‘Mungu Atamaliza Mazoezi Yenu’

MWANARIADHA akijitayarishia tukio la maana sana lazima ajizoeze kwa nguvu. Anataka kuzoeza mwili wake ili kwamba katika siku ile kubwa yeye aweze kufanya vizuri kadiri awezavyo. Wakristo, pia, lazima wajizoeze kwa nguvu lakini wakiwa na mradi tofauti. Mtume Paulo alisema: “Mwe mkijizoeza wenyewe kujitolea Mungu kukiwa mradi wenu.”​—1 Timotheo 4:7, NW.

Hivyo, Mkristo anapaswa kujitengeneza kiroho. Kama vile mwanariadha anavyoujenga mwili wake, Mkristo anajenga nguvu na uvumilivu wake wa kiroho. Anafanya hivyo kwa kujifunza Neno la Mungu, Biblia, kwa sala, kwa kushirikiana kikawaida na Wakristo wenzake, na kusema juu ya imani yake waziwazi.

Mara nyingi mwanariadha ana mwalimu, na Wakristo, pia, wana mwalimu. Ni nani? Hakuna mwingine ila Yehova Mungu mwenyewe! Mtume Petro alionyesha kwamba Yehova anaihangaikia programu ya mazoezi ya Kikristo, akiandika hivi: “Mungu wa fadhili zote zisizostahilika . . . atamaliza mazoezi yenu, atawafanya mwe imara, atawafanya mwe na nguvu.” (1 Petro 5:10, NW) Yehova anatupa sisi mazoezi gani? Aina nyingi, na yote ni ya muhimu ikiwa sisi tunataka kudumisha hali inayofaa kama Wakristo.

Nidhamu ya Moja kwa Moja

Petro mwenyewe alipokea mazoezi kutoka kwa Yehova. Tunaweza kujifunza mambo mengi kutokana na mambo aliyoona yeye. Nyakati nyingine mazoezi ya Petro yalikuwa machungu. Ebu wazia vile Petro alivyohisi wakati alipojaribu kumvunja moyo Yesu ili asitimize kusudi la Mungu, naye Yesu kwa ukali akajibu: “Nenda nyuma yangu, Shetani; u kikwazo kwangu; maana huyawazi yaliyo ya Mungu, bali ya wanadamu.” (Mathayo 16:23) Pia, ebu wazia, jinsi alivyohisi miaka mingi baadaye wakati woga wa wanadamu ulipomwongoza atende kwa njia isiyo ya hekima. Mtume Paulo alitoa nidhamu ya Yehova katika pindi hiyo: “Lakini Kefa [Petro] alipokuja Antiokia, nalishindana naye uso kwa uso, kwa sababu alistahili hukumu.”​—Wagalatia 2:11-14.

Hata hivyo, katika pindi zote mbili Yehova alikuwa akimzoeza Petro. Yeye alijifunza kwamba “kila adhabu wakati wake haionekani kuwa kitu cha furaha, bali cha huzuni; lakini baadaye huwaletea wao waliozoezwa nayo matunda ya haki yenye amani.” (Waebrania 12:11) Kukubali makaripio hayo yenye nguvu kuwa nidhamu kutoka kwa Yehova kulimsaidia Petro apate maoni yaliyo sahihi kuhusu mambo, na pia kulimzoeza yeye katika sifa za muhimu za Kikristo za upole na unyenyekevu.​—Mithali 3:34; 15:33.

Kushughulikia Hali

Yehova anaweza kutuzoeza sisi kwa kuruhusu hali zitokee ambazo ni ngumu kushughulika nazo​—nyakati nyingine hizi hata zinakuwa ndani ya kundi la Kikristo. Tunakua kama Wakristo tunaposali tupate mwongozo, tunapozitumia kanuni za Biblia ambazo tumejifunza, na kuona vile kutumia kanuni hizo sikuzote ndiyo njia bora.

Petro alihusika katika hitilafu za nyutu ambazo zilitokea miongoni mwa mitume wa Yesu. Ni jambo lenye kupendeza tunaposoma habari hizo kuona jinsi Yesu alivyotumia hitilafu hizo​—ambazo kwa kwa kweli zilikuwa matokeo ya kutokamilika na kukosa ujuzi—​kama nafasi za kuwazoeza wafuasi wake katika sifa za muhimu za Kikristo za upendo, unyenyekevu, na kusamehe.​—Mathayo 18:15-17, 21, 22; Luka 22:24-27.

Paulo pia alishuhudia hitilafu za nyutu. (Matendo 15:36-40; Wafilipi 4:2) Yeye alieleza jinsi matatizo kama hayo yanavyowapa Wakristo nafasi ya kupokea mazoezi: “Mkichukuliana, na kusameheana, mtu akiwa na sababu ya kumlaumu mwenzake; kama Bwana [Yehova, NW] alivyowasamehe ninyi, vivyo na ninyi. Zaidi ya hayo yote jivikeni upendo, ndio kifungo cha ukamilifu.”​—Wakolosai 3:13, 14.

Katika karne ya kwanza, hatari mbaya zaidi sana ilitokea miongoni mwa Wakristo. Petro alionya juu yayo: “Kutakavyokuwako waalimu wa uongo, watakaoingiza kwa werevu uzushi wa kupoteza, wakimkana hata Bwana aliyewanunua, wakijiletea uharibifu usiokawia. Na wengi watafuata ufisadi wao; na kwa hao njia ya kweli itatukanwa.” (2 Petro 2:1, 2) Jambo hili kali sana lililoonwa lingetokeza uharibifu kwa “waalimu wa uongo” wasiotubu. (2 Petro 2:3) Lakini namna gani wale ambao waliendelea kubaki waaminifu?

Jambo hilo lililoonwa lingewazoeza ‘waamshe uwezo wao wa kufikiri waziwazi.’ (2 Petro 3:1, NW) Kuwa macho kwao katika kulinda dhidi ya kuingia kwa mafundisho ya uwongo kungewataka wao warudie kufikiria sababu za imani yao. Wakiona matokeo mabaya ya vitendo vya “waalimu wa uongo,” uhakika wao katika ukweli wa Kikristo ungekuwa wenye nguvu zaidi.​—2 Petro 3:3-7.

Kwa mfano, katika kundi moja mtume Yohana mzee alipingwa na mtu fulani aitwaye Diotrefe, mwanamume mwenye kutaka umashuhuri ambaye hakuheshimu hata kidogo mamlaka ya Yohana na ambaye hakukataa tu kuwapokea wajumbe waliopelekwa na Yohana lakini huenda hata alijaribu kuwatenga na ushirika wale waliowapokea. Lazima jambo hili liwe liliwatia uchungu sana Wakristo wanyofu waliokuwa katika kundi pamoja na Diotrefe. Lakini liliwapa nafasi ya kuonyesha kwamba wao hawakuwa ‘wakiuiga ubaya’ na hivyo wapokee mazoezi yenye maendeleo katika ushikamanifu kwa Yehova na kwa mamlaka ya kimitume.​—3 Yohana 9-12.

Katika Kushughulika Pamoja na Watu Wasio Wakristo

Yesu alisema kwamba wafuasi wake hawakuwa sehemu ya ulimwengu. (Yohana 17:16) Ushikamanifu wa kwanza wa Mkristo ni kwa Yehova na Ufalme wake. Yeye anajaribu kudumisha viwango vya adili vya Mungu, hivyo mapendezi yake na mahangaikio makuu ni tofauti na ya wale walio katika ulimwengu. Hata hivyo, lazima Mkristo aishi ulimwenguni, na jambo hili bila kuepukika linasababisha mikazo.

Wakati wa huduma yake ndefu, lazima Petro awe aliona pindi nyingi wakati ambapo Wakristo walilazimika kufanya maamuzi magumu, wakisawazisha madai ya ulimwengu pamoja na maongozi ya dhamiri zao. Katika barua ya kwanza ya Petro, yeye alitoa shauri bora linalofaa juu ya jinsi ya kufanya hivyo ili Wakristo waweze ‘kuwa na dhamiri njema.’​—1 Petro 2:13-20; 3:1-6, 16.

Bila shaka, Wakristo wanatazama mbele kwenye wakati ambao sisi hatutalazimika tena kufikiria madai ya mfumo huu wa mambo. Lakini kwa sasa tunazoezwa katika uvumilivu na tunaruhusiwa kuonyesha ushikamanifu wetu tunapoelekeana na majaribu na mavutano mabaya. Pia tunazoezwa katika hekima inayofaa na ushujaa tunapopata maarifa katika kutumia kanuni za Biblia kuhusu hali mbalimbali kisha kutenda kwa ushujaa katika njia ambayo tunajua kwamba Yehova anatutaka sisi tutende. Fikiria kiasi ambacho sisi sote tutakuwa tumezoezwa kwa sababu ya kuishi katika mfumo huu na kushughulikia matatizo mengi magumu kwa kufaulu!

Chini ya Mateso

Petro alipozungumza juu ya Mungu kutuzoeza sisi, yeye alikuwa hasa anaelekeza kwa mateso. Yeye alionyesha kwamba Wakristo lazima watazamie mateso, akiandika: “Mwe na kiasi na kukesha; kwa kuwa mshitaki wenu Ibilisi, kama simba angurumaye, huzunguka-zunguka, akitafuta mtu ammeze.”​—1 Petro 5:8; ona pia 2 Timotheo 3:12.

Petro alistahili kuzungumza juu ya jambo hili kwa sababu yeye binafsi alikuwa amepata mateso. Katika siku za mapema za kundi la Kikristo, yeye pamoja na mitume wengine walipigwa sana na kuamriwa waache kuhubiri. Wao walitendaje? “Nao wakatoka katika ile baraza, wakifuraha kwa sababu wamehesabiwa kuwa wamestahili kuaibishwa kwa ajili ya jina hilo.”​—Matendo 5:41.

Kwa sababu hiyo, Petro alizungumza kutokana na mambo yaliyompata na pia chini ya mwongozo wa roho wakati aliposema: “Kwa kinyume, endeleeni kufurahi kwa kuwa ninyi ni washiriki wa mateso ya Kristo, ili mpate kufurahi na kushangilia mno pia wakati wa kufunuliwa kwa utukufu wake. Iwapo mnashutumiwa kwa ajili ya jina la Kristo, ninyi ni wenye furaha, kwa sababu roho ya utukufu, hata roho ya Mungu inatua juu yenu.”​—1 Petro 4:13, 14, NW.

Ndiyo, mateso ya waziwazi, pia yanaweza kutumikia kama aina ya mazoezi. Chini yayo, Mkristo anajifunza kutegemea zaidi roho ya Mungu. Imani yake inakuza “ubora uliojaribiwa.” (1 Petro 1:7, NW) Yeye anazoezwa katika ushujaa unaotegemea uwezo wa Yehova. (2 Timotheo 1:7) Yeye anakuza uvumilivu kwa subira, na kama Yesu, yeye ‘anajifunza kutii kwa mateso yanayompata.’​—Waebrania 5:8; 1 Petro 2:23, 24.

Yehova Anamaliza Mazoezi Yetu

Bila shaka, matatizo magumu, kutia na mateso, ambayo Mkristo anavumilia hayatoki kwa Mungu. Yakobo anashauri: “Mtu ajaribiwapo, asiseme, Ninajaribiwa na Mungu; maana Mungu hawezi kujaribiwa na maovu, wala yeye mwenyewe hamjaribu mtu.” (Yakobo 1:13) Matatizo yanatokea kwa sababu nyingi, kutia na wakati watu wanapofanya makosa au kutenda mabaya kwa kupenda kwao wenyewe. Hata hivyo, kwa kuwa mambo kama hayo yanatokea, Yehova anayatumia kuwazozea watumishi wake katika sifa za Kikristo ambazo ni za muhimu.

Ayubu, Yeremia, Petro, Paulo, na watumishi wote wa Mungu katika nyakati za Biblia walizoezwa katika njia hiyo. Sisi, pia, tunapoelekeana na hali tofauti-tofauti ambazo ni ngumu, twapaswa tuzione kama chanzo cha mazoezi yanayoruhusiwa na Yehova. Kwa kuelekeana nayo katika nguvu za Yehova, sisi tutazoezwa katika utii, hekima, unyenyekevu, ushujaa, upendo, uvumilivu, na sifa nyingine nyingi.​—Linganisha Yakobo 1:2-4.

Sisi pia tunatiwa moyo kujua kwamba kipindi hiki cha mazoezi yetu siku moja kitamalizika. Kwa sababu hiyo, Petro aliwafariji Wakristo wenzake: “Walakini, baada ya kuteswa kwa kitambo kidogo, Mungu wa fadhili zote zisizostahilika, aliyewaitia utukufu wake wa milele katika umoja na Kristo, yeye mwenyewe atamaliza mazoezi yenu, atawafanya mwe imara, atawafanya mwe na nguvu.” (1 Petro 5:10, NW) Maneno hayo yanatumika kwa nguvu ile ile kwa “mkutano mkubwa” unaotazama mbele kwenye uzima wa milele katika dunia paradiso.

Wazo hilo lenyewe lapaswa litusaidie sisi tujinyenyekeze kwa subira kwa mambo hayo yanayotupata yakiwa mazoezi, tukiazimia kutokana imani yetu. Hivyo, sisi tutapata kuona ukweli wa maneno ya Paulo yenye kutia moyo: “Tena tusichoke katika kutenda mema; maana tutavuna kwa wakati wake, tusipozimia roho.”​—Wagalatia 6:9.