‘Fanyeni Pigano Kali kwa Ajili ya Imani’!

‘Fanyeni pigano kali kwa ajili ya imani ambayo ilikabidhiwa mara moja kwa wakati wote kwa watakatifu.’—YUDA 3.

1. Wakristo wa kweli leo wanahusika katika vita kwa maana gani?

SIKUZOTE askari-jeshi vitani wamekuwa na maisha magumu sana. Ebu wazia ukivaa vifaa kamili vya vita na kupiga mwendo kilometa nyingi katika halihewa za aina zote, ukipata mazoezi yenye kuchosha ya kutumia silaha, au kulazimika kujikinga mwenyewe dhidi ya hali za namna zote zenye kutisha ambazo zaweza kuleta kifo au madhara. Hata hivyo, Wakristo wa kweli, hawashiriki vita vya mataifa. (Isaya 2:2-4; Yohana 17:14) Hata hivyo, lazima tusisahau kamwe kwamba sisi sote tuko vitani kwa namna fulani. Shetani amejawa na chuki kwa Yesu Kristo na wafuasi wake duniani. (Ufunuo 12:17) Wote wanaoamua kumtumikia Yehova Mungu, kwa kweli, wanajiandikisha kuwa askari-jeshi kupigana vita vya kiroho.—2 Wakorintho 10:4.

2. Yuda afafanuaje vita vya Kikristo, na barua yake yaweza kutusaidiaje tuivumilie?

² Kwa kufaa, ndugu nusu wa Yesu, Yuda, aandika: “Wapendwa, ingawa nilikuwa nikifanya kila jitihada kuwaandikia nyinyi juu ya wokovu ambao sisi twashika kwa shirika, niliona ni lazima niwaandikie ili kuwahimiza kwa bidii mfanye pigano kali kwa ajili ya imani ambayo ilikabidhiwa mara moja kwa wakati wote kwa watakatifu.” (Yuda 3) Yuda asihipo Wakristo ‘wafanye pigano,’ yeye atumia neno linalohusiana na neno “maumivu makali.” Naam, pigano hili laweza kuwa gumu, hata lenye kuleta maumivu makali! Je, wewe nyakati nyingine huona ikiwa vigumu kuvumilia katika vita hii? Barua ya Yuda fupi lakini yenye kujaa nguvu yaweza kutusaidia. Hiyo hutusihi tukinze ukosefu wa adili, tustahi mamlaka yaliyowekwa kimungu, na tujitunze katika upendo wa Mungu. Acheni tuone jinsi ya kutumia shauri hilo.

Kinza Ukosefu wa Adili

3. Ni hali gani ya dharura iliyokabili kutaniko la Kikristo katika siku ya Yuda?

³ Yuda angeweza kuona kwamba si wote kati ya Wakristo wenzake waliokuwa wakishinda ile vita dhidi ya Shetani. Hali ya dharura ilikabili kundi. Watu wenye ufisadi walikuwa “wamepenyeza ndani,” aandika Yuda. Watu hawa walikuwa wakiendeleza ukosefu wa adili kwa hila. Nao kwa ujanja walitetea matendo yao, “wakigeuza fadhili isiyostahiliwa ya Mungu wetu kuwa sababu ya kujitetea kwa ajili ya mwenendo mlegevu.” (Yuda 4) Labda, kama Waagnosti wa kale, walitoa sababu kwamba kadiri ambavyo mtu angefanya dhambi, ndivyo kadiri ambavyo angepokea rehema ya Mungu—kwa hiyo, kwa kweli, ingekuwa afadhali kufanya dhambi zaidi! Au labda waliamua kwamba Mungu mwenye fadhili hangewahukumu kamwe. Kwa vyovyote vile, walikosea.—1 Wakorintho 3:19.

4. Yuda ataja vielelezo gani vitatu vya Kimaandiko vya hukumu za Yehova za zamani?

⁴ Yuda akanusha kusababu kwao kuovu kwa kutaja vielelezo vitatu vya hukumu za Yehova za nyakati za zamani: dhidi ya Waisraeli ambao walikuwa ‘hawaonyeshi imani’; dhidi ya “malaika ambao hawakutunza cheo chao cha awali bali wakaachilia mbali mahali pao wenyewe pa kukaa” ili wafanye dhambi na wanawake; na dhidi ya wakazi wa Sodoma na Gomora, ambao ‘walikuwa wamefanya uasherati kwa kuzidi mno na kutoka kwenda kufuatia mwili kwa ajili ya utumizi usio wa asili.’ (Yuda 5-7; Mwanzo 6:2-4; 19:4-25; Hesabu 14:35) Katika kila kisa, Yehova alileta hukumu kubwa dhidi ya hao watenda-dhambi.

5. Yuda anukuu kutoka nabii yupi wa kale, na unabii huo ulielezaje uhakika kamili wa utimizo wake?

⁵ Baadaye, Yuda ataja hata hukumu yenye matokeo makubwa zaidi. Yeye anukuu unabii wa Enoki—kifungu kisichopatikana penginepo katika Maandiko yaliyopuliziwa.a (Yuda 14, 15) Enoki alitabiri wakati ambapo Yehova angehukumu watu wote wasiomwogopa Mungu na matendo yao yasiyo ya kumwogopa Mungu. Kwa kupendeza, Enoki alisema kwa kutumia kitenzi cha wakati uliopita, kwa kuwa hukumu za Mungu zilikuwa za hakika kana kwamba zilikuwa tayari zimetukia. Huenda ikawa watu walimdhihaki Enoki na baadaye Noa, lakini wadhihaki hao wote walikufa maji katika Gharika ya tufeni pote.

6. (a) Wakristo katika siku ya Yuda walihitaji kukumbushwa nini? (b) Kwa nini twapaswa kutia moyoni vikumbusha vya Yuda?

⁶ Kwa nini Yuda aliandika kuhusu hukumu hizi za kimungu? Kwa sababu alijua kwamba wengine ambao walikuwa wakishirikiana na makutaniko ya Kikristo katika siku yake mwenyewe walikuwa wakifanya dhambi zenye uchafu wenye kuchukiza na zenye kulaumika kama zile zilizochochea hukumu hizo za nyakati zilizopita. Hivyo, Yuda aandika kwamba makutaniko yahitaji kukumbushwa baadhi ya kweli za msingi. (Yuda 5) Ni wazi walikuwa wamesahau kwamba Yehova Mungu aliona yale waliyokuwa wakifanya. Naam, watumishi wake wakiasi sheria kimakusudi, wakijitia unajisi wenyewe na wengine, yeye huona. (Mithali 15:3) Matendo kama hayo humwumiza sana. (Mwanzo 6:6; Zaburi 78:40) Ni wazo lenye kutia hofu kwamba sisi tukiwa wanadamu tu twaweza kuathiri hisia za Bwana Mwenye Enzi Kuu wa ulimwengu. Yeye hutuona kila siku, na tufanyapo yote tuwezayo kufuata hatua za Mwana wake, Yesu Kristo, ndipo mwenendo wetu uletapo shangwe kwa moyo wake. Basi, acheni tusione uchungu kamwe juu ya vikumbusha hivyo kama zitolewavyo na Yuda lakini tuvitii kutoka moyoni.—Mithali 27:11; 1 Petro 2:21.

7. (a) Kwa nini ni muhimu kwa wale wanaohusika katika kosa zito kutafuta msaada mara moja? (b) Sisi sote twaweza kuepukaje ukosefu wa adili?

⁷ Yehova haoni tu bali yeye hutenda. Mungu mwenye haki, huhukumu waovu—kwa wakati wake. (1 Timotheo 5:24) Wale ambao husababu kwamba hukumu zake ni historia ya kale na kwamba hajali uovu wafanyao wanajipumbaza wenyewe tu. Ni jambo la maana kama nini leo kwa wowote ambao wamejihusisha katika ukosefu wa adili watafute msaada wa wazee Wakristo mara moja! (Yakobo 5:14, 15) Huenda lile tisho litokezwalo na ukosefu wa adili katika vita vyetu vya kiroho likafanya sisi sote tufikiri. Kila mwaka kuna majeruhi—watu ambao hufukuzwa miongoni mwetu, wengi wao kwa sababu ya kufanya matendo ya ukosefu wa adili bila kutubu. Lazima tuazimie kwa imara kukinza majaribu yoyote ambayo hata yanaanza kutuongoza katika kufanya hivyo.—Linganisha Mathayo 26:41.

Stahi Mamlaka Iliyowekwa Kimungu

8. Wale “watakatifu” waliotajwa katika Yuda 8 walikuwa akina nani?

⁸ Tatizo jingine ambalo Yuda anataja ni ukosefu wa staha kwa mamlaka iliyowekwa kimungu. Kwa mfano, katika mstari wa 8 awashtaki watu walewale waovu kwa sababu ya “kusema kwa maneno yenye kuudhi juu ya watukufu.” “Watukufu” hawa walikuwa akina nani? Walikuwa watu wasio wakamilifu, lakini walikuwa na madaraka waliyokabidhiwa kwa roho takatifu ya Yehova. Kwa mfano, makutaniko yalikuwa na wazee, ambao waliamuriwa kuchunga kundi la Mungu. (1 Petro 5:2) Kulikuwako waangalizi wasafirio pia, kama vile mtume Paulo. Na baraza la wazee katika Yerusalemu lilitumika likiwa baraza linaloongoza, likifanya maamuzi yaliyoathiri kutaniko la Kikristo kwa ujumla. (Matendo 15:6) Yuda alihangaika sana kwamba watu fulani makutanikoni walikuwa wakisema maneno yenye kuudhi, au kukufuru watu hao.

9. Ni vielelezo gani kuhusu ukosefu wa staha kwa mamlaka ambavyo Yuda anataja?

⁹ Ili kushutumu usemi huo wenye kukosa staha, katika mstari wa 11, Yuda ataja vielelezo vingine vitatu kuwa vikumbusha: Kaini, Balaamu, na Kora. Kaini alipuuza shauri la Yehova na kwa kukusudia akaendeleza mwendo wake mwenyewe wa chuki ya kuua kimakusudi. (Mwanzo 4:4-8) Balaamu alipokea maonyo ya kurudiwa-rudiwa ambayo bila shaka yalitoka kwa chanzo chenye nguvu zinazozidi zile za kibinadamu—hata punda-jike wake mwenyewe alisema naye! Lakini Balaamu kwa ubinafsi aliendelea kufanya njama dhidi ya watu wa Mungu. (Hesabu 22:28, 32-34; Kumbukumbu la Torati 23:5) Kora alikuwa na cheo chake mwenyewe cha daraka, lakini hakikumtosha. Alichochea uasi dhidi ya mtu msikivu zaidi duniani, Musa.—Hesabu 12:3; 16:1-3, 32.

10. Wengine leo huenda wakaangukiaje mtego wa “kusema kwa maneno yenye kuudhi juu ya watukufu,” na kwa nini usemi huo wapasa kuepukwa?

¹⁰ Vielelezo hivi vyatufundisha waziwazi kama nini kusikiliza shauri na kustahi wale ambao Yehova hutumia katika vyeo vya daraka! (Waebrania 13:17) Ni rahisi sana kutafuta kosa kwa wazee waliowekwa, kwa kuwa si wakamilifu, kama vile tu sisi sote tusivyo wakamilifu. Lakini tukishikilia makosa yao na kuwashushia staha, je, huenda tukawa ‘twasema maneno yenye kuudhi juu ya watukufu’? Katika mstari wa 10, Yuda ataja wale ambao “wanasema kwa maneno yenye kuudhi juu ya mambo yale yote ambayo kwa kweli hawayajui.” Nyakati nyingine, wengine watachambua uamuzi uliofanywa na baraza la wazee au halmashauri ya hukumu. Lakini, hawaruhusiwi kushiriki siri za mambo yote ambayo wazee walilazimika kuchunguza ili kufikia uamuzi huo. Kwa hiyo, kwa nini waseme maneno yenye kuudhi kuhusu mambo wasiyoyajua kwa kweli? (Mithali 18:13) Wale wenye kuendelea katika usemi usiojenga kama huo wangeweza kusababisha migawanyiko katika kutaniko na labda hata kulinganishwa na “miamba iliyofichwa chini ya maji” katika vikusanyiko vya waamini wenzao. (Yuda 12, 16, 19) Hatungetaka kamwe kuletea wengine hatari ya kiroho. Badala yake, acheni kila mmoja wetu aazimie kuthamini wanaume wenye daraka kwa kazi yao ngumu na ujitoaji wao kwa kundi la Mungu.—1 Timotheo 5:17.

11. Kwa nini Mikaeli alijiepusha na kuleta hukumu dhidi ya Shetani kwa maneno yenye kutumiwa vibaya?

¹¹ Yuda ataja kielelezo cha mtu aliyestahi mamlaka iliyowekwa ifaavyo. Yeye aandika hivi: “Wakati Mikaeli malaika mkuu alipokuwa na tofauti pamoja na Ibilisi na alikuwa akibishana juu ya mwili wa Musa, yeye hakuthubutu kuleta hukumu dhidi yake katika maneno yenye kuudhi, bali alisema: ‘Yehova na akukemee wewe.’” (Yuda 9) Simulizi hilo lenye kusisimua, lililorekodiwa na Yuda pekee katika Maandiko yaliyopuliziwa, latufundisha masomo mawili tofauti. Kwa upande mmoja, latufundisha kumwachia Yehova hukumu. Ni dhahiri kwamba Shetani alitaka kutumia vibaya mwili wa mwanamume mwaminifu Musa ili aendeleze ibada isiyo ya kweli. Lilikuwa jambo lenye uovu kama nini! Hata hivyo, kwa unyenyekevu Mikaeli alijiepusha na kuhukumu, kwa kuwa ni Yehova peke yake aliyekuwa na mamlaka hiyo. Basi, yatupasa sisi tujiepushe hata zaidi kuhukumu wanaume waaminifu wanaojaribu kumtumikia Yehova.

12. Wale wenye vyeo vya daraka katika kutaniko la Kikristo wanaweza kujifunza nini kutokana na kielelezo cha Mikaeli?

¹² Kwa upande ule mwingine, wale walio na mamlaka katika kutaniko wanaweza pia kujifunza somo kutoka kwa Mikaeli. Kwa vyovyote, ingawa Mikaeli alikuwa “malaika mkuu,” mkuu kuliko malaika wote, hakutumia vibaya cheo chake cha nguvu, hata alipochokozwa. Wazee waaminifu hufuata kielelezo hicho sana, wakitambua kwamba kutumia kwao vibaya mamlaka ni ukosefu wa staha kwa enzi kuu ya Yehova. Barua ya Yuda ilikuwa na mengi ya kusema kuhusu wanaume ambao walikuwa na vyeo vya staha katika makutaniko lakini walikuja kutumia vibaya nguvu yao. Mathalani, katika mstari wa 12 hadi wa 14, Yuda aandika shutumu kali sana la hadharani kwa ‘wachungaji wanaojilisha wenyewe bila hofu.’ (Linganisha Ezekieli 34:7-10.) Yaani, upendezi wao wa kwanza ulikuwa kujinufaisha wenyewe, si kundi la Yehova. Wazee leo wanaweza kujifunza mengi kutoka katika vielelezo hivyo visivyofaa. Kwa kweli, maneno ya Yuda hapa yanafafanua kwa dhahiri kile ambacho hatutaki kuwa. Tunapokuwa na ubinafsi, hatuwezi kuwa askari-jeshi wa Kristo; tunakuwa wenye shughuli zaidi tukipigania mambo ya kibinafsi. Badala yake, acheni sisi sote, tuishi kupatana na maneno haya ya Yesu: “Kuna furaha zaidi katika kutoa kuliko kulivyo katika kupokea.”—Matendo 20:35.

“Jitunzeni Wenyewe Katika Upendo wa Mungu”

13. Kwa nini sisi sote twapaswa kutamani sana kubaki katika upendo wa Mungu?

¹³ Kuelekea mwisho wa barua yake, Yuda atoa shauri hili lenye kuchangamsha moyo: “Jitunzeni wenyewe katika upendo wa Mungu.” (Yuda 21) Hakuna kitu kinginecho kitakachotusaidia tupigane vita vya Kikristo kuliko jambo hili moja, kubaki tukiwa watu wapendwao na Yehova Mungu. Kwa vyovyote, upendo ni sifa kuu ya Yehova. (1 Yohana 4:8) Paulo aliwaandikia Wakristo katika Roma hivi: “Nasadiki kwamba wala kifo wala uhai wala malaika wala serikali wala mambo yaliyo hapa sasa wala mambo yatakayokuja wala nguvu wala kimo wala kina wala kiumbe kingine chochote hakitaweza kututenga na upendo wa Mungu ulio katika Kristo Yesu Bwana wetu.” (Waroma 8:38, 39) Ingawa hivyo, twawezaje kubaki katika upendo huo? Ona hatua tatu tuwezazo kuchukua, kulingana na Yuda.

14, 15. (a) Kujijenga wenyewe katika “imani ye[t]u takatifu zaidi” sana kwamaanisha nini? (b) Twawezaje kuchunguza hali ya silaha zetu za kiroho?

¹⁴ Kwanza, Yuda atuambia tuendelee kujijenga wenyewe katika ‘imani yetu takatifu zaidi sana.’ (Yuda 20) Kama tulivyoona katika makala iliyotangulia, hii ni hatua ya kuendelea. Sisi tuko kama majengo ambayo yanahitaji kuimarishwa dhidi ya shambulio lenye kuharibu la hali za hewa zisababishwazo na vitu vya asili. (Linganisha Mathayo 7:24, 25.) Kwa hiyo na tusiwe wenye uhakika kupita kiasi. Badala yake, acheni tuone tuwezako kujijenga kwenye msingi wa imani yetu, tukiwa askari-jeshi wa Kristo wenye nguvu zaidi, walio waaminifu. Kwa mfano, twaweza kuchunguza sehemu za suti ya kiroho ya silaha inayofafanuliwa kwenye Waefeso 6:11-18.

¹⁵ Hali ya silaha zetu wenyewe za kiroho ikoje? Je, “ngao [yetu] kubwa ya imani” ni yenye nguvu kama ipasavyo kuwa? Tutazamapo nyuma miaka ya juzijuzi, je, twaona ishara fulani za kulegea, kama vile kupunguza kuhudhuria mikutano, kukosa bidii katika huduma, au kufifia kwa shauku kwa ajili ya funzo la kibinafsi? Ishara kama hizo ni zenye hatari! Twahitaji kutenda sasa ili kujijenga na kujiimarisha katika kweli.—1 Timotheo 4:15; 2 Timotheo 4:2; Waebrania 10:24, 25.

16. Kusali tukiwa na roho takatifu kwamaanisha nini, na ni jambo gani moja tupaswalo kuomba Yehova kwa ukawaida?

¹⁶ Njia ya pili ya kubaki katika upendo wa Mungu ni kuendelea kusali tukiwa na roho takatifu. (Yuda 20) Hiyo yamaanisha kusali kwa uvutano wa roho ya Yehova na kupatana na Neno lake lililopuliziwa kwa roho. Sala ni njia muhimu ya kumkaribia Yehova kibinafsi na kueleza ujitoaji wetu kwake. Tusipuuze kamwe pendeleo hilo la ajabu! Na tusalipo, twaweza kuuliza—kwa hakika, kuendelea kuomba—tupate roho takatifu. (Luka 11:13) Ndiyo kani iliyo na nguvu zaidi tuwezayo kupata. Tukiwa na msaada huo, sikuzote twaweza kubaki katika upendo wa Mungu na kuvumilia tukiwa askari-jeshi wa Kristo.

17. (a) Kwa nini kielelezo cha Yuda kuhusu rehema ni chenye kutokeza sana? (b) Kila mmoja wetu aweza kuendeleaje kuonyesha rehema?

¹⁷ Jambo la tatu, Yuda atusihi tuendelee kuonyesha rehema. (Yuda 22) Kielelezo chake mwenyewe kuhusu jambo hili ni chenye kutokeza. Hata hivyo, kwa kufaa alitaabishwa na ufisadi, ukosefu wa adili, na uasi uliokuwa unaingia katika kutaniko la Kikristo. Hata hivyo, hakushindwa na hofu, akifikiria kwamba nyakati hizo zilikuwa zenye hatari zaidi kuweza kuonyesha sifa “nyororo” ya rehema. La, aliwasihi ndugu zake waendelee kuonyesha rehema iwezekanapo, wakisababu kwa fadhili na wale walio na shaka na hata “kuwanyakua kutoka katika moto” wale waliokaribia dhambi nzito. (Yuda 23; Wagalatia 6:1) Hilo ni himizo zuri sana kama nini kwa wazee katika nyakati hizi zenye taabu! Wao pia hujitahidi kuonyesha rehema inapohitajiwa, huku wakiwa bado imara ilazimikapo. Vivyo hivyo sisi sote twataka kuonyeshana rehema. Kwa mfano, badala ya kuweka vinyongo vidogo-vidogo, twaweza kuwa wakarimu kwa msamaha wetu.—Wakolosai 3:13.

18. Twaweza kuwaje na uhakika wa ushindi katika vita vyetu vya kiroho?

¹⁸ Vita tupiganayo si rahisi. Kama asemavyo Yuda, ni “pigano kali.” (Yuda 3) Adui zetu ni wenye nguvu. Si Shetani peke yake tu, bali ulimwengu wake mwovu na ukosefu wa ukamilifu wetu, yote hayo yanapigana nasi. Lakini, twaweza kuwa na uhakika kabisa wa ushindi! Kwa nini? Kwa sababu tuko upande wa Yehova. Yuda amalizia barua yake kwa kikumbusha cha kwamba Yehova anahesabiwa sifa ya “utukufu, ukuu, uweza na mamlaka kwa umilele wote uliopita na sasa na hadi ndani ya umilele wote.” (Yuda 25) Je, hilo si wazo lenye kutia kicho? Je, basi, kwaweza kuwa na shaka lolote kwamba Mungu huyuhuyu “aweza kuwalinda nyinyi msijikwae”? (Yuda 24) La, hasha! Acheni kila mmoja wetu aazimie kuendelea kukinza ukosefu wa adili, astahi mamlaka iliyowekwa kimungu, na kujitunza katika upendo wa Mungu. Kwa njia hiyo, tutafurahia ushindi wenye utukufu pamoja.

[Maelezo ya Chini]

Maswali ya Kupitia

◻ Barua ya Yuda yatufundishaje kukinza ukosefu wa adili?

◻ Kwa nini ni jambo la maana sana kustahi mamlaka iliyowekwa kimungu?

◻ Kwa nini ni jambo zito sana kutumia vibaya mamlaka ya kutaniko?

◻ Twaweza kujitahidije kujitunza katika upendo wa Mungu?

[Picha katika ukurasa wa15]

Tofauti na askari-jeshi wa Kiroma, Wakristo wanapigana vita vya kiroho

[Picha katika ukurasa wa18]

Wachungaji Wakristo hutumikia, si kwa ubinafsi, bali kwa upendo