Sura 21
Siku ya Hukumu na Baada ya Hapo
1. Watu wengi wana maoni gani juu ya Siku ya Hukumu?
SIKU YA HUKUMU inaleta picha gani katika akili zako? Watu fulani wanawazia kiti cha enzi kikubwa, na mbele yacho kuna mstari mrefu wa watu ambao wamefufuliwa kwa wafu. Wakati kila mtu anapopita mbele ya hicho kiti cha enzi, anahukumiwa kwa matendo yake ya zamani, yote yakiwa yameandikwa katika kile kitabu cha Hakimu. Ikitegemea mambo aliyofanya, mtu huyo anapelekwa ama mbinguni ama motoni.
2. (a) Ni nani ambaye amefanya mpango kuwe Siku ya Hukumu? (b) Ni nani ambaye amemweka awe hakimu?
2 Walakini, Biblia inatoa picha iliyo tofauti sana juu ya Siku ya Hukumu. Si siku ya kuogopa. Angalia inavyosema Biblia juu ya Mungu: “Ameweka siku atakayowahukumu walimwengu kwa haki, kwa mtu yule aliyemchagua.” (Matendo 17:31) Bila shaka Hakimu huyo aliyewekwa na Mungu ni Yesu Kristo.
3. (a) Ni kwa sababu gani tunaweza kuwa na hakika kwamba Kristo atahukumu bila kuonea? (b) Watu watahukumiwa juu ya msingi gani?
3 Tunaweza kuwa na hakika kwamba Kristo atahukumu bila kuonea na bila kupendelea. Unabii unaomhusu katika Isaya 11:3, 4 unatuhakikishia hilo. Hivyo, kinyume cha maoni ya watu wengi, yeye hatahukumu watu kwa kutegemea dhambi zao za zamani, ambazo nyingi za hizo huenda zilifanywa kwa kutokujua. Biblia inaeleza kwamba wakati wa kufa mtu anawekwa huru au anafunguliwa kutokana na dhambi zo zote alizokuwa amefanya. Inasema: “Yeye ambaye amekufa ameondolewa hatia ya dhambi yake.” (Warumi 6:7, NW) Maana yake ni kwamba mtu anapofufuliwa atahukumiwa juu ya msingi wa yale atakayofanya wakati wa Siku ya Hukumu, si juu ya yale aliyofanya kabla hajafa..
4. (a) Siku ya Hukumu itakuwa ya muda gani? (b) Ni nani watakaokuwa mahakimu pamoja na Kristo?
4 Kwa hiyo, Siku ya Hukumu si siku halisi yenye saa 24. Biblia inaeleza hilo waziwazi inaposema juu ya wale watakaoshiriki pamoja na Yesu katika kuhukumu. (1 Wakorintho 6:1-3) “Nikaona viti vya enzi,” mwandikaji wa Biblia anasema, “na kulikuwako wale walioketi juu yavyo, na uwezo wa kuhukumu ulipewa kwao.” Mahakimu hao ni wafuasi waaminifu wa Kristo waliopakwa mafuta ambao, kama Biblia inavyoendelea kusema, “wakaja kwenye uhai na wakatawala wakiwa wafalme pamoja na Kristo kwa miaka elfu.” Hivyo Siku ya Hukumu itakuwa ya miaka 1,000. Ni kipindi kile kile cha miaka 1,000 ambacho katika hicho Kristo na wafuasi wake waaminifu waliopakwa mafuta 144,000 watatawala wakiwa “mbingu mpya” juu ya “dunia mpya.”—Ufunuo 20:4, 6; 2 Petro 3:13, NW.
5, 6. (a) Mtunga zaburi wa Biblia alisimuliaje Siku ya Hukumu? (b) Maisha duniani yatakuwa namna gani wakati wa Siku ya Hukumu?
5 Ziangalie kurasa hizi. Zinatoa wazo fulani la namna Siku ya Hukumu itakavyokuwa nzuri ajabu kwa wanadamu. Mtunga zaburi wa Biblia aliandika juu ya wakati huo mtukufu hivi: “Acha shamba lililo wazi lifurahi na yote yaliyomo. Wakati uo huo acha miti yote ya mwitu itoe sauti kwa shangwe mbele za Yehova. Kwa maana yeye amekuja; kwa maana yeye amekuja kuihukumu dunia. Yeye ataihukumu nchi inayozaa kwa uadilifu na mataifa kwa uaminifu wake.”—Zaburi 96:12, 13, NW.
6 Wakati wa Siku ya Hukumu wale watakaookoka Har-Magedoni watafanya kazi kuifanya dunia iwe paradiso. Wale wafu watakaribishwa warudie uhai katika paradiso hiyo. (Luka 23:43, NW) Weee, kutakuwako furaha kama nini wakati jamaa zilizotenganishwa na kifo kwa muda mrefu zitakapoungana tena pamoja! Ndiyo, itakuwa vizuri kama nini kuishi katika amani, kufurahia afya njema na kupokea mafundisho juu ya makusudi ya Mungu! Biblia inasema: “Wakati kuna hukumu zinazotoka kwako kwa ajili ya dunia, uadilifu ndio wakazi wa nchi inayozaa watajifunza hakika.” (Isaya 26:9, NW) Wakati wa Siku ya Hukumu watu wote watajifunza habari za Yehova, nao watapewa nafasi kamili ya kumtii na kumtumikia.
7. Wakati wa Siku ya Hukumu, ni nini litakalowapata wale wanaochagua kumtumikia Mungu na wale wanaokataa?
7 Yesu Kristo na wafalme washirika wake 144,000 watawahukumu wanadamu chini ya hali hizo za paradiso. Watu wanaochagua kumtumikia Yehova watakuwa katika hali ya kupokea uzima wa milele. Lakini, hata chini ya hali hizo zilizo bora kabisa, wengine watakataa kumtumikia Mungu. Ni kama Maandiko yanavyosema: “Ijapokuwa yule mwovu aonyeshwa kibali, yeye hatajifunza uadilifu. Katika nchi ya unyofu yeye atatenda isivyo haki.” (Isaya 26:10, NW) Basi baada ya kupewa nafasi kamili ya kubadili njia zao na kujifunza uadilifu, waovu hao wataharibiwa. Wengine watauawa hata kabla ya Siku ya Hukumu kumalizika. (Isaya 65:20) Hawataruhusiwa waendelee kuishi ili kuchafua au kuiharibu dunia-paradiso.
8. Yesu alionyeshaje kwamba wakati wa Siku ya Hukumu ingekuwa vigumu zaidi kwa watu fulani kuzoea uadilifu kuliko ambavyo ingekuwa kwa wengine?
8 Je! itakuwa vigumu kwa watu fulani kati ya watu watakaofufuliwa kujifunza na kuzoea uadilifu kuliko itakavyokuwa kwa wengine? Yesu Kristo alipokuwa hapa duniani, alionyesha itakuwa hivyo. Wengi wa watu ambao yeye na wanafunzi wake waliwahubiri hawakusikiliza. Walimkataa wakisema siye Masihi, hata baada ya kusikia mahubiri yake na kumwona akifanya miujiza. Alipokuwa akiwatuma wanafunzi wake kwenda kuhubiri, Yesu alisema hivi juu ya mji ambao ungekataa ujumbe wao: “Amin, nawaambia, Itakuwa rahisi nchi ya Sodoma na Gomora kustahimili . . . siku ya hukumu, kuliko mji ule.”—Mathayo 10:15.
9, 10. (a) Ni watu gani wasio haki (wasio waadilifu) watakaofufuliwa wakati wa Siku ya Hukumu? (b) Ni kwa sababu gani itakuwa vigumu zaidi kwa watu fulani wasio haki kuliko kwa wengine wasio haki?
9 Kwa kusema hivyo, Yesu alionyesha kwamba angalau wengine kati ya watu wasio waadilifu wa Sodoma na Gomora ya kale watakuwapo duniani wakati wa Siku ya Hukumu. Ijapokuwa walikuwa wamekuwa wenye mwenendo mchafu sana, tunaweza kutazamia kwamba wengine kati yao watafufuliwa. (Mwanzo 19:1-26) Kwa rehema yake, Yehova atawarudisha ili wawe na nafasi ya kujifunza makusudi yake. Lakini maneno ya Yesu yanaonyesha vilevile kwamba wengine kati ya watu wasio waadilifu ambao yeye na wanafunzi wake binafsi waliwahubiri watakuwapo wakati wa Siku ya Hukumu. Wao, pia, watafufuliwa wapewe nafasi zaidi ya kujifunza makusudi ya Mungu. Ni kwa akina nani itakuwa vigumu zaidi kumkubali Kristo kuwa mfalme wakati huo? Ni kwa wale watu wa Sodoma wa kale au kwa wale waliokuwa wameyakataa mahubiri ya Yesu na ya wanafunzi wake?
10 Itakuwa vigumu zaidi kwa wale waliomkataa Yesu binafsi. Akizungumza juu ya Kapernaumu, mmoja wa miji alikofanya miujiza, Yesu alisema: “Kwa kuwa kama miujiza iliyofanyika kwako ingalifanyika katika Sodoma, ungalikuwapo mji huo hata leo. Walakini nawaambieni, itakuwa rahisi nchi ya Sodoma kustahimili.. . siku ya hukumu kuliko wewe.” (Mathayo 11:22-24) Ndiyo, wakati wa Siku ya Hukumu itakuwa vigumu hata zaidi kwa wale wa kutoka Kapernaumu kukubali makosa yao, kumkubali na kumtumikia Kristo akiwa mfalme kuliko itakavyokuwa kwa wale watu wa Sodoma wa kale kujifunza uadilifu.
11. Ni kwa sababu gani itakuwa rahisi zaidi Siku ya Hukumu kwa wale “wenye haki” kuliko kwa ye yote wa wale “wasio haki”?
11 Hivyo itakuwa rahisi zaidi kwa wafufuliwa fulani “wasio haki” (wasio waadilifu) kujifunza juu ya Mungu na kumtumikia kuliko itakavyokuwa kwa wengine “wasio haki.” (Mathayo 12:41, 42) Basi, namna gani wale “wenye haki” watakaofufuliwa—watu kama Abrahamu, Isaka, Ayubu, Debora, Ruthu, Danieli na wengine? Kabla ya kufa kwao wote walikutazamia kuja kwa Masihi. Watafurahi kama nini wakati wa Siku ya Hukumu kujifunza habari zake, na kujua yeye anatawala huko mbinguni! Basi itakuwa rahisi zaidi sana kwa watu hao “wenye haki” kuzoea uadilifu wakati huo kuliko itakavyokuwa kwa wo wote wa wale “wasio haki.”—Matendo 24:15.
“UFUFUO WA UZIMA” NA “UFUFUO WA HUKUMU”
12. Kulingana na Yohana 5:28-30, ni nani wanaopokea “ufufuo wa uzima,” na ni nani wanaopokea “ufufuo wa hukumu”?
12 Katika kuisimulia hali itakayokuwako Siku ya Hukumu, Yesu alisema: “Waliomo makaburini wataisikia sauti yake. Nao watatoka; wale waliofanya mema kwa ufufuo wa uzima, na wale waliotenda mabaya kwa ufufuo wa hukumu . . . Kama nisikiavyo ndivyo nihukumuvyo; na hukumu yangu ni ya haki, kwa sababu siyatafuti mapenzi yangu mimi, bali mapenzi yake aliyenipeleka.” (Yohana 5:28-30) Huo “ufufuo wa uzima” ni nini, na huo “ufufuo wa hukumu” ni nini? Na ni nani watakaoupokea ufufuo wa namna hizo mbili?
13. Maana yake nini mtu kupokea “ufufuo wa uzima”?
13 Tumekwisha kuona waziwazi kwamba wafu watakapotoka makaburini, hawatahukumiwa kwa matendo yao ya zamani. Badala yake, watahukumiwa juu ya msingi wa yale watakayotenda wakati wa Siku ya Hukumu. Hivyo Yesu alipowataja “wale waliofanya mema” na “wale waliotenda mabaya,” alikuwa akimaanisha mema na mabaya ambayo wangefanya wakati wa Siku ya Hukumu. Kwa sababu ya mema watakayofanya, wengi wa wale watakaofufuliwa watafanya maendeleo wakafikie ukamilifu wa kibinadamu mwishoni mwa ile Siku ya Hukumu ya miaka 1,000. Hivyo kurudi kwao kutoka kwa wafu kutaonekana kuwa ni “ufufuo wa uzima,” kwa maana wataufikia uzima mkamitifu bila dhambi.
14. Maana yake nini mtu kupokea “ufufuo wa hukumu”?
14 Kwa upande mwingine, namna gani wale “waliotenda mabaya” wakati wa Siku ya Hukumu? Kurudi kwao kutoka kwa wafu kutaonekana kuwa ni “ufufuo wa hukumu.” Hiyo ina maana gani? Maana yake ni hukumu au kulaaniwa kufa. Hivyo watu hao wataharibiwa ama wakati wa Siku ya Hukumu ama karibu na mwisho wake. Sababu yake ni kwamba wanafanya mabaya; kwa ugumu wa shingo zao wanakataa kujifunza uadilifu na kuuzoea.
SIKU YA HUKUMU INAPOANZA
15. Ni jambo gani linalotukia muda mfupi tu kabla haijaanza Siku ya Hukumu?
15 Mtume Yohana aliona katika njozi yanayotendeka mara kabla ya Siku ya Hukumu. Aliandika hivi: “Mimi nikaona kiti cha enzi kikubwa cheupe na yule aliyeketi juu yake. Dunia na mbingu vikakimbia mbele yake, . . . Nami nikawaona wafu, wakubwa kwa wadogo, wamesimama mbele ya hicho kiti cha enzi... Na hao wafu wakahukumiwa.” (Ufunuo 20:11, 12, NW) Hivyo kabla Siku ya Hukumu haijaanza, mfumo (taratibu) huu wa mambo ambao ndiyo ile ‘dunia na zile mbingu’ utatoweka. Wale tu wanaomtumikia Mungu ndio watakaookoka, hali waovu wote wataangamizwa penye Har-Magedoni.—1 Yohana 2:17.
16. (a) Zaidi ya wafu, ni akina nani wengine watakaohukumiwa wakati wa Siku ya Hukumu? (b) Watahukumiwa kutokana na nini?
16 Hivyo, si “wafu” waliofufuliwa peke yao watakaohukumiwa wakati wa Siku ya Hukumu. “Walio hai” watakaookoka Har-Magedoni, vilevile watoto wote ambao huenda wakazaa, watahukumiwa. (2 Timotheo 4:1) Katika njozi yake, Yohana aliona namna wanavyohukumiwa. “Na vitabu vya kukunjwa vilifunguliwa,” akaandika. “Na wale wafu walihukumiwa kutokana na mambo hayo yaliyoandikwa katika hivyo vitabu vya kukunjwa kulingana na matendo yao. Nayo bahari ikawatoa wale waliokufa ndani yake, na kifo na Hadesi vikawatoa wafu hao waliokuwa ndani yavyo, nao wakahukumiwa mmoja mmoja kulingana na matendo yao.”—Ufunuo 20:12, 13, NW.
17. Vile “vitabu vya kukunjwa” ambavyo katika hivyo “walio hai” na “wafu” watahukumiwa ni nini?
17 “Vitabu vya kukunjwa” hivyo vinavyofunguliwa ambavyo kutokana navyo “wale wafu” na vilevile “walio hai” wanahukumiwa ni nini? Kwa wazi vitakuwa kitu fulani kitakachoongezwa kwenye Biblia Takatifu tuliyo nayo sasa. Ni maandishi au vitabu vitakavyoongozwa kwa roho ya Mungu vikiwa na sheria na maagizo ya Yehova. Kwa kuvisoma watu wote duniani wataweza kuyajua mapenzi ya Mungu. Ndipo, juu ya msingi wa sheria na maagizo yaliyo katika hivyo “vitabu vya kukunjwa,” kila mtu duniani atahukumiwa. Wale watakaoyatii yaliyoandikwa humo watapokea faida za dhabihu ya ukombozi wa Kristo, nao wataendelea polepole kufikia ukamilifu wa kibinadamu.
18. (a) Hali mwishoni mwa Siku ya Hukumu itakuwa nini? (b) Ni kwa njia gani hao “wafu” wanakuja kwenye uzima mwishoni mwa miaka 1,000?
18 Karibu na mwisho wa Siku ya Hukumu ya miaka 1,000 hakuna mtu duniani atakayekuwa katika hali ya kufa kwa sababu ya dhambi ya Adamu. Kweli kweli, kila mtu atakuwa ameufikia uzima kabisa kabisa. Hiyo ndiyo maana ya Biblia inaposema hivi: “Wengine kati ya hao wafu [kuondoa wale 144,000 wanaoenda mbinguni] hawakuja kwenye uzima mpaka miaka hiyo elfu moja ilipomalizika.” (Ufunuo 20:5, NW) Mtajo huu “wengine kati ya hao wafu” hauna maana ya kwamba wengine wanafufuliwa mwishoni mwa Siku ya Hukumu ya miaka 1,000. Maana yake ni kwamba watu wote wanafikia uzima kwa kuwa mwishowe wanafikia ukamilifu wa kibinadamu. Watakuwa katika hali ile ile kamilifu kama ya Adamu na Hawa walipokuwa katika bustani ya Edeni. Kutatukia nini wakati huo?
BAADA YA SIKU YA HUKUMU
19. Ni nini ambalo Kristo atafanya mwishoni mwa Siku ya Hukumu?
19 Akiisha kufanya yote ambayo Mungu amempa afanye, ndipo Yesu Kristo “atakapompa Mungu Baba ufalme wake.” Hiyo ni mwishoni mwa ile Siku ya Hukumu ya miaka 1,000. Kufikia wakati huo maadui wote watakuwa wamekwisha kuondoshwa. Wa mwisho kati yao ni kifo kilichorithiwa kutoka kwa Adamu. Kitaharibiwa! Ndipo ule Ufalme unapokuwa mali ya Yehova Mungu. Yeye anautawala moja kwa moja akiwa Mfalme.—1 Wakorintho 15:24-28.
20. (a) Yehova atafanya nini ili ajue ni majina ya nani yatakayoandikwa katika “kile kitabu cha uzima”? (b) Ni kwa sababu gani jaribu la mwisho la wanadamu linafaa?
20 Yehova atajuaje ni majina ya nani yatakayoandikwa katika hicho “kitabu cha kukunjwa cha uzima,” au “kile kitabu cha uzima”? (Ufunuo 20:12, 15, NW) Itakuwa kwa kuwajaribu wanadamu. Kumbuka namna Adamu na Hawa walivyoshindwa na jaribu la namna hiyo, na namna Ayubu alivyoshika ukamilifu alipojaribiwa. Lakini wanadamu wengi sana watakaoishi mpaka mwisho wa miaka 1,000 hawatakuwa wamejaribiwa imani yao kamwe. Kabla hawajafufuliwa walikuwa hawajui makusudi ya Yehova. Walikuwa sehemu ya mfumo (taratibu) mbovu wa mambo ya Shetani; walikuwa “wasio haki.” Halafu walipofufuliwa ikawa rahisi kwao kumtumikia Yehova kwa sababu waliishi katika Paradiso bila upinzani wo wote kutoka kwa Ibilisi. Lakini je! mabilioni hayo ya wanadamu, ambao wakati huo wamekuwa wakamilifu, watamtumikia Yehova ikiwa Shetani atapewa nafasi ya kujaribu kuwazuia wasiendelee kufanya hivyo? Je! Shetani ataweza kuwatendea alivyowatendea Adamu na Hawa wakamilifu?
21. (a) Yehova ataacha namna gani wanadamu wajaribiwe? (b) Jaribu hilo litakapomalizika, itakuwaje kwa wote wenye kuhusika?
21 Ili kujibu kabisa maulizo hayo, Yehova anamruhusu Shetani na mashetani wake wafunguliwe kutoka shimo refu lisilo na mwisho ambamo wamekuwa kwa muda wa miaka 1,000. Halafu? Biblia inaonyesha kwamba Shetani atafaulu kugeuza watu fulani waache kumtumikia Yehova. Hao watakuwa kama “mchanga wa bahari,” maana yake hesabu yao haijulikani. Baada ya kutimizwa kwa jaribu hilo, Shetani na mashetani wake, na vilevile wale wasiopita jaribu hilo, wanatupwa katika “lile ziwa la moto” la mfano, ambalo ndicho kifo cha pili (cha milele). (Ufunuo 20:7-10, 15) Lakini wale ambao majina yao yanapatikana yameandikwa katika “kile kitabu cha uzima” wataendelea kukaa katika paradiso ya kidunia yenye utukufu. Kuandikisha majina yao katika hicho “kitabu cha uzima” maana yake ni kwamba Yehova anawahukumu kuwa ni waadilifu kabisa katika moyo, akili na mwili na hivyo wanastahili kuishi milele katika paradiso duniani.
ILE SIKU YA HUKUMU YA SASA
22. Ili tuishi tuje tuione Siku ya Hukumu na jaribu la mwisho kwa wanadamu, ni lazima sasa tuokoke nini?
22 Hivyo Biblia inatupasha habari ya mambo yatakayotendeka muda wa miaka zaidi ya 1,000 ijayo. Nayo inaonyesha kwamba hakuna sababu ya kuogopa yaliyoko mbele. Lakini ulizo ni hili: Je! wewe utakuwa huko uyafurahie mambo mazuri ambayo Yehova ameweka katika akiba? Hilo litategemea kama wewe utaokoka siku ya hukumu inayotangulia, yaani, ‘siku ya hukumu ya sasa na ya kuwaharibu wao wasioogopa Mungu.’—2 Petro 3:7, ZSB.
23. (a) Sasa watu wanatengwa katika jamii gani mbili? (b) Itakuwaje kwa kila jamii, na kwa sababu gani?
23 Ndiyo, tangu Kristo aliporudi na kuketi katika kiti chake cha enzi cha kimbingu, wanadamu wote wamekuwa wakihukumiwa. Hii “siku ya hukumu” ya sasa inatokea kabla haijaanza ile Siku ya Hukumu ya miaka 1,000. Wakati wa hukumu ya sasa watu wanatengwa kama “mbuzi” kwenye mkono wa kushoto wa Kristo au kama “kondoo” kwenye mkono wake wa kuume. Hao “mbuzi” wataharibiwa kwa sababu wanashindwa kusaidia “ndugu” wapakwa mafuta wa Kristo katika kumtumikia Mungu. Mwishowe, “mbuzi” hao wanajionyesha kuwa watenda dhambi wasiotubu, waovu, wenye kufanya mioyo yao iwe migumu katika kuzoea mambo yasiyo ya uadilifu. Kwa upande mwingine, hao “kondoo” watabarikiwa kwa kupewa uzima chini ya utawala huo wa Ufalme kwa sababu wanawaunga mkono ndugu” za Kristo kwa kila njia.—Mathayo 25:31-46.
[Picha katika ukurasa wa 178]
Itakuwa vigumu zaidi kwa akina nani Siku ya Hukumu?