Ukombozi Wakaribia kwa Ajili ya Watu wa Ujitoaji Kimungu!

“Yehova ajua jinsi ya kukomboa watu wa ujitoaji kimungu katika jaribu, lakini kuwaweka akiba watu wasio waadilifu kwa ajili ya siku ya hukumu wakatiliwe mbali.”—2 PETRO 3:9, NW.

1. (a) Ni hali gani zenye kutaabisha zinazokabili binadamu katika siku zetu? (b) Kwa sababu hiyo, ni maswali gani tutafikiria?

MATATIZO ya maisha yanaongezeka kwa ainabinadamu yote. Ndivyo ilivyo hata kama mtu anaishi mahali ambako kuna vitu vya kumwili vingi au ambako ni vichache. Ukosefu wa usalama uko kila mahali. Kana kwamba hali za kiuchumi zisizo imara hazileti wasiwasi wa kutosha, matatizo mazito ya kimazingira yanashambulia sayari Dunia, yakitisha uhai wote ulio juu yayo. Magonjwa yaenea pote. Maradhi yenye kuambukiza, magonjwa ya moyo, na pigo la kansa huua wengi. Ukosefu wa adili umetaabisha sana hisiamoyo za binadamu pamoja na maisha ya jamaa. Licha ya haya yote, ulimwengu umejaa jeuri. Kwa sababu ya yale ambayo jamii ya kibinadamu inakabili, tunauliza hivi kihalisi: Je! kuna msingi timamu wa kutarajia ukombozi wa mapema? Ikiwa ndivyo, utakujaje, na kwa ajili ya nani?—Linganisha Habakuki 1:2; 2:1-3.

2, 3. (a) Ni kwa nini sisi leo tunaona yale yanayosemwa kwenye 2 Petro 2:9 kuwa yenye kutupa uhakika? (b) Biblia inaelekeza kwenye matendo gani hususa ya ukombozi kuwa msingi wa kitia-moyo?

² Yanayotukia katika siku yetu hutuku-mbusha nyakati nyingine zenye umaana mkubwa katika historia ya kibinadamu. Mtume Petro huvuta uangalifu kwenye matendo ya ukombozi ambayo Mungu alifanya katika pindi hizo, kisha anaelekeza kwenye neno mkataa hili lenye kutoa uhakikisho: “Yehova ajua jinsi ya kukomboa watu wa ujitoaji kimungu katika jaribu.” (2 Pet. 2:9, NW) Angalia maneno yanayozunguka taarifa hiyo kwenye 2 Petro 2:4-10, NW:

³ “Kwa hakika ikiwa Mungu hakukosa kuadhibu malaika waliofanya dhambi, bali, kwa kuwatupa katika Tartaro, aliwapeleka kwenye mashimo yenye giza zito mno wawekwe akiba kwa ajili ya hukumu; na yeye hakukosa kuadhibu ulimwengu wa kale, bali alimlinda Noa, mhubiri wa uadilifu, salama pamoja na wengine saba wakati alipoleta gharika juu ya ulimwengu wa watu wasiohofu Mungu; na kwa kuyafanya majiji ya Sodoma na Gomora kuwa majivu aliwalaani, akiweka kiolezo kwa ajili ya watu wasiohofu Mungu cha mambo yatakayokuja; naye alimwokoa Loti mwadilifu, aliyesumbuliwa sana na anasa ya mwenendo mlegevu wa watu wakaidi-sheria—maana mtu huyo mwadilifu kwa yale aliyoona na kusikia alipokuwa akikaa miongoni mwao siku kwa siku alikuwa akitesa nafsi yake yenye uadilifu kwa sababu ya matendo yao yasiyo ya kisheria—Yehova ajua jinsi ya kukomboa watu wa ujitoaji kimungu katika jaribu, lakini kuwaweka akiba watu wasio waadilifu kwa ajili ya siku ya hukumu wakatiliwe mbali, hata hivyo, hasa wale wanaofuata mnofu pamoja na tamaa ya kuuchafua na wanaodharau ubwana.” Kama yanavyoonyesha maandiko hayo, yaliyotukia katika siku za Noa na katika wakati wa Loti yanajaa maana kwetu.

Roho Iliyoenea Pote Katika Siku ya Noa

4. Katika siku ya Noa, ni kwa nini Mungu aliona dunia kuwa imeharibiwa? (Zaburi 11:5)

⁴ Habari ya kihistoria katika Mwanzo sura ya 6 hutupasha habari kwamba katika siku ya Noa dunia ilikuja kuharibika machoni pa Mungu wa kweli. Kwa nini? Kwa sababu ya jeuri. Hilo halikuwa jambo la visa vya hapa na pale vya jeuri ya uhalifu. Mwanzo 6:11, NW huripoti kwamba “dunia ikajaa jeuri.”

5. (a) Ni mtazamo gani kwa upande wa binadamu ulichangia jeuri ya siku za Noa? (b) Enoki alikuwa ameonya nini kwa habari ya hali ya kutohofu Mungu?

⁵ Ni nini kilichoisababisha? Andiko ambalo limenakiliwa kutoka 2 Petro hutaja watu wasiohofu Mungu. Ndiyo, roho ya kutohofu Mungu ilijaa katika mambo ya binadamu. Hiyo ilihusu si kutojali tu sheria ya kimungu kwa ujumla bali mtazamo wa ukaidi kuelekea Mungu mwenyewe.a Na watu wanapokuwa wakaidi kuelekea Mungu, inaweza kutarajiwaje kwamba watashughulika na wanadamu wenzao kwa fadhili? Tayari kabla Noa kuzaliwa, kutohofu Mungu huku kulitokeza sana hivi kwamba Yehova alimfanya Enoki atoe unabii kuhusu matokeo. (Yuda 14, 15, NW) Kukaidi Mungu kwao hakika kungeleta utekelezo wa hukumu ya kimungu.

6, 7. Ni hali gani iliyohusu malaika ilikuwa jambo kubwa katika hali mbaya zilizositawi kabla ya Gharika?

⁶ Ulikuwako uvutano mwingine uliochangia jeuri ya siku hizo. Mwanzo 6:1, 2 huelekeza uangalifu kwa huo linaposema: “Ikawa wanadamu walipoanza kuzidi usoni pa nchi na wana wa kike walizaliwa kwao, wana wa Mungu [wa kweli, NW] waliwaona hao binti za wanadamu ya kuwa ni wazuri; wakajitwalia wake wo wote waliowachagua.” Hao wana wa Mungu wa kweli walikuwa akina nani? Hawakuwa binadamu wa kikawaida tu. Kwa karne nyingi wanaume walikuwa wamekuwa wakiwaona wanawake wazuri na kuwaoa. Hawa wana wa Mungu walikuwa malaika waliojivika miili. Kwenye Yuda 6, wanaelezwa kuwa “malaika wasioilinda enzi yao wenyewe, lakini wakayaacha makao yao yaliyowahusu.”—Linganisha 1 Petro 3:19, 20.

⁷ Wakati viumbe hao wenye uwezo upitao wa kibinadamu ambao walijivika miili wakawa kama wanaume walipofanya ngono na binti za watu, matokeo yalikuwa nini? “Wanefili walikuwako duniani siku zile; tena, baada ya hayo, wana wa Mungu [wa kweli, NW] walipoingia kwa binti za wanadamu, wakazaa nao wana; hao ndio waliokuwa watu hodari zamani, watu wenye sifa.” Ndiyo, wazao wa muungano huo usio wa asili walikuwa Wanefili, watu wenye uweza waliotumia nguvu zao zipitazo za kibinadamu kuwachokoza wengine.—Mwanzo 6:4.

8. Yehova aliitikiaje hali mbaya duniani?

⁸ Hali ilikuja kuwa baya kadiri gani? Ilifikia kadiri ya kwamba “BWANA [Yehova, NW] akaona ya kuwa maovu ya mwanadamu ni makubwa duniani na kwamba kila kusudi analowaza moyoni mwake ni baya tu sikuzote.” Mungu aliitikiaje hali hii? “BWANA, [Yehova, NW] akaghairi kwa kuwa amemfanya mwanadamu duniani, akahuzunika moyo.” Hii haimaanishi kwamba Mungu alihisi kwamba alikuwa amekosea kwa kuumba ainabinadamu. Badala ya hivyo, yeye alighairi kwamba baaada ya kuumba binadamu, mwenendo wao ulipata kuwa mwovu sana hivi kwamba aliwajibika kuwaharibu.—Mwanzo 6:5-7.

Mwendo Ulioongoza Kwenye Kukombolewa

9. (a) Kwa nini Mungu alishughulika na Noa kwa upendeleo? (b) Mungu alimpa Noa kimbele habari gani?

⁹ Kwa habari ya Noa, “alipata upendeleo machoni pa Yehova. . . . Noa alikuwa mtu mwadilifu. Yeye alijithibitisha mwenyewe kuwa asiye na hatia kati ya watu walioishi wakati mmoja naye. Noa alitembea pamoja na Mungu wa kweli.” (Mwa. 6:8, 9, NW) Kwa hiyo Mungu alimjulisha Noa kimbele kwamba Yeye angeleta gharika ya tufeni pote na akamwagiza ajenge safina. Ainabinadamu yote, isipokuwa Noa na jamaa yake, ingefutiliwa mbali kutoka usoni pa dunia. Hata viumbe-wanyama vingeharibiwa, isipokuwa vile vichache ambavyo vingewakilisha kila aina ya msingi ambayo Noa angeingiza ndani ya safina.—Mwanzo 6:13, 14, 17.

10. (a) Ni tayarisho gani ambalo lilikuwa lazima lifanywe kwa kutazamia kuhifadhiwa, na ilikuwa kazi kubwa kadiri gani? (b) Ni jambo gani linalostahili kuangaliwa juu ya njia ambayo Noa alishughulikia mgawo wake?

¹⁰ Maarifa hayo ya kujua kimbele yaliweka juu ya Noa daraka zito. Lazima safina ijengwe. Ingekuwa na umbo kama la sanduku kubwa mno, ikiwa na nafasi yenye kutumika ya meta za kyubiki 40,000. Noa alipaswa kuweka akiba ya vyakula kisha akusanye wanyama na ndege, “kila kilicho hai chenye mwili,” ili kihifadhiwe. Ulikuwa mradi uliotia ndani kazi ya miaka mingi. Noa aliitikiaje? Yeye “akafanya kulingana na yote ambayo Mungu alikuwa amemwamuru yeye. Yeye alifanya ivyo hivyo.”—Mwanzo 6:14-16, 19-22, NW; Waebrania 11:7.

11. Kwa habari ya nyumba yake mwenyewe, ni daraka gani muhimu lililokalia Noa?

¹¹ Alipokuwa akifanya kazi hiyo, ilikuwa lazima Noa atoe wakati wa kujenga hali ya kiroho ya nyumba yake. Walihitaji kulindwa salama dhidi ya kukubali njia zenye jeuri na mtazamo wa ukaidi wa watu waliowazunguka. Lilikuwa jambo la maana kwamba wasijihusishe kupita kiasi katika mambo ya maisha ya kila siku. Mungu alikuwa na kazi yao ya kufanya na ilihitajiwa kabisa kwamba iwe ndilo jambo kubwa maishani mwao. Twajua kwamba jamaa ya Noa iliitikia maagizo yake na walishiriki imani yake kwa sababu Noa, mke wake, wana wao watatu, na wake za wana wao—watu wanane wote pamoja—wananenwa katika Maandiko wakiwa na kibali.—Mwanzo 6:18; 1 Petro 3:20.

12. Kama inavyoonyeshwa kwenye 2 Petro 2:5, ni daraka gani alilotimiza Noa kwa uaminifu?

¹² Pia Noa alikuwa na daraka jingine—kuonya watu juu ya Gharika iliyokuwa ikija na kujulisha kwa nini ilikuwa ikija. Ni wazi kwamba alitimiza daraka hilo kwa uaminifu, kwa kuwa yeye anatajwa katika Neno la Mungu kuwa “mhubiri wa uadilifu.”—2 Petro 2:5, NW.

13. Ni hali gani zilizomkabili Noa alipokuwa akishughulika na mgawo wake aliopewa na Mungu?

¹³ Sasa fikiria tu hali ambazo chini yazo Noa alitimiza mgawo huo. Jiweke katika mahali pake. Kama wewe ungalikuwa Noa au mshiriki wa jamaa yake, ungalikuwa umezungukwa na jeuri iliyotendwa na Wanefili na watu wasiohofu Mungu. Ungalikuwa unakabiliwa moja kwa moja na mavutano ya malaika waasi. Ulipokuwa ukifanya kazi katika safina, ungalikuwa kitu cha kudhihakiwa. Na mwaka baada ya mwaka ulipokuwa ukionya watu juu ya Gharika iliyokuwa ikija, ungaliona kwamba watu walikuwa wamejitia sana katika mambo ya maisha ya kila siku hivi kwamba “hawakujali”—yaani, “mpaka gharika ikaja na kuwafagilia mbali wote.”—Mathayo 24:39, NW; Luka 17:26, 27.

Maono ya Noa Yamaanisha Nini Kwako?

14. Ni kwa nini sisi leo hatulioni kuwa jambo gumu kuelewa ile hali iliyomkabili Noa na jamaa yake?

¹⁴ Si vigumu kwa wasomaji wetu kuwazia hali kama hiyo. Kwa nini? Kwa sababu hali katika siku yetu zinafanana sana na zile zilizokuwako katika siku za Noa. Yesu Kristo alisema kwamba hili lingetarajiwa. Katika unabii wake mkubwa juu ya kuwapo kwake wakati wa umalizio wa mfumo wa mambo, Yesu alitabiri hivi: “Kama vile siku za Noa zilivyokuwa, hivyo ndivyo kuwapo kwa Mwana wa mtu kutakavyokuwa.”—Mathayo 24:37, NW.

15, 16. (a) Ni kweli jinsi gani kwamba, kama katika siku ya Noa, dunia leo inajaa jeuri? (b) Watumishi wa Yehova wamepatwa na jeuri gani hasa?

¹⁵ Je! imekuwa hivyo? Je! leo ulimwengu ‘umejaa jeuri?’ Ndiyo! Watu zaidi ya milioni mia moja wamekufa katika vita katika karne hii. Baadhi ya wasomaji wetu wamehisi moja kwa moja matokeo ya jambo hilo. Hata wengi zaidi wametishwa na wahalifu wakikusudia kuchukua pesa zao au vitu vingine vyenye thamani. Na walio wachanga wamekuwa katika hali ya kuweza kupatwa na jeuri shuleni.

¹⁶ Hata hivyo, watumishi wa Yehova wanapatwa na zaidi ya mikumbo ya vita na jeuri ya wahalifu isiyobagua. Wao wanapatwa pia na jeuri kwa sababu wao si sehemu ya ulimwengu bali hujitahidi kuwa watu wa ujitoaji kimungu. (2 Timotheo 3:10, 12) Nyakati nyingine jeuri kama hiyo inakuwa ni kusukumwa tu au kupigwa kofi; nyakati nyingine inahusu kuharibiwa kwa mali, mapigo makali, na hata mauaji.—Mathayo 24:9.

17. Je! kutohofu Mungu kumenea pote leo? Eleza.

¹⁷ Wanapokuwa wakijitia katika jeuri hiyo, nyakati nyingine, watu wasiohofu Mungu wamejulisha wazi kwa ufidhuli madharau yao kwa Mungu. Katika eneo moja katika Afrika, polisi walijulisha wazi hivi: “Serikali ni yetu. Nyinyi endeni kwa Mungu, ikiwa yuko, mkamwombe aje awasaidie.” Katika magereza na kambi za mateso, Mashahidi wa Yehova wamekabiliwa na watu kama Baranowsky, katika Sachsenhausen, Ujeremani, ambaye alidhihaki hivi: “Mimi nimeanza vita na Yehova. Tutaona ni nani mwenye nguvu zaidi, mimi au Yehova.” Muda mfupi baadaye, Baranowsky akawa mgonjwa na akafa; lakini wengine wameendelea kudhihirisha mtazamo kama huo. Wakuu wenye kujitia sana katika kampeni ya mnyanyaso sio peke yao huonyesha ukaidi kuelekea Mungu. Kuzunguka ulimwengu, watumishi wa Mungu husikia na kuona mambo ambayo hutoa uthibitisho kwamba wale wanaojitia katika hayo hawana hofu kwa Mungu katika mioyo yao.

18. Ni katika njia gani roho waovu wanachangia ile hali yenye msukosuko ya ainabinadamu?

¹⁸ Katika siku hizi zinazofanana sana na wakati wa Noa, tunaona pia ushahidi wa kujiingiza kwa roho waovu katika mambo ya binadamu. (Ufunuo 12:7-9) Roho waovu hawa ni malaika wale wale waliojivika miili wakawa binadamu na kuoa wanawake katika siku za Noa. Gharika ilipokuja, wake zao na watoto wao waliharibiwa, lakini malaika hao waasi walilazimika kurudi ndani ya makao ya roho. Hawakuwa tena na mahali katika tengenezo takatifu la Yehova bali walitupwa katika Tartaro, hali ya giza zito, wakikatiliwa mbali na nuru ya kimungu. (2 Petro 2:4, 5) Wakitenda chini ya mwelekezo wa Shetani, wameendelea kudumisha uhusiano wa karibu sana na wanadamu na, ingawa hawawezi tena kujivika miili, wamejaribu kuwadhibiti wanaume, wanawake, na hata watoto. Baadhi ya udhibiti huo umefanywa kupitia mazoea ya kifumbo. Pia wanachochea ainabinadamu kufanya matendo ya kuangamizana bila sababu yenye kueleweka kwa akili za kibinadamu. Lakini si hayo tu.

19. (a) Roho waovu wanaelekeza chuki yao kwa nani hasa? (b) Roho waovu wanajaribu kutulazimisha tufanye nini?

¹⁹ Biblia hufunua kwamba roho waovu wanapiga vita dhidi ya wale “ambao hushika amri za Mungu na wana kazi ya kutoa ushahidi kwa Yesu.” (Ufunuo 12:12, 17, NW) Hao roho waovu ndio wachocheaji wakuu wa mnyanyaso wa watumishi wa Yehova. (Waefeso 6:10-13) Wanatumia kila njia inayowazika kushurutisha au kushawishi binadamu waaminifu wavunje ukamilifu kwa Yehova na kuacha kupiga mbiu ya Ufalme wa Yehova na Yesu akiwa ndiye Mfalme wa Kimesiya.

20. Roho waovu wanajaribuje kuzuia watu wasitoke katika udhibiti wao? (Yakobo 4:7)

²⁰ Roho waovu hujaribu kuzuia watu wanaotamani kutoka kwenye mavutano yao yenye kuonea. Mmoja ambaye hapo kwanza aliwasiliana na roho katika Brazili anaripoti kwamba wakati Mashahidi walipotembelea makao yake, sauti za roho waovu zilimwamuru asifungue mlango; lakini alifanya hivyo, na akajifunza ukweli. Katika maeneo mengi, roho waovu hutumia moja kwa moja wazoeaji wa uchawi ili kujaribu kukomesha kazi ya Mashahidi wa Yehova. Kwa kielelezo, katika kijiji kimoja katika Suriname, wapingaji wa Mashahidi wa Yehova walimwendea mwenye kuwasiliana na roho aliyejulikana sana kuwa aweza kusababisha kifo cha ghafula kwa watu kwa kuwaelekezea tu fimbo yake ya kiuchawi. Akiwa na kikundi chake cha wacheza-dansi na wapiga-ngoma, huyo mwenye kuwasiliana na roho, akiwa amepagawa na roho mwovu, aliwakabili Mashahidi wa Yehova. Akataja-taja maneno yake ya kiuchawi na kuwaelekezea fimbo yake. Wanakijiji waliwatarajia Mashahidi waanguke na kufa papo hapo, lakini mwenye kuwasiliana na roho ndiye aliyezimia na akalazimika kuondolewa mbali mbiombio na waungaji mkono wake wenye kuaibika.

21. Kama vile katika siku ya Noa, watu walio wengi huitikiaje kuhubiri kwetu, na kwa nini?

²¹ Hata katika maeneo ambako uchawi na ulozi hauzoewi waziwazi hivyo, kila Shahidi wa Yehova amepata kuona inavyokuwa unapojaribu kuhubiri watu wanaojishughulisha sana na mambo ya maisha ya kila siku hivi kwamba hawataki kusumbuliwa. Kama ilivyokuwa katika siku ya Noa, walio wengi sana ‘hawajali.’ (Mathayo 24:37-39, NW) Huenda wengi wakasifu umoja wetu na mambo tunayotimiza. Lakini kazi yetu ya ujenzi wa kiroho—inayohusu saa nyingi za funzo la kibinafsi, kuhudhuria mikutano kwa ukawaida, na utumishi wa shambani—yote ni upumbavu kwao. Wanadhihaki tumaini letu katika ahadi za Neno la Mungu, kwa sababu maisha zao zinategemea mali za kimwili na anasa ya kimwili wanayoweza kupata sasa.

22, 23. Matukio ya siku ya Noa yanatoaje uhakikisho wenye nguvu kwamba Yehova atakomboa watu wa ujitoaji kimungu na jaribu?

²² Je! watumishi wa Yehova washikamanifu watapatwa milele na mabaya kutoka kwa wale wasiompenda Mungu? Sivyo kabisa! Ilitukiaje katika siku ya Noa? Kwa mwelekezo wa Mungu, Noa na jamaa yake waliingia ndani ya safina iliyokamilika. Ndipo, katika wakati hususa uliotajwa kimungu, “chemchemi zote za vilindi vikuu zilibubujika kwa nguvu, madirisha ya mbinguni yakafunguka.” Gharika iliendelea mpaka hata milima ikafunikwa. (Mwanzo 7:11, 17-20) Wale malaika walioacha makao yao yaliyowahusu walilazimika kuacha miili yao ya kibinadamu waliyokuwa wamejivika wakarudi kwenye makao ya roho. Wanefili pamoja na wale wengine wote wa huo “ulimwengu wa watu wasiohofu Mungu,” kutia na wale ambao hawakujali hata kidogo wasichukue hatua juu ya onyo la Noa, wakaharibiwa. Kwa upande mwingine, Noa na mke wake na wana wao watatu na wake za wana wao waliokolewa. Hivyo, Yehova alikomboa Noa na jamaa yake na jaribu ambalo walikuwa wamevumilia kishikamanifu kwa miaka mingi.

²³ Je! Yehova atafanya vivyo hivyo kwa ajili ya watu wa ujitoaji kimungu leo? Hakuna shaka lolote. Yeye ameahidi hivyo, naye hawezi kusema uwongo.—Tito 1:2; 2 Petro 3:5-7, NW.

[Maelezo ya Chini]

Do You Remember?

◻ Petro alionyeshaje kwamba Yehova ajua jinsi ya kukomboa watu wa ujitoaji kimungu katika jaribu?

◻ Ni mambo gani hakika yaliyochangia jeuri katika siku ya Noa?

◻ Kwa sababu ya Gharika ya tufeni pote iliyokuwa ikija, Noa alikuwa na daraka gani?

◻ Ni ulingano gani mbalimbali na siku za Noa tunaoona katika wakati wetu?

[Picha katika ukurasa wa 12]

Kujenga safina kulitia ndani miaka mingi ya kazi ngumu

[Picha katika ukurasa wa 13]

Noa alitoa wakati wa kujenga hali ya kiroho ya jamaa yake