Har–Magedoni

Je, wanadamu wataruhusiwa na Mungu waiangamize dunia kwa kile kinachoitwa “Har–Magedoni ya nyukilia”?

Zab. 96:10: “Yehova amekuwa mfalme. Nchi [Kiebrania, te·velʹ; dunia, yenye rutuba na inayokaliwa, ulimwengu unaoweza kukaliwa] yenye kuzaa pia hufanywa imara ili isitikiswe.”

Zab. 37:29: “Waadilifu wenyewe wataimiliki dunia, nao watakaa milele juu yake.”

Ufu. 11:18: “Mataifa wakawa na ghadhabu, nayo ghadhabu yako [ya Yehova] mwenyewe ikaja, na wakati uliowekwa kwa ajili ya . . . kuwaharibu wale wanaoiharibu dunia.”

Har–Magedoni inayotajwa katika Biblia ni nini?

Ufu. 16:14, 16: “Hayo, kwa kweli, ni maneno yanayoongozwa na roho waovu nayo yanafanya ishara, nayo yanakwenda kwa wafalme wa dunia nzima inayokaliwa, ili kuwakusanya pamoja kwa vita vya ile siku kuu ya Mungu Mweza-Yote. Nayo yakawakusanya pamoja mahali panapoitwa katika Kiebrania Har–Magedoni [Amagedoni].”

Har–Magedoni itapiganwa Mashariki ya Kati tu?

Watawala na majeshi ya mataifa yote watakusanywa ili kumpinga Mungu

Ufu. 16:14: “Yanakwenda kwa wafalme wa dunia nzima inayokaliwa, ili kuwakusanya pamoja kwa vita vya ile siku kuu ya Mungu Mweza-Yote.”

Ufu. 19:19: “Nami nikamwona yule mnyama-mwitu [utawala wote wa kisiasa wa kibinadamu] na wafalme wa dunia na majeshi yao wamekusanyika pamoja ili kupigana vita na yule anayeketi juu ya farasi na jeshi lake.”

Yer. 25:33: “Wale waliouawa na Yehova siku hiyo hakika watakuwa kutoka mwisho mmoja wa dunia mpaka mwisho wa pili wa dunia.”

Kutumiwa kwa jina Har–Magedoni (Amagedoni) hakumaanishi kwamba vita hivyo vitapiganwa kwenye mlima halisi wa Megido

Hakuna Mlima halisi wa Megido; ila kilima chenye urefu wa meta 21 ambapo magofu ya Megido ya kale yanapatikana.

Wafalme na majeshi ya kivita ya “ulimwengu wote” hayangeweza kutoshea katika Uwanda wa Esdraeloni, chini ya Megido. Uwanda huo ni wenye pembe tatu, urefu wa kilometa 32 tu, na upana wa kilometa 29 upande wa mashariki.—The Geography of the Bible (New York, 1957), Denis Baly, uku. 148.

Jina hilo linafaa kwa sababu ya mambo yaliyokuwa yakitukia huko Megido nyakati za kale; uwanda uliokuwa chini ya Megido ulikuwa mahali pa vita vya kukata maneno

Huko Yehova alimfanya Sisera, yule mkuu wa jeshi la Wakanaani, ashindwe mbele ya Mwamuzi Baraka.—Amu. 5:19, 20; 4:12-24.

Thutmose wa Tatu, farao wa Misri, alisema: “Kuteka Megido ni sawa na kuteka miji elfu!”—Ancient Near Eastern Texts Relating to the Old Testament (Princeton, N.J.; 1969), kilichohaririwa na James Pritchard, uku. 237.

Kurejelewa kwa Megido (maana yake, “Kusanyiko la Vikosi”) kwafaa kwa sababu Har–Magedoni ni hali ya ulimwengu ambayo vikosi vya kijeshi na wote wanaowaunga mkono watawala wa mataifa yote watahusika.

Ni nini au ni nani watakaoharibiwa kwenye Har–Magedoni?

Dan. 2:44: “Mungu wa mbinguni atausimamisha ufalme. . . . Utazivunja na kuzikomesha falme hizi zote, nao utasimama mpaka wakati usio na kipimo.”

Ufu. 19:17, 18: “Nikaona pia malaika amesimama katika jua, naye akapaaza kilio kwa sauti kubwa na kuwaambia ndege wote wanaoruka katikati ya mbingu: ‘Njooni hapa, mkusanyike pamoja kwenye mlo mkubwa wa jioni wa Mungu, ili mpate kula sehemu zenye nyama za wafalme na sehemu zenye nyama za viongozi wa kijeshi na sehemu zenye nyama za watu wenye nguvu na sehemu zenye nyama za farasi na za wale wanaoketi juu yao, na sehemu zenye nyama za wote, za watu huru na vilevile za watumwa na za wadogo na wakubwa.’”

1 Yoh. 2:16, 17: “Kila kitu kilicho katika ulimwengu—tamaa ya mwili na tamaa ya macho na mtu kujionyesha mali yake maishani—hakitokani na Baba, bali hutokana na ulimwengu. Zaidi ya hayo, ulimwengu unapitilia mbali na pia tamaa yake, lakini yeye anayefanya mapenzi ya Mungu anadumu milele.”

Ufu. 21:8: “Lakini kwa habari ya waoga na wale wasio na imani na wale wenye kuchukiza katika uchafu wao na wauaji na waasherati na wale wanaozoea kuwasiliana na pepo na waabudu-sanamu na waongo wote, fungu lao litakuwa ndani ya lile  ziwa linalowaka moto na kiberiti. Hili linamaanisha kifo cha pili.”

Je, uharibifu huo utakuwa wa milele?

Mt. 25:46: “Na hawa [waliokataa kuwatendea “ndugu” za Kristo mema] watakatiliwa mbali milele, lakini waadilifu wataingia katika uzima wa milele.”

2 The. 1:8, 9: “Wale wasiomjua Mungu na wale wasiotii habari njema juu ya Bwana wetu Yesu . . . watahukumiwa adhabu ya uharibifu wa milele.”

Je, kutakuwako waokokaji?

Sef. 2:3: “Mtafuteni Yehova, ninyi nyote mlio wapole wa dunia, ambao mmetenda uamuzi Wake wa hukumu. Utafuteni uadilifu, utafuteni upole. Huenda mkafichwa katika siku ya hasira ya Yehova.”

Rom. 10:13: “Kila mtu anayeliitia jina la Yehova ataokolewa.”

Zab. 37:34: “Mtumaini Yehova na kuishika njia yake, naye atakuinua uimiliki dunia. Watu waovu watakapokatiliwa mbali, wewe utaona hilo.”

Yoh. 3:16: “Mungu . . . akamtoa Mwana wake mzaliwa-pekee, ili kila mtu anayemwamini asiangamizwe bali awe na uzima wa milele.”

Ufu. 7:9, 10, 14: “Nikaona, na, tazama! umati mkubwa, ambao hakuna mtu aliyeweza kuuhesabu, kutoka mataifa yote na makabila na vikundi vya watu na lugha, wamesimama mbele ya kiti cha ufalme na mbele ya Mwana-Kondoo, wamevikwa kanzu nyeupe; na kulikuwa na matawi ya mitende mikononi mwao. Nao wanaendelea kupaaza sauti kubwa, wakisema: ‘Wokovu unatoka kwa Mungu wetu, anayeketi juu ya kiti cha ufalme, na Mwana-Kondoo.’ . . . ‘Hawa ndio wale wanaotoka katika ile dhiki kuu.’”

Ni nini kitakachowapata watoto wachanga kwenye Har–Magedoni?

Biblia haijibu swali hilo moja kwa moja, wala sisi si waamuzi. Hata hivyo, Biblia inaonyesha kwamba Mungu anawaona watoto wachanga wa Wakristo wa kweli kuwa “watakatifu.” (1 Kor. 7:14) Inafunua pia kwamba katika nyakati za zamani Mungu alipowaharibu waovu aliwaharibu watoto wao pia. (Hes. 16:27, 32; Eze. 9:6) Mungu hataki mtu yeyote aharibiwe, hivyo anafanya onyo litolewe sasa ili kunufaisha wazazi na watoto pia. Je, halingekuwa jambo la hekima kwa wazazi kuishi maisha ambayo yatawafanya watoto wao wapate kibali cha Mungu sasa na wakati wa Har–Magedoni?

Je, kuharibiwa kwa waovu kunaonyesha kwamba Mungu hana upendo?

2 Pet. 3:9: “Yehova . . . ni mwenye subira kwenu kwa sababu hataki yeyote aangamizwe bali hutaka wote wafikie toba.”

Luka 18:7, 8: “Je, Mungu hatasababisha haki ifanywe kwa ajili ya watu wake waliochaguliwa ambao wanampaazia sauti mchana na usiku, hata ingawa ana ustahimilivu kwao? Ninawaambia ninyi, Yeye atasababisha watendewe haki upesi?”

2 The. 1:6: “Ni jambo la uadilifu kwa upande wa Mungu kuwalipa dhiki wale wanaowafanyia ninyi [watumishi wake] dhiki.”

Je, inawezekana kutounga mkono upande wowote?

2 The. 1:8: “Anapoleta kisasi juu ya wale wasiomjua Mungu [kwa kuchagua] na wale wasiotii habari njema juu ya Bwana wetu Yesu.”

Mt. 24:37-39: “Kama vile siku za Noa zilivyokuwa . . . hawakujali mpaka gharika ikaja na kuwafagilia mbali wote, ndivyo kuwapo kwa Mwana wa binadamu kutakavyokuwa.”

Mt. 12:30: “Yeye asiyekuwa upande wangu ananipinga, naye asiyekusanya pamoja nami anatawanya.”

Linganisha na Kumbukumbu la Torati 30:19, 20.

Ni nani anayeyachochea mataifa kwenye hali ya ulimwengu itakayotokeza vita dhidi ya Mungu?

Ufu. 16:13, 14; 12:9: “Nikaona maneno machafu matatu yaliyoongozwa na roho ambayo yalionekana kama vyura yakitoka katika kinywa cha yule joka mkubwa [Shetani Ibilisi; Ufu. 12:9] na kutoka katika kinywa cha yule mnyama-mwitu na kutoka katika kinywa cha yule nabii wa uwongo. Hayo, kwa kweli, ni maneno yanayoongozwa na roho waovu nayo yanafanya ishara, nayo yanakwenda kwa wafalme wa dunia nzima inayokaliwa, ili kuwakusanya pamoja kwa vita vya ile siku kuu ya Mungu Mweza-Yote.”

Linganisha na Luka 4:5, 6; 1 Yohana 5:19; pia Matendo 5:38, 39; 2 Mambo ya Nyakati 32:1, 16, 17.