Babuloni Mkubwa​—Kuuawa Kwake

“Juu ya kipaji cha uso wake paliandikiwa jina, fumbo: ‘Babuloni Mkubwa, mama ya makahaba na ya vitu vya kunyarafisha vya dunia.’” “Katika siku moja tauni zake zitakuja, kifo na ombolezo na njaa kuu, na yeye atachomwa kabisa kwa moto, kwa sababu Yehova Mungu, ambaye alihukumu yeye, ni imara sana.”​—Ufunuo 17:5; 18:8, NW.

SISI tuna haki ya kushangaa juu ya maneno hayo yaliyoandikwa na mtume Yohana katika karne ya kwanza ya Wakati wa Kawaida wetu. Ni nani huyu ‘mama ya makahaba’? Ni jinsi gani amemuudhi Mungu sana hata apaswe kumhukumu vikali hivyo? Hakuna shaka kwamba hukumu za Mungu dhidi ya kahaba huyo wa kifumbo Babuloni Mkubwa zina uharibifu mkubwa. Na hakika hii inatupa sisi sababu ya kujua ni nani huyu kahaba na jinsi mwisho wake utakavyotuathiri.​—Ufunuo 18:21.

Babuloni Mkubwa anafananisha nani au nini? Biblia inasema kwamba watawala wa ulimwengu wamefanya naye uasherati na kwamba wafanya biashara wameuziana naye. (Ufunuo 18:3) Kwa hiyo, hawezi kuwa anawakilisha siasa au biashara kubwa. Lakini hiyo inaibakiza sehemu ya tatu tu iliyo na nguvu nyingi ulimwenguni iwe ndiyo yenye kupewa cheo hicho ‘mama wa makahaba.’ Kahaba huyo si mwingine ila milki ya ulimwengu wa Shetani ya dini bandia!a

Sasa yanabakia maswali haya: Ni kwa sababu gani, jinsi gani, na wakati gani Babuloni Mkubwa atauawa? Au kwa kuuliza kihalisi: Ni kwa sababu gani, jinsi gani, na wakati gani dini bandia itatoweka kwenye dunia hii?

Kumbukumbu la Matendo Yasiyo ya Kikristo ya Jumuiya ya Wakristo

Tunapofikiria kumbukumbu la matendo ya dini bandia, huenda hata tukakumbuka tamko hili la kale la kiunabii: “Wao hupanda upepo, nao watavuna tufani.” (Hosea 8:7) Hii inakubaliana na kanuni iliyotajwa na Paulo mtume Mkristo: “Msidanganyike, Mungu hadhihakiwi; kwa kuwa cho chote apandacho mtu, ndicho atakachovuna.” (Wagalatia 6:7) Hivyo, dini bandia imepanda nini ulimwenguni pote? Nayo itavuna nini?

Yesu Kristo alifundisha kwamba wafuasi wake wanapaswa kupenda si jirani zao tu, bali pia adui zao. (Mathayo 5:43, 44) Akitaja maneno ya Maandiko ya Kiebrania, Paulo alieleza wazi jinsi Wakristo wanavyopaswa kutendea adui zao. Alisema: “Adui yako akiwa na njaa, mlishe; akiwa na kiu, mnyweshe; maana ufanyapo hivyo, utampalia makaa ya moto kichwani pake. Usishindwe na ubaya, bali uushinde ubaya kwa wema.”​—Warumi 12:20, 21.

Hata hivyo, historia ya dini za Jumuiya ya Wakristo ni ya chuki na umwagaji damu. Mapigano matakatifu ya kale na ya ki-siku-hizi yenye kuhusisha ndani kupora vitu, kunyang’anya watu mali zao, na kuwaua yamebarikiwa na kuachiliwa tu. Kwa kielelezo, unyang’anyi wa mali za Abisinia uliofanywa na Italia ya Ufashisti (1935) na “pigano takatifu” la Franco katika Vita ya Kihispania ya Wenyewe kwa Wenyewe (1936-39) ulibarikiwa na waheshimiwa wa Kanisa Katoliki.

Tofauti zenye kuwako kati ya wanatheolojia zimemalizwa kwa kuchoma watu kwenye mti. Mtafsiri wa Biblia William Tyndale alinyongwa kwenye mti na mwili wake ukachomwa katika 1536, baada ya yeye kutangaza chapa ya tafsiri yake ya “Agano Jipya” katika Kiingereza. Mapema kidogo, kwa amri ya Papa Martin 5, wanadini wenye mamlaka, kwa kuongozwa na roho ya kulipiza kisasi, walichimbua mifupa ya mtafsiri wa Biblia Wycliffe miaka 44 baada ya kifo chake ili waone raha ya kuichoma. Wakati wa lile Baraza la Kikatoliki la Kuhukumu Wazushi wa Kidini, maelfu ya Wayahudi na “wazusha-fitina” walinyang’anywa mali zao, wakateswa-teswa, na kuchomwa kwenye mti​—yote hayo yakisemwa eti yanafanywa kwa jina la Kristo! Michael Servetus aliye mwanatheolojia Mhispania, ambaye alinyanyaswa na Wakatoliki Waroma na Waprotestanti hali kadhalika, alichomwa kwenye mti kwa maagizo ya Mprotestanti John Calvin. Katika vile vita vya ulimwengu viwili vya karne hii, majeshi yamebarikiwa na makasisi “Wakristo,” na askari wamehimizwa kuua na makasisi wa jeshini wenye utukuzo wa taifa.

Ni tofauti kama nini na Ukristo wa kweli! Mtume Paulo aliandika hivi: “Kwa kuwa mmekuwa wateule wa Mungu, watakatifu wapendwao, jivikeni moyo wa rehema, utu wema, unyenyekevu, upole, uvumilivu, mkichukuliana, na kusameheana, mtu akiwa na sababu ya kumlaumu mwenzake; kama Bwana alivyowasamehe ninyi, vivyo na ninyi. Zaidi ya hayo yote jivikeni upendo, ndio kifungo cha ukamilifu.”​—Wakolosai 3:12-14.

Kwa Wakristo katika Roma, Paulo aliandika hivi: “Msimlipe mtu ovu kwa ovu. Angalieni yaliyo mema machoni pa watu wote. Kama yamkini, kwa upande wenu, mkae katika amani na watu wote. Wapenzi, msijilipize kisasi, bali ipisheni ghadhabu ya Mungu; maana imeandikwa, Kisasi ni juu yangu mimi; mimi nitalipa, anena Bwana [Yehova, NW].” (Warumi 12:17-19) Basi, kulingana na kanuni za Kikristo, Jumuiya ya Wakristo imeshindwa kutimiza wajibu. Imepanda chuki na unafiki na itavuna uharibifu.

Dini Zisizo za Kikristo​—Kumbukumbu la Matendo Yazo

Lakini Babuloni Mkubwa ni zaidi ya dini za Jumuiya ya Wakristo tu. Dini zote kubwa-kubwa za ulimwengu huu zinashiriki hatia ya damu ya huyo kahaba mwenye sifa mbaya sana. Kwa kielelezo, dini ya Shinto ya Japani lazima ichukue sehemu ya lawama la fikira ya kishupavu na ukatili wa kinyama ulioonyeshwa na jeshi la Wajapani katika Vita ya Ulimwengu 2. Mwanahistoria Paul Johnson anashikilia kwamba “ili wajiimarishe wenyewe katika ulimwengu usio na huruma, wenye mashindano” unaotawalwa na viwango vya mwenendo wa Wazungu, wao waliona ikihitajika kabisa kuvumbua “dini ya serikali na adili yenye kutawala, yenye kujulikana kuwa Shinto na bushido [“njia ya shujaa wa kivita”]. . . . Ibada ya kumwabudu mmaliki wa ukawaida ilianzishwa, hasa katika majeshi yenye silaha, na kuanzia miaka ya 1920 na kuendelea kanuni za kitaifa kuhusu mienendo inayofaa, kokumin dotoku, zikafundishwa katika shule zote.” Tokeo lilikuwa nini? Kufikia 1941, wakati Japani ilipoangusha makombora juu ya Pearl Harbor na hivyo ikaingia katika Vita ya Ulimwengu 2, “Shinto . . . iligeuzwa ikaacha kuwa kidhehebu kisichoerevuka, kikuukuu na cha wachache, ikafanywa serikali ya ki-siku-hizi yenye utawala wa jumla, na kwa hiyo kwa kinyume chenye ajabu ya kuchukiza, dini, ambayo ingalipaswa kutumika kukinza mabaya makubwa sana ya kilimwengu katika enzi hiyo, ilitumiwa kuyatakasa.”

Kuhusu mgawanyo wa India katika 1947, ambamo kisababishi kimoja kilikuwa tofauti za kidini, mwanahistoria Johnson anasema hivi: “Watu kama milioni 5 hadi 6 walikimbia waponye uhai wao wakielekea kila upande. . . . Makadirio kuhusu waliokufa wakati huo yalianzia milioni 1 hadi 2. Hesabu za ki-siku-hizi zaidi zinaanzia 200,000 hadi 600,000.” Mpaka leo hii, uuaji na matendo ya kushushia watu heshima yanatukia katika jamii ya Wahindu kwa kuchochewa na dini. Mara nyingi Waharija, au watupwa-nje ambao hapo kwanza waliitwa wasiogusika, huuawa na magenge ya wauaji yenye kutengenezwa na wenye mashamba walio matajiri.

Uhindu umefungamana na mazoea ya kuwasiliana na roho waovu. (Ufunuo 18:23) Mwandikaji Mhindi Sudhir Kakar ananena juu ya “msisimuko wa Mhindu wa wastani na staha yake kuhusu ajabu za kimafumbo na wenye kuzizoelea” kisha anaongezea hivi: “Wanajimu, watabiria nasibu, wenye kuona mambo yanayotendeka mbali wakiwa pia kama wasadhu [wanaume “watakatifu” wenye kujinyima sana rahaj, wafakiri [Waombaji wanaofanya mizungu ya kustaajabisha] na wanadamu wengine walio na nguvu za kimungu huheshimiwa sana kwa maana wanafikiriwa kuwa wanapashana habari kwa usiri pamoja na aliye juu zaidi.”​—India Today, Aprili 30, 1988.

Kwa kuongezea, kuna mapigano ya daima miongoni mwa Wahindu, Wakalasinga, na dini nyingine za Mashariki. Kwenye mapigano hayo, kila dini inaongezea ushiriki wayo wa chuki, magomvi, na uuaji. Hiyo ni sehemu nyingine moja tu ya tunda la Babuloni Mkubwa.

Zaidi ya hilo, historia ya ki-siku-hizi yenye vita, mauaji, na ukandamizaji haina mengi ya kupendekeza dini ya Wayahudi. Jeuri inayodhihirishwa nyakati nyingine na washiriki wa farakano la Kihasidi la dini ya Wayahudi kuelekea wafuasi wa mafarakano mengine ya Kiyahudi na wa dini zisizo za Kiyahudi hazilipendekezi kamwe machoni pa Mungu.

Tunapojifunza historia ya milki ya ulimwenguni pote ya dini, tunaweza kuona kwa urahisi ni kwa sababu gani yule Hakimu Mkuu Zaidi ana msingi wa kuua Babuloni Mkubwa. “Ndiyo, katika yeye ilipatikana damu ya wanabii na ya watakatifu na ya wale wote ambao wamechinjwa juu ya dunia.” (Ufunuo 18:24, NW) Ushiriki wa dini bandia katika vita vya kimajimbo na vya ulimwengu umeifanya iwe na hatia machoni pa Mungu kuhusu damu ya “wale wote ambao wamechinjwa juu ya dunia.”

Kulingana na shtaka la kisheria ambalo Biblia inatoa, Babuloni Mkubwa amehukumiwa kustahili uharibifu kwa sababu ya kumbukumbu lake la matendo ya uasherati wa kiroho pamoja na watawala wa ulimwengu, hatia yake ya damu katika vita, na mazoea yake ya kuwasiliana na roho waovu. Kwa hiyo, Yehova Mungu amefanya uamuzi wa kuhukumu kwamba ni lazima milki ya ulimwengu ya dini bandia ikomeshwe kabisa.​—Ufunuo 18:3, 23, 24.

Jinsi Dini Bandia Itakavyotoweka

Kwa usemi wenye ufananishi mwingi, kitabu cha Ufunuo kinaeleza juu ya uharibifu wa Babuloni Mkubwa. Kwenye Ufunuo 17:16, NW, tunasoma hivi: “Pembe kumi ambazo wewe uliona, na hayawani-mwitu, hizi zitachukia kahaba na zitafanya yeye kuwa mwenye kuteketezwa na mwenye uchi, na zitakula kabisa sehemu zake zenye mnofu na zitachoma yeye kabisa kabisa kwa moto.” Hizo “pembe kumi” zinafananisha serikali zote za kisiasa zilizopo sasa ulimwenguni na ambazo zinaunga mkono Umoja wa Mataifa, yule “hayawani-mwitu rangi-nyekundu-nyangavu,” yeye mwenyewe akiwa ni sanamu ya mfumo wa kisiasa wa Ibilisi ambao umetiwa madoa ya damu.​—Ufunuo 16:2; 17:3, NW.b

Kulingana na unabii wa Biblia, serikali za kisiasa zinazoshirikiana na Umoja wa Mataifa zitageuka dhidi ya milki ya ulimwengu ya dini bandia na kuiteketeza. Dini bandia zote zitaathiriwa. Mifumo fulani ya kisiasa imekwisha kuonyesha ukosefu wayo wa subira kuhusu kujiingiza kwa dini bandia katika mambo ya kisiasa na ya kijamii. Nchi fulani za kisoshalisti zimechukua msimamo wa kuunga mkono imani ya kwamba hakuna Mungu na zimeifanya dini iwe kama si kitu, kama vile katika Albania, au zikaifanya kama mjakazi mwenye kufanya lolote analoagizwa, kama vile katika Urusi na China. Kwingineko, watawala wa kisiasa wanaonyesha uchukizo mkali kuhusu ile theolojia ya ukombozi inayofuatwa na mapadri fulani Wakatoliki katika nchi zilizo maskini zaidi. Hata hivyo nchi nyingine zinakandamiza dini zinazojihusisha katika mambo ya ubaguzi wa rangi. Hata katika nchi zinazoitwa zenye hiari nyingi eti, wanasiasa fulani wanachukizwa na kujiingiza-ingiza kwa makasisi katika siasa na masuala ya kijamii.

Inabakia kuonwa ni masuala gani zaidi yatachochea sehemu za kisiasa ulimwenguni pote zichukue hatua dhidi ya dini bandia. Lakini jambo moja ni hakika​—kuuawa kwa Babuloni Mkubwa na sehemu hizi kutakuwa si mapenzi yao tu bali pia mapenzi ya Mungu. Ufunuo 17:17, NW, unataarifu hivi: “Mungu alitia ndani ya mioyo yao kufikiliza fikira yake, hata kufikiliza fikira yao moja kwa kumpa ufalme wao hayawani-mwitu, mpaka hapo maneno ya Mungu yatakuwa yametimilizwa.”​—Linganisha Yeremia 51:12, 13.

Usikosee. Kuuawa kwa Babuloni Mkubwa hakutakuwa wonyesho wa uadui wa kisiasa tu kuelekea unyeti na ujidukizi wa kidini. Watawala wa kisiasa watakuwa vyombo vitakavyomfanyia Mungu kazi ya kuharibu ibada bandia ulimwenguni pote bila kujua kwamba vinamfanyia yeye hivyo. Ndiyo, “Mungu amekumbuka matendo yake yasiyo ya haki.”​—Ufunuo 18:5, NW.

Yehova ameamrisha kwamba ni lazima dini bandia yenye kiburi inyenyekezwe. Unabii unataarifu hivi: “Kwa kadiri ambayo yeye alijitukuza mwenyewe na akaishi katika anasa ya kutoona aibu, kwa kadiri hiyo mpe yeye teso na ombolezo. Kwa maana katika moyo wake yeye hufuliza kusema, ‘Mimi naketi nikiwa malkia, na mimi si mjane, na mimi sitaona kamwe ombolezo.’ Hiyo ndiyo sababu katika siku moja tauni zake zitakuja, kifo na ombolezo na njaa kuu, na yeye atachomwa kabisa kwa moto, kwa sababu Yehova Mungu, ambaye alihukumu yeye, ni imara sana.”​—Ufunuo 18:7, 8, NW.

Kuuawa Wakati Gani?

Hiyo “siku moja,” au wakati mfupi wa kuuawa haraka sana, sasa u karibu. Kwa uhakika, uharibifu wa Babuloni Mkubwa unaileta upesi “siku ya kisasi cha Mungu wetu.” (Isaya 61:2) Baada ya hapo, vita yenye haki ya Mungu ya Har–Magedoni itatufikilia. Ushuhuda wote wa matukio ya ulimwengu tangu 1914 unaonyesha kwamba wakati unaishia mfumo wa mambo ya Shetani. Kwa hiyo, utawala wa Ufalme wa Mungu u karibu.​—Luka 21:32-36; Ufunuo 16:14-16.

Waabudu wa kweli watatendaje kuhusu uharibifu wa Babuloni Mkubwa? Ufunuo unasema: “Uwe na nderemo juu yake, , O mbingu, pia nyinyi watakatifu na nyinyi mitume na nyinyi wanabii, kwa sababu kwa hukumu Mungu ametoza adhabu kutoka kwake yeye kwa ajili ya nyinyi!” (Ufunuo 18:20, NW) Kutakuwa na ushangilio wa ulimwengu wote mzima wakati kusudi la Yehova linapotekelezwa na wakati jina lake linapotakaswa. Unabii unataarifu hivi: “Baada ya vitu hivi mimi nikasikia kilichokuwa kama sauti kubwa ya umati mkubwa katika mbingu. Wao walisema: ‘Sifuni Yah, enyi watu! Wokovu na utukufu na nguvu ni za Mungu wetu; kwa sababu hukumu zake ni za kweli na za uadilifu. Kwa maana yeye ametekeleza hukumu juu ya kahaba mkubwa ambaye alifisidi dunia kwa uasherati wake, na yeye amelipiza kisasi cha damu ya watumwa wake katika mkono wake.”​—Ufunuo 19:1, 2, NW.

Kuteketezwa kwa Babuloni Mkubwa, ambako kutafuatwa na kuuawa na Mungu kwa sehemu zilizobaki za mfumo wa Shetani, kutamaanisha baraka zisizo na mwisho kwa waabudu wa kweli wa Mungu, kutia na wengi ambao watafufuliwa hapa duniani. Kama vile Yesu alivyowaahidi wote hao: “Ninyi mkikaa katika neno langu, mmekuwa wanafunzi wangu kweli kweli; tena mtaifahamu kweli, nayo hiyo kweli itawaweka huru.”​—Yohana 8: 31, 32; Ufunuo 19:11-21.

Waabudu wa kweli tayari wako huru na mafundisho ya dini bandia ambayo yamekufuru Mungu muda wa enzi zote. Katika ulimwengu mpya wenye uadilifu ulioahidiwa, wao watakuwa huru kuishi bila hofu ya kifo, kwa maana “Mungu mwenyewe atakuwa pamoja nao. Naye atafuta kila chozi katika macho yao, wala mauti haitakuwapo tena; wala maombolezo, wala kilio, wala maumivu hayatakuwapo tena; kwa kuwa mambo ya kwanza yamekwisha kupita.” (Ufunuo 21:3, 4) Mambo ya kwanza ambayo yatakuwa yamepita yatakuwa ni kutia ndani Babuloni Mkubwa, milki ya ulimwengu ya Shetani ya dini bandia.

[Maelezo wa Chini]

[Blabu katika ukurasa wa 5]

“Kwa kinyume chenye ajabu ya kuchukiza, dini, ambayo ingalipaswa kutumika kukinza mabaya makubwa sana ya kilimwengu katika enzi hiyo, ilitumiwa kuyatakasa”

[Picha katika ukurasa wa 4]

Wycliffe na Tyndale walinyanyaswa kwa kutafsiri Biblia

[Hisani]

Kutoka maandishi ya kale yaliyonakshiwa katika Bibliotheque Nationale