Sura 20
Jamaa ya Kibinadamu Yenye Furaha Chini ya Ubaba Mpya
1. Ni kwa sababu gani habari juu ya ubaba mpya ni habari njema kwa jamaa ya kibinadamu?
BAADA ya Har–Magedoni, ubaba wa pili unawangojea wanadamu wote. Hiyo ni habari njema kweli kweli! Ubaba mpya huo unawezesha kuwe uzima wa milele katika ukamilifu wa kibinadamu katika paradiso ya duniani pote, kwa maana Baba mpya wa jamaa ya kibinadamu yeye mwenyewe hapatwi na kifo. Yeye ana uwezo wa kuwapa uzima mkamilifu wale wote anaolea kuwa watoto wake duniani.
2. Kwa sababu gani ubaba mpya unahitajiwa?
2 Ubaba mpya unahitajiwa kwa sababu wanadamu walipoteza ubaba wao wa kwanza, ule ubaba wa Muumba wanadamu. Mstari unaoanza na Yesu na kurudi nyuma mpaka mtu wa kwanza Adamu, unamalizika kwa kutupa orodha hii: “Kainani, mwana wa Enoshi, mwana wa Sethi, mwana wa Adamu, mwana wa Mungu.”—Luka 3:37, 38, NW.
3. Kulikuwa msiba gani kwa jamaa yote ya kibinadamu kupoteza ubaba wa Yehova Mungu?
3 Kupoteza ubaba wa Yehova Mungu kulithibitika kuwa msiba kwa ajili ya wanadamu wote. Wazao wa Adamu walirithi hukumu ya kifo. Jambo hilo linaelezwa kwa wazi sana katika Warumi 5:12: “Kwa mtu mmoja dhambi iliingia ulimwenguni, na kwa dhambi hiyo mauti; na hivyo mauti ikawafikia watu wote kwa sababu wote wamefanya dhambi.” Huyo “mtu mmoja” alikuwa Adamu, na kwa sababu ya dhambi yake ya kukusudia, yeye alipoteza ubaba wa Muumba wake, Yehova.
4. Adamu na wanadamu walikuja chini ya ubaba wa nani?
4 Adamu alikuja chini ya ubaba wa nani wakati huo? Yeye alileta ulimwengu wote wa wanadamu chini ya ubaba wa nani? Ingekuwa ubaba wa yule aliyemshinda na kumtoa nje ya jamaa ya wana wote wa Mungu watiifu katika mbingu na duniani. Ulikuwa ubaba wa yule aliyesema uwongo wa kwanza, Shetani Ibilisi. Mpingaji huyo wa Yehova alitokezaje jambo hilo?
5. (a) Shetani Ibilisi alitumia chombo gani kumdanganya mke wa Adamu aingie katika kutokumtii Mungu? (b) Kwa sababu gani na jinsi gani Adamu alikuja chini ya daraka kamili kwa sababu ya mwendo aliochukua?
5 Kwenye 2 Wakorintho 11:3, NW mtume Paulo anafunua jambo hilo akiandika hivi: “Yule nyoka alimtongoza Hawa kwa ujanja wake.” Kwa ujanja, Shetani alimtumia nyoka katika Edeni kupeleka ule uwongo wa kwanza kwa Hawa asiyeshuku, kwa njia isiyo ya kweli akimshtaki Yehova Mungu kuwa amesema uwongo. (Mwanzo 3:1-7; Yohana 8:44) Adamu hakumsahihisha mkeye. Yeye hakukataa kula pamoja naye na yeye hakuokoa hali hiyo. Kosa lake la kukusudia lilitimiza aliyotaka yule Nyoka. Ikiliweka lawama mahali linapofaa kuwa, andiko la 1 Timotheo 2:14, NW linasema hivi: “Adamu hakudanganywa, lakini mwanamke ndiye alidaganywa kabisa kabisa akaingia katika kosa.”
Yule Anayestahili Kuwa na Ubaba
6, 7. Yesu alionyesha angeweza kuaminishwa ubaba gani, na unabii wa Biblia unalionyeshaje wazi jambo hilo?
6 Akikataa kumwabudu “mungu wa huu mfumo,” Yesu alithibitisha kwamba ndiye Yeye atakayeaminishwa ule ubaba wa pili wa jamaa ya kibinadamu. (2 Wakorintho 4:4, NW; Mathayo 4:1-11; Luka 4:1-13) Tangu uzawa wake wa kibinadamu katika 2 K.W.K., ndiye Yule ambaye kwake unabii wa Isaya 9:6, NW ulitumika:
7 “Kwa maana kuna mtoto ambaye amezaliwa kwetu, kumekuwa na mwana ambaye amepewa kwetu sisi; na utawala wa mwana-mfalme utakuwa juu ya bega lake. Na jina lake ataitwa Mshauri wa Ajabu, Mungu Mwenye Nguvu, Baba ya Milele, Mwana-Mfalme wa Amani.” Kwa hiyo, “Mwana-Mfalme wa Amani” ana daraka jingine atakalotimiza kwa ajili ya wanadamu—lile la kuwa “Baba ya Milele” yao.
8. Ni kwa sababu gani Yesu aliwezeshwa achukue tendo la kuwa “Baba ya Milele” kwa wanadamu, na hilo lilithibitishwaje na mtume Paulo?
8 Mwana wa Mungu atakuwa huyo “Baba ya Milele” kwa hii jamaa ya kibinadamu, aliyotolea uhai wake mkamilifu wa kibinadamu katika dhabihu. Ni kama vile anavyoandika mtume Paulo: “Kwa kuwa ikiwa kwa kosa la mtu mmoja wengi walikufa, fadhili zisizostahilika za Mungu na zawadi ya bure yake pamoja na fadhili zisizostahilika kupitia mtu mmoja Yesu Kristo zilikuwa nyingi zaidi kwa wengi. Hivyo, basi, kama vile kwa kosa moja matokeo kwa watu wa namna zote yalikuwa kuhukumiwa hatia, vivyo hivyo pia kupitia tendo moja la kuhesabiwa haki matokeo kwa watu wa namna zote ni kuwatangaza waadilifu kwa ajili ya uzima.”—Warumi 5:15, 18, NW.
9. Yesu akawaje Adamu wa pili kwa wanadamu, lakini ni kutoka makao gani yeye anatenda akiwa Baba ya wanadamu?
9 Hivyo, kuna usawaziko mkamilifu wa mambo hayo ya maana. Mmoja mwenye kutenda lile “kosa moja” alikuwa yule mtu wa kwanza duniani, Adamu. Lile “tendo moja la kuhesabiwa haki” lilifanywa na yule mtu mkamilifu mwingine mmoja tu, Yesu Kristo. Hilo lilimruhusu apate kuwa yule “Baba ya Milele” ya wazao wa Adamu mwenye kukosa. Katika njia hiyo yeye anakuwa Adamu wa pili kuelekea jamaa ya kibinadamu. Kule kudhabihu uhai wake mkamilifu wa kibinadamu na kule kumtolea Hakimu Mkuu katika mbingu haki hiyo ya uhai huo wa kibinadamu kulimwezesha atumike hapa duniani akiwa baba ya milele ya wanadamu. Alipofufuliwa kutoka kwa wafu, yeye alirudishwa kwenye makao ya kiroho na akatukuzwa kwenye mkono wa kuume wa Mfufuaji wake. Hivyo imeandikwa hivi: “Hata ndivyo imeandikwa: ‘Mtu wa kwanza Adamu akawa nafsi hai,’ Adamu wa mwisho akawa roho yenye kupa uzima.” (1 Wakorintho 15:45, NW) Baba mlezi mpya wa wanadamu atawapa mwanzo mzuri wa maisha iwezekanavyo.
Viumbe wa Kwanza wa Kibinadamu Kuzaliwa na Baba
10. Ni nani viumbe wa kibinadamu wa kwanza kuzaliwa na huyo Baba mlezi?
10 “Baba ya Milele,” Yesu Kristo Mfalme, ataonyesha ni nani watakaokuwa wa kwanza kuzaliwa na yeye. Namna gani? Kwa kuhifadhi kupitia “dhiki ile iliyo kuu” zile maisha za mamilioni waliojiweka wakfu wanaoishi sasa. Wao ndio ule “mkutano mkubwa” wa “kondoo wengine.”—Ufunuo 7:9, 14.
11. Ni nafasi gani za kidunia zilizoko mbele ya waokokaji wenye mfano wa kondoo wa “dhiki ile iliyo kuu”?
11 Isiyolinganika ni ile nafsi ya kidunia inayowekwa mbele ya ule “mkutano mkubwa” baada ya “dhiki ile iliyo kuu.” Ikiwa inaelezwa kuwa sehemu ya “ishara” ya huu “umalizio wa mfumo wa mambo,” wale mbuzi wa mfano katika mfano wa Yesu watakatiliwa mbali kutoka uzima kwenye dunia hii, kutakakomaanisha uharibifu wa milele kwao. Lakini sivyo itakavyokuwa kwa ule “mkutano mkubwa” wa wale wenye mfano wa kondoo ambao kwa upendo na ushikamanifu walifanya mema kwa mabaki ya “ndugu” za kiroho za Kristo ambao wangalipo duniani. (Mathayo 25:31-46) Kuhifadhiwa huko kwa “kondoo” hao kupita mpaka ule upande mwingine wa “dhiki ile iliyo kuu” na kuingia kwenye ule Utawala wa Mileani wa “Mwana-Mfalme wa Amani” aliyetabiriwa kutawezesha waokokaji hao kuingia kwenye baraka za milki ya Ufalme. Wao watakuwa ndio raia wa kidunia wa yule “Mwana-Mfalme wa Amani.”
12. Ni maneno gani ya Yesu juu ya ufufuo yanayoonyesha kwamba uzima usio na mwisho umewekwa mbele ya wale wanaoingia katika milki ya kidunia ya Ufalme?
12 Wakati huo yale maneno ya Yesu aliyoyasema kabla ya kumfufua Lazaro kutoka kwa wafu yatatimizwa kuelekea hao wanaoingia katika milki ya kidunia ya Ufalme. Yeye alisema hivi: “Mimi ndimi huo ufufuo, na uzima. Yeye aniaminiye mimi, ajapokufa, atakuwa anaishi, naye kila aishiye na kuniamini hatakufa kabisa hata milele.” (Yohana 11:25, 26) Kwa utii wao kwake, wao watafikia uzima mkamilifu wa kibinadamu katika milki ya kidunia ya Mfalme. Hata yule mtenda mabaya mwenye kusikitikia aliyekufa pamoja na Yesu huko Kalvari atapendelewa kuwa na nafasi ya kuingia kwenye hiyo Paradiso. (Luka 23:43) Yesu atatimiza yote yanayodokezwa na hilo jina lake “Baba ya Milele.”
Taraja Lenye Furaha kwa Wafu
13. Ufufuo wa wanadamu wafu utawezesha watu gani wa nyakati za kale wanaojulikana sana waonekane katika milki ya kidunia ya Ufalme?
13 Yesu, mzao mwenye kutokeza zaidi wa Abrahamu alisema kwamba huyo babu, mwanaye Isaka, na mjukuu wake Yakobo wangeonekana katika milki ya kidunia ya Ufalme wa Mungu. (Mathayo 22:31, 32) Hilo lingewezekana kwa ufufuo. Kama alivyosema Yesu, wanadamu wote wafu walio katika makaburi ya ukumbusho watasikia sauti ya Mwana wa Mungu na kutoka. Wakati wao ujao baada ya hapo utategemea mwendo wa tendo wanaochukua.—Yohana 5:28, 29; Ufunuo 20:12-15.
14. Ni lazima nini kifanywe mapema kwa ajili ya wale walio kwenye mstari wa ufufuo wa kidunia, na ni nani watakaokuwa wa kwanza kushiriki katika matayarisho hayo?
14 Itakuwa lazima kufanya matayarisho makubwa kwa ajili ya baadhi ya wanadamu watakaoinuliwa kutoka makaburini na kuletwa kwenye uhai duniani chini ya Ufalme wa “Baba ya Milele.” Kwanza matayarisho hayo yatafanywa na waokokaji wa “vita ya siku ile kuu ya Mungu Mwenyezi” kwenye Har–Magedoni. (Ufunuo 16:14, 16) Sisi hatujui sasa “mkutano mkubwa” wa wale “kondoo wengine” wa yule “Mwana-Mfalme wa Amani” utakuwa umefikia hesabu gani. Lakini watakuwako wengi kutosha kazi hiyo.
15. Wengine watatumikia katika cheo gani cha pekee chini ya Baba mlezi wa wanadamu?
15 Zaburi 45 inamsema huyo “Mwana-Mfalme wa Amani” kuwa Mfalme, na kwa kuwa yeye ndiye atakayekuwa “Baba ya Milele” ya wanadamu, Zaburi hiyo inamwambia hivi: “Mahali pa babu zako kutakuja kuwako wana wako, ambao utaweka kuwa wana-wafalme katika dunia yote.” (Zaburi 45:16, NW) Lakini hata kabla ya kufufuliwa kwa hao “babu” waaminifu, washiriki wanaume wa “mkutano mkubwa” wa waokokaji wa Har–Magedoni watakuwa wamekwisha wekwa kwenye vyeo hivyo vya wana-wafalme. Maelfu ya hao wanaotazamiwa kuwa waokokaji wa Har–Magedoni tayari wanatumika wakiwa wazee katika makundi zaidi ya 49,000 ya Mashahidi wa Yehova, wakisimamia faida za kiroho za makundi ya kwao.
16. (a) Chini ya usimamizi wa wana-wafalme, wale waokokaji wa Har–Magedoni watatumika katika utendaji gani? (b) Ni maulizo gani yanayotokea kwa habari ya utaratibu ambao katika huo wafu watarudishwa?
16 Chini ya usimamizi wa wana-wafalme, waokokaji wa Har–Magedoni watatumikia kwa bidii na ushirikiano. Inabaki kuonwa ni maagizo gani ambayo hao “wana-wafalme katika dunia yote” watapokea kutoka kwa “Mwana-Mfalme wa Amani,” yakitoa mambo yenye kusisimua yatakayoonwa na waokokaji wenzao wote wa Har–Magedoni. Ebu fikiria mavazi yote yatakayotayarishwa kuwavika ifaavyo wafu wanaorudi! Ebu fikiria mahitaji yote ya vyakula yatakayotolewa au kuwekwa katika ghala! Makao pia yatahitaji kuwekwa tayari. Lo! utakuwa wakati wa kusisimua kama nini kwa wale wote watakaoshiriki kazi hiyo ya matayarisho! Ni nani watakaokuwa wa kwanza kurudi? Je! watarudi katika utaratibu ulio kinyume cha ule ambao katika huo walikwenda katika makaburi ya ukumbusho? Je! mfia imani Abeli na Henoki aliyetwaliwa na Mungu, pamoja na Noa, Abrahamu, Isaka, Yakobo, na manabii wote waaminifu, watathawabishwa kipekee kwa kufufuliwa kwanza?
17. Ni nani atakayeamua utaratibu ambao katika huo wafu watarudi kwenye uzima duniani, na ni jina gani la cheo lililotabiriwa kwa habari yake linaloonyesha uwezo wake wa kutimiza madaraka yake?
17 “Mwana-Mfalme wa Amani” anajua na yeye ataamua hilo. Naye atakuwa na uwezo kamili wa kutimiza madaraka yake akiwa ndiye Baba mpya ya wanadamu waliokombolewa. Jingine la majina yake ya cheo yaliyotabiriwa lilikuwa “Mungu Mwenye Nguvu.” Hilo linaonyesha kwamba atakuwa mwenye nguvu, Yeye mwenye uwezo. Kuonyeshwa kwa uungu wake kutakuwa kwenye nguvu kwa kuwa yeye atawafufua wafu wote waliokombolewa, akikumbuka majina yao moja moja na nyutu zao. (Yohana 5:28, 29; Matendo 10:42) Yeye ana uwezo kamili wa kuondoa madhara yote ambayo Shetani Ibilisi amefanya wakati wa miaka 6,000 iliyopita ya kuwako kwa wanadamu.
18. (a) Uhitaji wa Adamu kuwa babu ya Yesu Kristo uliondolewaje? (b) Yesu aliwezeshwaje awe baba ya pili ya wazao wa Adamu?
18 Adamu wa kwanza aliachia wazao wake wote hukumu ya kifo. Je! Adamu alipata kuwa babu ya mwanadamu Yesu Kristo? Hapana, Yesu hakuwa na baba ya kibinadamu bali alizaliwa na bikira aliyefanywa achukue mimba kwa kani ya uhai yake ambayo Mungu alihamisha kutoka makao ya kiroho. Kwa hiyo mtenda dhambi Adamu hakupata kuwa babu ya huyo Mwana wa Mungu wa kidunia. Hata hivyo, yule Adamu wa pili, amekuwa roho yenye kupa uhai. Akiwa na uwezo huo anaweza kutimiza unabii wa Isaya na kuwa yule “Baba ya Milele” kwa wazao wa yule Adamu wa kwanza, ambao yeye anawakomboa na kuwalea kwa kusudi la kuwapa uzima mkamilifu wa kibinadamu katika dunia paradiso.
19. Yehova Mungu atakuja kuingia katika uhusiano gani mpya kuelekea jamii ya kibinadamu, na hivyo ni hila gani mbovu ya Shetani Ibilisi ambayo atazuia?
19 Kwa njia hiyo Baba ya kimbingu ya Yesu Kristo atakuwa Babu ya kimbingu ya jamaa ya kibinadamu iliyorudishwa. Kwa sababu hiyo jamaa ya kibinadamu itaingia katika uhusiano mpya na Muumba wa mbingu na dunia. Hakujapata kamwe kuwa na uwezekano hata mdogo sana wa kwamba Yehova angeshindwa kutimiza kusudi lake la awali. Hivyo Yehova atakuwa amezuia ile hila ya Shetani Ibilisi yenye uovu na isiyo ya kumheshimu Mungu. Jamaa yote ya kibinadamu iliyonunuliwa upya itawezeshwa kujua uhakika huo. Itakuwa siku nzuri ajabu Yesu Kristo atwaapo ubaba wa jamaa ya kibinadamu ili alee wanadamu katika Paradiso iliyorudishwa duniani.
[Picha katika ukurasa wa 164, 165]
Kristo, katika mamlaka ya kifalme, awa “Baba ya Milele” kwa wale wote anaolea