Kunyakuliwa

Mtume Paulo aliposema kwamba Wakristo ‘watanyakuliwa’ wakawe pamoja na Bwana, alikuwa akizungumza juu ya nini?

1 The. 4:13-18, UV: “Hatutaki msijue habari zao waliolala mauti [“wale wanaokufa,” NAJ], msije mkahuzunika kama na wengine wasio na matumaini. Maana, ikiwa twaamini ya kwamba Yesu alikufa akafufuka, vivyo hivyo na hao waliolala katika Yesu, Mungu atawaleta pamoja naye. Kwa kuwa twawaambieni haya kwa neno la Bwana, kwamba sisi tulio hai, tutakaosalia hata wakati wa kuja kwake Bwana, hakika hatutawatangulia wao waliokwisha kulala mauti. Kwa sababu Bwana mwenyewe atashuka kutoka mbinguni pamoja na mwaliko, na sauti ya malaika mkuu, na parapanda ya Mungu; nao waliokufa katika Kristo watafufuliwa kwanza. Kisha sisi tulio hai, tuliosalia, tutanyakuliwa pamoja nao katika mawingu, ili tumlaki Bwana hewani; na hivyo tutakuwa pamoja na Bwana milele. Basi, farijianeni kwa maneno hayo.” (Inaonekana kwamba washiriki fulani wa kutaniko la Kikristo katika Thesalonike walikuwa wamekufa. Paulo aliwatia moyo waliobaki wafarijiane kwa tumaini la ufufuo. Aliwakumbusha kwamba Yesu alifufuliwa baada ya kufa kwake; kwa hiyo, pia, wakati wa kuja kwa Bwana, wale Wakristo waaminifu kati yao waliokuwa wamekufa wangefufuliwa wakawe pamoja na Kristo.)

Ni nani ‘watakaonyakuliwa katika mawingu,’ kama ilivyoandikwa katika 1 Wathesalonike 4:17?

Mstari wa 15 unaeleza kwamba hao ni waaminifu ‘watakaosalia hata wakati wa kuja kwake Bwana,’ yaani, watakuwa wangali hai wakati wa kuja kwa Kristo. Je, watapata kufa? Kulingana na Waroma 6:3-5 na 1 Wakorintho 15:35, 36, 44 (maandiko yaliyonukuliwa katika ukurasa wa 113), ni lazima wafe kabla ya kwenda kuishi mbinguni. Lakini si lazima wabaki katika kifo wakingojea kurudi kwa Kristo. Wao ‘watanyakuliwa’ mara moja, “kufumba na kufumbua,” wakawe pamoja na Bwana.—1 Kor. 15:51, 52, UV; pia Ufunuo 14:13.

Je, Kristo atatokea akionekana kwa macho juu ya wingu, kisha awachukue Wakristo waaminifu waende mbinguni huku ulimwengu ukitazama?

Je, Yesu alisema kwamba ulimwengu utamwona tena kwa macho yao halisi?

Yoh. 14:19, UV: “Bado kitambo kidogo na ulimwengu haunioni tena; bali ninyi [wanafunzi wake waaminifu] mnaniona. Na kwa sababu mimi ni hai, ninyi nanyi mtakuwa hai.” (Italiki ni zetu.) (Linganisha na 1 Timotheo 6:16.)

Maneno ‘Bwana atashuka kutoka mbinguni’ yanamaanisha nini?

Je, Bwana anaweza ‘kushuka kutoka mbinguni,’ kama inavyoelezwa katika 1 Wathesalonike 4:16, bila kuonekana kwa macho halisi? Katika siku za Sodoma na Gomora, majiji ya zamani, Yehova alisema kwamba “nitashuka sasa nione” mambo ambayo watu wanatenda. (Mwa. 18:21, UV) Lakini Yehova alipofanya ukaguzi huo, hakuna mwanadamu yeyote aliyemwona, ingawa waliwaona wale malaika aliowatuma wamwakilishe. (Yoh. 1:18) Vivyo hivyo, bila kurudi katika mwili, Yesu anaweza kuwaelekezea fikira zake wafuasi wake waaminifu duniani ili awape thawabu.

Basi, wanadamu ‘watamwonaje’ Bwana “akija katika wingu”?

Yesu alitabiri hivi: “Hapo ndipo watakapomwona Mwana wa Adamu [Yesu Kristo] akija katika wingu pamoja na nguvu na utukufu mwingi.” (Luka 21:27, UV) Maneno hayo, pamoja na mengine yanayofanana nayo katika mistari mingine hayapingi yale ambayo Yesu alisema, kama yalivyoandikwa katika Yohana 14:19. Hebu wazia: Katika Mlima Sinai, ni jambo gani lililotukia wakati Mungu ‘alipokuja kwa watu katika wingu zito,’ kama inavyoelezwa katika Kutoka 19:9? (UV) Mungu alikuwapo bila kuonekana; watu wa Israeli waliona mambo yanayothibitisha kuwapo kwake, lakini hakuna mmoja kati yao aliyemwona Mungu kihalisi kwa macho yake. Hivyo, pia, Yesu aliposema kwamba atakuja “katika wingu,” bila shaka alimaanisha kwamba hataonekana kwa macho ya wanadamu, lakini wanadamu watatambua kuwapo kwake. ‘Watamwona’ kwa macho yao ya akilini, wakitambua kwamba yeye yupo. (Kwa maelezo zaidi, ona kichwa “Kurudi kwa Kristo.”)

Je, inawezekana kwa Wakristo kuchukuliwa mbinguni wakiwa na miili yao yenye nyama?

1  Kor. 15:50, UV: “Ndugu zangu, nisemayo ni haya, ya kuwa nyama na damu haziwezi kuurithi ufalme wa Mungu; wala uharibifu kurithi kutokuharibika.”

Je, mambo yaliyompata nabii Eliya yanapinga jambo hilo? Sivyo hata kidogo. Jambo hilo linapaswa kueleweka kupatana na maneno haya yaliyo wazi ambayo Yesu alisema miaka mingi baadaye: “Hakuna mtu aliyepaa mbinguni, ila yeye aliyeshuka kutoka mbinguni, yaani, Mwana wa Adamu.” (Yoh. 3:13, UV) Ijapokuwa Eliya alionwa alipokuwa ‘akipanda mbinguni kwa upepo wa kisulisuli,’ hilo halimaanishi kwamba aliingia katika makao ya kiroho. Kwa nini sivyo? Kwa sababu baadaye anatajwa kwamba alimtumia mfalme wa Yuda barua ya kumkaripia. (2 Fal. 2:11, UV; 2 Nya. 21:1, 12-15) Kabla ya wanadamu kuvumbua ndege, wakati huo Yehova alitumia njia yake mwenyewe (gari la moto na upepo wa kisulisuli) ili kumwinua Eliya kutoka chini na kumwingiza mbinguni ambapo ndege wanaruka, kisha akamsafirisha na kumpeleka mahali pengine.—Linganisha na Mwanzo 1:6-8, 20.

Je, Wakristo waaminifu watachukuliwa kwenda mbinguni kwa siri, watoweke tu duniani bila kufa?

Rom. 6:3-5, UV: “Hamfahamu ya kuwa sisi sote tuliobatizwa katika Kristo Yesu tulibatizwa katika mauti yake? . . . Kwa maana kama mlivyounganika naye katika mfano wa mauti yake, kadhalika mtaunganika kwa mfano wa kufufuka kwake.” (Jambo lililompata Yesu liliweka kielelezo. Wanafunzi wake na pia watu wengine walijua kwamba yeye alikufa. Alirudi mbinguni baada tu ya kufa na kufufuliwa kwake.)

1 Kor. 15:35, 36, 44, UV: “Labda mtu atasema, Wafufuliwaje wafu? Nao huja kwa mwili gani? Ewe mpumbavu! Uipandayo haihuiki, isipokufa. Hupandwa mwili wa asili; hufufuliwa mwili wa roho.” (Kwa hiyo, lazima mtu afe kabla ya kupokea mwili huo wa roho, sivyo?)

Je, Bwana atawachukua kimuujiza Wakristo wote waaminifu kutoka duniani kabla ya dhiki kuu?

Mt. 24:21, 22: “Ndipo kutakapokuwa na dhiki kuu ya namna ambayo haijapata kutukia tangu mwanzo wa ulimwengu mpaka sasa, hapana, wala haitatukia tena. Kwa kweli, kama siku hizo hazingefupishwa, hakuna chochote chenye mwili ambacho kingeokolewa; lakini kwa sababu ya wale waliochaguliwa siku hizo zitafupishwa.” (Andiko hilo linaonyesha kwamba “wale waliochaguliwa” hawatakuwa wamechukuliwa wote kwenda mbinguni kabla ya dhiki kuu. Badala yake, linawatolea tazamio, pamoja na wenzao katika mwili, la kuokoka hiyo dhiki kuu duniani.)

Ufu. 7:9, 10, 14, UV: “Baada ya hayo nikaona, na tazama, mkutano mkubwa sana ambao hapana mtu awezaye kuuhesabu, watu wa kila taifa, na kabila, na jamaa, na lugha, wamesimama mbele ya kiti cha enzi, na mbele za Mwana-Kondoo, wamevikwa mavazi meupe, wana matawi ya mitende mikononi mwao; wakilia kwa sauti kuu, wakisema, Wokovu una Mungu wetu aketiye katika kiti cha enzi, na Mwana-Kondoo. . . . Hao ndio wanaotoka katika dhiki ile iliyo kuu.” (Ili mtu ‘atoke’ katika kitu fulani ni lazima kwanza aingie ndani au awe ndani yake. Kwa hiyo, lazima huo umati mkubwa ni watu ambao hasa wanapatwa na dhiki kuu na wanatoka humo wakiwa hai.) (Kuhusu kuwa kwao duniani, ona ukurasa wa 203, 204.)

Wakristo wa kweli watapata ulinzi gani wakati wa dhiki kuu?

Rom. 10:13, UV: “Kila atakayeliitia Jina la Bwana [“Yehova,” NW] ataokoka.”

Sef. 2:3, UV: “Mtafuteni BWANA [“Yehova,” NW], enyi nyote mlio wanyenyekevu wa dunia, ninyi mliozitenda hukumu zake; itafuteni haki, utafuteni unyenyekevu; huenda mtafichwa katika siku ya hasira ya BWANA.” (Ona pia Isaya 26:20)

Je, Wakristo wote wa kweli watachukuliwa kwenda mbinguni baada ya dhiki kuu?

Mt. 5:5, UV: “Heri wenye upole; maana hao watairithi nchi.”

Zab. 37:29, UV: “Wenye haki watairithi nchi [“dunia,” NW], nao watakaa humo milele.” (Ona pia mstari wa 10, 11, 34.)

1 Kor. 15:50, UV: “Nyama na damu haziwezi kuurithi ufalme wa Mungu.”

Ona pia kichwa, “Mbingu.”

Kwa nini Wakristo fulani wanachukuliwa kwenda mbinguni wakawe pamoja na Kristo?

Ufu. 20:6, UV: “Watakuwa makuhani wa Mungu na wa Kristo, nao watatawala pamoja naye hiyo miaka elfu.” (Kwa kuwa watatawala pamoja na Kristo, ni lazima kuwe na watu ambao watakuwa chini yao. Hao ni nani? Ona Mathayo 5:5 na Zaburi 37:29.)

Ona pia kichwa, “Kuzaliwa Mara ya Pili.”

Je, wale watakaoenda mbinguni watarudishwa duniani baadaye ili waishi milele hapa katika Paradiso?

Met. 2:21, ZSB: “Wenye haki watakaa katika inchi [“duniani,” NW], na wakamilifu watabaki ndani yake.” (Ona kwamba andiko hilo halisemi watu hao wenye haki watarudi duniani bali kwamba watabaki ndani yake.)

1 The. 4:17, UV: “Na hivyo tutakuwa [Wakristo walionyakuliwa kwenda mbinguni] pamoja na Bwana milele.”

‘Je, unaamini kwamba watu watanyakuliwa?’

Unaweza kujibu hivi: ‘Nimeona kwamba watu wana maoni mbalimbali kuhusu maana ya kunyakuliwa. Maoni yako ni nini kuhusu jambo hilo? . . . Kuhusu jambo lolote, inafaa kulinganisha maoni yetu na mambo ambayo Biblia yenyewe inasema. (Tumia baadhi ya habari zilizo juu zinazohusu jambo hilo.)’

Au unaweza kusema: ‘Watu wamenieleza kwamba kunyakuliwa ni njia ambayo Wakristo watatumia kukimbia. Wengi wana maoni kwamba watatumia njia hiyo ili kuikimbia dhiki kuu inayokuja. Je, hayo ndiyo maoni yako?’ Kisha unaweza kuongezea: (1) ‘Bila shaka sisi tunataka Mungu atulinde wakati huo, nami nimetiwa moyo sana na maandiko fulani yanayoonyesha jinsi tunavyoweza kupata ulinzi huo. (Sef. 2:3)’ (2) ‘Jambo la kupendeza ni kwamba, Biblia inaonyesha kwamba Mungu atawalinda waaminifu fulani hapa hapa duniani. (Met. 2:21, 22) Hilo linapatana na kusudi la Mungu alipomuumba Adamu na kumweka katika Paradiso, sivyo?’

Pia unaweza kusema: ‘Unaposema kunyakuliwa, je, unamaanisha kwamba Wakristo wanaoishi wakati wa mwisho wa ulimwengu watachukuliwa waende mbinguni? . . . Je, umewahi kujiuliza watafanya nini watakapofika mbinguni? . . . Ona mambo ambayo andiko la Ufunuo 20:6 (na 5:9, 10) linasema. . . . Lakini watatawala nani? (Zab. 37:10, 11, 29)’