Karibuni—Ulimwengu Usio na Maumivu!

ETI ulimwengu usio na maumivu utakuja karibuni? Hizo zingekuwa habari zenye kukaribishwa vizuri kama nini na watesekao daima—maumivu yao yawe ni ya kimwili, kiakili, au ya kihisia-moyo! Mathalani, mamilioni wangeona shangwe nyingi mno kwa kuondolewa yale maumivu makali sana ya kimwili yasababishwayo na namna fulani za kansa, ule usumbufu wa maumivu makali ya mshipa wa ubongoni, na ule ugonjwa wa moyo usongao pumzi ukiwa na maumivu makali ya kifua na koo. Wale wenye kusumbuliwa na matatizo makali ya kiakili wangekaribisha vizuri kitulizo cha kutopatwa na mateso yao ambayo mara nyingi huwa hayaelezeki. Na mamilioni zaidi wangeshangilia kama tu maumivu yao ya kihisia-moyo yasababishwayo na hisia kama hofu, kihoro, hatia, wasiwasi, na mvurugiko wa mawazo yangeisha. Lakini je! sisi twataka kweli kweli kuuona mwisho wa maumivu yote?

“Kutokuwa kabisa na maumivu ni msiba,” ndivyo ataarifu mchunguzi wa umbo la mwili Allan Basbaum wa Chuo Kikuu cha Kalifornia huko San Francisco. Alitoa taarifa hiyo akiwa na sababu nzuri. Maumivu ya kimwili, yakiwa kama kionyo, hutujulisha kwamba jambo fulani lenye madhara linatendeka.

Kutoweza kuhisi maumivu ya kimwili kwaweza kuwa msiba kweli kweli. Kielezi cha jambo hilo chatolewa katika ripoti hii ya gazeti Time: “Tabasamu ya mvulana huyo wa miaka kumi na miwili humpa uvutio wenye kutofautiana sana na sura yake iliyo ya kusikitikiwa. Mikono na miguu yake imeharibika sura na kukunjika, kana kwamba alipatwa na nyongea. Vidole kadhaa vimekosekana. Kidonda kikubwa kilicho wazi hufunika goti moja, na ile midomo yenye kutabasamu imeumwa-umwa sana. Yeye hukodoa macho kwa mtazamo hoi kama wa mtoto aliyetwangwa . . . Alizaliwa akiwa na kasoro haba ya chembe za urithi ambayo humfanya asihisi maumivu. Vidole vyake ama vilivyogwa au vikachomwa moto kwa sababu hakuondoa mkono wake katika vitu vyenye moto au vilivyo hatari. Mifupa na maungo yake yameharibika kwa sababu aliyagonga mno alipotembea au kukimbia. Goti lake likawa limepata kidonda kwa kutambaa juu ya vitu vyenye ncha kali ambavyo hakuweza kuvihisi. Yeye akivunja mfupa au ateguke kiuno, hangepata hisia ya kutosha kumfanya alie kuomba msaada.”

Watu fulani hufanya haraka kulaumu Mungu kwa masumbufu hayo na kwa mashaka yenye kupata mamilioni. Hata hivyo, je! kwa haki twaweza kulaumu Mungu kwa mateso yenye maumivu ya ainabinadamu?

Je! Mungu Ndiye wa Kulaumiwa?

Kwa miaka kama 6,000 sasa, ainabinadamu imekuwa katika utumwa kwa maumivu ya kimwili, ya kiakili, na ya kihisia-moyo. Kwa uhakika, kama karne 19 zilizopita, mtume Mkristo Paulo alitoa maoni haya sahihi: “Viumbe vyote pia vinaugua pamoja, navyo vina utungu pamoja hata sasa.” (Warumi 8:22) Kujapokuwa na zile dawa nyingi za kumaliza maumivu kwenye maduka ya dawa na jitihada za watabibu wa maradhi na wa akili, kunaendelea kuwako utumwa wenye kuenea kote wa maumivu ya aina zote. Naam, watu fulani wamelaani Mungu kwa sababu ya mateso yao, kama vile mke wa mwanamume Ayubu alivyomhimiza afanye karne nyingi zilizopita! Hata hivyo, kama vile Ayubu mwenyewe alivyong’amua, roho hiyo ni ya upumbavu na isiyofaa.—Ayubu 2:9, 10.

Mungu hawezi kulaumiwa kihaki kwa sababu ya utumwa wa kuwa na maumivu ambao wanadamu wanao wakati wa sasa. Bali, lawama liko juu ya mwongo fulani asiyeonekana pamoja na wazazi wetu wa kwanza. Jinsi gani hivyo?

Maandiko huonyesha kwamba ajapokuwa mwadilifu hapo awali, kiumbe-roho mmoja alikuja kuwa na pupa ya mamlaka na umashuhuri. Kwenye pambazuko la uhai wa kibinadamu duniani, aliwazia akiona ainabinadamu katika dunia-paradiso, wote wakimpa Mungu Mweza Yote, Yehova, ujitoaji kamili. Kwa kusukumwa na moyo uliokuwa umekuwa na nia ya kudhuru, huyu kiumbe-roho aliasi dhidi ya Muumba, akitaka ibada ya kibinadamu na ujitoaji kwa ajili yake mwenyewe. Makusudio yake maovu yalijidhihirisha aliposema uwongo kwa ujanja. Jambo hilo, nalo, lilileta dhambi ulimwenguni.

Yehova Mungu aliambia mwanadamu wa kwanza, Adamu, kwamba kula tunda la kutoka mti wa maarifa ya mema na mabaya kungetokeza kifo. (Mwanzo 2:15-17) Lakini mke wa Adamu, Hawa, alishawishwa kutotii. Akitumia nyoka kuwa mneni, huyo Mdanganyi roho alimwambia hivi mwanamke huyo: “Hakika hamtakufa, kwa maana Mungu anajua ya kwamba siku mtakayokula matunda ya mti huo, mtafumbuliwa macho [yale ya Hawa na ya mume wake], nanyi [wote wawili] mtakuwa kama Mungu, mkijua mema na mabaya.” (Mwanzo 3:1-5) Huo ulikuwa ndio uwongo wa kwanza, nao ulimtia alama huyu kiumbe roho mwovu kuwa ‘baba wa uwongo.’ (Yohana 8:44, NW) Utumizi wake wa nyoka katika pindi hiyo katika bustani ya Edeni una ulinganifu katika utambulisho wake wa Kimaandiko kuwa ndiye “nyoka wa zamani, aitwaye Ibilisi na Shetani.”—Ufunuo 12:9.

Dhambi ilileta mguno na utumwa wa maumivu juu ya ainabinadamu. Kwa kweli kama vile neno la Mungu lilivyosema, siku ile ile Adamu alipotenda dhambi, Mungu alitangaza hukumu ya kifo juu ya wenye kukiuka sheria. Kihukumu, kwa maoni ya Yehova, Adamu na Hawa walikufa siku hiyo. (Linganisha Luka 20:37, 38.) Katika Edeni, Yehova alimwambia hivi mwanamke yule wa kwanza mwenye dhambi: “Nitakuzidishia uchungu wako, na kuzaa kwako; kwa utungu utazaa watoto.” (Mwanzo 3:16) Adamu angechakura riziki yake kwa maumivu mengi nje ya bustani ya Edeni katika dunia iliyo mbali sana na hali ya kiparadiso. Yehova alisema: “Kwa jasho la uso wako utakula chakula, hata utakapoirudia ardhi, ambayo katika hiyo ulitwaliwa; kwa maana u mavumbi wewe, nawe mavumbini utarudi.” (Mwanzo 3:17-19) Hivyo utumwa wa maumivu ukapata mwanzo wao kwa jamii ya kibinadamu.

Kwa hiyo, basi, utumwa wa maumivu waunganishwa na kutokamilika, dhambi, na kifo kilichorithiwa kutoka kwa Adamu. Kama vile mtume Paulo awekavyo wazo hilo: “Kwa mtu mmoja dhambi iliingia ulimwenguni, na kwa dhambi hiyo mauti; na hivyo mauti ikawafikia watu wote kwa sababu wote wamefanya dhambi.” (Warumi 5:12) Lakini Neno la Mungu hutusaidia kuhimili maumivu, kwa maana hutuambia ni kwa nini Yehova ameyaruhusu na kutuhakikishia kwamba karibuni yatai-sha. Mungu aliruhusu yule ‘baba wa uwongo’ mwenye kunyiririka kama nyoka, Shetani Ibilisi, asumbue Ayubu mwadilifu na hivyo atahini ukamilifu wake. Ushindani wa Ibilisi ulikuwa kwamba Ayubu alitumikia Mungu kutokana na ubinafsi, si upendo. (Ayubu 1:8-12) Lakini Ayubu alibaki mwaminifu kwa Mungu, akithibitisha kwamba wanadamu wasiokamilika waweza kumtumikia Yeye kutokana na upendo na waweza kuunga mkono enzi kuu Yake kwa uaminifu-mshikamanifu kujapokuwako mitihani mikali ya imani yao. Uvumilivu wa Ayubu akiwa mshika-ukamilifu ulichangia kutetewa kwa jina la Yehova, ukathibitisha kwamba Shetani ni mwongo, na kumletea thawabu nyingi huyo mzee wa ukoo aliye kielelezo. (Ayubu 42:12-17; Yakobo 5:11) Kutokana na yaliyompata Ayubu, twaweza kukata shauri kwamba kusudi la Mungu liishapo kutimizwa, utumwa wa ainabinadamu kwa maumivu utaisha. Lakini twawezaje kuwa na uhakika juu ya jambo hilo?

Jinsi Maumivu Yataisha

Kwa kweli, Yehova ameandaa njia yenye matokeo kabisa ya kumaliza utumwa wa kibinadamu kwa maumivu. Amefanya hivyo kwa msingi wa dhabihu ya ukombozi ya Mwana wake, Yesu Kristo. Yesu ndiye “Mwana-kondoo wa Mungu, aichukuaye dhambi ya ulimwengu.” (Yohana 1:29) Alikuja duniani, “si ili ahudumiwe, bali kuhudumu na kutoa nafsi yake ukombozi [uhai wake mkamilifu wa kibinadamu] kwa kubadilishana ili kupata wengi.” (Mathayo 20:28, NW) Kupitia kutotii, Adamu alipoteza uhai mkamilifu wa kibinadamu, akiwa na haki na matazamio yao yote. Na huo hususa ndio uliofidiwa kwa njia ya dhabihu ya ukombozi wa Yesu. (1 Timotheo 2:5, 6; Waebrania 7:26) Kweli kweli, “Mungu aliupenda ulimwengu hivi hata akamtoa Mwanae wa pekee, ili kila anayemwamini asipotee, bali awe na uzima wa milele.”—Yohana 3:16, HNWW.

Pia Mungu ameahidi kihususa kwamba utumwa kwa maumivu utaisha. Akitabiri wakati ambapo maumivu yenye kushirikishwa na dhambi hayatakuwapo tena, mtume Mkristo Yohana alivuviwa kimungu kuandika hivi:

“Kisha nikaona mbingu mpya na dunia mpya. Mbingu ile ya kwanza na dunia ile ya kwanza vilikuwa vimetoweka, nayo bahari pia haikuwako tena. . . . Kisha nikasikia sauti kubwa kutoka katika kiti cha enzi ikisema, ‘Tazama! Mungu amefanya makao yake kati ya watu. Atakaa kati yao, nao watakuwa watu wake, naye atakuwa Mungu wao. Yeye atayafuta machozi yao yote; maana hakutakuwako tena na kifo, wala uchungu, wala kilio, wala maumivu; maana ile hali ya kale imepita! Kisha yule aliyeketi juu ya kiti cha enzi [Yehova Mungu] akasema, ‘Tazama, nafanya yote mapya.’ Tena akaniambia, ‘Andika hili, maana maneno haya ni ya kuaminika na ya kweli!’”—Ufunuo 21:1-5, HNWW.

Karibuni wanadamu watii watapokea manufaa kamili ya dhabihu ya ukombozi wa Yesu. Hilo litatukia chini ya utawala wa Ufalme ambao wanyoofu wameutolea sala kwa muda mrefu, wakisema: “Baba yetu uliye mbinguni, jina lako litukuzwe, Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10) Katika Ufalme wa kimbingu, Yesu Kristo atatawala mpaka awe ameweka adui wote chini ya miguu yake, kutia na utumwa wa maumivu na yule adui wa mwisho, kifo.—1 Wakorintho 15:25, 26.

Ndiyo, kwa kadiri ambavyo wanadamu watiifu wahusika, karibuni Mungu ‘atafuta machozi yao yote; maana hakutakuwako tena na kifo, wala uchungu, wala kilio, wala maumivu.’ (Ufunuo 21:4, HNWW) Ndipo maneno ya kiunabii yanayofuata ambayo yana utumizi wa kiroho yatakuwa pia na utimizo halisi: “Bariki Yehova, O nafsi yangu, . . . yeye ambaye anasamehe kosa lako lote, ambaye anaponya maradhi yako yote.” “Hapana mwenyeji atakayesema, Mimi mgonjwa.”—Zaburi 103:1-3, NW; Isaya 33:24.

Mwisho wa Maumivu Lini?

Mwisho wa utumwa wa maumivu uko karibu. Ndiyo, utatukia katika siku yetu, na kizazi kiki hiki kitauona. Utimizo wa unabii wa Biblia waonyesha kwamba tunaishi kwenye mwisho wa huu mfumo mwovu wa mambo. Vita visivyo na kifani, njaa, na matetemeko ya dunia, na pia kuhubiriwa duniani pote kwa habari njema na Mashahidi wa Yehova, ni sehemu ya “ishara” iliyo mjumliko wa mambo mengi ya “kuwapo” kwa Yesu kusikoonekana katika utukufu wa Ufalme wa kimbingu.—Mathayo 24:3-14, 21, 34, NW.

Karibuni, “mbingu ile ya kwanza na dunia ile ya kwanza,” mfumo wa mambo ya Ibilisi uliopangwa kitengenezo pamoja na muundo wao wa kiserikali, zitapitilia mbali. “Bahari” yenye msukosuko ya ainabinadamu waovu itakoma kuwako. Kwa hiyo sisi twasimama kwenye ukingo wenyewe wa “mbingu mpya” ya kiserikali iliyo juu ya “dunia mpya,” jamii ya kibinadamu yenye uadilifu. Katika hizo “uadilifu utakaa.”—Ufunuo 21:1; 2 Petro 3:13, NW.

Kwa kuwa mibaraka ya jinsi hiyo chini ya serikali mpya—Ufalme wa Mungu—iko karibu sana hivyo, jipe moyo. Tafuta maarifa zaidi juu ya ulimwengu mpya usio na maumivu na kifo. Kweli kweli, itazamie siku ile yenye baraka iliyo karibu sana sasa ambapo wote wapendao na kutii Yehova Mungu wataishi katika ulimwengu usio na maumivu.