Kitabu cha Ufunuo Kinatuhusuje Leo?

1-2. Ni sababu gani moja inayofanya tupendezwe na kitabu cha Ufunuo?

JE, UMEWAHI kutazama albamu ya picha za mtu fulani? Unapotazama picha unaona watu wengi usiowafahamu. Hata hivyo, unavutiwa sana na picha moja. Kwa nini? Kwa sababu upo kwenye picha hiyo. Unapochunguza picha hiyo, unajaribu kukumbuka picha hiyo ilipigwa lini na wapi. Pia, unajaribu kumtambua kila mtu aliye kwenye picha hiyo. Picha hiyo ina maana sana kwako.

² Kitabu cha Ufunuo ni kama picha hiyo. Kwa nini? Kuna angalau sababu mbili. Kwanza, kitabu hicho cha Biblia kiliandikwa kwa ajili yetu. Katika mstari wa kwanza kabisa tunasoma hivi: “Ufunuo kupitia Yesu Kristo ambao Mungu alimpa, ili kuwaonyesha watumwa wake mambo yanayopaswa kutukia hivi karibuni.” (Ufu. 1:1) Hivyo, mambo yaliyoandikwa katika kitabu hiki si kwa ajili ya watu wote kwa ujumla, bali kwa ajili yetu, watumishi wa Mungu waliojiweka wakfu. Tukiwa watu wa Mungu, hatupaswi kushangaa tunapotambua kwamba tunashiriki katika utimizo wa unabii unaopatikana katika kitabu hiki chenye kusisimua. Kwa maneno mengine, ni kana kwamba tupo kwenye ile picha.

3-4. Kulingana na kitabu cha Ufunuo unabii wake ungetimizwa lini, nao unapaswa kumchochea kila mmoja wetu afanye nini?

³ Sababu ya pili inahusu wakati ambao unabii huo unatimizwa. Mtume Yohana aliyekuwa amezeeka, aliutambulisha wakati huo aliposema hivi: “Kwa mwongozo wa roho nilikuja kuwa katika siku ya Bwana.” (Ufu. 1:10) Yohana alipoandika maneno hayo karibu mwaka wa 96 W.K., “siku ya Bwana” haikuwa imeanza, ingeanza miaka mingi baadaye. (Mt. 25:14, 19; Luka 19:12) Lakini kulingana na unabii wa Biblia, siku hiyo ilianza mwaka wa 1914, Yesu alipowekwa kuwa Mfalme mbinguni. Tangu mwaka huo na kuendelea, unabii wa Ufunuo unaohusu watu wa Mungu ulianza kutimizwa. Naam, sasa tunaishi katika “siku ya Bwana”!

⁴ Kwa kuwa tunaishi katika kipindi hiki chenye kusisimua, sisi ndio tunaohitaji kukazia uangalifu wa pekee ushauri huu wenye upendo, unaopatikana kwenye Ufunuo 1:3: “Mwenye furaha ni yule anayesoma kwa sauti na wale wanaosikia maneno ya unabii huu, na wanaoshika mambo yaliyoandikwa humo, kwa kuwa wakati uliowekwa uko karibu.” Kwa kweli, tunahitaji ‘kusoma kwa sauti,’ ‘kusikia maneno ya unabii huu,’ na ‘kuyashika.’ Ni baadhi ya maneno gani ambayo tunahitaji kuyashika?

 5. Kitabu cha Ufunuo kinakaziaje uhitaji wa kuhakikisha kwamba ibada yetu inakubalika kwa Yehova?

⁵ Kuanzia sura ya kwanza ya Ufunuo, tunajifunza kwamba Yesu anatambua kabisa mambo yanayotendeka katika makutaniko ya watu wake. (Ufu. 1:12-16, 20; 2:1) Yesu alionyesha kwamba anatambua mambo yanayotendeka kupitia ujumbe wake kwa makutaniko saba huko Asia Ndogo. Katika ujumbe huo, alitoa mwongozo hususa ili kuwasaidia Wakristo wa karne ya kwanza wahakikishe kwamba ibada yao inakubalika kwa Yehova. Isitoshe, mambo aliyosema katika ujumbe huo yanawahusu watu wote wa Mungu leo. Tunajifunza nini? Kiongozi wetu Yesu Kristo, anatambua vema hali yetu ya kiroho. Anatuongoza na kutulinda; anaona kila jambo linaloendelea. Anajua mambo tunayohitaji ili tuendelee kufurahia kibali cha Yehova. Alitoa mwongozo gani ambao tunahitaji kuufuata leo?

 6. (a) Kama inavyoonyeshwa kwenye Ufunuo 2:3, 4, ni tatizo gani la msingi lililofunuliwa katika ujumbe wa Yesu kwa kutaniko la Efeso? (b) Tunajifunza nini kutokana na ujumbe huo?

⁶ Soma Ufunuo 2:3, 4. Hatupaswi kuacha upendo tuliokuwa nao mwanzoni kwa Yehova. Ujumbe wa Yesu kwa Wakristo katika kutaniko la Efeso, ulionyesha kwamba walikuwa wamevumilia na kwamba waliendelea kumtumikia Yehova bila kuacha licha ya changamoto mbalimbali. Hata hivyo, walikuwa wameacha upendo waliokuwa nao mwanzoni. Walihitaji kuchochea upendo huo, la sivyo, ibada yao haingekubalika. Vivyo hivyo, leo tunahitaji kufanya mengi zaidi ya kuvumilia tu. Tunahitaji kuvumilia tukiwa na nia nzuri. Mungu wetu hapendezwi tu na mambo tunayofanya, bali pia kwa nini tunayafanya. Nia yetu ni muhimu kwake, kwa sababu anatarajia ibada yetu itegemee upendo wetu wenye kina na uthamini wetu kwake.​—Met. 16:2; Marko 12:29, 30.

 7. (a) Kama inavyoonyeshwa kwenye Ufunuo 3:1-3, Yesu aliona tatizo gani katika kutaniko la Sardi? (b) Tunahitaji kufanya nini?

⁷ Soma Ufunuo 3:1-3. Ni lazima tuendelee kuwa macho na chonjo. Washiriki wa kutaniko la Sardi walikuwa na tatizo tofauti. Ingawa walikuwa na hali nzuri ya kiroho wakati uliopita, sasa walikuwa wamepunguza bidii yao kwenye utumishi wa Mungu. Hivyo, Yesu aliwaambia ‘waamke.’ Tunapata onyo gani? Bila shaka, Yehova hatasahau kazi yetu. (Ebr. 6:10) Hata hivyo, hatuwezi kutegemea tu mambo tuliyofanya wakati uliopita katika utumishi wa Yehova. Ingawa huenda tunapitia hali zinazotuzuia kufanya mengi sasa, tunahitaji kuendelea kuwa na mengi katika “kazi ya Bwana,” tukiendelea kuwa macho na chonjo hadi mwisho.​—1 Kor. 15:58; Mt. 24:13; Marko 13:33.

 8. Tunajifunza nini kutokana na maneno ambayo akina ndugu wa Laodikia waliambiwa kwenye Ufunuo 3:15-17?

⁸ Soma Ufunuo 3:15-17. Ni lazima tuwe na bidii na tujitoe kwa moyo wote katika ibada yetu. Ujumbe wa Yesu kwa Wakristo katika kutaniko la Laodikia ulifunua tatizo lingine. Walikuwa “vuguvugu” katika ibada yao. Kwa sababu ya kukosa bidii, Yesu aliwaambia kwamba walikuwa wenye “taabu na wa kusikitikiwa.” Walihitaji kuwa na bidii nyingi kwa ajili ya Yehova na ibada yake. (Ufu. 3:19) Tunajifunza nini? Ikiwa tumepunguza bidii yetu, ni lazima tuongeze uthamini kwa utajiri wetu mwingi wa kiroho. (Ufu. 3:18) Tusiruhusu kamwe tukengeushwe na kufuatilia maisha ya starehe, na kuacha kutanguliza mambo ya kiroho maishani.

 9. Kama inavyoonyeshwa na ujumbe wa Yesu kwa Wakristo huko Pergamamu na Thiatira, tunahitaji kuepuka hatari gani?

⁹ Ni lazima tukatae mafundisho ya waasi-imani. Yesu aliwakaripia baadhi ya Wakristo huko Pergamamu kwa kuendeleza migawanyiko na madhehebu. (Ufu. 2:14-16) Aliwapongeza Wakristo huko Thiatira ambao walijiepusha na “mambo mazito ya Shetani,” na akawahimiza ‘waishike imara’ ile kweli. (Ufu. 2:24-26) Wakristo dhaifu ambao walijiruhusu washawishiwe na mafundisho ya uwongo walihitaji kutubu. Namna gani sisi leo? Ni lazima tukatae fundisho lolote lililo kinyume na njia ya Yehova ya kufikiri. Huenda waasi-imani wakaonekana kuwa “watu wanaomwogopa Mungu” lakini ‘wanazikana nguvu zake.’ (2 Tim. 3:5) Ikiwa tutakuwa wanafunzi wenye bidii wa Neno la Mungu, itakuwa rahisi kwetu kutambua na kuyakataa mafundisho ya uwongo.—2 Tim. 3:14-17; Yuda 3, 4.

10. Tunajifunza somo gani lingine kutokana na mambo ambayo Yesu aliyaambia makutaniko ya Pergamamu na Thiatira?

¹⁰ Hatupaswi kuvumilia, kujihusisha, au kuunga mkono aina yoyote ya ukosefu wa maadili. Wakristo huko Pergamamu na Thiatira walikuwa na tatizo lingine. Yesu aliwashutumu baadhi ya Wakristo katika makutaniko hayo kwa sababu hawakupinga ukosefu wa maadili. (Ufu. 2:14, 20) Tunajifunza nini? Tusitarajie kwamba Yehova atavumilia matendo yoyote ya ukosefu wa maadili hata ikiwa tumemtumikia kwa miaka mingi na sasa tuna mapendeleo fulani. (1 Sam. 15:22; 1 Pet. 2:16) Anatarajia tudumishe viwango vyake vya juu vya maadili hata viwango vya maadili vya ulimwengu vinapozidi kuporomoka.​—Efe. 6:11-13.

11. Tumejifunza nini kufikia sasa? (Tazama pia sanduku “Masomo Tunayojifunza.”)

¹¹ Tumejifunza nini kufikia sasa? Tumeona umuhimu wa kuhakikisha kwamba ibada yetu inakubalika kwa Yehova. Ikiwa tunafanya jambo fulani ambalo litafanya ibada yetu isikubalike, tunahitaji kuchukua hatua haraka ili kurekebisha mambo. (Ufu. 2:5, 16; 3:3, 16) Hata hivyo, Yesu alitaja jambo lingine pia kwa makutaniko. Ni jambo gani hilo?

12. Yesu aliwaambia jambo gani akina ndugu huko Smirna na Filadelfia ambalo tunapaswa kupendezwa nalo leo? (Ufunuo 2:10)

¹² Sasa, acheni tuchunguze ujumbe wa Yesu kwa makutaniko ya Smirna na Filadelfia. Aliwaambia Wakristo wa huko wasiogope mateso, kwa kuwa uaminifu wao ungethawabishwa. (Soma Ufunuo 2:10; 3:10) Tunajifunza nini leo? Tunapaswa kutarajia mateso na tuwe tayari kuyavumilia. (Mt. 24:9, 13; 2 Kor. 12:10) Kwa nini kikumbusho hicho ni muhimu?

13-14. Watu wa Mungu wameathiriwaje na matukio yanayotajwa kwenye Ufunuo sura ya 12?

¹³ Kitabu cha Ufunuo kinatuambia kwamba watu wa Mungu wangeteswa katika siku zetu, yaani, “siku ya Bwana.” Ufunuo sura ya 12 inataja kwamba vita vingetokea mbinguni mara tu baada ya kuzaliwa kwa Ufalme wa Mungu. Mikaeli, yaani, Yesu Kristo aliyetukuzwa, na jeshi lake wangepigana vita dhidi ya Shetani na roho waovu. (Ufu. 12:7, 8) Matokeo ni kwamba maadui hao wa Mungu wangeshindwa na kutupwa duniani, na hivyo kusababisha mateso mabaya sana duniani na kwa wakaaji wake. (Ufu. 12:9, 12) Lakini jambo hilo linawaathirije watu wa Mungu?

¹⁴ Kisha kitabu cha Ufunuo kinatuambia jambo ambalo Shetani alifanya. Kwa kuwa sasa hangeweza kwenda mbinguni, anaelekeza hasira yake kwa Wakristo watiwa-mafuta waliobaki, ambao ni wawakilishi wa Ufalme wa Mungu duniani, na ambao wana “kazi ya kutoa ushahidi kumhusu Yesu.” (Ufu. 12:17; 2 Kor. 5:20; Efe. 6:16, 20) Unabii huo umetimizwaje?

15. Ni nani wanaofananishwa na “mashahidi wawili” wanaotajwa katika kitabu cha Ufunuo sura ya 11, na walipatwa na jambo gani?

¹⁵ Shetani aliwachochea maadui wa watu wa Mungu wawashambulie ndugu watiwa-mafuta waliokuwa wakiongoza kazi ya kuhubiri Ufalme. Wale walioongoza miongoni mwao wanafananisha wale ‘mashahidi wawili’ wanaosemwa kwamba waliuawa.b (Ufu. 11:3, 7-11) Mwaka wa 1918, ndugu wanane waliokuwa wakiongoza walihukumiwa kwa mashtaka ya uwongo, na kila mmoja akapewa kifungo cha muda mrefu gerezani. Kwa maoni ya wanadamu, ilionekana kwamba kazi ya Wakristo hao watiwa-mafuta ilikuwa ‘imeuawa.’

16. Ni jambo gani lenye kushangaza lililotukia mwaka wa 1919, lakini Shetani ameendelea kufanya nini tangu wakati huo?

¹⁶ Pia, unabii wa Ufunuo unataja kwamba ‘mashahidi hao wawili’ wangerudishiwa uhai baada ya kipindi kifupi cha wakati. Katika utimizo wa unabii huo, jambo fulani lenye kushangaza lilitukia mwaka uliofuata baada ya kifungo chao. Mwanzoni mwa mwaka 1919, ndugu hao watiwa-mafuta waliwekwa huru, na baadaye mashtaka yao yaliondolewa. Bila kukawia, akina ndugu hao walirudi tena kwenye kazi ya Ufalme. Lakini hilo halikumzuia Shetani kuwashambulia watu wa Mungu. Tangu wakati huo, Shetani ameuelekeza “mto” wa mateso dhidi ya watu wote wa Mungu. (Ufu. 12:15) Kwa kweli, ‘hapa ndipo kila mmoja wetu anahitaji uvumilivu na imani.’​—Ufu. 13:10.

17. Watu wa Mungu wamepata msaada gani ambao hawakutarajia, licha ya kushambuliwa na Shetani?

¹⁷ Kisha, Ufunuo sura ya 12 inaonyesha kwamba watu wa Mungu wangepata msaada kutoka chanzo kisichotarajiwa. Kitabu cha Ufunuo kinataja kwamba “dunia” iliumeza ule “mto” wa mateso. (Ufu. 12:16) Hivyo ndivyo ilivyotukia. Nyakati fulani mifumo imara zaidi ya ulimwengu wa Shetani, kama vile mifumo fulani ya kisheria, imewasaidia watu wa Mungu. Tena na tena, watumishi wa Yehova wameshinda kesi mahakamani, jambo ambalo limewaruhusu kuwa na uhuru wa kadiri fulani. Wametumiaje uhuru huo? Wametumia kikamili kila fursa kufanya kazi ambayo Yehova amewapatia. (1 Kor. 16:9) Kazi hiyo inatia ndani nini?

18. Katika siku hizi za mwisho, kazi yetu kuu ni gani?

¹⁸ Yesu alitabiri kwamba watu wake wangetangaza “habari njema ya Ufalme” wa Mungu katika dunia yote kabla ya mwisho kufika. (Mt. 24:14) Kwa kufanya hivyo, wananufaika kutokana na msaada wa malaika au kikundi cha malaika, wanaotajwa kwamba wana “habari njema ya milele ili [waitangaze] kwa wale wanaokaa duniani, kwa kila taifa na kabila na lugha na watu.”—Ufu. 14:6.

19. Wale wanaompenda Yehova wanapaswa kutangaza ujumbe gani mwingine?

¹⁹ Habari njema ya Ufalme si ujumbe pekee ambao watu wa Mungu wanapaswa kutangaza. Wanapaswa pia kuunga mkono kazi ya malaika wanaotajwa kwenye Ufunuo sura ya 8 hadi ya 10. Malaika hao wanatangaza mfululizo wa ole kwa wale wanaoupinga Ufalme wa Mungu. Hivyo, Mashahidi wa Yehova wamekuwa wakitangaza ujumbe wa hukumu unaofananishwa na “mvua ya mawe na moto,” wakifunua hukumu za Mungu dhidi ya sehemu mbalimbali za ulimwengu mwovu wa Shetani. (Ufu. 8:7, 13) Watu wanahitaji kujua kwamba mwisho uko karibu ili waweze kufanya mabadiliko ya haraka katika maisha yao na kuokoka siku ya hasira ya Yehova. (Sef. 2:2, 3) Lakini ujumbe huo haupendwi na wengi. Ili kuutangaza tunahitaji kuwa na ujasiri. Wakati wa dhiki kuu, ujumbe wa hukumu ya mwisho utakuwa mkali zaidi.—Ufu. 16:21.

20. Tutazungumzia nini katika makala mbili zinazofuata?

²⁰ Kwa kweli, tunahitaji kutii “maneno ya unabii huu” kwa sababu tunahusika katika utimizo wa mambo tunayosoma kwenye kitabu cha Ufunuo. (Ufu. 1:3) Lakini tunawezaje kuvumilia kwa uaminifu mateso na kuendelea kutimiza sehemu yetu katika kutangaza kwa ujasiri ujumbe huo? Tutaimarishwa na mambo mawili: kwanza, mambo ambayo kitabu cha Ufunuo kinafunua kuhusu maadui wa Mungu, na pili, baraka za wakati ujao ambazo tutapata ikiwa tutaendelea kuwa waaminifu. Tutazungumzia mambo hayo katika makala mbili zinazofuata.