“Mfuate Sana Hatua Zake”—Jinsi Gani?
“MIMI singeweza kamwe kuwa mkamilifu kama Yesu, hata nikisali au nikijaribu sana.” Asilimia 89 ya wale waliochunguzwa maoni na kichapo U.S. Catholic walikubaliana na maneno hayo. Kwa kweli, taraja la kutembea katika hatua za Kristo linaweza kuonekana kana kwamba ni mzigo. Hasa wakati unapofikiria Kristo kuwa vile anavyoonyeshwa na makanisa. Mwanamume mmoja Mkatoliki alisema: “Kwa ujumla, mimi namfikiria Yesu kuwa mtu mchangamfu, mwenye upendo, mwenye kujali watu, mwenye kuvumilia watu ambaye hanitazamii mimi nifanye mambo mengi mno. Lakini ninapofika kanisani, naona Yesu akiabudiwa kwa utawa mwingi mpaka mimi nashindwa kujua la kufanya kisha ninanyenyekezwa na makosa yangu ya kutokamilika.”
Lakini, maandishi ya Injili hayamwonyeshi Kristo ‘akiabudiwa kwa utawa mwingi.’ Yanaonyesha kwamba Yesu alizaliwa katika jamaa ya watu wenye kuchuma riziki kwa jasho, wala si ya matajiri. Yusufu baba yake mlezi alikuwa seremala. Ingawa ni machache yanayojulikana juu ya utoto wa Yesu, kisa kimoja kinafunua habari nyingi. Yesu alipokuwa na umri wa miaka 12, wazazi wake walienda naye Yerusalemu katika ziara yao ya kila mwaka kwa ajili ya Sikukuu ya Kupitwa. Katika pindi hiyo yeye alijihusisha sana katika mazungumzo ya Kimaandiko, na jamaa yao ikaondoka bila yeye. Halafu inaeleweka kwamba Yusufu na Mariamu walimkuta siku tatu baadaye katika hekalu, akiwa “ameketi katikati ya waalimu, akiwasikiliza na kuwauliza maswali.” Zaidi ya hilo, “wote waliomsikia walistaajabia fahamu zake na majibu yake.” Wazia hilo, kwamba akiwa na umri wa miaka 12 tu angeweza si kuuliza tu maulizo yaliyofikiriwa vizuri ya kiroho bali pia angeweza kutoa majibu ya kiakili. Bila shaka alikuwa amesaidiwa na mazoezi aliyopewa na wazazi wake!—Luka 2:41-50.
Ikiwa wewe ni kijana, je! inawezekana kwako kufuata mfano wa Kristo? Hakika inawezekana! Kwa maana Kristo mwenyewe alituachia ‘kielelezo, tufuate nyayo zake.‘—1 Petro 2:21.
Ujana ni wakati mzuri wa kujipatia maarifa ya msingi juu ya Mungu na Neno lake. Ni kweli kwamba wengine unaowajua huenda wakapoteza wakati mwingi wakisoma vitabu vyenye picha za kuchekesha na kutazama televisheni. Badala ya hivyo, mbona wewe usifuate hatua za Yesu, ambaye alipokuwa mvulana alifurahia kujifunza juu ya Yehova? Kwa sababu ya kupenda mambo ya kiroho, “Yesu akazidi kuendelea katika hekima.” (Luka 2:52) Hata wewe unaweza kufanya hivyo.
Kwa mfano: Katika shule ya Afrika ya Kusini, mwalimu aliulizwa kama angeweza kuthibitisha kwamba Biblia ni ya kweli. Mwalimu huyo mwanamume aliungama kwamba hangeweza. Mvulana aliye mmoja wa Mashahidi wa Yehova alisema hivi kwa ujasiri: “Hakika mimi naweza kuthibitisha Biblia ni ya kweli!” Jinsi gani? Yeye alizikumbuka habari alizokuwa amejifunza katika toleo la juzijuzi la Mnara wa Mlinzi. Kwa hiyo baada ya kupata ruhusa ya kusema, akaeleza maana ya unabii ulioandikwa katika Danieli sura ya 2. Darasa lilistaajabu alipokuwa akionyesha jinsi unabii huo ulivyotabiri kuinuka na kuanguka kwa serikali za ulimwengu zenye kufuatana mfululizo na jinsi zingeharibiwa hatimaye na Ufalme wa Mungu. Mazungumzo mazuri sana yakafuata naye akapata nafasi ya kujibu maulizo mengi.
Kuja Kufanya Mapenzi ya Mungu
Msingi wa maarifa na ufahamu wa Biblia ambao Yesu aliweka katika ujana wake ulimvuta moyoni baadaye achukue hatua nzito. “Yesu akaja . . . Yordani kwa Yohana ili abatizwe.” Wakati uliofaa ulikuwa umefika ili yeye abebe madaraka yake akiwa mhudumu wa Mungu. Ubatizo ulimaanisha kwamba anajitoa afanye mapenzi ya Mungu.—Mathayo 3:13-15.
Vivyo hivyo Wakristo wanatakwa waige Kristo kwa kubatizwa. Ubatizo ni mfano mtakatifu, ishara ya nje-nje ya wakfu. Wakati tunapokubali kufanyia mtu au shirika fulani kazi, kwanza tunahakikisha ni matakwa na hali gani zilizopo na mara nyingi tunafuatisha jambo hilo na utiaji sahihi katika mkataba. Lakini bila sahihi, mkataba huo hauwi na wajibu wa kufuatwa. Ndivyo ilivyo kuhusu ubatizo—huo unafanya wakfu wetu kwa Mungu uwe halali. Katika maana fulani, sisi tunakuwa tukisema kama Yesu: ‘Tazama, nimekuja niyafanye mapenzi yako, Mungu.’ (Waebrania 10:7) Hivyo tunakuwa watumishi wa Mungu, wahudumu wake!—2 Wakorintho 3:5, 6.
Bila shaka, kama ilivyokuwa kwa Yesu, kwanza itakupasa upate msingi wa maarifa ya kumjua Mungu. Lakini Mashahidi wa Yehova wanaweza kukusaidia—na watoto wako—mfanye hivyo kwa kujifunza Biblia hatua kwa hatua.
Kuitanguliza Huduma
Baada ya kubatizwa, Yesu aliingia katika kipindi cha kufunga, kutafakari, na kusali. Bila shaka kufanya hivyo kulimtayarisha kwa ajili ya kishawishi alichokikabili baada ya hapo. Shetani Ibilisi alimtolea utawala juu ya “milki zote za ulimwengu.” Loo! Yesu angalipata kazi ya maisha iliyo nzuri kama nini kama angalikubali toleo la Ibilisi! Lakini Kristo alitambua kwamba kazi ya maisha ya namna hiyo ingalikuwa ya muda mfupi tu. Kwa hiyo yeye alimkataa Ibilisi bila kukawia na badala yake ‘akaanza kuhubiri, na kusema, Tubuni; kwa maana ufalme wa mbinguni umekaribia.’ (Mathayo 4:2, 8-10, 17) Katika muda wote uliobaki wa maisha yake ya kidunia, Kristo alikuwa mhudumu wa wakati wote wa Ufalme wa Mungu.
Vivyo hivyo leo, Mkristo hangeruhusu ulimwengu wa Shetani umtie chambo cha kufanya kusudi lake maishani liwe ni kupata kazi na shughuli za daima zenye mshahara mnono. Wakati Yesu alipowaita wanafunzi wake wa kwanza-kwanza, “mara wakaziacha nyavu zao, wakamfuata.” (Marko 1:17-21) Basi, je! lingekuwa jambo la hekima kunaswa kabisa katika shughuli za kilimwengu? Yesu anaamuru wafuasi wake leo ‘wahubiri habari njema za ufalme.’ (Mathayo 24:14) Ni kweli, huenda wewe una jamaa au madaraka mengine ya kuangaliwa. Kwa sababu hiyo wengi wa Mashahidi wa Yehova wanatumia nyakati za jioni na miisho-juma watekeleze daraka lao la Kikristo la kuhubiri. Wengine hata wanaweza kufanya hivyo wakati wote!
Katika Afrika ya Kusini kijana mmoja mwanamume alipanga ahudhurie chuo kikuu akiisha kumaliza shule. Lakini, baada ya kuonyesha wakfu wake kwa Yehova kwa kubatizwa, alijiona akiwa na wajibu wa kuingia huduma ya wakati wote. Baba yake, asiye Shahidi, alikataa mara ya kwanza. Lakini baada ya mazungumzo mengi, baba yake alikubali mwishowe mwanaye atumikie kwenye makao makuu ya Mashahidi wa Yehova katika Afrika ya Kusini.
Baada ya kutumia miaka tisa yenye furaha akiwa kule, alioa na kuingia kazi ya kuhubiri wakati wote pamoja na bibi-arusi wake. Baadaye wakapata mtoto. Hata hivyo, walimwomba Yehova awasaidie waendelee wakiwa wahudumu wa wakati wote. Wao waliikumbuka ahadi ya Yesu kwamba mtu akitanguliza Ufalme wa Mungu, “[mahitaji ya kimwili] hayo yote mtazidiziwa.” (Mathayo 6:33) Ndivyo ilivyokuwa. “Katika muda wa miaka iliyopita matumizi yetu maishani yamekuwa ya hali ya chini,” anasema baba yule, “lakini tumempa binti yetu makao ya kupendeza na mahitaji yake yote ya kimwili.”
“Mpole na Mnyenyekevu wa Moyo”
“Njooni kwangu, ninyi nyote msumbukao na wenye kulemewa na mizigo,” akasema Yesu, “nami nitawapumzisha. Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu; kwa maana nira ni laini, na mzigo wangu ni mwepesi.”—Mathayo 11:28-30.
Alipokuwa akifanya miujiza, kama vile kufukuza mashetani, Yesu hakujipatia sifa ya kufanya hivyo, bali alikiri waziwazi kwamba alikuwa ametimiza mambo hayo “kwa [roho ya] Mungu.” (Mathayo 12:28) Na ingawa aliweza kuvuta fikira za wasikilizaji ili wamsikilize kwa njia ya kwamba ‘walishangaa mno kwa mafundisho yake,’ yeye hakujitafutia utukufu mwenyewe. (Luka 4:32) Bali, yeye alikuwa akisema, “Mafunzo yangu si yangu mimi, ila ni yake yeye aliyenipeleka.”—Yohana 7:16.
Wakristo wa kweli leo wanajaribu kuonyesha unyenyekevu ule ule. Kwa mfano, wanapofundisha wengine, wao hawajaribu kuvuta fikira kuelekea wao wenyewe. Bali, wanafanya haraka kumpa Yehova na tengenezo lake sifa kwa sababu ya uwezo wo wote walio nao kupelekea watu ujumbe wa Neno la Mungu. “Nawe una nini usichokipokea?” mtume Paulo anauliza.—1 Wakorintho 4:7.
Unyenyekevu wa Yesu ulionyeshwa pia katika nia yake ya kusafiri maelfu ya maili, si akiwa katika gari la kukokotwa na farasi, bali kwa miguu akiwa mhubiri wa kutembea mahali pengi. Katika pindi moja yeye na wanafunzi wake walikuwa wamechoka sana hata wakahitaji ‘kupumzika kidogo.’ Hata hivyo wakati mkutano mkubwa sana wa watu ulipokuja wakiwa na njaa ya kutiwa moyo kiroho, Yesu alisahau uchovu wake “akaanza kuwafundisha mambo mengi.”—Marko 6:31-34.
Mhudumu mmoja mwenye kusafiri wa Mashahidi wa Yehova (anayeitwa mwangalizi wa mzunguko) na wahudumu wenzake wawili katika Lesotho, Afrika alionyesha hivi juzi roho kama hiyo. Wao walitembea kwa muda wa saa 22 wakipita katika eneo la milima-milima wakatembelee Wakristo wenzao wachache wenye kukaa peke yao. Kwa kuchoka kusafiri, mwangalizi wa mzunguko aliamua kupumzika kesho yake. Lakini mkutano mkubwa wa watu wakaja kumsalimu na kuuliza maulizo mpaka yeye akainuka na kuwafundisha habari za Ufalme ingawa alikuwa amechoka sana. Itikio lao lilikuwa la kutia moyo sana hata wasafiri hao wachovu wakajisikia wamethawabishwa kwa jitihada zao.
Mwige Yeye!
Mtume Paulo anatutia moyo ‘tumtazame Yesu, mwenye kuanzisha na mwenye kutimiza imani yetu.’ (Waebrania 12:2) Tunaweza kufanya hivyo kwa kusoma kwa ukawaida masimulizi ya Injili na kutafakari njia ambazo tunaweza kumwiga Kristo. Kwa mfano, Yesu alionyesha ushujaa alipokanusha waziwazi unafiki na hali ya kujifanya kuwa waadilifu ya viongozi wa kidini, ingawa yeye alijua walimchukia na wangemwua. (Mathayo 23:1-36; 26:3, 4) Akiwa chini ya shambulio yeye aliweza kubaki mtulivu na mwenye kujiweza. (1 Petro 2:23) Katika kufundisha kwake, alionyesha maumbile ya kibinadamu na akaonyesha alikuwa na uwezo wa kusema kweli za ndani sana kwa usemi rahisi.
Lakini karama ya Yesu iliyokuwa ya kutokeza zaidi ilikuwa upendo. “Hakuna aliye na upendo mwingi kuliko huu, kwa mtu kuutoa uhai wake kwa ajili ya rafiki zake.” (Yohana 15:13) Hata aliongeza mpanuko kwenye neno hili upendo kwa kutuambia tupende adui zetu.—Mathayo 5:43-48.
Yesu alikuwa mfano bora kama nini kwetu! Kumwiga yeye si jambo rahisi. Na huenda tukajikwaa mara kwa mara. Lakini haitupasi kuchoka kamwe. (Wagalatia 6:9) Kwa maana kuna mamilioni ya watu wanaojitahidi kufuata Yesu nao wanafanikiwa. Ndiyo, wale wale waliokuletea gazeti hili bila shaka wamo miongoni mwa hao. Wao wangefurahi sana kukusaidia wewe, pia ufuate hatua za Yesu—SANA!
[Blabu katika ukurasa wa 5]
Hata akiwa kijana, Yesu alionyesha kupendezwa kwingi sana na mambo ya kiroho. Je! wewe unamwiga yeye katika jambo hilo?
[Blabu katika ukurasa wa 6]
Kristo alikataa kazi ya maisha ya kilimwengu kwa kupendelea huduma