Onyesha Upendo na Imani Sikuzote

“Yeye anayebaki katika upendo anabaki katika muungano pamoja na Mungu.” “Na huu ndio ushindaji ambao umeushinda ulimwengu, imani yetu.”—1 YOHANA 4:16; 5:4, NW.

 1, 2. Ni sifa gani zinazokaziwa hasa kwenye 1 Yohana 4:7–5:21?

YEHOVA ndiye mfano bora kabisa wa sifa ya upendo, na wale wanaotamani kumpendeza yeye ni lazima waonyeshe sifa hiyo ya kimungu. Mtume Yohana anaonyesha wazi jambo hilo katika sehemu ya mwisho ya barua yake ya kwanza yenye uongozi wa Mungu.

² Ni lazima pia Wakristo wa kweli waonyeshe imani. Ni kwa njia hiyo tu wanaweza kushinda ulimwengu na kubaki wakiwa salama katika upendeleo wa Yehova. Basi, tunapojifunza kile kisehemu cha mwisho cha barua ya Yohana, na tufikirie katika sala umaana wa kuonyesha upendo na imani.

‘Acheni Tupendane’

 3, 4. Kuonyesha upendo kuna uhusiano gani na hali yetu ya kumjua Mungu?

³ Yohana anakazia umaana wa upendo. (Soma 1 Yohana 4:7, 8, NW.) “Wapendwa” Wakristo wanahimizwa ‘waendelee kupendana, kwa sababu upendo unatoka kwa Mungu,’ kwa maana Yehova ndiye Chanzo chao. “Kila mmoja anayependa amezaliwa kutoka kwa Mungu [akiwa mtu aliyezaliwa kwa roho] naye anapata maarifa ya kumjua Mungu,” kwa kuwa ana habari juu ya sifa na makusudi ya Yehova na jinsi yeye anavyoonyesha upendo. Leo haya “maarifa ya kumjua Mungu” yamepatikana pia na ule “mkutano mkubwa” wa “kondoo wengine” wa Kristo.

⁴ Kumjua Mungu kunamaanisha kuthamani kweli kweli sifa zake, kumpenda yeye kabisa, na kushikamana naye akiwa ndiye Mwenye Enzi Kuu. Lakini “yeye asiyependa hajapata kumjua Mungu.” Wale wasioonyesha upendo wa Kikristo ‘hawajapata kumjua Mungu, kwa sababu Mungu ni upendo.’ Ndiyo, upendo ndio sifa kuu ya Yehova, inayoonekana wazi katika maandalizi ya kiroho na kimwili aliyofanyia wanadamu.

 5. Ni ushuhuda gani ulio mkubwa zaidi unaoonyesha kwamba “Mungu ni upendo”?

⁵ Jambo linalotajwa baada ya hapo ndio ushuhuda mkubwa zaidi wa kwamba ‘Mungu ni upendo.’ (Soma 1 Yohana 4:9, 10, NW) Yohana anasema: “Kwa jambo hili upendo wa Mungu ulidhihirishwa katika habari yetu [tukiwa watenda dhambi waliostahili kifo), kwa sababu Mungu alituma Mwana wake mzaliwa-pekee akaingie ulimwenguni ili sisi tuweze kupata uzima kupitia yeye.” Yesu ni “Mwana mzaliwa-pekee” wa Yehova kwa sababu yeye peke yake ndiye aliyeumbwa na Mungu moja kwa moja. (Yohana 1:1-3, 14; Wakolosai 1:13-16) Yesu ‘alitumwa akaingie ulimwenguni’ kwa kuwa mwanadamu, akiendesha hadharani huduma yake, halafu kufa kifo cha dhabihu. (Yohana 11:27; 12:46) ‘Kupata uzima wa milele kupitia yeye,’ kama ni mbinguni ama duniani, kunahitaji imani katika ustahili wa dhabihu yake ya ukombozi.

 6. Tulipokuwa tungali watenda dhambi wasiompenda Mungu, yeye alifanya nini?

⁶ Sisi tulikuwa tungali watenda dhambi wasiokuwa wakimpenda Mungu wakati “yeye alitupenda na kutuma Mwana wake akiwa dhabihu ya upatanisho kwa ajili ya dhambi zetu.” Dhabihu ya Kristo ilifanya iwezekane kwetu kurudishwa kwenye uhusiano unaofaa pamoja na Mungu. (Warumi 3:24, 25; Waebrania 2:17) Je! wewe unathamini udhihirisho huo ulio mkubwa zaidi ya wote wa upendo tusioustahili kwa upande wa Baba yetu wa kimbingu?

 7. (a) Kwa kuwa hatuwezi kusema kwamba tunampenda Yehova kwa sababu tumemwona yeye, tunaweza kuonyeshaje kwamba tunampenda? (b) Wonyesho wetu wa upendo wa kidugu unathibitisha nini?

⁷ Upendo wa Mungu kwetu unapasa ugeuze mwelekeo tulio nao kuhusu wengine. (Soma 1 Yohana 4:11-13, NW.) Kwa kuwa yeye alitupenda tulipokuwa tungali watenda dhambi, “sisi wenyewe tuko chini ya wajibu wa kupendana.” Kati ya wanadamu, “hakuna mtu aliyemwona Mungu wakati wo wote.” Kwa hiyo sisi hatuwezi kusema kwamba tunampenda Yehova kwa sababu tumemwona. (Kutoka 33:20; Yohana 1:18; 4:24) Kwa kuonyesha upendo, tunaonyesha kwamba tunampenda aliye Chanzo cha sifa hiyo. Upendo wetu wa kidugu unathibitisha kwamba “Mungu anabaki katika sisi na upendo wake unakamilishwa,” au unafikia kuonyeshwa kwa ukamili, katika sisi. Nasi tunajua kwamba “tunabaki katika muungano pamoja na” Yehova “kwa sababu yeye ametupa sisi roho yake.” Wonyesho wetu wa upendo wa kidugu unathibitisha kwamba roho ya Yehova inafanya kazi ndani yetu, kwa maana upendo ni moja la matunda ya roho hiyo. (Wagalatia 5:22, 23) Jambo hili linaonyesha kwamba tunamjua Yehova na tuna kibali chake.

 8. Kuna ushuhuda gani zaidi kwamba sisi “tumo katika muugano pamoja na Mungu”?

⁸ Kuna ushuhuda mwingine tena wa kuonyesha kwamba sisi tumo “katika muungano pamoja na Mungu.” (Soma 1 Yohana 4:14-16a, NW.) Kwa sababu Yohana alikuwa ‘ameona’ mambo ambayo Yesu alifanya duniani na jinsi alivyotaabika kwa ajili ya wanadamu, yeye angeweza ‘kutoa ushahidi kwamba Baba ametuma Mwana Wake kuwa Mwokozi wa ulimwengu’ wa wanadamu wenye dhambi. (Yohana 4:42; 12:47, NW ) Zaidi ya hilo, ‘Mungu anabaki katika muungano pamoja nasi na sisi pamoja naye’ tukifanya ungamo la kutoka moyoni kwamba Yesu Kristo ni Mwana wake. Jambo hilo linataka tujizoeze imani na kutoa ushuhuda wa hadharani kwamba Yesu ndiye Mwana wa Mungu. (Yohana 3:36; Warumi 10:10) Kuwa kwetu na uhakika katika “upendo ambao Mungu anao kwa habari yetu” kunatoa ushuhuda zaidi wa kwamba sisi tulio wa mabaki wapakwa-mafuta na wa “kondoo wengine” tumo katika muungano pamoja na Yehova.

 9. (a) Ni katika maana gani upendo kwa Mungu unaweza ‘kukamilishwa,’ na jambo hilo litahusuje uhusiano wetu pamoja na wengine? (b) Upendo ‘mkamilifu’ unaendeleza nini?

⁹ Halafu sasa Yohana anaonyesha kwamba upendo unaweza ‘kukamilishwa.’ (Soma 1 Yohana 4:16b, 17.) Tunakumbushwa kwamba “Mungu ni upendo.” Kwa sababu ‘tunabaki katika upendo,’ huku tukionyesha tunda hilo la roho ya Yehova, ‘tunabaki katika muungano pamoja na Mungu.’ Ikiwa upendo wa Yehova “umekamilishwa kwetu sisi,” huku tukiwa tumefikia kuonyesha kikamili kumwelekea yeye, tutapenda waamini wenzetu. (Linganisha mstari 12.) Upendo ‘mkamilifu’ unaendeleza pia “uhuru wa kusema” kuelekea Mungu katika sala sasa na “katika ile siku ya hukumu” inayoshirikishwa na kuwapo kwa Kristo. Basi wale wanaoonyesha upendo kama huo hawatakuwa na sababu ya kuogopa kwamba Mungu atawahukumu vikali. Tukionyesha upendo, ni katika maana hiyo kwamba “sawa na vile huyo [Yesu] alivyo, ndivyo sisi wenyewe tulivyo katika ulimwengu huu.” Ndiyo, sisi tuko kama yeye katika kufurahia upendeleo tukiwa watoto wa Mungu katika ulimwengu huu wa wanadamu waliotenganishwa na Mungu.

10. Wale ambao ndani yao upendo ‘umekamilishwa’ hawapatwi na nini?

¹⁰ Wale ambao ndani yao upendo ‘umekamilishwa’ hawapatwi na woga ule unaozuia sala. (Soma 1 Yohana 4:18,19, NW.) “Woga unatumia kizuizi” ambacho kingetuzuia tusifikie Yehova kwa uhuru. Kwa hiyo ikiwa sisi tunajisikia tukiwa na woga huo, ‘hatujakamilishwa katika upendo.’ Lakini ikiwa sisi ‘tumekamilishwa katika upendo,’ sifa hiyo inajaa katika mioyo yetu, inatusukuma tufanye mapenzi ya kimungu, na kutuongoza tubaki karibu na Baba yetu wa kimbingu katika sala. Hakika sisi tuna sababu ya kumpenda Yehova na kumpelekea sala, kwa maana kama vile Yohana anavyosema, ‘Sisi tunapenda, kwa sababu Mungu alitupenda sisi kwanza.’

11. Kwa sababu gani inafaa kutazamiwa kwamba tutii ile amri inayosema, “Yeye ampendaye Mungu, ampende na ndugu yake”?

¹¹ Haitoshi kusema tu kwamba tunampenda Mungu. (Soma 1 Yohana 4:20, 21.) Mtu ye yote anayesema, “Nampenda Mungu” huku akichukia ndugu yake wa kiroho “ni mwongo.” Kwa kuwa tunaweza kuona ndugu yetu na kutazama tabia zake za kimungu, kumwonyesha huyo upendo kunapasa kuwe rahisi kuliko kumpenda Mungu asiyeonekana. “Asiyempenda ndugu yake ambaye amemwona, hawezi kumpenda Mungu ambaye hakumwona.” Kwa hiyo ni jambo linalotazamiwa kwa kufaa kwamba tutii “amri” hii: “Yeye ampendaye Mungu, ampende na ndugu yake.”

Ni Nani anayeushinda Ulimwengu?

12. Kwa kuwa sisi tunampenda Mungu, ni upendo gani mwingine tungetazamiwa tuwe nao?

¹² Halafu Yohana anaonyesha linalomaanishwa hasa na kumpenda Mungu. (Soma 1 Yohana 5:1-5.) Kwanza, mtume anaonyesha kwamba “kila mtu aaminiye kwamba Yesu ni Kristo,” (Masihi au Mpakwa Mafuta wa Yehova), “amezaliwa na Mungu,” au amezaliwa na Yehova kwa roho. Zaidi ya hilo, kila mtu anayempenda Mzaaji huyo, Yehova, anampenda mtu mwingine ye yote “aliyezaliwa na yeye.” Ndiyo, watoto wote wa Mungu waliopakwa mafuta wanampenda yeye na wangetazamiwa wapendane wao kwa wao. Upendo huo wa kidugu ni sehemu ya maana pia inayopaswa kuwa katika ule “mkutano mkubwa” wa “kondoo wengine” wenye matumaini ya kidunia.—Yohana 10:16; Ufunuo 7:9.

13. (a) Kwa sababu gani amri za Mungu si “nzito” kwetu? (b) Sisi ‘tunaushindaje ulimwengu’?

¹³ ‘Twajua kwamba twawapenda watoto wa Mungu wakati tunapompenda yeye na kushika amri zake.’ Kwa kweli, ‘kumpenda Mungu ni kushika amri zake.’ Kwa kuwa sisi tunapenda Mungu na uadilifu, tunafurahia kushika amri zake. Yohana anasema kwamba hizo “si zito” kwetu “kwa maana kila kitu kichozaliwa na Mungu huushinda ulimwengu.” Maneno “kila kitu” huenda yakamaanisha uwezo unaotolewa na Mungu wa “kuushinda ulimwengu,” au kupata ushindi juu ya jamii ya kibinadamu isio na uadilifu pamoja na vishawishi vilivyomo vya kuvunja amri za Yehova. (Yohana 16:33) “Kushinda kuushindako ulimwengu” ni “imani yetu” katika Mungu, Neno lake, na Mwana wake. ‘Tukiamini ya kwamba Yesu ni Mwana wa Mungu,’ sisi ‘tunaushinda ulimwengu’ kwa kukataa mawazo yao yenye makosa na njia zao za ukosefu wa adili, na kwa kushika amri za Mungu.

14. (a) Yesu alikujaje “kwa njia ya maji”? (b) Kristo alionyeshwaje kuwa Mwana wa Mungu “kwa damu”? (c) Roho takatifu ‘ilitoaje ushuhuda’ juu ya Yesu Kristo?

¹⁴ Kwa kuwa kuamini Yesu ni jambo la maana sana ili tuwe ‘washindaji ulimwengu,’ Yohana anataja ushuhuda unaotolewa juu ya Kristo na ‘vitoaji ushahidi watatu.’ (Soma 1 Yohana 5:6-8, NW.) Kwanza Yohana anasema kwamba Yesu “alikuja kwa njia ya maji.” Wakati Yesu alipobatizwa katika maji ili aonyeshe kwamba alikuwa akijitokeza kwa Mungu, Yehova alitangaza: “Huyu ni Mwanangu, mpendwa wangu, ninayependezwa naye.” (Mathayo 3:17) Kristo alionyeshwa pia kuwa ni Mwana wa Mungu kwa “damu” aliyomimina alipokuwa akifa awe ukombozi. (1 Timotheo 2:5, 6) Zaidi ya hilo, Yohana anasema, “roho [takatifu] ndicho kitu kile kinachotoa ushahidi, kwa sababu ile roho ndiyo ukweli.” Kushuka kwa roho juu ya Yesu wakati wa ubatizo wake kulimthibitisha kuwa Mwana wa Mungu. (Mathayo 3:16; Yohana 1:29-34) Roho ya Yehova iliwezesha Yesu atimize agizo alilopewa na kufanya kazi za uwezo mwingi. (Yohana 10:37, 38; Matendo 10:38) Kwa kutumia ile roho, Mungu alileta giza lisilo la kawaida, tetemeko la ardhi, na kupasuka kwa pasia la hekalu wakati Yesu alipokufa, halafu kwa kutumia roho ile ile Mungu akamfufua.—Mathayo 27:45-54.

15. Ni vitu gani ambavyo ndivyo “vitoaji ushahidi vitatu”?

¹⁵ Hivyo “kuna vitoaji ushahidi watatu” kwamba Yesu ni Mwana wa Mungu. Hao ni (1) ile roho takatifu, (2) maji ya ubatizo wa Yesu na kile kilichofananishwa na maji hayo (kujitoa kwake mwenyewe kwa Yehova) na (3) ile damu aliyomimina kwa kufa akiwa ukombozi. Vitu vitatu hivyo ‘vinapatana’ katika kutoa ushuhuda wa kwamba Yesu ni Mwana wa Mungu, ambaye ni lazima sisi tumwamini kikweli ikiwa tutapokea uzima wa milele.—Linganisha Kumbukumbu la Torati 19:15.

Ushahidi Unaotolewa na Mungu

16. Yehova ametoaje ushahidi kuhusu Yesu?

¹⁶ Mungu mwenyewe ametoa ushahidi kuhusu Mwana wake. (Soma 1 Yohana 5:9-12, NW.) “Tukiupokea [kuwa wa kweli] ushahidi [usio kamilifu] ambao wanadamu wanatoa [kama vile tunavyofanya kidesturi katika maongezi na katika mahakama], ule ushahidi ambao Mungu anatoa ni mkubwa zaidi.” (Yohana 8:17, 18) Kwa kuwa ‘Mungu hawezi kusema uwongo,’ tunaweza kuutumanini kabisa ‘ushahidi ambao ametoa kuhusu Mwana wake.’ Na Yehova amesema kwamba Yesu Kristo ni Mwana wake. (Tito 1:2; Mathayo 3:17; 17:5) Zaidi ya hilo, Mungu aliviunga mkono vile “vitoaji ushahidi vitatu,” yaani, roho takatifu Yake, yale maji ya ubatizo wa Yesu, na damu ya Kristo iliyomwagwa.

17. Ni kwa njia gani tu wokovu unawezekana?

¹⁷ “Mtu yule anayetia imani yake katika Mwana wa Mungu anakuwa na ushahidi ukitolewa katika habari yake mwenywe,” au “katika yeye mwenyewe,” kwa sababu ushuhuda wote unamsadikisha yeye kwamba Yesu ni Mwana wa Mungu. Lakini “mtu yule asiye na imani katika Mungu” huwa ni shahidi mwenye kutegemeka kuhusu Mwana Wake anamfanya Yehova aonekane kana kwamba ni mwongo. Bila shaka, ujumla wa ushahidi unaotolewa ni “kwamba Mungu alitupa sisi uzima wa milele, na uzima huo u katika Mwana wake.” Kwa kuamini kwamba Yesu ni Mwana wa Mungu hivyo tu ndivyo inavyowezekana kupata wokovu unaoongoza kwenye uzima wa milele. (Yohana 11:25, 26; 14:6; 17:1-3) Kwa hiyo “yeye ambaye ana Mwana” kwa kumwamini yeye ana ile zawadi isiyostahilika ya uzima wa milele. (Yohana 20:31) Lakini “uzima huo” hautafurahiwa na mtu ye yote asiyeamini kwamba Yesu ni Mwana wa Mungu.

Sala Inafanya Kazi!

18. Kwa sababu gani Yohana ameandika “mambo hayo”?

¹⁸ Halafu Yohana anaonyesha kusudi lililofanya aandike barua yake kisha anazungumzia sala. (Soma 1 Yohana 5:13-15, NW.) Yeye ameandika “mambo hayo” ili kwamba sisi ‘tupate kujua kwamba yana uzima wa milele.’ Huo ndio usadiki wetu sisi tunaotia imani katika “jina” la Mwana wa Mungu. (Linganisha 1 Yohana 3:23.) Na waasi-imani, ambao si wa namna yetu, hawawezi kuharibu imani hiyo.—1 Yohana 2:18, 19.

19. (a) Kulingana na 1 Yohana 5:14, 15, sisi tuna “uhakika” gani kuelekea Mungu? (b) Ni baadhi ya mambo gani ambayo kwa ajili ya hayo sisi tunaweza kusali kwa kufaa?

¹⁹ Sisi tuna “uhakika” au “hali ya kusema mambo waziwazi” kuelekea Mungu kwamba hata liwe ni jambo gani tunaloomba katika sala “kulingana na mapenzi yake, yeye anatusikia.” Kwa kufaa tunasali kwa ajili ya mambo kama vile kutakaswa kwa jina la Yehova, roho yake, hekima ya kimungu, na kukombolewa kwenye yule mwovu. (Mathayo 6:9, 13; Luka 11:13; Yakobo 1:5-8) Nasi “tunajua tutapata vitu tulivyoomba kwa kuwa tumeviomba kwake,” yule “Msikiaji wa sala.”— Zaburi 65:2, NW.

20, 21. (a) Ni nini “dhambi isiyo ya mauti”? (b) Kwa sababu gani ni kosa kusali kuhusu “dhambi iliyo ya mauti”?

²⁰ Halafu Yohana anasema juu ya sala za namna mbili za dhambi. (Soma 1 Yohana 5:16, 17.) “Dhambi isiyo ya mauti” si ya kukusudia, na halingekuwa kosa kusali kwamba mkosaji mwenye kutubu asamehewe. (Matendo 2:36-38; 3:19; Yakobo 5:13-18) Lakini lingekuwa kosa kusali kuhusu “dhambi iliyo ya mauti” kwa sababu hiyo ni dhambi ya kukusudia dhidi ya roho takatifu, ambayo haiwezekani kupata msamaha. (Mathayo 12:22-32; Waebrania 6:4-6; 10:26-31) Watendaji dhambi hawa wanaenda Gehena, wakipatwa na uharibifu wa milele katika ile “mauti ya pili.” (Ufunuo 21:8; Mathayo 23:15) Kwa hiyo ingawa Yehova ndiye Mwamuzi wa mwisho, sisi hatujasirii kumchukiza kwa kusali kwa ajili ya mtenda dhambi wakati ushuhuda unapoonyesha kwamba mtu huyo amekuwa na hatia ya “dhambi [ya kukusudia] iliyo ya mauti.”

²¹ Kwa hiyo, “mtu [hasa mzee wa wapakwa-mafuta] akimwona ndugu yake anatenda dhambi isiyo ya mauti [“mauti ya pili” ], ataomba, na Mungu atampa uzima [mtenda dhambi huyo],” amwokoe kwenye uharibifu wa milele. Bila shaka, “kila lisilo la haki ni dhambi,” au kuikosa shabaha ya viwango vya uadilifu vya Mungu. “Na dhambi iko isiyo ya mauti” kwa sababu inatokana na hali yetu ya kutokamilika, kwa sababu tunatubu, na dhambi hiyo inafunikwa na dhabihu ya Kristo.

Mambo Makuu ya Barua ya Yohana

22. Ni nani ‘asiyebana’ Mkristo mshikamanifu, na mtu wa namna hiyo anaweza kusali juu ya nini akiwa na uhakika?

²² Sasa Yohana anatoa muhtasari wa mambo ya msingi katika barua yake. (Soma 1 Yohana 5:18-21, NW.) Kila mtu “aliyezaliwa kutoka kwa Mungu” akiwa Mkristo aliyepakwa mafuta kwa roho “hazoei dhambi.” Yesu Kristo, “Yule aliyezaliwa kutoka kwa Mungu” kupitia roho takatifu, “analinda huyo, na yule mwovu [Shetani] hambani.” Mkristo mpakwa-mafuta huyo aliye mshikamanifu anaweza kusali akiwa na uhakika ili akombolewe kwenye yule mwovu na anaweza kutumia “ule mgawo mkubwa wa imani” aepuke madhara ya kiroho kutoka “makombora yote yanayowaka moto” ya Shetani. —Mathayo 6:13; Waefeso 6: 16, NW.

23. Ni kwa njia gani “ulimwengu mzima umo katika uwezo wa yule mwovu”?

²³ Kwa kuwa wapakwa-mafuta wana ushuhuda wa kwamba wao ni wana wa kiroho wa Yehova, wanaweza kusema, “Sisi twajua tunatokana na Mungu.” Uhakika wa kwamba wao wana imani katika Kristo na hawazoei dhambi unathibitisha kwamba wao ni watoto wa Mungu ambao Shetani hakuweza ‘kuwabana.’ “Lakini ulimwengu mzima [jamii ya kibinadamu isiyo na uadilifu] umo katika uwezo wa yule mwovu,” Shetani Ibilisi. (Waefeso 2:1, 2; Ufunuo 12:9) Ulimwengu unajiacha uongozwe na mavutano maovu ya Shetani na kutawalwa naye. Usifanye jitihada yo yote kujiondoa kwake ili ufanye mapenzi ya kimungu.

24. Ni kwa kusudi gani Yesu ‘ametupa sisi uwezo wa kiakili’?

²⁴ Walimu fulani wa uwongo walishikilia kwamba Kristo hakuwa amekuja katika mwili. (2 Yohana 7) Lakini ushuhuda unaotajwa katika barua hii unawezesha Yohana kusema, “Nasi twajua kwamba Mwana wa Mungu amekwisha kuja.” (1 Yohana 1:1-4; 5:20) Zaidi ya hilo, Yesu “ametupa sisi uwezo wa kiakili,” au “utambuzi wa akilini,” ili kwamba “sisi tupate kuwa na maarifa ya kumjua yule wa kweli,” ufahamu wenye uendelevu juu ya Mungu. (Mathayo 11:27) Kwa hiyo “sisi tumo katika muugano pamoja na yule wa kweli [Yehova Mungu], kwa njia ya Mwana wake Yesu Kristo.”—Linganisha Yohana 17:20, 21.

25. Sisi Wakristo tunaweza kutumiaje shauri lililo kwenye 1 Yohana 5:21?

²⁵ Wale walio katika muungano pamoja na Mungu wa kweli, Yehova, kama ni wa mabaki wapakwa-mafuta au ni wa “kondoo wengine,” wanataka kumpendeza katika kila njia. Lakini vishawishi vya kuingia katika ibada ya sanamu vilikuwako katika karne ya kwanza, sawa na vile vilivyopo leo. Kwa hiyo kwa kufaa Yohana anamaliza barua yake kwa kutoa shauri hili la kibaba: “Watoto wadogo, jilindeni na sanamu.” Sisi Wakristo, hatuinamii mifano. (Kutoka 20:4-6) Tunajua pia kwamba ingekuwa kosa kujiweka sisi wenyewe, kuweka anasa, au kitu kingine cho chote mahali pa Mungu. (2 Timotheo 3:1, 2, 4) Na wakfu wetu kwake unatuzuia tusimwabudu yule “mnyama-mwitu” wa kisiasa na “mfano” wake. (Ufunuo 13:14-18, NW; 14:9-12) Kwa hiyo tukiwa na kusudi la kumpendeza Baba yetu wa kimbingu na kupokea zawadi ya uzima wa milele, acheni tuwe thabiti katika kupiga moyo konde tuiepuke ibada yote ya sanamu, tusiiruhusu iharibu uhusiano wetu wenye thamani kubwa pamoja na Yehova kupitia Yesu Kristo.

Msaada Wenye Kudumu Kwetu

26. Ni baadhi ya mambo gani yanayostahili kuangaliwa katika Yohana wa Kwanza?

²⁶ Barua ya kwanza ya Yohana iliyoongozwa na Mungu ilisaidia Wakristo wa kwanza waepuke kabisa ibada ya sanamu. Iliwawezesha kupinga uwongo wa waasi-imani, na ina kusudi linalofanana na hilo leo. Kwa mfano, inathibitisha kwamba Yesu Kristo aliishi akiwa mwanadamu na akafa akiwa “dhabihu ya upatanisho” kwa ajili ya dhambi. Barua hiyo inamtambulisha yule “mpinga Kristo” na kutofautisha kati ya watoto wa Mungu na wale wa Ibilisi. Inaonyesha jinsi ya kujaribu “semi zilizoongozwa kwa roho” ili kuona kama zinatokana na Yehova. Zaidi ya hilo, maneno ya Yohana yanatusadikisha kwamba “Mungu ni upendo,” kwamba imani ya kweli inaushinda ulimwengu, na kwamba Yehova anasikia sala za mashahidi wake washikamanifu.

27. Ni kwa njia gani barua ya Kwanza ya Yohana iliyoongozwa na Mungu inavyoweza kutusaidia?

²⁷ Kwa kukabiliwa na vishawishi vya kilimwengu, jambo la hekima kama nini kuzingatia onyo la Yohana dhidi ya kupenda ulimwengu! Tofauti za kibinafsi zikileta mgogoro juu ya uhusiano wetu pamoja na waamini fulani wenzetu, maneno ya mtume yanaweza kutukumbusha kwamba tunaweza kuthibitisha kuwa wapenda Mungu kwa kuonyesha upendo wa kidugu. Kwa msaada wa kimungu na kwa kutumia mashauri ya Yohana, tunaweza kuepuka kuzoea dhambi na tunaweza kudumisha imani inayoshinda ulimwengu. Kwa hiyo acheni tuonyeshe shukrani zetu kwa barua hiyo iliyoongozwa na Mungu tunapoendelea kutembea katika nuru ya kimungu, kuendelea kuishi tukiwa watoto wa Mungu, na sikuzote tuonyeshe upendo na imani kwa utukufu wa Baba yetu ya kimbingu, Yehova.

Wewe Ungejibuje?

◻ Ikiwa sisi tunampenda Yehova, jambo hilo linapasa liwe na matokeo gani juu ya uhusiano wetu na waamini wenzetu?

◻ Sisi tunaweza ‘kuushindaje ulimwengu’?

◻ Ni nani wale “vitoaji ushahidi vitatu” kuhusu Mwana wa Mungu?

◻ Kwa habari ya sala, ni “uhakika” gani tunaoweza kuwa nao?

◻ Barua ya Kwanza ya Yohana inaweza kutusaidia kwa njia gani?

[Blabu katika ukurasa wa 22]

Kwa kuwa Yehova alitupenda sisi tulipokuwa tungali watenda dhambi, ‘sisi tuko chini ya wajibu wa kupendana’

[Blabu katika ukurasa wa 23]

Imani yetu katika Mungu, Neno lake, na Mwana wake mzaliwa-pekee inatuwezesha ‘kuushinda ulimwengu’

[Picha katika ukurasa wa 25]

Roho takatifu, maji ya ubatizo wa Yesu, damu yake iliyomwagwa, na Yehova mwenyewe walitoa ushahidi wa kwamba Yesu Kristo ni Mwana wa Mungu