Mbingu

Je, sisi sote tulikuwa katika makao ya kiroho kabla hatujazaliwa tukiwa wanadamu?

Yoh. 8:23: “[Yesu Kristo alisema:] ‘Ninyi mnatoka kwenye makao ya chini; mimi ninatoka kwenye makao ya juu. Ninyi mnatoka katika ulimwengu huu; mimi sitoki katika ulimwengu huu.’” (Yesu alitoka katika makao ya kiroho. Lakini, kama Yesu alivyosema, wanadamu wengine hawakutoka huko.)

Rom. 9:10-12: “Rebeka alipochukua mimba ya mapacha . . . Walipokuwa bado hawajazaliwa wala kufanya jambo lolote jema au baya, ili kusudi la Mungu kuhusu kuchagua liendelee kutegemea, si matendo, bali Yeye ambaye huita, Rebeka aliambiwa: ‘Mkubwa atakuwa mtumwa wa mdogo.’” (Bila shaka, ikiwa mapacha hao, Yakobo na Esau, walikuwa wameishi katika makao ya kiroho kwa hakika wangekuwa na sifa ya kuwa wema au wabaya ikitegemea mwenendo wao huko, sivyo? Lakini hawakuwa na sifa zozote za aina hiyo mpaka baada ya kuzaliwa kwao wakiwa wanadamu.)

Je, watu wote wema huenda mbinguni?

Mdo. 2:34: “Daudi [ambaye Biblia inasema kwamba ni ‘mtu aliyekubalika kwa moyo wa Yehova’] hakupanda mbinguni.”

Mt. 11:11: “Kwa kweli nawaambia ninyi, Kati ya wale waliozaliwa na wanawake hajatokea mkuu kuliko Yohana Mbatizaji; lakini mtu aliye mdogo zaidi katika ufalme wa mbinguni ni mkuu kuliko yeye.” (Kwa hiyo Yohana hakuenda mbinguni alipokufa.)

Zab. 37:9, 11, 29: “Watenda-maovu watakatiliwa mbali, bali wale wanaomtumaini Yehova ndio watakaoimiliki dunia . . . Wapole wataimiliki dunia, nao watapata furaha yao tele katika wingi wa amani. Waadilifu wenyewe wataimiliki dunia, nao watakaa milele juu yake.”

Kama Adamu hangefanya dhambi, je, mwishowe angeenda mbinguni?

Mwa. 1:26: “Mungu akaendelea kusema: ‘Na tufanye mtu kwa mfano wetu, kwa sura yetu, nao watawale samaki wa baharini na viumbe vinavyoruka vya mbinguni na wanyama wa kufugwa na dunia yote na kila mnyama anayetembea juu ya dunia.’” (Mungu alikusudia Adamu aitunze dunia na wanyama waliomo. Hakuna lolote linalosemwa kuhusu kwenda kwake mbinguni.)

Mwa. 2:16, 17: “Yehova Mungu akamwekea mtu amri hii: ‘Matunda ya kila mti wa bustani unaweza kula mpaka ushibe. Lakini kuhusu matunda ya mti wa ujuzi wa mema na mabaya usile, kwa maana siku utakapokula, utakufa hakika.’” (Hapo mwanzoni Yehova hakukusudia mwanadamu afe siku moja. Amri ya Mungu iliyonukuliwa hapa inaonyesha kwamba alimwonya juu ya tendo ambalo lingemletea kifo. Kifo kingekuwa adhabu ya kutotii, si mlango wa kuingia katika maisha bora mbinguni. Ikiwa mwanadamu angetii, angeishi milele katika Paradiso ambayo Mungu alikuwa amempa. Ona pia Isaya 45:18.)

Je, ni lazima mtu aende mbinguni ndipo awe na maisha yenye furaha kweli kweli?

Zab. 37:11: “Wapole wataimiliki dunia, nao watapata furaha yao tele katika wingi wa amani.”

Ufu. 21:1-4: “Nikaona mbingu mpya na dunia mpya . . . Nikasikia sauti kubwa kutoka katika kile kiti cha ufalme ikisema: ‘Tazama! Hema la Mungu liko pamoja na wanadamu, naye atakaa pamoja nao, nao watakuwa watu wake. Na Mungu mwenyewe atakuwa pamoja nao. Naye atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.’”

Mika 4:3, 4: “Hawatainua upanga, taifa juu ya taifa, wala hawatajifunza vita tena. Nao wataketi, kila mtu chini ya mzabibu wake na chini ya mtini wake, wala hakutakuwa na mtu yeyote anayewatetemesha; kwa maana kinywa cha Yehova wa majeshi kimesema hivyo.”

Je, Yesu aliwafungulia njia ya kwenda mbinguni wale waliokuwa wamekufa kabla ya kifo chake mwenyewe?

Andiko la 1 Pet. 3:19, 20 linamaanisha nini? 1 Pet. 3:19, 20: “Katika hali hiyo [katika roho, baada ya kufufuliwa] pia [Yesu] alienda zake na kuwahubiria roho walio gerezani, ambao wakati fulani hawakuwa watiifu wakati subira ya Mungu ilipokuwa ikingoja katika siku za Noa, safina ilipokuwa ikijengwa, ambayo ndani yake watu wachache, yaani, nafsi [“watu,” UV, ZSB, BHN, VB] nane, walichukuliwa salama kupitia maji.” (Je, hao “roho walio gerezani” walikuwa nafsi za wanadamu waliokataa kutii mahubiri ya Noa kabla ya Gharika, na je, sasa walikuwa wamefunguliwa njia ya kwenda mbinguni? Unapolinganisha andiko la 2 Petro 2:4 na Yuda 6 na Mwanzo 6:2-4 utaona kwamba roho hao walikuwa malaika, wana wa Mungu waliokuwa wamevaa miili na kuoa katika siku za Noa. Katika 1 Petro 3:19, 20 neno la Kigiriki lililotafsiriwa “roho” ni pneuʹma·sin, lakini neno lililotafsiriwa “nafsi” ni psy·khaiʹ. “Roho” hao hawakuwa nafsi zilizojivua mwili bali walikuwa malaika wasiotii; “nafsi” zinazotajwa hapa zilikuwa watu walio hai, wanadamu, Noa na nyumba yake. Kwa hiyo lazima ‘roho hao walio gerezani’ walihubiriwa ujumbe wa hukumu.)

Andiko la 1 Petro 4:6 linamaanisha nini? “Kwa kweli, kwa kusudi hili habari njema ilitangazwa kwa wafu pia, ili wahukumiwe kuhusiana na mwili kwa maoni ya wanadamu lakini waishi kuhusiana na roho kwa maoni ya Mungu.” (Je, “wafu” hao walikuwa ni watu waliokufa kabla ya Kristo kufa? Kama ilivyokwisha kuonyeshwa, wafu si “roho walio gerezani.” Roho hao walikuwa malaika wasiotii. Na mahubiri hayo hayangeweza kuwasaidia wanadamu waliokufa kimwili kwa sababu, kama andiko la Mhubiri 9:5 linavyosema, wafu “hawajui lolote kamwe,” na andiko la Zaburi 146:4 linaongezea kwamba mtu anapokufa “mawazo yake hupotea.” Lakini andiko la Waefeso 2:1-7, 17 linamaanisha watu waliokuwa wafu kiroho na ambao walianza kuishi kiroho walipokubali habari njema.)

Je, “Agano Jipya” huonyesha kwamba Wakristo wote wana tumaini la kuishi mbinguni?

Yoh. 14:2, 3: “Katika nyumba ya Baba yangu mna makao mengi. Kama sivyo, ningaliwaambia ninyi, kwa sababu ninaenda kuwatayarishia ninyi mahali. Pia, nikienda na kuwatayarishia ninyi mahali, nitakuja tena nami nitawapokea ninyi nyumbani kwangu mwenyewe, ili mahali nilipo mimi, ninyi pia muwe hapo.” (Hapa Yesu anaonyesha kwamba mitume wake waaminifu, aliokuwa akisema nao, baada ya muda fulani wangekuwa katika “nyumba” ya Baba yake, mbinguni, pamoja na Yesu. Lakini yeye hasemi hapa ni wangapi wengine ambao pia wangeenda mbinguni.)

Yoh. 1:12, 13: “Wengi kadiri ileile waliompokea [Yesu], aliwapa mamlaka ya kuwa watoto wa Mungu, kwa sababu walikuwa wakionyesha imani katika jina lake; nao walizaliwa, si kutokana na damu au kutokana na mapenzi ya mwili au kutokana na mapenzi ya mwanadamu, bali kutokana na Mungu.” (Ona kwamba muktadha, katika mstari wa 11, unaelekeza kwa Wayahudi, ‘watu wa Yesu mwenyewe.’ Wengi wao kadiri waliompokea alipokuja kwao katika karne ya kwanza wakawa watoto wa Mungu, wakiwa na tumaini la uzima wa mbinguni. Maneno katika andiko hilo yanarejezea tendo katika wakati uliopita, kwa hiyo fungu hilo halielekezi kwa watu wote ambao wamekuwa Wakristo tangu hapo.)

Rom. 8:14, 16, 17: “Wote wanaoongozwa na roho ya Mungu, hao ndio wana wa Mungu. Roho yenyewe hutoa ushahidi pamoja na roho yetu kwamba sisi ni watoto wa Mungu. Basi, ikiwa sisi ni watoto, sisi pia ni warithi: warithi wa Mungu kwelikweli, lakini warithi pamoja na Kristo, mradi tu tunateseka pamoja ili pia tutukuzwe pamoja.” (Wakati maneno hayo yalipoandikwa, wote walioongozwa na roho ya Mungu walikuwa wana wa Mungu ambao tumaini lao lilikuwa kutukuzwa pamoja na Kristo. Lakini hali haikuwa hivyo sikuzote kabla ya wakati huo. Andiko la Luka 1:15 linasema kwamba Yohana Mbatizaji angejawa na roho takatifu, lakini andiko la Mathayo 11:11 linaonyesha wazi kwamba yeye hataushiriki utukufu wa Ufalme wa mbinguni. Basi, pia, baada ya kukusanywa kwa warithi wa Ufalme wa mbinguni, kungekuwako wengine ambao wangemtumikia Mungu wakiwa wafuasi wa Mwanawe na bado wasishiriki katika utukufu wa mbinguni.)

Ni mistari gani hususa katika “Agano Jipya” inayotaja uandalizi kwa ajili ya Wakristo kupewa thawabu ya uzima wa milele duniani?

Mt. 5:5: “Wenye furaha ni wale walio na tabia-pole, kwa kuwa watairithi dunia.”

Mt. 6:9, 10: “Baba yetu uliye mbinguni, jina lako na litakaswe. Ufalme wako na uje. Mapenzi yako na yatendeke duniani kama ilivyo mbinguni.” (Mapenzi ya Mungu kuhusu dunia ni nini? Mwanzo 1:28 na Isaya 45:18 huonyesha nini?)

Mt. 25:31-33, 40, 46: “Wakati Mwana wa binadamu atakapofika katika utukufu wake, na malaika wote pamoja naye, ndipo atakapoketi juu ya kiti chake cha ufalme chenye utukufu. Na mataifa yote yatakusanyika mbele yake, naye atawatenganisha watu, mmoja kutoka kwa mwenzake, kama vile mchungaji anavyotenganisha kondoo na mbuzi. Naye atawaweka kondoo kwenye mkono wake wa kuume, lakini mbuzi kwenye mkono wake wa kushoto. . . . Mfalme atajibu na kuwaambia [kondoo], ‘Kwa kweli ninawaambia ninyi, Kwa kadiri ambayo mlimtendea hilo mmoja wa walio wadogo zaidi wa ndugu zangu hawa, mlinitendea mimi.’ Na hawa [mbuzi] watakatiliwa mbali milele, lakini waadilifu [kondoo] wataingia katika uzima wa milele.” (Ona kwamba “kondoo” hao si sawa na ndugu za Mfalme, ambao ni “washiriki wa mwito wa mbinguni.” [Ebr. 2:10–3:1] Bali hawa walio mfano wa kondoo wangekuwa hai wakati ambapo Kristo angekuwa katika kiti chake cha ufalme na wakati ambapo baadhi ya “ndugu” zake wangekuwa bado wanapata shida duniani.)

Yoh. 10:16: “Nina kondoo wengine, ambao si wa zizi hili; hao pia nitawaleta, nao wataisikiliza sauti yangu, nao watakuwa kundi moja, mchungaji mmoja.” (Hao “kondoo wengine” ni nani? Ni wafuasi wa Mchungaji Mwema, Yesu Kristo, lakini hawamo katika zizi la kondoo la “agano jipya,” wakiwa na tumaini la uzima wa mbinguni. Hata hivyo wanashirikiana kwa ukaribu na wale walio katika zizi hilo la kondoo.)

2 Pet. 3:13: “Kulingana na ahadi yake tunangojea mbingu mpya na dunia mpya, na humo uadilifu utakaa.” (Pia Ufunuo 21:1-4)

Ufu. 7:9, 10: “Baada ya mambo haya [baada ya mtume Yohana kuona hesabu kamili ya wale “waliotiwa muhuri” ambao walikuwa “wamenunuliwa kutoka duniani” ili wakawe na Kristo katika Mlima Sayuni wa mbinguni; ona Ufunuo 7:3, 4; 14:1-3] nikaona, na, tazama! umati mkubwa, ambao hakuna mtu aliyeweza kuuhesabu, kutoka mataifa yote na makabila na vikundi vya watu na lugha, wamesimama mbele ya kiti cha ufalme na mbele ya Mwana-Kondoo, wamevikwa kanzu nyeupe; na kulikuwa na matawi ya mitende mikononi mwao. Nao wanaendelea kupaaza sauti kubwa, wakisema: ‘Wokovu unatoka kwa Mungu wetu, anayeketi juu ya kiti cha ufalme, na Mwana-Kondoo.’”

Biblia inawatolea watu wangapi tumaini la uzima wa mbinguni?

Luka 12:32: “Msiogope, kundi dogo, kwa sababu Baba yenu amekubali kuwapa ninyi ufalme.”

Ufu. 14:1-3: “Nami nikaona, na, tazama! Mwana-Kondoo [Yesu Kristo] amesimama juu ya Mlima Sayuni [mbinguni; ona Waebrania 12:22-24], na pamoja naye 144,000 wakiwa na jina lake na jina la Baba yake limeandikwa juu ya mapaji ya nyuso zao. . . . Nao wanaimba kana kwamba ni wimbo mpya . . . na hakuna yeyote aliyeweza kujifunza kikamili wimbo ule ila wale 144,000, ambao wamenunuliwa kutoka duniani.”

Je, wale 144,000 ni Wayahudi wa asili peke yao?

Ufu. 7:4-8: “Nikaisikia hesabu ya wale waliotiwa muhuri, 144,000, waliotiwa muhuri kutoka kila kabila la wana wa Israeli: . . . Yuda . . . Rubeni . . . Gadi . . . Asheri . . . Naftali . . . Manase . . . Simeoni . . . Lawi . . . Isakari . . . Zabuloni . . . Yosefu . . . Benyamini.” (Hayo hayawezi kuwa makabila ya Israeli ya asili kwa sababu hakukuwa kamwe na kabila la Yosefu, makabila ya Efraimu na Dani hayamo kwenye orodha hii, na Walawi walitengwa kwa ajili ya utumishi wa hekalu lakini hawakuhesabiwa kati ya yale makabila 12. Ona Hesabu 1:4-16.)

Rom. 2:28, 29: “Yeye si Myahudi aliye hivyo kwa nje, wala kutahiriwa si kule ambako ni kwa nje juu ya mwili. Bali yeye ni Myahudi aliye hivyo kwa ndani, na kutahiriwa kwake ni kule kwa moyo kupitia roho, wala si kupitia sheria zilizoandikwa.”

Gal. 3:26-29: “Ninyi nyote, kwa kweli, ni wana wa Mungu kupitia imani yenu katika Kristo Yesu. . . . Hakuna Myahudi wala Mgiriki, hakuna mtumwa wala mtu huru, hakuna mwanamume wala mwanamke; kwa maana ninyi nyote ni mtu mmoja katika muungano na Kristo Yesu. Zaidi ya hayo, ikiwa ninyi ni wa Kristo, ninyi kwa kweli ni uzao wa Abrahamu, warithi kuhusiana na ahadi.”

Je, namba 144,000 ni ya mfano tu?

Jibu linaonyeshwa na uhakika wa kwamba, baada ya kutajwa kwa namba halisi 144,000, andiko la Ufunuo 7:9 linataja “umati mkubwa, ambao hakuna mtu aliyeweza kuuhesabu.” Ikiwa namba 144,000 haingekuwa halisi, basi haingekuwa na maana ikilinganishwa na “umati mkubwa.” Kuiona namba hiyo kuwa halisi kunapatana na maneno ya Yesu katika Mathayo 22:14 kuhusu Ufalme wa mbinguni: “Wanaoalikwa ni wengi, lakini wanaochaguliwa ni wachache.”

Je, “umati mkubwa” unaotajwa katika Ufunuo 7:9, 10 pia huenda mbinguni?

Andiko la Ufunuo haliwataji kama linavyowataja wale 144,000, kwamba wao “wamenunuliwa kutoka duniani” wakawe pamoja na Kristo juu ya Mlima Sayuni wa mbinguni.—Ufu. 14:1-3.

Maelezo kwamba “wamesimama mbele ya kiti cha ufalme na mbele ya Mwana-Kondoo” si lazima yamaanishe ni mahali fulani, bali ni hali yenye kukubaliwa. (Linganisha na Ufunuo 6:17; Luka 21:36.) Maneno “mbele ya kiti cha ufalme” (Kigiriki, e·noʹpi·on tou throʹnou; kihalisi, “machoni pa kiti cha ufalme”) si lazima yamaanishe kwamba wako mbinguni. Wamesimama tu “machoni” pa Mungu, anayetuambia kwamba yeye anawaona wanadamu akiwa mbinguni.—Zab. 11:4; linganisha na Mathayo 25:31-33; Luka 1:74, 75; Matendo 10:33.

“Umati mkubwa mbinguni” unaotajwa katika Ufunuo 19:1, 6 si sawa na ule “umati mkubwa” wa Ufunuo 7:9. Wale walio mbinguni hawasemwi kuwa ‘wametoka katika mataifa yote’ wala hawamhesabii Mwana-Kondoo wokovu wao; wao ni malaika. Maneno “umati mkubwa” yanatumiwa katika miktadha katika Biblia.—Marko 5:24; 6:34; 12:37.

Wale wanaoenda mbinguni watafanya nini huko?

Ufu. 20:6: “Watakuwa makuhani wa Mungu na wa Kristo, nao watatawala wakiwa wafalme pamoja naye ile miaka elfu.” (Ona pia Danieli 7:27)

1 Kor. 6:2: “Hamjui kwamba watakatifu watauhukumu ulimwengu?”

Ufu. 5:10: “Ukawafanya kuwa ufalme na makuhani kwa Mungu wetu, nao watatawala wakiwa wafalme juu ya dunia.”

Ni nani anayewachagua wale watakaoenda mbinguni?

2 The. 2:13, 14: “Tuna wajibu wa kumshukuru Mungu sikuzote kwa ajili yenu, akina ndugu mnaopendwa na Yehova, kwa sababu Mungu aliwachagua ninyi tangu mwanzo kwa ajili ya wokovu kwa kuwatakasa ninyi kwa roho na kwa imani yenu katika kweli. Kwa lengo hili aliwaita ninyi kupitia habari njema tunayoitangaza, kwa kusudi la kujipatia utukufu wa Bwana wetu Yesu Kristo.”

Rom. 9:6, 16: “Si wote wanaotokana na Israeli ni ‘Israeli’ kikweli.   . . . Haitegemei yule anayetaka wala yule anayekimbia, bali hutegemea Mungu, aliye na rehema.”