Rahabu inavyoeleza vizuri. Kwa kweli “imani pasipo matendo imekufa.”
Hekima ya Kimbingu na Sala
Walimu wanahitaji imani na hekima pia ili watimize wajibu wao. (3:1-18) Wao wana daraka zito wakiwa wafunzi. Kama wao, ni lazima tudhibiti ulimi—kitu ambacho hekima ya kimbingu inatusaidia kufanya.
Hekima hutuwezesha pia kutambua kwamba kujiachilia kwenye mielekeo ya kilimwengu kungeharibu uhusiano wetu pamoja na Mungu. (4:1–5:12) Ikiwa tumeshindana kwa ajili ya makusudi ya kibinafsi au tumelaumu ndugu zetu, tunahitaji kutubu. Na ni jambo la maana kama nini kuepuka urafiki pamoja na ulimwengu huu, kwa kuwa huo ni uzinzi wa kiroho! Tusipuuze kamwe mapenzi ya Mungu kwa mipango ya kupangia vitu vya kimwili, na tujilinde dhidi ya roho isiyo na saburi na kupiga kite dhidi yetu wenyewe kwa wenyewe.
Yeyote aliye mgonjwa kiroho apaswa kutafuta msaada wa wazee wa kundi. (5:13-20) Ikiwa dhambi zimetendwa, sala zao na shauri lao la hekima zitasaidia kurudisha kwenye afya ya kiroho mtenda dhambi aliyetubu. Kwa kweli, “yeye amrejezaye mwenye dhambi hata atoke katika njia ya upotevu, ataokoa roho [nafsi, NW, ya mtenda mabaya] na mauti [ya kiroho na ya milele].”
[Sanduku katika ukurasa wa 23]
Watendaji wa Neno: Tunapaswa kuwa “watendaji wa neno, wala si wasikiaji tu.” (Yakobo 1:22-25) Msikiaji tu “ni kama mtu anayejiangalia uso wake katika kioo.” Baada ya ukaguzi mfupi, aondoka “mara akasahau jinsi alivyo.” Lakini ‘mtendaji wa neno’ achunguza kwa uangalifu sheria ya Mungu kamilifu, au kamili, inayotia ndani kila kitu kinachotakwa kwa Mkristo. Yeye ‘hukaa humo,’ akiendelea kuchunguza sheria hiyo kwa maoni ya kufanya marekebisho ili apatane nayo kwa ukaribu. (Zaburi 119:16) ‘Mtendaji wa neno’ anatofautianaje na mtu anayetupa macho ndani ya kioo na kusahau kinachofunua? Naam, mtendaji anatumia neno la Yehova na kuonea shangwe upendeleo Wake!—Zaburi 19:7-11.