Wapanda-farasi hao na miendo yao wanatuacha katika mshangao. Lakini, farasi na wapandaji walioshuhudiwa na mwandikaji wa Ufunuo ni wenye kusisimua kuwatazama! Ni wa fumbo na pia wa kutisha. Wapanda-farasi hao wamejulikana kote kote kuwa Wapanda-farasi wa Ufunuo.

Wazia kwamba sasa wapanda-farasi wanne wanakuja mbio kwa kishindo wakielekea mahali ulipo, mmoja hata akipunga-punga upanga! Ebu tazama rangi ya farasi wanaowaendesha. Kila mmoja ni tofauti. Farasi mmoja ni mweupe, mwingine mwekundu, mwingine mweusi, na kuna mwingine mwenye rangi ya ugonjwa-ugonjwa iliyo mchanganyiko wa kijani na manjano. Hakika wanaonekana wa ajabu-ajabu na wa kifumbo!

Fuatana na masimulizi yenye kwenda kasi kuhusu yaliyoonwa na mwandikaji wa Biblia, mtume Yohana. Yeye anasema: “Ndipo nikaona farasi mweupe, na mwenye kumpanda alichukua uta. Alipewa taji, naye akaendelea kuendesha akiwa mshindi ili akashinde. . . . Na farasi mwingine akatokea, wa rangi iliyo nyekundu-nyangavu, na mwenye kumpanda alipewa uwezo wa kuondoa amani duniani, na kufanya watu wachinjane; yeye alipewa upanga mkubwa. . . . Na kule nikaona farasi mweusi, na mwendeshaji wake alikuwa na jozi ya mizani katika mkono wake, nami nikasikia sauti . . . ikisema, ‘Ngano ya kisaga kimoja kwa [mshahara wa siku moja], na shayiri ya visaga vitatu kwa [mshahara wa siku moja] ‘ . . . Na kule nikaona farasi wa rangi ya majivu, na jina la mwendeshaji wake lilikuwa Kifo, na Hadesi ilimfuata. Wakapewa uwezo juu ya robo moja ya dunia, ili waue watu kwa upanga, njaa, kifo, na wanyama-mwitu wa dunia.”​—Ufunuo 6:2-8, An American Translation.

Tangu njozi hiyo ilipoandikwa mara ya kwanza, maana yake imekuwa isiyoeleweka na wasomaji wengi sana. Ni mambo gani yanayofananishwa na farasi na waendeshaji wao wa kifumbo? Uendeshaji wao ulianza wakati gani? Je, uendeshaji wao una uhusiano wo wote na maisha leo? Maelezo ya namna nyingi yametolewa juu ya mambo yanayoweza kuwa yanafananishwa na farasi hao na waendeshaji wao, na juu ya wakati uendeshaji wao unapotukia.

Utofautiano ulio mkubwa zaidi unapatikana katika fasiri zinazohusu yule farasi mweupe na mwendeshaji wake. Kwa mfano, kitabu New Catholic Encyclopedia kinaeleza kwamba yule farasi mweupe anafananisha ‘ama ushindi wa gospeli ama wa ukoloni.’

Katika kitabu Daniel and the Revelation, Uriah Smith anatoa fasiri hii: “Farasi mweupe . . . ni mfano unaofaa wa shangwe za ushindi za gospeli katika karne ya kwanza . . . Weupe wa farasi unamaanisha utakato wa imani katika kipindi hicho.”

The Expositor’s Bible inasema: “Chini ya yule mwendeshaji wa kwanza, jambo tunalojulishwa si utu wa Kristo bali ni kuksudi lake katika hatua ya mwanzo kabisa ya mwendo walo wenye ushindi, na tunapewa ahadi ya kwamba kusudi hilo litapata ushindi wakati ujao. . . . Tunajifunza kwamba kusudi hilo limo ulimwenguni, kwamba ufalme huo umo katikati yetu, na kwamba wale wanaoupinga watapatwa na ushinde mkubwa.” Lakini, Woodrow Kroll, wa shirika la Hazina ya Wayahudi Wakristo, anatoa maoni ya kwamba mpandaji wa yule farasi mweupe ni yule mpinga Kristo.

NI NANI anayeweza kulifumbua fumbo la wale wapanda-farasi wa Ufunuo? Katika Biblia, kwenye Danieli 2:47 (NW), Yehova Mungu anaitwa “Mfumbua siri.” Kwa kuwa ndiye aliyeongoza uandikaji wa Biblia kwa roho yake, kutia na ile njozi inayowahusu wapanda-farasi, anaweza kutoa majibu tunayohitaji. Basi, kwa kulichunguza Neno lake lililofunuliwa ili tupate habari, tunaweza kuifumbua maana ya wale farasi wenye rangi pamoja na wapandaji wao.​—Amosi 3:7; 2 Timotheo 3:16; 2 Petro 1:21.

Mistari ya kwanza mitatu ya Ufunuo inatoa ufunguo wa kusaidia kulifumbua fumbo hilo. Inaonyesha kwamba mfululizo huo wa njozi ulihusu matukio ya wakati ujao, yaani, wakati wa baada ya mwaka ule wa 96 W.K. ambao mtume Yohana aliona mambo yote hayo na kuyaandika. Hilo linapatana na maneno yaliyo kwenye Ufunuo 1:10 yanayosema kwamba mambo yaliyoonekana katika njozi yangetukia baada tu ya “siku ya Bwana” kuanza.​—Linganisha 1 Wakorintho 1:8; 5:5.

Tukiwa na hayo akilini mwetu, tutawachunguza farasi hao na wenye kuwapanda. Kwanza, inafaa tufahamu kwa usahihi yule farasi mweupe ni nini na mwenye kumpanda. Hapo ndipo maana ya wale waendeshaji-farasi wengine itakapolingana sawasawa na mahali itakapowekwa.

Fasiri Zachunguzwa

Katika makala iliyotangulia, ilisemwa kwamba fasiri moja juu ya yule farasi mweupe na mpandaji wake ni kwamba walifananisha ‘ama ushindi wa gospeli ama wa ukoloni.’ Lakini ulimwengu haujageuzwa ufuate gospeli (habari njema) juu ya Kristo na makusudi ya Mungu yanayomzunguka. Na kwa hakika, ukoloni haukupanda na kusonga mbele kwa ushindi. Bali, umekuwa ukivunjika-vunjika, kubomoka vipande vipande, katika karne hii.

Namna gani juu ya ile fasiri ya kwamba farasi mweupe anafananisha ushindi wa gospeli na utakato wa imani katika karne ya kwanza? Fasiri hiyo inakosa kuangalia uhakika wa kwamba njozi hiyo ilikuwa ya mambo yatakayotukia wakati ujao. Na kwa kuwa Yohana aliandika njozi hiyo akiwa mfungwa uhamishoni katika kisiwa cha Patmo mwaka 96 wa Wakati wa Kawaida wetu, haingeweza kufananisha kitu cho chote kilichohusiana na karne ya kwanza.

Elezo jingine lilikuwa kwamba yule farasi mweupe anatujulisha kusudi la Kristo wala si utu wake na kwamba Ufalme wake ‘umo katikati’ yetu, yaani, katika mioyo yetu. Lakini kusudi la Yesu Kristo na Ukristo havikuanza wakati fulani baada ya kuandikwa kwa Ufunuo. Bali, kusudi hilo lilikuwa limekwisha kuonekana sana kati ya Wakristo wa kwanza kabla Yohana hajaandika.

Pia, wakati Yesu aliposema kwamba “ufalme wa Mungu u miongoni mwenu,” alikuwa akiambia Mafarisayo wanafiki wa kidini kwa kujibu ulizo walilokuwa wametokeza. Yesu hakuwa akisema na wafuasi wake waaminifu na kuwaambia kwamba Ufalme ulikuwa kitu ‘kilicho miongoni mwao’ katika maana ya kuwa katika mioyo yao. Bali, alikuwa akiwaambia Mafarisayo wasioamini ya kwamba yeye, Yesu, akiwa mwakilishi wa Ufalme wa Mungu wa wakati ujao, alikuwa kati yao katika pindi hiyo.​—Luka 17:21, NW; ona pia The Jerusalem Bible na The New English Bible.

Namna gani wazo la kwamba mpandaji aliye juu ya farasi mweupe ni yule mpinga Kristo? Hakuna mahali Biblia inaposema kwamba mpinga Kristo atajipenyeza sana hata iweze kusemwa juu yake kwamba “alienda akishinda na ili kukamilisha ushindi wake,” kama ilivyosemwa juu ya mpandaji wa yule farasi mweupe. (Ufunuo 6:2, NW) Ni wazi kwamba ye yote yule aliyeketi juu ya farasi mweupe atasonga mbele hali akishinda kabisa. Ushindi wake hautakosa. Adui zake wote wataharibiwa.

Vidokezi vya Biblia Vinasaidia Kumtambulisha

Kitambulisho kisichoweza kuwa na kosa juu ya mpandaji wa yule farasi mweupe kinatolewa baadaye na “Mfunua siri” katika njozi iyo hiyo. Kwenye Ufunuo 19:11-16, farasi mweupe anaonekana tena, na safari hii mpandaji wake anatambulishwa waziwazi.

Uhakika wa kwamba farasi mweupe anaonekana mara mbili katika mfululizo ule ule wa njozi unaonyesha kwamba ni farasi yule yule mmoja, na kwamba kazi au utendaji mbali-mbali unaofanywa na mpandaji huyo ndizo zinazofananishwa. Katika ile tamasha ya pili mpandaji anatajwa jina. Anaitwa “Mwaminifu na Wa-kweli,” “Neno la Mungu,” na ‘Mfalme wa Wafalme, na Bwana wa Mabwana.’

Mitajo hiyo ya cheo haituachii shaka juu ya ni nani aliye mpandaji wa yule farasi mweupe. Si mwingine ila Bwana Yesu Kristo mwenyewe! (Linganisha Ufunuo 17:14.) Lakini anapanda katika wakati gani wa maisha yake? Lazima uwe ni wakati fulani baada ya mwisho wa karne ya kwanza, wakati ambao njozi ya Ufunuo ilitolewa. Angalia, pia, kwamba sasa anapewa taji ya kifalme. Kwa hiyo wakati fulani ujao Yesu Kristo alipaswa aanze kuwa na daraka la pekee akiwa Mfalme, au Mtawala. Na akiwa katika cheo hicho, anafananishwa pia na shujaa wa vita mwenye uta, anayekusudiwa asonge mbele hali “akishinda na ili kukamilisha ushindi wake.”

Pia uhakika ufuatao unaonyesha kwamba hilo lingepasa kuwa tukio la wakati ujao: Kufikia wakati wa ile njozi ya ufunuo, miaka zaidi ya 60 ilikuwa imepita tangu Yesu alipomaliza maisha yake ya kidunia, akafufuliwa kwa wafu, na kupaa mbinguni. Aliporudi mbinguni, Yesu aliambiwa angoje kwenye mkono wa kuume wa Mungu mpaka ufike wakati huo ambao adui zake wangefanywa wawe ‘kiti cha kuwekea miguu yake.’​—Waebrania 10:12, 13, NW.

Uendeshaji Waanza

Kwa hiyo kuendeshwa kwa yule farasi mweupe kulipasa kuanze wakati fulani wa baadaye ambapo Yesu Kristo angetawazwa awe Mfalme wa kimbingu wa Ufalme wa Mungu. Wakati huo Mungu angemtuma aende akiwa na amri hii: “Nenda hali ukitiisha katikati ya adui zako.” (Zaburi 110:2, NW) Lakini jambo hilo linatukia wakati gani?

Kuvikwa taji kwa Yesu Kristo akiwa Mfalme wa kimbingu kunasimuliwa kwenye Zaburi 45:3-7. Halafu katika Waebrania 1:8, 9 mtume Paulo anatumia maneno ya zaburi hiyo na kuhusianisha mistari 6 na 7 na Mwana wa Mungu, Yesu Kristo. Habari zenye maelezo marefu na uthibitisho mbalimbali wa Kimaandiko uliochapishwa na Mashahidi wa Yehova zinaonyesha kwamba kuvikwa taji kwa Yesu Kristo mbinguni kulitukia mwishoni mwa Majira ya Mataifa, “nyakati zilizowekwa za mataifa,” mwaka 1914 W.K.​—Luka 21:24.a

Kwa hiyo, fasiri yo yote inayoonyesha kwamba uendeshaji wa wale wapanda-farasi ulianza kabla ya mwaka 1914 haingeweza kuwa sahihi. Pia, kwa kuwa mpandaji wa yule farasi mweupe ndiye aliyewatangulia wengine, farasi wale wengine na wapandaji wao wangefananisha matukio ambayo yangetukia pamoja na upandaji wake, au muda fulani baada ya hapo. Basi bila shaka uendeshaji wa wapanda-farasi hao wanne unaanza mwanzoni mwa “wakati wa mwisho” mwaka 1914 na kuendelea. Ni tangu wakati huo ushuhuda umeonekana wa kwamba hizi ni “siku za mwisho.”​—Danieli 12:4; 2 Timotheo 3:1-5, 13.