Kulifumbua Fumbo la Wapanda-Farasi

NI NANI anayeweza kulifumbua fumbo la wale wapanda-farasi wa Ufunuo? Katika Biblia, kwenye Danieli 2:47 (NW), Yehova Mungu anaitwa “Mfumbua siri.” Kwa kuwa ndiye aliyeongoza uandikaji wa Biblia kwa roho yake, kutia na ile njozi inayowahusu wapanda-farasi, anaweza kutoa majibu tunayohitaji. Basi, kwa kulichunguza Neno lake lililofunuliwa ili tupate habari, tunaweza kuifumbua maana ya wale farasi wenye rangi pamoja na wapandaji wao.​—Amosi 3:7; 2 Timotheo 3:16; 2 Petro 1:21.

Mistari ya kwanza mitatu ya Ufunuo inatoa ufunguo wa kusaidia kulifumbua fumbo hilo. Inaonyesha kwamba mfululizo huo wa njozi ulihusu matukio ya wakati ujao, yaani, wakati wa baada ya mwaka ule wa 96 W.K. ambao mtume Yohana aliona mambo yote hayo na kuyaandika. Hilo linapatana na maneno yaliyo kwenye Ufunuo 1:10 yanayosema kwamba mambo yaliyoonekana katika njozi yangetukia baada tu ya “siku ya Bwana” kuanza.​—Linganisha 1 Wakorintho 1:8; 5:5.

Tukiwa na hayo akilini mwetu, tutawachunguza farasi hao na wenye kuwapanda. Kwanza, inafaa tufahamu kwa usahihi yule farasi mweupe ni nini na mwenye kumpanda. Hapo ndipo maana ya wale waendeshaji-farasi wengine itakapolingana sawasawa na mahali itakapowekwa.

Fasiri Zachunguzwa

Katika makala iliyotangulia, ilisemwa kwamba fasiri moja juu ya yule farasi mweupe na mpandaji wake ni kwamba walifananisha ‘ama ushindi wa gospeli ama wa ukoloni.’ Lakini ulimwengu haujageuzwa ufuate gospeli (habari njema) juu ya Kristo na makusudi ya Mungu yanayomzunguka. Na kwa hakika, ukoloni haukupanda na kusonga mbele kwa ushindi. Bali, umekuwa ukivunjika-vunjika, kubomoka vipande vipande, katika karne hii.

Namna gani juu ya ile fasiri ya kwamba farasi mweupe anafananisha ushindi wa gospeli na utakato wa imani katika karne ya kwanza? Fasiri hiyo inakosa kuangalia uhakika wa kwamba njozi hiyo ilikuwa ya mambo yatakayotukia wakati ujao. Na kwa kuwa Yohana aliandika njozi hiyo akiwa mfungwa uhamishoni katika kisiwa cha Patmo mwaka 96 wa Wakati wa Kawaida wetu, haingeweza kufananisha kitu cho chote kilichohusiana na karne ya kwanza.

Elezo jingine lilikuwa kwamba yule farasi mweupe anatujulisha kusudi la Kristo wala si utu wake na kwamba Ufalme wake ‘umo katikati’ yetu, yaani, katika mioyo yetu. Lakini kusudi la Yesu Kristo na Ukristo havikuanza wakati fulani baada ya kuandikwa kwa Ufunuo. Bali, kusudi hilo lilikuwa limekwisha kuonekana sana kati ya Wakristo wa kwanza kabla Yohana hajaandika.

Pia, wakati Yesu aliposema kwamba “ufalme wa Mungu u miongoni mwenu,” alikuwa akiambia Mafarisayo wanafiki wa kidini kwa kujibu ulizo walilokuwa wametokeza. Yesu hakuwa akisema na wafuasi wake waaminifu na kuwaambia kwamba Ufalme ulikuwa kitu ‘kilicho miongoni mwao’ katika maana ya kuwa katika mioyo yao. Bali, alikuwa akiwaambia Mafarisayo wasioamini ya kwamba yeye, Yesu, akiwa mwakilishi wa Ufalme wa Mungu wa wakati ujao, alikuwa kati yao katika pindi hiyo.​—Luka 17:21, NW; ona pia The Jerusalem Bible na The New English Bible.

Namna gani wazo la kwamba mpandaji aliye juu ya farasi mweupe ni yule mpinga Kristo? Hakuna mahali Biblia inaposema kwamba mpinga Kristo atajipenyeza sana hata iweze kusemwa juu yake kwamba “alienda akishinda na ili kukamilisha ushindi wake,” kama ilivyosemwa juu ya mpandaji wa yule farasi mweupe. (Ufunuo 6:2, NW) Ni wazi kwamba ye yote yule aliyeketi juu ya farasi mweupe atasonga mbele hali akishinda kabisa. Ushindi wake hautakosa. Adui zake wote wataharibiwa.

Vidokezi vya Biblia Vinasaidia Kumtambulisha

Kitambulisho kisichoweza kuwa na kosa juu ya mpandaji wa yule farasi mweupe kinatolewa baadaye na “Mfunua siri” katika njozi iyo hiyo. Kwenye Ufunuo 19:11-16, farasi mweupe anaonekana tena, na safari hii mpandaji wake anatambulishwa waziwazi.

Uhakika wa kwamba farasi mweupe anaonekana mara mbili katika mfululizo ule ule wa njozi unaonyesha kwamba ni farasi yule yule mmoja, na kwamba kazi au utendaji mbali-mbali unaofanywa na mpandaji huyo ndizo zinazofananishwa. Katika ile tamasha ya pili mpandaji anatajwa jina. Anaitwa “Mwaminifu na Wa-kweli,” “Neno la Mungu,” na ‘Mfalme wa Wafalme, na Bwana wa Mabwana.’

Mitajo hiyo ya cheo haituachii shaka juu ya ni nani aliye mpandaji wa yule farasi mweupe. Si mwingine ila Bwana Yesu Kristo mwenyewe! (Linganisha Ufunuo 17:14.) Lakini anapanda katika wakati gani wa maisha yake? Lazima uwe ni wakati fulani baada ya mwisho wa karne ya kwanza, wakati ambao njozi ya Ufunuo ilitolewa. Angalia, pia, kwamba sasa anapewa taji ya kifalme. Kwa hiyo wakati fulani ujao Yesu Kristo alipaswa aanze kuwa na daraka la pekee akiwa Mfalme, au Mtawala. Na akiwa katika cheo hicho, anafananishwa pia na shujaa wa vita mwenye uta, anayekusudiwa asonge mbele hali “akishinda na ili kukamilisha ushindi wake.”

Pia uhakika ufuatao unaonyesha kwamba hilo lingepasa kuwa tukio la wakati ujao: Kufikia wakati wa ile njozi ya ufunuo, miaka zaidi ya 60 ilikuwa imepita tangu Yesu alipomaliza maisha yake ya kidunia, akafufuliwa kwa wafu, na kupaa mbinguni. Aliporudi mbinguni, Yesu aliambiwa angoje kwenye mkono wa kuume wa Mungu mpaka ufike wakati huo ambao adui zake wangefanywa wawe ‘kiti cha kuwekea miguu yake.’​—Waebrania 10:12, 13, NW.

Uendeshaji Waanza

Kwa hiyo kuendeshwa kwa yule farasi mweupe kulipasa kuanze wakati fulani wa baadaye ambapo Yesu Kristo angetawazwa awe Mfalme wa kimbingu wa Ufalme wa Mungu. Wakati huo Mungu angemtuma aende akiwa na amri hii: “Nenda hali ukitiisha katikati ya adui zako.” (Zaburi 110:2, NW) Lakini jambo hilo linatukia wakati gani?

Kuvikwa taji kwa Yesu Kristo akiwa Mfalme wa kimbingu kunasimuliwa kwenye Zaburi 45:3-7. Halafu katika Waebrania 1:8, 9 mtume Paulo anatumia maneno ya zaburi hiyo na kuhusianisha mistari 6 na 7 na Mwana wa Mungu, Yesu Kristo. Habari zenye maelezo marefu na uthibitisho mbalimbali wa Kimaandiko uliochapishwa na Mashahidi wa Yehova zinaonyesha kwamba kuvikwa taji kwa Yesu Kristo mbinguni kulitukia mwishoni mwa Majira ya Mataifa, “nyakati zilizowekwa za mataifa,” mwaka 1914 W.K.​—Luka 21:24.a

Kwa hiyo, fasiri yo yote inayoonyesha kwamba uendeshaji wa wale wapanda-farasi ulianza kabla ya mwaka 1914 haingeweza kuwa sahihi. Pia, kwa kuwa mpandaji wa yule farasi mweupe ndiye aliyewatangulia wengine, farasi wale wengine na wapandaji wao wangefananisha matukio ambayo yangetukia pamoja na upandaji wake, au muda fulani baada ya hapo. Basi bila shaka uendeshaji wa wapanda-farasi hao wanne unaanza mwanzoni mwa “wakati wa mwisho” mwaka 1914 na kuendelea. Ni tangu wakati huo ushuhuda umeonekana wa kwamba hizi ni “siku za mwisho.”​—Danieli 12:4; 2 Timotheo 3:1-5, 13.

Farasi Wale Wengine na Wapandaji Wao

Farasi yule wa pili ni wa rangi iliyo “nyekundu-nyangavu,” au ni “mwenye rangi ya moto.” (Ufunuo 6:3, 4, NW) Mpandaji wake “alipewa ruhusa kuondoa amani katika dunia ili wapate kuchinjana.” Alipewa “upanga mkubwa.” Ikawa hivyo wakati mwaka 1914 ulipoona mwanzo wa vita iliyo mbaya zaidi katika historia yote ya kibinadamu, hiyo ikiwa ndiyo vita ya kwanza ya duniani pote. Huko nyuma ilikuwa ikiitwa “Ile Vita Kuu.” Miaka 21 tu baadaye Vita ya Ulimwengu ya Pili ilianza, nayo ikawa yenye kuleta hasara kubwa kuliko Vita ya Ulimwengu ya Kwanza. Tangu wakati huo kumekuwa na vita vya daima. Kwa ujumla, tangu mwaka 1914, vita vimeua watu wapatao milioni 100.

Farasi wa tatu ni mweusi, na mpandaji wake ana jozi moja ya mizani mkononi mwake. (Ufunuo 6:5, 6) Sauti inapaazwa ikisema kwamba mshahara wa siku nzima ungehitajiwa ili kununua kisaga kimoja tu (lita 1.1) cha ngano au visaga vitatu vya ile nafaka ya bei ndogo zaidi, shayiri. Jambo hilo linasimulia vya kufaa upungufu wa chakula wa kadiri isiyopata kuwapo kabla ya hapo. Ndivyo imekuwa tangu mwaka 1914. Tangu pale pale mwanzoni mwa kutokea kwa Vita ya Ulimwengu ya Kwanza, bei za chakula ziliongezeka sana. Mamilioni ya watu waliuawa na njaa. Tangu wakati huo, upungufu wa chakula umeendelea bila kukoma. Inakadiriwa kwamba sasa watu wapatao milioni 450 ni wenye njaa kufikia hatua ya kufa, na hesabu inayofikia bilioni moja hawana chakula cha kutosha. Mara kwa mara hali hiyo isiyo na tumaini zuri inazidishwa na njaa kuu na vifo vingi sana kama vile vilivyoripotiwa kutoka Ethiopia miaka ya karibuni.

Kwa habari ya yule farasi wa nne, tunaona kwamba yeye ni “wa rangi ya kijivu-jivu,” mwenye kuonekana mgonjwa-mgonjwa. Jina la mpandaji wake ni “Kifo.” (Ufunuo 6:7, 8, NW) Huyo anafananisha vizuri hesabu kubwa sana ya vifo vilivyo-tokea tangu mwaka 1914 kwa kusababishwa na matukio ya asili, kama upungufu wa chakula na njaa, vita na jeuri, tauni na magonjwa. Homa kuu ya Kispania iliyotokea ulimwenguni pote mwishoni mwa Vita ya Ulimwengu ya Kwanza ilisababisha vifo zaidi ya milioni 20. Sasa ugonjwa wa moyo, kansa, na magonjwa mengine mengi yanaua mamilioni ya watu katika vifo vya mapema.

Matukio yaliyofananishwa na farasi hao na wapandaji hao yanatajwa pia katika unabii mwingine wa Yesu unaolingana na huo kuhusu wakati wetu. Yeye alisema kwamba katika “umalizio wa mfumo wa mambo,” ambamo sasa tunaishi, kungekuwa na vita ya duniani pote kwa kuwa ‘taifa lingeinuka juu ya taifa na ufalme juu ya ufalme.’ Alitabiri “kuongezeka kwa kutokutii sheria” na “mahali hapa na mahali hapa magonjwa ya kipuku na upungufu wa chakula.”​—Mathayo 24:1-12; Luka 21:10, 11, NW.

Je! Kulikuwa na Farasi wa Tano?

Ufunuo 6:8 (NW) unasema hivi: “Nami nikaona, na, tazama! farasi wa rangi ya kijivu; na yule aliyeketi juu yake alikuwa na jina Kifo. Na Hadesi alikuwa akimfuata kwa ukaribu.” Kwa kutegemea msingi huo, wengine wamedokeza kwamba kwa kuwa watu wa kwanza wanne waliotajwa wamepanda farasi, je, hata yule wa tano hawi amepanda farasi?

Biblia haisemi hivyo. Katika maandishi ya Kigiriki neno la kusema “farasi” halipatikani kwenye Ufunuo 6:8 kuhusiana na “Hadesi.” Kwa hiyo, tafsiri zilizo nyingi za Biblia hazilitii ndani neno “faras” linapotaja yule mtu wa tano. Kwa hiyo inatosha kujua kwamba Hadesi, kaburi la ujumla la wanadamu, ilikuwa ikiwafuata wale farasi watatu na wapandaji wao waliotangulia, ikiwakusanya wote waliouawa nao.

Njozi Hiyo Inakuwa na Matokeo Gani Kwako?

Hakika ni jambo la kusisimua kuishi katika wakati ambao njozi hii ya uendeshaji wa wale wapanda-farasi wanne wa Ufunuo inatimizwa kwa njia ya kutazamisha. Lakini pia ni wakati wa kuchukua mambo kwa uzito sana, wakati unaohitaji mtu ajichunguze binafsi. Kwa sababu gani? Kwa sababu kila mtu aliye duniani anapatwa na matokeo ya uendeshaji huo wa mfano. Ndiyo, wewe na wapendwa wako mnahusika nyote. Jinsi gani?

Ulizo hilo linatokeza sehemu nyingine nzito ya habari hii litakalojibiwa katika toleo linalofuata la Mnara wa Mlinzi: “Matokeo ya Uendeshaji Wao Kwako.” Usilikose jibu hilo lenye kuvutia sana.

[Maelezo ya Chini]

[Picha katika ukurasa wa 5]

1914—“Mfalme wa wafalme” aendesha farasi mweupe wake

[Picha katika ukurasa wa 7]

Tangu mwaka 1914, Hadesi imevuna mavuno yenye ukatili mkubwa ikifuata wale wapanda-farasi waliotangulia wa Vita, Njaa, na Magonjwa ya Kipuku