Mungu Si wa Polepole kwa Habari ya Ahadi Yake

“EE BWANA, nilie hata lini, wewe usitake kusikia?” Hayo ni maneno ya Habakuki, nabii Mwebrania, aliyeishi katika karne ya saba K.W.K. Lakini maneno hayo yanatukumbusha jambo fulani, sivyo? Ni asili ya kibinadamu kutaka kupata vitu tunavyovitamani sana mara moja au haraka iwezekanavyo. Na hilo ni kweli hasa katika enzi yetu ambayo hutaka kutimiziwa mambo mara moja.—Habakuki 1:2.

Katika karne ya kwanza, kuna watu fulani ambao yaonekana walihisi kwamba Mungu angelipasa kuwa ametimiza ahadi zake mapema zaidi. Walikosa subira sana hivi kwamba hata walimwona Mungu kuwa wa polepole au mwenye kuchelewa. Kwa sababu hiyo, mtume Petro alilazimika kuwakumbusha kwamba maoni ya Mungu kuhusu wakati ni tofauti sana na yetu. Petro aandika hivi: “Acheni jambo hili moja lisiwe likiponyoka kujali kwenu, kwamba siku moja kwa Yehova ni kama miaka elfu na miaka elfu kama siku moja.”—2 Petro 3:8.

Kulingana na njia hiyo ya kukadiria wakati, mtu mwenye umri wa miaka 80 ameishi kwa muda upatao saa mbili tu, nayo historia yote ya wanadamu imechukua muda upatao siku sita tu. Tukitazama mambo kwa njia hiyo, inakuwa rahisi zaidi kwetu kuelewa njia ya Mungu ya kushughulika nasi.

Hata hivyo, Mungu si asiyejali wakati. Kinyume cha hilo, yeye yuko chonjo sana kuhusu wakati. (Matendo 1:7) Kwa hiyo, Petro anaendelea kusema hivi: “Yehova si wa polepole kwa habari ya ahadi yake, kama watu fulani waonavyo kuwa ni upolepole, bali yeye ni mwenye subira kwenu kwa sababu hataki yeyote aangamizwe bali hutaka wote wafikie toba.” (2 Petro 3:9) Tofauti na wanadamu, Mungu hahisi amesongwa kufanya mambo kana kwamba anaishiwa na wakati. Akiwa “Mfalme wa umilele,” yeye anaona kila kitu vizuri sana na anaweza kuamua ni wakati gani, katika mkondo wa wakati, matendo yake yatawanufaisha zaidi wote wanaohusika.—1 Timotheo 1:17.

Baada ya kueleza sababu inayofanya Mungu aonekane kuwa wa polepole, Petro atoa onyo hili: “Siku ya Yehova itakuja kama mwizi.” Yaani, siku ya kutoa hesabu itakuja hasa wakati ambapo watu hawaitarajii. Kisha, katika mistari inayofuata, Petro aonyesha taraja la ajabu kwa wale wanaoonyesha “matendo matakatifu ya mwenendo na vitendo vya ujitoaji-kimungu,” yaani, kwamba wanaweza kuokoka na kuingia katika “mbingu mpya na dunia mpya” zilizoahidiwa na Mungu.— 2 Petro 3:10-13.

Jambo hilo lapasa kutufanya tushukuru hata zaidi kwamba hukumu ya Mungu haijaja bado. Subira yake imetuwezesha kujua kusudi lake na kurekebisha maisha yetu ili kupokea baraka zake alizoahidi. Je, haitupasi kuona “subira ya Bwana wetu kuwa wokovu,” kama Petro anavyosababu? (2 Petro 3:15) Hata hivyo, kuna sababu nyingine inayomfanya Mungu awe na subira.

Kiwango cha Uovu Kukamilika

Tunapochunguza jinsi Mungu alivyoshughulika na wanadamu wakati uliopita, tunaona kwamba mara nyingi alizuia hukumu yake hadi wakati ambapo hakukuwa na tumaini lolote la hali kubadilika. Kwa mfano, kuhusiana na hukumu yake dhidi ya Wakanaani, Mungu alimtajia Abrahamu dhambi zao mapema sana. Lakini wakati wa kutekelezwa kwa hukumu yake haukuwa umefika. Kwa nini? Biblia husema: “Maana haujatimia uovu wa Waamori [Wakanaani] bado,” au kama tafsiri ya Knox isemavyo: “Uovu wa Waamori [haukuwa] umekamilika kabisa.”—Mwanzo 15:16.a

Hata hivyo, miaka ipatayo 400 baadaye, hukumu ya Mungu ilitekelezwa, nao Waisraeli, wazao wa Abrahamu, wakatwaa nchi hiyo. Wakanaani kadhaa waliokolewa, kama vile Rahabu, na Wagibeoni, kwa sababu ya mtazamo wao na matendo yao, lakini kwa ujumla, ukosefu wao wa usafi ulikuwa umefikia kiwango kikubwa mno, kama inavyofunuliwa na uchimbuzi wa kiakiolojia. Waliabudu mifano ya uume, wakafanya umalaya hekaluni, na kutoa watoto wakiwa dhabihu. Kichapo Halley’s Bible Handbook chasema hivi: “Waakiolojia ambao huchimbua kwenye magofu ya majiji ya Kanaani hujiuliza ni kwa nini Mungu hakuwaangamiza hata mapema zaidi ya wakati alipofanya hivyo.” Hatimaye, ‘kiwango cha dhambi za Wakanaani kikakamilika’; uovu wao ukawa ‘umekamilika kabisa.’ Hakuna yeyote ambaye kwa haki angeweza kumlaumu Mungu kuwa mwenye kukosa haki aliporuhusu nchi hiyo isafishwe huku akiwaokoa wale walioonyesha mtazamo unaofaa.

Mambo yalikuwa vivyo hivyo wakati wa Noa. Licha ya uhakika wa kwamba kabla ya Furiko watu walikuwa waovu, kwa rehema Mungu aliamua kwamba wakati wao ungeendelea kwa miaka mingine 120. Noa alikuwa “mhubiri wa uadilifu” kwa kipindi fulani cha wakati huo. (2 Petro 2:5) Kadiri wakati ulivyopita, ndivyo uovu wao ulivyoonekana kukamilika. “Mungu akaiona dunia, na tazama, imeharibika; maana kila mwenye mwili amejiharibia njia yake duniani.” (Mwanzo 6:3, 12) ‘Kiwango chao cha dhambi kilikuwa kimekamilika’; kupita kwa wakati kulikuwa kumeifikisha mielekeo yao mibaya kwenye upeo. Mungu alikuwa na sababu halali kabisa alipochukua hatua. Watu wanane tu ndio waliobainika kuwa waadilifu machoni pa Mungu, naye akawaokoa.

Hali sawa na hiyo inaonekana katika njia ambayo Mungu alishughulika na Israeli. Licha ya kuwa walijiendesha kwa njia ya kukosa uaminifu na iliyopotoka, Mungu aliwaonyesha subira kwa mamia ya miaka. Rekodi yasema hivi: “Mwenyezi-Mungu . . . mara kwa mara alituma . . . wajumbe wake maana alikuwa na huruma kwa watu wake . . . Lakini wao waliendelea [ku]yapuuza maneno yake na kuwacheka manabii wake, mpaka hatimaye ghadhabu ya Mwenyezi-Mungu ikawaka dhidi ya watu wake hata kusiwe na namna yoyote ya kutoroka.” (2 Mambo ya Nyakati 36:15, 16) Watu walikuwa wamefikia kiwango cha kutoweza kubadilika. Ni Yeremia tu na watu wengine kadhaa ndio wangeweza kuokolewa. Mungu hangeweza kusemwa kuwa mwenye kukosa haki alipowahukumu wale wengine.

Wakati wa Mungu wa Kuchukua Hatua Umefika

Kutokana na mifano hiyo, tunaweza kuona kwamba Mungu anazuia hukumu dhidi ya mfumo wa mambo uliopo hadi wakati utimie. Hilo laelezwa katika agizo lililotolewa kwa mfishaji wa ufananisho aliyewekwa na Mungu: “‘Tia ndani mundu wako mkali ukusanye vichala vya mzabibu wa dunia, kwa sababu zabibu za huo zimekuwa mbivu.’ Naye huyo malaika akatia mundu wake katika dunia akakusanya mzabibu wa dunia, na kuuvurumisha ndani ya sindikio kubwa la divai la hasira ya Mungu.” Ona kwamba uovu wa wanadamu ‘umekuwa mbivu,’ yaani, umefikia kiwango cha kutoweza kubadilika. Mungu atekelezapo hukumu, hakutakuwa na shaka kwamba mwingilio wake ni halali.—Ufunuo 14:18, 19.

Kwa kuzingatia yaliyo juu, ni wazi kwamba lazima hukumu ya Mungu dhidi ya ulimwengu iwe imekaribia, kwa sababu ulimwengu umekuwa na sifa kama zile zilizomfanya Mungu atekeleze hukumu yake wakati uliopita. Kila tutazamapo, dunia imejaa jeuri kama ilivyokuwa kabla ya Furiko la wakati wa Noa. Mitazamo ya watu inazidi kuwa kama inavyoelezwa kwenye Mwanzo 6:5: “Kila kusudi analowaza moyoni mwake [mwanadamu] ni baya tu sikuzote.” Hata dhambi nzito zilizofanya Mungu ahukumu Wakanaani ni za kawaida leo.

Wanadamu wamejionea mabadiliko yenye kutisha hasa tangu Vita ya Ulimwengu ya Kwanza. Wameona dunia ikilowa kwa damu ya mamilioni ya watu. Vita, maangamizi ya jamii nzima-nzima, ugaidi, uhalifu, na uasi-sheria zimezuka ulimwenguni pote. Njaa kuu, maradhi, na ukosefu wa adili zimeikumba dunia yetu. Ushuhuda wote unaonyesha kwamba sasa tunaishi katikati ya kizazi kiovu ambacho Yesu alisema hivi kukihusu: “Kizazi hiki hakitapitilia mbali kwa vyovyote mpaka mambo yote haya yatukie.” (Mathayo 24:34) Ulimwengu sasa unakamilisha “kiwango chake cha dhambi.” “Vichala vya mzabibu wa dunia” vinakuwa mbivu ili vivunwe.

Wakati Wako wa Kuchukua Hatua

Mtume Yohana aliambiwa kwamba wakati wa hukumu ukaribiapo, aina mbili za ubivu zinatukia. Kwa upande mmoja, “yeye anayetenda ukosefu wa uadilifu; acha azidi kutenda ukosefu wa uadilifu; na acha mwenye uchafu azidi kufanywa kuwa mwenye uchafu wa kuchukiza.” Bali kwa upande mwingine, “acha mwadilifu azidi kufanya uadilifu, na acha mtakatifu azidi kufanywa kuwa mtakatifu.” (Ufunuo 22:10, 11) Jambo hili la pili linatimia kuhusiana na kazi ya ulimwenguni pote ya kufundisha Biblia inayofanywa na Mashahidi wa Yehova. Lengo la kazi hiyo ni kufundisha watu yale Mungu huwataka wafanye ili waweze kuhesabiwa kuwa wenye kustahili kupata uhai udumuo milele. Utendaji huo sasa unafikia nchi 233 kupitia makutaniko yapatayo 87,000.

Mungu si wa polepole. Kwa subira, yeye ameruhusu watu wawe na wakati unaohitajiwa ili ‘wavae utu mpya’ kusudi wawe na taraja la kutimiziwa ahadi zake. (Waefeso 4:24) Leo, Mungu angali anangoja, licha ya hali ulimwenguni ambazo sikuzote zinazidi kuwa mbaya. Mashahidi wa Yehova ulimwenguni pote wanafanya yote wawezayo ili waonyeshe jirani zao ujuzi uongozao kwenye uhai udumuo milele. (Yohana 17:3, 17) Kwa kufurahisha, zaidi ya watu 300,000 wanaitikia na kubatizwa kila mwaka.

Kwa kutazamia uhai udumuo milele, sasa si wakati wa kungoja bali ni wakati wa kuchukua hatua. Kwa kuwa karibuni tutaona utimizo wa ahadi ya Yesu: “Kila mtu aliye hai na hudhihirisha imani katika mimi hatakufa hata kidogo kabisa.”—Yohana 11:26.

[Maelezo ya Chini]

[Picha katika ukurasa wa 6]

Mfishaji aliyewekwa na Mungu aliagizwa atie mundu ndani wakati mzabibu wa dunia ulipokuwa mbivu

[Picha katika ukurasa wa 7]

Mashahidi wa Yehova ulimwenguni pote wanasaidia watu wawe na taraja la kupata baraka za Mungu za milele