Ngoja kwa Subira

MCHUNGAJI aliyelia “Mbwa-Mwitu!” tena na tena wakati hapakuwapo mbwa-mwitu, alipata kwamba kilio chake cha kutaka msaada kilichofuata, hakikusikizwa. Vivyo hivyo leo, wengi hupuuza kule kukaribia kwa siku ya Yehova kwa sababu wamesikia maonyo mengi sana ambayo yamethibitika kuwa maonyo yasiyo ya kweli. Ule uhakika wa kwamba watu wengi hushindwa kutambua ni lipi onyo la kweli na ni lipi lipaswalo kusikizwa, hutumiwa kwa faida na adui mkubwa wa Mungu, Shetani, yule “malaika wa nuru” asiye wa kweli.—2 Wakorintho 11:14.

Roho ya kutojali ingekuwa hatari hata kwa wale ambao wamemtumikia Yehova kwa muda fulani. Kwa nini? Fikiria onyo la mtume Petro katika karne ya kwanza.

Fikiri Vizuri

Barua ya pili ya Petro iliyopuliziwa ilikuwa kikumbusha kwa Wakristo wa mapema, na ni kikumbusha kwetu pia. “Wapendwa,” yeye aandika, “sasa hii ndiyo barua ya pili ninayowaandikia nyinyi, ambayo katika hiyo, kama katika ile yangu ya kwanza, ninaamsha uwezo wenu mwangavu wa kufikiri kwa njia ya kikumbusha.” (2 Petro 3:1) Petro ana msingi gani wa kuwa na hangaiko hilo? Petro akazia kuwapo kwa wadhihaki ambao dhihaka yao hudhoofisha uhitaji wa kuwa na hisi ya uharaka kwa habari ya wakati ambamo watumishi wa Mungu wanaishi. Sasa ndio wakati wa kujihadhari tusidanganywe na wadhihaki. Hivyo Petro awahimiza wasomaji wake “[wakumbuke] semi zilizosemwa hapo awali na manabii watakatifu.” (2 Petro 3:2; Matendo 3:22, 23) Manabii walikuwa wamesema nini?

Pindi nyingi, watumishi waaminifu wa Mungu walikuwa wamevuta uangalifu juu ya jinsi ambavyo hukumu za kimungu zilikomesha uovu. Petro huwakumbusha wasomaji wake Furiko la siku ya Noa ambalo Mungu alitumia likiwa njia ya kuingilia kati, wakati ambapo dunia ilijawa na ubaya. Gharika hiyo yenye maji mengi lilikomesha kabisa ulimwengu wa wakati huo. Lakini Mungu alimhifadhi Noa na familia yake katika safina pamoja na viumbe-wawakilishi wenye uhai ‘wa kila namna.’ Hekaya zenye kuenea ulimwenguni hushuhudia ukweli wa hilo simulizi la Biblia.a—Mwanzo 6:19; 2 Petro 3:5, 6.

Petro huuita uingiliaji-kati huo wa kimungu ‘jambo ambalo huponyoka kujali’ kwa watu fulani. Kisha wengine walidanganywa na wadhihaki wa wakati huo wakawa watu wasiojali. Ingawa hivyo, sisi hatupaswi kamwe kusahau yale ambayo Yehova tayari amefanya. Petro atuambia hivi: “Kwa neno hilohilo mbingu na dunia zilizopo sasa zimewekwa akiba kwa ajili ya moto na zinawekwa akiba hadi siku ya hukumu na ya uangamizo wa watu wasiomwogopa Mungu.” (2 Petro 3:7) Ndiyo, uingiliaji-kati wa kimungu, utatokea tena.

Mungu Si wa Polepole

Milenia za wakati tayari zimepita. Kwa nini Mungu amengoja kwa muda mrefu hivyo kutatua matatizo ya wanadamu? Kwa mara nyingine, Petro akazia jambo jingine. Yeye asema hivi: “Acheni jambo hili moja lisiwe likiponyoka kujali kwenu, kwamba siku moja kwa Yehova ni kama miaka elfu na miaka elfu kama siku moja.” (2 Petro 3:8) Maoni ya Yehova ya wakati hutofautiana na yetu. Kwa Mungu aliye wa milele, wakati wa tangu kuumbwa kwa Adamu hadi sasa hata haujumliki kuwa juma moja. Lakini hata tuwe na maoni gani juu ya wakati, kila milenia na kila siku ipitayo hutuleta karibu zaidi na kutimizwa kwa kusudi la Yehova.

“Ngoja! ngoja! huumiza matumbo” ni usemi ambao hudokeza kwamba kungoja tu jambo fulani litukie huonekana kana kwamba kwalikawiza. Hata hivyo, Petro apendekeza “kungojea na kuweka karibu akilini kuwapo kwa siku ya Yehova.” (2 Petro 3:12) Twaweza kusitawishaje mtazamo wa akilini ambao hutuweka chonjo kuhusiana na kukaribia kwa uingiliaji-kati wa kimungu?

Muungwana Ni Kitendo

Petro akazia uangalifu juu ya vitendo na matendo. Yeye arejezea “matendo matakatifu ya mwenendo” na vilevile “vitendo vya ujitoaji-kimungu.” (2 Petro 3:11) Hivyo vyahusisha nini?

Mtumishi halisi wa Mungu hutenda katika njia ambayo humpendeza Yeye. Imani ya mwabudu wa kweli wa namna hiyo, hudhihirishwa katika mwenendo wake. Mwenendo huo humtofautisha na wale ambao husema tu juu ya itikadi katika Mungu na katika ahadi zake. Labda umetambua kwamba huduma ya waziwazi ya Mashahidi wa Yehova huwatenga kuwa watu tofauti. Wao hukuzuru nyumbani kwako ili kuvuta uangalifu kwenye ahadi za Mungu ambazo zimeonyeshwa katika Biblia. Lakini wao pia hutoa ushahidi juu ya matumaini na itikadi zao popote pale wakutapo watu.

Shahidi ambaye hujishughulisha sana na kutangazia wengine imani yake hupata kwamba, itikadi zake huimarishwa na kutiwa nguvu. Usemi huongeza kina cha kuwaza na wakati huohuo usemi huleta shangwe na uradhi. Tutangazapo habari njema za Ufalme wa Mungu, tunampendeza Yehova pia. Twajua kwamba yeye ‘si asiye mwadilifu ili asahau kazi yetu na upendo tuonyeshao kwa ajili ya jina lake,’ kama vile Paulo, mtume mwenzi wa Petro atangazavyo.—Waebrania 6:10; Waroma 10:9, 10.

Ni nini matokeo ya shughuli hiyo ya kueneza habari njema za Ufalme katika hizi siku za mwisho za mfumo huu mwovu uliopo? Mamia ya maelfu ya watu wenye mioyo ya haki wanajifunza juu ya jinsi wawezavyo kuwa na uhusiano wa karibu na Yehova, kunufaika na fadhili yake isiyostahiliwa na kupata furaha ya kweli katika tazamio la kupata uhai wa milele katika dunia iliyo paradiso.

Ujuzi wa Kimbele

Ingawa twajua kutoka katika Biblia kwamba Yehova Mungu ataingilia kati kwa wakati wake upaswao, nasi twahitaji kusikiza onyo jingine ambalo Petro atoa. “Mkiwa mnakuwa na ujuzi huu wa kimbele, iweni wenye kulinda ili msipate kuongozwa kando pamoja nao kwa kosa la watu wanaokaidi sheria na kuanguka kutoka kwenye uimara wenu wenyewe.”—2 Petro 3:17.

Bila shaka Yehova alijua kimbele kwamba, watu fulani wasio na imani yenye nguvu wangeweza kuvunjwa moyo na kule kuonekanako kuwa kukawia kwa uingiliaji-kati wa kimungu. Alijua pia kwamba uvutano wa watu wasiomcha Mungu ungeweza kufisidi watumishi wake wa kweli au, angalau, kudhoofisha itikadi yao kwamba, kutakaswa kwa jina la Mungu kuko karibu. Ni jambo lenye kuhuzunisha kama nini kuanguka kutoka kwenye uimara katika siku hizi za mwisho!

Sasa si wakati wa kuwa na shaka au kuwa na ukosefu wa uhakika juu ya yale ambayo Yehova atatenda. (Waebrania 12:1) Badala yake, sasa ndio wakati wa kukuza uthamini wa kile ambacho subira ya Yehova imeleta—tazamio la wokovu kwa mamilioni ya watu wanaopata kuwa sehemu ya ule umati mkubwa wa kimataifa na wanaotazamia kwa hamu kuokoka dhiki kubwa inayokuja. (Ufunuo 7:9, 14) Petro ahimiza kwa bidii hivi: “Endeleeni kukua katika fadhili isiyostahiliwa na ujuzi juu ya Bwana na Mwokozi wetu Yesu Kristo. Kwake uwe utukufu sasa na pia hadi siku ya umilele.”—2 Petro 3:18.

“Jitunzeni Wenyewe Katika Upendo wa Mungu”

Kuwa wenye shughuli nyingi katika kuhubiri Ufalme na kuhudhuria kwa ukawaida mikutano ya Kikristo kwa ajili ya ibada, na kujifunza Neno la Mungu, hutupa ulinzi. Hivyo, hatutakuwa na wakati wa kuhangaikia mno hali zinazoharibika za mfumo mwovu wa leo. Hofu na mahangaiko hayapaswi kutawala maisha ya Wakristo wa kweli. (1 Wakorintho 15:58) Kadiri tunavyokuwa wenye shughuli nyingi katika kumtumikia Yehova, ndivyo wakati upitavyo upesi zaidi.

Yuda, ndugu-nusu wa Yesu aliyeishi wakati mmoja na Petro, atuhimiza kwa bidii hivi: “Nyinyi wapendwa, kwa kujijenga wenyewe juu ya imani yenu takatifu zaidi sana, na kusali mkiwa na roho takatifu, jitunzeni wenyewe katika upendo wa Mungu, huku mkingojea rehema ya Bwana wetu Yesu Kristo kwa tazamio la uhai udumuo milele.” (Yuda 20, 21) Ona umaana wa kuwa na mwelekeo ufaao ambao huendelezwa kwa kudumu katika sala. (1 Wathesalonike 5:17) Kisha Yuda aongeza kusema hivi: “Endeleeni kuwaonyesha rehema baadhi ya walio na shaka; waokoeni kwa kuwanyakua kutoka katika moto. Lakini endeleeni kuonyesha wengine rehema, mkifanya hivyo kwa hofu, huku mkilichukia hata vazi la ndani ambalo limetiwa vidoa na mwili.” (Yuda 22, 23) Ni muhimu kama nini kutiana nguvu katika nyakati hizi ngumu! Na ni jambo la maana kama nini kutotumbukia katika kishawishi, tukitumia ‘siku hii ya wokovu’ iliyorefushwa kuwa sababu ya kujitetea kwa ajili ya “mwenendo mlegevu” ambao sasa umeenea pote katika ulimwengu wa leo ulio mfisadi kiadili.—Yuda 4; 2 Wakorintho 6:1, 2.

Kwa kusikiza shauri lenye upendo la Petro, Paulo, na Yuda na kwa kuwa mwenye shughuli nyingi na mwenye kutenda katika utumishi wa Mungu, waweza kungoja kwa subira kuingilia kati kwa Yehova. Lakini utafanya hivyo?

Usikawie kupata habari kutoka kwa Mashahidi wa kwenu kwa ajili ya kupata msaada wa kuimarisha imani yako katika ahadi ya Muumba ya uhai udumuo milele. Jifunze yale yahitajiwayo ili ustahili kushiriki katika kazi hii isiyoweza kurudiwa kamwe ya kutoa ushahidi tufeni pote, ambayo itamalizika kwenye dhiki kubwa inayokaribia. (Marko 13:10) Kisha utakuwa na tazamio la kuishi katika ulimwengu mpya wenye uadilifu ambao Yehova aahidi. (2 Petro 3:13) Sikiliza vikumbusha vyake! Ngoja kwa subira! Uwe mwenye shughuli nyingi!

[Maelezo ya Chini]

[Picha katika ukurasa wa 7]

jifunze sasa juu ya ahadi ya mungu ya paradiso

[Hisani ya Picha katika ukurasa wa 5]

Mbwa-Mwitu: Animals/Jim Harter/Dover Publications, Inc.; mchungaji mchanga: Children: A Pictorial Archive from Nineteenth-Century Sources/Grafton/Dover Publications, Inc.