Kondoo Wengine na Agano Jipya

“Wageni . . . kila aishikaye sabato asiivunje, na kulishika sana agano langu; nitawaleta hao nao hata mlima wangu mtakatifu.”—ISAYA 56:6, 7.

1. (a) Kulingana na ono la Yohana, nini hutimizwa huku pepo za hukumu ya Yehova zikizuiwa? (b) Yohana aliona umati upi wenye kutokeza?

KATIKA ono la nne kwenye kitabu cha Ufunuo, mtume Yohana aliona pepo zenye kuharibu za hukumu ya Yehova zimezuiwa huku kutiwa muhuri kwa washiriki wote wa “Israeli wa Mungu” kukikamilishwa. Hao ndio wa kwanza kubarikiwa kupitia Yesu, sehemu iliyo kuu ya mbegu ya Abrahamu. (Wagalatia 6:16; Mwanzo 22:18; Ufunuo 7:1-4) Katika ono hilohilo, Yohana aliona “umati mkubwa, ambao hakuna mtu aliyeweza kuuhesabu, kutoka katika mataifa yote na makabila na vikundi vya watu na lugha . . . , [waki]lia kwa sauti kubwa, wakisema: ‘Sisi tunawiwa wokovu na Mungu wetu, aketiye juu ya hicho kiti cha ufalme, na kwa Mwana-Kondoo.’” (Ufunuo 7:9, 10) Katika kusema, ‘Sisi tunawiwa wokovu na Mwana-Kondoo,’ umati mkubwa waonyesha kwamba wao pia hubarikiwa kwa njia ya Mbegu ya Abrahamu.

2. Umati mkubwa ulitokea wakati gani, na huo watambulishwaje?

² Umati huo mkubwa ulitambuliwa huko nyuma mwaka wa 1935, na leo idadi yake ni watu zaidi ya milioni tano. Ukiwa umeteuliwa kuokoka dhiki kubwa, washiriki wake watawekwa kando kwa ajili ya uhai udumuo milele Yesu agawanyapo “kondoo” na “mbuzi.” Wakristo wa umati mkubwa wamo miongoni mwa “kondoo wengine” katika kielezi cha Yesu cha mazizi ya kondoo. Wao hutumaini kuishi milele katika dunia iliyo paradiso.—Mathayo 25:31-46; Yohana 10:16; Ufunuo 21:3, 4.

3. Wakristo watiwa-mafuta na kondoo wengine hutofautianaje kuhusiana na agano jipya?

³ Kwa wale 144,000, baraka ya agano la Kiabrahamu hutekelezwa kupitia agano jipya. Wakiwa washiriki katika agano hilo, wao huja “chini ya fadhili isiyostahiliwa” na “chini ya sheria kuelekea Kristo.” (Waroma 6:15; 1 Wakorintho 9:21) Kwa sababu hiyo, wale washiriki 144,000 wa Israeli wa Mungu ndio pekee ambao wameshiriki mifano ifaavyo wakati wa Ukumbusho wa kifo cha Yesu, na Yesu alifanya agano lake kwa ajili ya Ufalme pamoja nao pekee. (Luka 22:19, 20, 29) Washiriki wa umati mkubwa si washiriki katika agano jipya. Hata hivyo, wao hushirikiana na Israeli wa Mungu na huishi pamoja nao katika “nchi” yao. (Isaya 66:8) Kwa hiyo ni jambo la akili kusema kwamba wao pia huja chini ya fadhili isiyostahiliwa ya Yehova na chini ya sheria kuelekea Kristo. Ingawa si washiriki katika agano jipya, wao hunufaika nalo.

“Wageni” na “Israeli wa Mungu”

4, 5. (a) Kulingana na Isaya ni kikundi kipi ambacho kingemhudumu Yehova? (b) Isaya 56:6, 7 hutimizwaje juu ya umati mkubwa?

⁴ Nabii Isaya aliandika hivi: “Wageni, walioandamana na BWANA ili wamhudumu, na kulipenda jina la BWANA, kuwa watumishi wake; kila aishikaye sabato asiivunje, na kulishika sana agano langu; nitawaleta hao nao hata mlima wangu mtakatifu, na kuwafurahisha katika nyumba yangu ya sala; makafara yao na dhabihu zao zitakubaliwa juu ya madhabahu zangu.” (Isaya 56:6, 7) Katika Israeli, hili lilimaanisha kwamba “wageni,” watu wasio Waisraeli, wangemwabudu Yehova—wakilipenda jina lake, wakitii masharti ya agano la Sheria, wakishika Sabato, na kutoa dhabihu kwenye hekalu, “nyumba ya sala” ya Mungu.—Mathayo 21:13.

⁵ Katika siku yetu, ‘wageni ambao wameandamana na BWANA’ ni ule umati mkubwa. Hao humhudumu Yehova kwa ushirikiano na Israeli wa Mungu. (Zekaria 8:23) Wao hutoa dhabihu zilezile zenye kukubalika watoazo Israeli wa Mungu. (Waebrania 13:15, 16) Wao huabudu katika hekalu la Mungu la kiroho, “nyumba [yake] ya sala.” (Linganisha Ufunuo 7:15.) Je, wao hushika Sabato ya kila juma? Wala watiwa-mafuta wala kondoo wengine hawaamuriwi kufanya hivyo. (Wakolosai 2:16, 17) Hata hivyo, Paulo aliwaambia Wakristo watiwa-mafuta Waebrania hivi: “Kumebaki pumziko la sabato kwa watu wa Mungu. Kwa maana mtu ambaye ameingia ndani ya pumziko la Mungu amepumzika pia mwenyewe kutokana na kazi zake mwenyewe, kama vile Mungu alivyofanya kutokana na zake mwenyewe.” (Waebrania 4:9, 10) Waebrania hao waliingia katika “pumziko la sabato” walipojitiisha kwa “uadilifu wa Mungu” na kupumzika kutoka hali ya kujaribu kujitetea kwa kazi za Sheria. (Waroma 10:3, 4) Wakristo watiwa-mafuta Wasio Wayahudi huonea shangwe pumziko lilelile kwa kujitiisha kwa uadilifu wa Yehova. Umati mkubwa hujiunga nao katika pumziko hilo.

6. Kondoo wengine leo hujiwekaje chini ya agano jipya?

⁶ Zaidi, kondoo wengine hujiweka chini ya agano jipya kama vile wageni wa zamani walivyojiweka chini ya agano la Sheria. Katika njia gani? Si kwa kuwa washiriki katika hilo bali kwa kujinyenyekeza kwa sheria zinazoshirikishwa nalo na kunufaika kutokana na mipango yake. (Linganisha Yeremia 31:33, 34.) Kama waandamani wao watiwa-mafuta, kondoo wengine wana sheria ya Yehova ikiwa imeandikwa ‘katika moyo wao.’ Wao huzipenda sana na kuzitii amri na kanuni za Yehova. (Zaburi 37:31; 119:97) Kama Wakristo watiwa-mafuta, wao wamjua Yehova. (Yohana 17:3) Vipi juu ya tohara? Miaka ipatayo 1,500 kabla ya kufanywa kwa agano jipya, Musa aliwahimiza Waisraeli hivi: “Zitahirini govi za mioyo yenu.” (Kumbukumbu la Torati 10:16; Yeremia 4:4) Ingawa tohara ya kimwili ya lazima ilipitilia mbali pamoja na Sheria, watiwa-mafuta na pia kondoo wengine lazima ‘watahiri’ mioyo yao. (Wakolosai 2:11) Mwishowe, Yehova husamehe kosa la kondoo wengine kwa msingi wa “damu [ya Yesu] ya agano” iliyomwagwa. (Mathayo 26:28; 1 Yohana 1:9; 2:2) Mungu hawafanyi kuwa wana wa kiroho, kama vile ambavyo huwafanya wale 144,000. Lakini yeye huwatangaza kondoo wengine kuwa waadilifu, katika maana ambayo Abrahamu alitangazwa kuwa mwadilifu akiwa rafiki ya Mungu.—Mathayo 25:46; Waroma 4:2, 3; Yakobo 2:23.

7. Ni tazamio gani liwezekanalo kwa ajili ya kondoo wengine leo, ambao hutangazwa kuwa waadilifu kama vile Abrahamu?

⁷ Kwa wale 144,000, kutangazwa kuwa waadilifu huwafungulia njia kulikubali tumaini la kutawala na Yesu katika Ufalme wa kimbingu. (Waroma 8:16, 17; Wagalatia 2:16) Kwa kondoo wengine, kutangazwa kuwa waadilifu wakiwa rafiki za Mungu huwawezesha kuwa na tumaini la uhai udumuo milele katika dunia iliyo paradiso—ama kwa kuokoka Har–Magedoni wakiwa sehemu ya umati mkubwa ama kupitia “ufufuo wa waadilifu.” (Matendo 24:15) Ni pendeleo lililoje kuwa na tumaini la namna hiyo na kuwa rafiki ya Mwenye Enzi Kuu ya ulimwengu wote mzima, kuwa “mgeni-mwalikwa katika hema [lake]”! (Zaburi 15:1, 2, NW) Ndiyo, watiwa-mafuta na kondoo wengine hubarikiwa katika njia ya ajabu kupitia Yesu, Mbegu ya Abrahamu.

Siku ya Kufunika Iliyo Kubwa Zaidi

8. Ni nini kilichofananishwa kimbele na dhabihu za Siku ya Kufunika chini ya Sheria?

⁸ Alipokuwa akizungumzia agano jipya, Paulo aliwakumbusha wasomaji wake kuhusu Siku ya Kufunika ya kila mwaka chini ya agano la Sheria. Siku hiyo, dhabihu tofauti zilitolewa—moja kwa ajili ya kabila la kikuhani la Lawi na ile nyingine kwa ajili ya makabila 12 yasiyo ya kikuhani. Kwa muda mrefu jambo hilo limeelezwa kuwa likifananisha kimbele dhabihu kubwa ya Yesu ambayo ingewanufaisha wale 144,000 walio na tumaini la kimbingu na pia yale mamilioni ya watu walio na tumaini la kidunia.a Paulo alionyesha kwamba katika huo utimizo manufaa za dhabihu ya Yesu zatekelezwa kupitia Siku ya Kufunika iliyo kubwa zaidi chini ya agano jipya. Akiwa Kuhani wa Cheo cha Juu wa siku hiyo kubwa zaidi, Yesu alitoa uhai wake mkamilifu ukiwa dhabihu ya kufunika ili kupata “ukombozi udumuo milele” kwa ajili ya wanadamu.—Waebrania 9:11-24.

9. Wakiwa katika agano jipya, Wakristo watiwa-mafuta Waebrania wangeweza kupokea nini?

⁹ Wakristo Waebrania wengi wa karne ya kwanza walikuwa bado “wenye bidii kuhusu Sheria [ya Kimusa].” (Matendo 21:20) Kwa kufaa, basi, Paulo aliwakumbusha hivi: “[Yesu] ni mpatanishi wa agano jipya, ili, kwa sababu kifo kimetukia kwa ajili ya kuachiliwa kwao kwa njia ya fidia kutoka kwenye mikiuko-sheria chini ya agano la kwanza, wale ambao wameitwa wapate kuipokea ahadi ya urithi udumuo milele.” (Waebrania 9:15) Hilo agano jipya liliwaweka Wakristo Waebrania huru na lile agano la zamani, lililofichua hali yao yenye dhambi. Kwa sababu ya hilo agano jipya, wangeweza kupokea “ahadi ya urithi [wa kimbingu] udumuo milele.”

10. Ni kwa sababu gani watiwa-mafuta na kondoo wengine humshukuru Mungu?

¹⁰ “Kila mtu” ambaye “hudhihirisha imani katika Mwana” atanufaika kutokana na dhabihu ya fidia. (Yohana 3:16, 36) Paulo alisema hivi: “Kristo [alitolewa] mara moja kwa wakati wote ili kuchukua dhambi za wengi; na mara ya pili aonekanapo itakuwa bila dhambi na kwa wale wanaomtazamia kwa bidii itakuwa kwa ajili ya wokovu wao.” (Waebrania 9:28) Leo, wanaomtafuta Yesu kwa bidii hutia ndani Wakristo watiwa-mafuta wa Israeli wa Mungu ambao wako hai na mamilioni ya watu wanaofanyiza umati mkubwa, ambao pia wana urithi udumuo milele. Jamii zote mbili humshukuru Mungu kwa sababu ya hilo agano jipya na kwa sababu ya baraka zenye kutoa uhai zishirikishwazo nalo, kutia na Siku ya Kufunika iliyo kubwa zaidi na huduma ya Kuhani Mkuu, Yesu, katika Patakatifu Zaidi pa kimbingu.

Shughuli Nyingi Katika Utumishi Mtakatifu

11. Wakiwa na dhamiri zilizosafishwa kupitia dhabihu ya Yesu, watiwa-mafuta na kondoo wengine hufanya nini kwa furaha?

¹¹ Katika barua yake kwa Waebrania, Paulo alikazia thamani iliyo bora zaidi ya dhabihu ya Yesu katika mpango wa agano jipya ikilinganishwa na matoleo ya dhambi chini ya agano la zamani. (Waebrania 9:13-15) Dhabihu ya Yesu iliyo bora yaweza “[kutu]safisha dhamiri zetu kutoka kazi zilizokufa ili tupate kutoa utumishi mtakatifu kwa Mungu aliye hai.” Kwa Wakristo Waebrania, “kazi zilizokufa” zilitia ndani “mikiuko-sheria chini ya agano la kwanza.” Kwa Wakristo leo, hizo zatia ndani dhambi zilizofanywa wakati uliopita ambazo juu yazo kumekuwa na toba ya kweli na ambazo Mungu amesamehe. (1 Wakorintho 6:9-11) Wakiwa na dhamiri zilizosafishwa, Wakristo watiwa-mafuta hutoa “utumishi mtakatifu kwa Mungu aliye hai.” Na hivyo ndivyo umati mkubwa ufanyavyo. Wakiwa wamesafisha dhamiri zao kupitia “damu ya Mwana-Kondoo,” wako katika hekalu kubwa la Mungu la kiroho, “wa[ki]mtolea utumishi mtakatifu mchana na usiku.”—Ufunuo 7:14, 15.

12. Twaonyeshaje kwamba tuna “uhakikisho kamili wa imani”?

¹² Kwa kuongezea, Paulo alisema hivi: “Acheni tukaribie tukiwa na mioyo ya kweli katika uhakikisho kamili wa imani, mioyo yetu ikiisha kunyunyiziwa kutoka kwenye dhamiri mbovu na miili yetu kuoshwa kwa maji safi.” (Waebrania 10:22) Twaweza kuonyeshaje kwamba tuna “uhakikisho kamili wa imani”? Paulo aliwahimiza Wakristo Waebrania hivi: “Acheni tushike sana tangazo la hadharani la tumaini letu [la kimbingu] bila kuyumbayumba, kwa maana yeye ni mwaminifu aliyeahidi. Na acheni tufikiriane ili kuchocheana kwenye upendo na kazi zilizo bora, si kuachilia mbali kukusanyika pamoja sisi wenyewe, kama vile wengine walivyo na desturi, bali kutiana moyo, na zaidi sana hivyo kwa kadiri mwonavyo siku ikikaribia.” (Waebrania 10:23-25) Ikiwa imani yetu iko hai, sisi pia ‘hatutaachilia mbali kukusanyika pamoja sisi wenyewe.’ Tutapendezwa na kuwachochea ndugu zetu na kuchochewa nao kwenye upendo na kazi zilizo bora na kutiwa nguvu kwa ajili ya ile kazi muhimu ya kutangaza tumaini letu hadharani, liwe ni la kidunia au la kimbingu.—Yohana 13:35.

“Agano Lidumulo Milele”

13, 14. Ni katika njia zipi agano jipya ni lenye kudumu milele?

¹³ Ni nini kitukiacho wale wa mwisho wa 144,000 wapatapo utimizo wa tumaini lao la kimbingu? Je, agano jipya litakoma kutumika? Wakati huo hakutakuwa mshiriki yeyote wa Israeli wa Mungu mwenye kubaki duniani. Washiriki wote katika hilo agano watakuwa pamoja na Yesu “katika ufalme wa Baba [yake].” (Mathayo 26:29) Lakini twakumbuka maneno haya ya Paulo katika barua yake kwa Waebrania: ‘Mungu wa amani alimleta kutoka kwa wafu mchungaji mkubwa wa kondoo kwa damu ya agano lidumulo milele.’ (Waebrania 13:20; Isaya 55:3) Ni katika maana gani agano jipya ni lenye kudumu milele?

¹⁴ Kwanza, tofauti na agano la Sheria, hakuna jingine litakalochukua mahali pake. Pili, matokeo ya utendaji-kazi wake ni yenye kudumu, kama vile umaliki wa Yesu ulivyo. (Linganisha Luka 1:33 na 1 Wakorintho 15:27, 28.) Ufalme wa kimbingu una mahali pa milele katika makusudi ya Yehova. (Ufunuo 22:5) Na tatu, kondoo wengine wataendelea kunufaika na mpango wa agano jipya. Wakati wa Utawala wa Miaka Elfu wa Kristo, wanadamu waaminifu watafuliza ‘kumtolea Yehova utumishi mtakatifu mchana na usiku katika hekalu lake’ kama vile wafanyavyo sasa. Yehova hatakumbuka tena dhambi zao za wakati uliopita zilizosamehewa kwa msingi wa “damu ya [Yesu] ya agano.” Wataendelea kuonea shangwe msimamo mwadilifu wakiwa rafiki za Yehova, na sheria yake itakuwa bado imeandikwa katika mioyo yao.

15. Fafanua uhusiano wa Yehova na waabudu wake wa kidunia katika ulimwengu mpya.

¹⁵ Je, wakati huo Yehova ataweza kusema hivi kuhusu watumishi hawa wa kibinadamu: ‘Mimi ni Mungu wao, nao ni watu wangu’? Ndiyo. “Atakaa pamoja nao, nao watakuwa vikundi vya watu wake. Na Mungu mwenyewe atakuwa pamoja nao.” (Ufunuo 21:3) Watapata kuwa “kambi ya watakatifu,” wawakilishi wa kidunia wa “jiji lenye kupendwa,” bibi-arusi wa kimbingu wa Yesu Kristo. (Ufunuo 14:1; 20:9; 21:2) Hayo yote yatawezekana kwa sababu ya imani yao katika “damu ya [Yesu] ya agano” iliyomwagwa na kwa sababu ya ujitiisho wao kwa wafalme na makuhani wa kimbingu, ambao walipokuwa duniani walikuwa Israeli wa Mungu.—Ufunuo 5:10.

16. (a) Ni uwezekano upi mbalimbali ambao huwangojea wale wafufuliwao duniani? (b) Ni baraka zipi zitakazokuja mwishoni mwa ile miaka elfu?

¹⁶ Vipi wafu wafufuliwao duniani? (Yohana 5:28, 29) Wao pia wataalikwa ‘kujibariki’ kupitia Yesu, Mbegu ya Abrahamu. (Mwanzo 22:18) Wao pia watalazimika kulipenda jina la Yehova, wakimhudumu, wakitoa dhabihu zenye kukubalika, na kutoa utumishi mtakatifu katika nyumba yake ya sala. Wale wafanyao hivyo wataingia katika pumziko la Mungu. (Isaya 56:6, 7) Kufikia mwisho wa miaka elfu moja, watu wote waaminifu watakuwa wameletwa kwenye ukamilifu wa kibinadamu kupitia uhudumiaji wa Yesu Kristo na makuhani wenzake 144,000. Watakuwa waadilifu, sio tu kutangazwa kuwa waadilifu wakiwa rafiki za Mungu. “[Wata]kuja kwenye uhai,” wakiwa huru kabisa bila dhambi na kifo kilichorithiwa kutoka kwa Adamu. (Ufunuo 20:5; 22:2) Hiyo itakuwa baraka iliyoje! Kwa maoni yetu leo, yaonekana kwamba wakati huo kazi ya ukuhani ya Yesu na wale 144,000 itakuwa imetimizwa. Baraka za Siku ya Kufunika iliyo kubwa zaidi zitakuwa zimetumika kikamili. Zaidi, Yesu ‘atakabithi ufalme Mungu wake aliye Baba.’ (1 Wakorintho 15:24) Kutakuwa na mtihani wa mwisho kwa wanadamu, kisha Shetani na roho wake waovu wataharibiwa milele.—Ufunuo 20:7, 10.

17. Kila mmoja wetu apaswa aazimie kufanya nini kwa kufikiria shangwe itungojeayo?

¹⁷ “Agano lidumulo milele” litatimiza fungu jipi, ikiwa kuna fungu lolote, katika muhula wenye kusisimua utakaoanza wakati huo? Hatuwezi kusema juu ya hilo. Yale ambayo Yehova amefunua kufikia sasa yatosha kwa sasa. Hilo latuacha tukiwa tumepigwa butwaa. Ebu fikiria—uhai udumuo milele ukiwa sehemu ya “mbingu mpya na dunia mpya”! (2 Petro 3:13) Chochote na kisidhoofishe tamaa yetu ya kurithi ahadi hiyo. Huenda kusimama imara kusiwe rahisi. Paulo alisema hivi: “Mna uhitaji wa uvumilivu, ili kwamba, baada ya nyinyi kuwa mmefanya mapenzi ya Mungu, mpate kupokea utimizo wa ahadi.” (Waebrania 10:36) Ingawa hivyo, kumbuka kwamba tatizo lolote lipaswalo kushindwa, upinzani wowote upaswao kushindwa, huwa jambo duni sana ulinganishwapo na shangwe ambayo yatungojea. (2 Wakorintho 4:17) Kwa sababu hiyo, yeyote kati yetu na asiwe “namna irudiyo nyuma kwenye uangamivu.” Badala yake, na tujithibitishe kuwa “namna iliyo na imani kuelekea kuhifadhi hai nafsi.” (Waebrania 10:39) Sisi sote na tuwe na itibari kamili katika Yehova, Mungu wa maagano, kwa baraka ya milele ya kila mmoja wetu.

[Maelezo ya Chini]

Je, Ulielewa?

◻ Mbali na Wakristo watiwa-mafuta, ni nani wanaobarikiwa kupitia Mbegu ya Abrahamu?

◻ Katika kubarikiwa kupitia agano jipya, kondoo wengine wakoje kama wageuzwa-imani chini ya agano la zamani?

◻ Kondoo wengine hubarikiwaje kupitia mpango wa Siku ya Kufunika iliyo kubwa zaidi?

◻ Kwa nini Paulo aliliita agano jipya “agano lidumulo milele”?

[Sanduku katika ukurasa wa 21]

Utumishi Mtakatifu Katika Hekalu

Umati mkubwa huabudu pamoja na Wakristo watiwa-mafuta katika ua wa kidunia wa hekalu kubwa la Yehova la kiroho. (Ufunuo 7:14, 15; 11:2) Hakuna sababu ya kukata kauli kwamba wako katika Ua tofauti wa Wasio Wayahudi. Yesu alipokuwa duniani, kulikuwa na Ua wa Wasio Wayahudi katika hekalu. Hata hivyo, katika mipango iliyopuliziwa kimungu ya mahekalu ya Solomoni na Ezekieli, hakukuwa na uandalizi wa Ua wa Wasio Wayahudi. Katika hekalu la Solomoni, palikuwa na ua wa nje ambako Waisraeli na wageuzwa-imani, wanaume kwa wanawake, waliabudu pamoja. Hicho ndicho kiolezo cha kiunabii cha ua wa kidunia wa hekalu la kiroho, ambako Yohana aliona umati mkubwa ukitoa utumishi mtakatifu.

Hata hivyo, ni makuhani na Walawi pekee ambao wangeweza kuingia katika ua wa ndani, ambako madhabahu kubwa ilikuwa; ni makuhani pekee ambao wangeweza kuingia Patakatifu; na ni kuhani wa cheo cha juu pekee ambaye angeweza kuingia Patakatifu Zaidi. Ua wa ndani na Patakatifu paeleweka kufananisha kimbele hali ya kiroho ya kipekee ya Wakristo watiwa-mafuta duniani. Na Patakatifu Zaidi hufananisha mbingu yenyewe, ambako Wakristo watiwa-mafuta hupokea uhai usioweza kufa pamoja na Kuhani wao wa Cheo cha Juu wa kimbingu.—Waebrania 10:19, 20.

[Picha katika ukurasa wa 23]

Kwa kufikiria shangwe ambayo yatungojea, acheni “[tuwe] na imani kuelekea kuhifadhi hai nafsi”