Maisha Bila Maumivu Yanakaribia!

UTENDAJI mbalimbali wa mwili utulindao na madhara kwa njia zilizo tata hakika ni wa kustaajabisha. Kuuchunguza kwapaswa kutusukume tumsifu Muumba, kama alivyofanya mtunga-zaburi wa Biblia aliyeandika hivi: “Nitakushukuru kwa kuwa nimeumbwa kwa jinsi ya ajabu ya kutisha.” (Zaburi 139:14) Kwa kweli, ni Mungu peke yake awezaye kuwezesha maisha bila maumivu! Lakini hilo litatekelezwaje?

Angalia kwamba kabla tu ya ahadi hiyo ya kwamba maumivu na machozi yatakomeshwa, Biblia yaeleza juu ya “mbingu mpya na dunia mpya; kwa maana mbingu za kwanza na dunia ya kwanza zimekwisha kupita.” (Ufunuo 21:1, 4, ZSB) Bila shaka, Biblia haisemi juu ya kupitilia mbali kwa mbingu na dunia yetu halisi. Bali, kwa ufupi yasema kwamba mfumo mpya kabisa wa mambo utachukua mahali pa huu wa sasa. Ndiyo, serikali mpya iliyo na nguvu kuliko zile za kibinadamu itafanya iwezekane kufurahia maisha bila maumivu papahapa duniani.

Katika kueleza juu ya serikali hii, Biblia husema kwamba “Mungu wa mbinguni atausimamisha ufalme [au, serikali] ambao . . . utavunja falme hizi zote vipande vipande na kuziharibu, nao utasimama milele na milele.” (Danieli 2:44) Yesu Kristo alipokuwa duniani, alitufundisha kusali kwa ajili ya serikali hii ya Ufalme aliposema hivi: “Ninyi salini hivi; Baba yetu uliye mbinguni, jina lako litukuzwe, ufalme wako uje, mapenzi yako yatimizwe, hapa duniani kama huko mbinguni.”—Mathayo 6:9, 10.

Ingawa hivyo, utimizo wa sala hiyo waweza kumaanishaje maisha bila maumivu kwako?

Mtawala Mwenye Nguvu Ipitayo Ile ya Kibinadamu

Ufunguo umo katika hekima na nguvu ya yule ambaye Mungu amechagua awe kichwa cha serikali Yake. Huyo ni Yesu Kristo mwenyewe. Juu yake, unabii mmoja wa Biblia wasema hivi: “Ile serikali itakuwa juu ya bega lake . . . Kwa habari ya ongezeko la serikali yake na amani hakutakuwa na mwisho.”—Isaya 9:6, 7, King James Version.

Hekima ya Yesu, ambaye sasa yuko mbinguni, ni kubwa kuliko ile ya watabibu wote wa kidunia. Yeye aelewa kikamili utendaji mbalimbali wa mwili wetu wa kimnofu, kutia na mifumo yao ya kujilinda na madhara. Alipokuwa mwanadamu duniani zaidi ya miaka 1,900 iliyopita, hakukuwa na ugonjwa au usumbufu ambao hangeweza kuponya. Hivyo alionyesha lile atakalofanya kwa kadiri kubwa zaidi akiwa Mtawala wa Ufalme wa Mungu. Kwa habari ya kisa kimoja, Biblia yasema hivi:

“Wakamwendea makutano mengi wakimletea viwete, vipofu, mabubu, vilema, na wengine wengi, wakawaweka miguuni pake; akawaponya; hata ule mkutano wakastaajabu, walipowaona mabubu wanasema, vilema wanakuwa wazima, viwete wanakwenda, na vipofu wanaona.” (Mathayo 15:30, 31) Kati ya masumbufu ambayo Yesu ataponya wakati wa utawala wake wa Ufalme ni ule wa kuogopesha sana, maumivu ya daima.

Kwa kweli, hiyo itakuwa baraka nzuri kama nini! Nayo haitatekelezwa kwa ajili ya wachache tu. Ahadi ya Muumba ni hii: “Hapana mwenyeji atakayesema, Mimi mgonjwa.” (Isaya 33:24) Hapo ndipo ile ahadi itakapotimizwa chini ya Ufalme wa Mungu, ya kwamba “maumivu hayatakuwapo tena.”—Ufunuo 21:4.

Chini ya utawala wa Kristo ulio mtukufu wa Ufalme, utendaji mwingi wa mwili wetu, kutia na ule utulindao na madhara, utafanya kazi kikamilifu kwa sababu dhambi iliyorithiwa itakuwa imeondolewa. Mfumo wa ving’ora vya kutahadharisha mwili wetu hautakuwa tena wa mateso. Jambo la kufurahisha, kulingana na unabii mbalimbali wa Biblia unaotimizwa sasa, ni kwamba tuko kwenye ukingo wenyewe wa ulimwengu mpya huo, ambamo maumivu hayatasababisha mateso kamwe.—Mathayo 24:3-14, 36-39; 2 Timotheo 3:1-5; 2 Petro 3:11-13.

Wewe waweza kufurahia maisha chini ya Ufalme wa Mungu wakati ambapo ile aina ya maumivu ambayo yakumba mamilioni ya watu sasa haitakuwapo tena. Lakini wahitaji kufanya jambo fulani. Yesu Kristo alionyesha takwa fulani la msingi aliposema hivi katika sala kwa Mungu: “Na uzima wa milele ndio huu, Wakujue wewe, Mungu wa pekee wa kweli, na Yesu Kristo uliyemtuma.”—Yohana 17:3.

Mashahidi wa Yehova watafurahi kukusaidia ujipatie ujuzi muhimu huu. Uliza tu mmoja wao katika eneo lako, au uandikie wachapishaji wa gazeti hili, ukionyesha tamaa yako ya kuwa na funzo la Biblia katika nyumba yako au mahali pengine popote pafaapo. Mipango itafanywa ili ujifunze mengi zaidi juu ya makusudi ya Mungu kwa wanadamu kufurahia maisha bila maumivu.