Sikia Ambacho Roho Husema kwa Makundi
Habari zilizo katika kurasa 10 mpaka 21 zilitolewa kwenye Haki ya Kimungu Mikusanyiko ya Wilaya ya Mashahidi wa Yehova 1988 zikiwa hotuba za ufunguzi za mfululizo wenye kichwa “Wakati Uliowekwa U Karibu.”
“Acheni yeye ambaye ana sikio asikie ambacho roho husema kwa makundi.”—UFUNUO 3:22, NW.
1. Ni maneno gani ya Ufunuo yaliyo habari njema katika muda huu usio wa furaha, na ni nini ule “unabii” na “wakati uliowekwa” ambao unatajwa?
MIAKA kadhaa iliyopita, mchunguzi wa mambo ya kijamii katika United States alieleza kwamba watu katika bara hilo walikuwa na uhuru mwingi mno lakini si na furaha ya kutosha. Aliongezea kuwa watu “wanapata kwamba furaha imewakimbia. Paradiso waliyojiahidi imekuwa utupu.” Kwa hiyo, maneno ya mtume Yohana kwenye Ufunuo 1:3, NW, ni habari njema, maana yeye anatuambia jinsi ya kupata furaha. Yohana aliandika hivi: “Mwenye furaha ni yeye ambaye husoma kwa sauti kubwa na wale ambao husikia maneno ya unabii huu, na ambao hushika vitu vilivyoandikwa katika huo; kwa maana wakati uliowekwa u karibu.” “Unabii” anaotaja ni ule ulioandikwa katika kitabu cha Ufunuo. Na “wakati uliowekwa” ni wakati ambapo lazima unabii huu wa Ufunuo utimizwe. Maneno ya Yohana yana umaana wa kina kirefu kwa sisi leo.
2. Ni lazima Yohana awe alikuwa akishangaa juu ya nini karne ya kwanza ilipokuwa ikikaribia mwisho?
2 Zaidi ya miaka 60 kabla hajaandika kitabu cha Ufunuo, Yohana alikuwako Pentekoste wakati kundi la Kikristo lililopakwa mafuta lilipoanzishwa. Sasa, katika 96 W.K., kundi hilo lilikuwa limekua kutoka kuwa na washiriki wale 120 wa awali likawa tengenezo kubwa la kimataifa. Lakini matatizo yalikuwa yamekuwako. Sawa na vile Yesu, Paulo, na Petro walivyokuwa wameonya, maasi-imani na mafarakano yalikuwa yakianza kutokea, na lazima Yohana awe alishangaa mambo yangekuwaje wakati ujao.—Mathayo 13:24-30, 36-43; Matendo 20:29, 30; 2 Petro 2:1-3.
3. Njozi ambazo Yohana aliona na kuandika katika Ufunuo zilikuwa uhakikisho kamili wa nini?
3 Basi, wazia alivyofurahi alipopokea “ufunuo kwa Yesu Kristo, ambao Mungu alimpa, aonyeshe watumwa wake vitu ambavyo lazima vitukie karibuni.” (Ufunuo 1:1, NW) Katika mfululizo wa njozi tukufu, Yohana aliona kwamba makusudi ya Yehova yangetimizwa na kwamba uvumilivu wa Wakristo waaminifu ungethawabishwa vizuri ajabu. Pia alipokea ujumbe mbalimbali kutoka kwa Yesu kwa ajili ya makundi saba; kwa kweli, hayo ndiyo mashauri ya mwisho ambayo Yesu aliwapa Wakristo moja kwa moja kabla ya kuja Kwake katika utukufu wa Ufalme.
Yale Makundi Saba
4. (a) Ni nini daraka la makundi ya Kikristo yenye uaminifu? (b) Ni maana gani inayogusiwa na uhakika wa kwamba wazee wapakwa-mafuta wanaonwa kama nyota saba katika mkono wa kulia wa Kristo?
4 Makundi hayo saba ya Wakristo wapakwa-mafuta yaliwakilishwa kuwa vinara saba vya taa, na wazee wapakwa-mafuta waliomo waliwakilishwa kuwa nyota saba katika mkono wa kulia wa Kristo. (Ufunuo 1:12, 16) Kwa mfano huo ulio wazi sana, Yohana aliona kwamba ni lazima makundi ya Kikristo yenye uaminifu yawe vichukua-nuru, kama vinara vya taa katika ulimwengu uliotiwa giza. (Mathayo 5:14-16) Kushika wazee kwa Yesu katika mkono wake wa kulia kulionyesha kwamba ndiye huongoza wazee, akiwapa mwongozo na kuwasimamia.
5. Jumbe yalizopewa yale makundi saba zilielekezwa kwa nani siku ya Yohana?
5 Yesu anamwambia Yohana: “Unachoona andika katika hati-kunjo na kuipeleka kwenye makundi saba, katika Efeso na katika Smirna na katika Pargamamu na katika Thiatira na katika Sardisi na katika Filadelfia na katika Laodikia.” (Ufunuo 1:11, NW) Katika siku ya Yohana makundi hayo yalikuwako kikweli, nasi tunaweza kuwa na uhakika kwamba Yohana alipomaliza kuandika Ufunuo, kila kundi lilipokea nakala. Lakini angalia inayotaarifu Dictionary of the Bible ya Hastings kuhusu Ufunuo: “Ni vigumu kupata kitabu kingine chochote katika A[gano] J[ipya] kinachoshuhudizwa vizuri jinsi hiyo katika karne ya 2.” Hiyo inamaanisha kwamba kitabu cha Ufunuo kilijulikana na kusomwa si na Wakristo tu katika yale makundi saba bali pia na wengine wengi waliotaka kujifunza maneno ya unabii huo. Kweli kweli, mashauri ya Yesu yalikuwa kwa Wakristo wote wapakwa-mafuta.
6, 7. (a) Maneno ya Ufunuo yanatumika lini hasa, na tunajuaje? (b) Ni nani leo wanaofananishwa na zile nyota saba na yale makundi saba?
6 Lakini jumbe hizo kwa makundi saba zina utumizi mpana hata zaidi. Kwenye Ufunuo 1:10, NW, Yohana anasema: “Kwa kuvuviwa mimi nilikuja kuwa katika ile siku ya Bwana.” Mstari huo ni ufunguo wa maana wa kuelewa Ufunuo. Unaonyesha kwamba Ufunuo unatumika hasa kuhusiana na “siku ya Bwana,” iliyoanza Yesu alipokuwa Mfalme katika 1914. Uelewevu huo unahakikishwa na jumbe za Yesu kwa yale makundi saba. Humo tunapata maneno kama haya yaliyosemwa kwa Pargamamu: “Mimi naja kwako upesi.” (Ufunuo 2:16; 3:3, 11, NW) Baada ya 96 W.K., Yesu ‘hakuja’ kwa njia yoyote kubwa mpaka alipotawazwa akiwa Mfalme katika 1914. (Matendo 1:9-11) Ndipo, kwa utimizo wa Malaki 3:1, ‘akaja’ tena katika 1918, alipokuja kwenye hekalu la Yehova kuhukumu kwanza watu wa nyumba ya Mungu. (1 Petro 4:17) ‘Atakuja’ mara nyingine, wakati ujao, “akiwalipiza kisasi wao wasiomjua Mungu, na wao wasioitii Injili ya Bwana wetu Yesu.”—2 Wathesalonike 1:7, 8; Mathayo 24:42-44.
7 Kwa kufikiria hilo, tunaelewa kwamba yale makundi saba ni picha ya makundi yote ya Wakristo wapakwa-mafuta baada ya 1914, na zile nyota saba zinawakilisha wazee wote wapakwa-mafuta katika makundi hayo. Zaidi ya hilo, kwa njia ya urefusho, wazee walio wa “kondoo wengine” wamo pia katika mkono wa kulia wa kuongozwa na Yesu. (Yohana 10:16) Na mashauri yaliyopewa yale makundi saba yanatumika kikanuni kwa makundi yote ya watu wa Mungu leo kuzunguka ulimwengu, kutia na yale ya Wakristo wenye tumaini la kidunia.
8. Yesu alipata hali gani alipokuja kukagua wenye kudai kuwa Wakristo katika 1918?
8 Yesu alipokuja kukagua wenye kudai kuwa Wakristo katika 1918, alipata Wakristo wapakwa-mafuta duniani wakijaribu sana kushika maneno ya unabii ule. Tangu miaka ya 1870 walikuwa wakionya watu juu ya umaana wa mwaka 1914. Walikuwa wameteswa sana na Jumuiya ya Wakristo wakati wa vita ya ulimwengu ya kwanza, na katika 1918 kazi yao ni kama ilikoma kabisa wakati maofisa wenye kuongoza Sosaiti ya Mnara wa Mlinzi walipofungwa kwa mashtaka bandia. Lakini yaliyowapata wakati huo yanalingana ajabu na manabii yaliyo katika Ufunuo. Na hali yao ya kupiga moyo konde watii maneno ya Yesu kwa yale makundi saba iliwatambulisha bila shaka lolote kwamba wao tu ndio Wakristo wanaochukua nuru katika ulimwengu huu ulioingiwa na usiku. Leo, mabaki hao wanajumlika kuwa jamii ya Yohana inayoishi kuona na kushiriki matimizo ya sehemu nyingi za Ufunuo.
Mashauri na Pongezi
9, 10. Ni utimizo wa maneno gani ya Yesu umewaletea furaha kubwa Wakristo wa ki-siku-hizi? Eleza.
9 Kwenye Ufunuo 3:8, NW, Yesu alisema hivi kwa kundi katika Filadelfia: “Mimi najua matendo yako—tazama! mimi nimeweka mbele yako mlango uliofunguliwa, ambao hakuna mmoja awezaye kufunga—kwamba wewe una nguvu chache, na wewe ulishika neno langu na hukuthibitika kuwa bandia kwa jina langu.” Kwa uwazi, Wakristo katika Filadelfia walikuwa wamekuwa watendaji, na sasa mlango wa fursa ulikuwa ukiwafungukia.
10 Uhalisi wa ki-siku-hizi wa ujumbe huo ulifurahisha sana watu wa Mungu. Baada ya majaribu yaliyowapata katika 1918, walirudishiwa hali njema kiroho, na katika 1919 Yesu akawafungulia mlango wa fursa. Walipita katika mlango huo walipokubali agizo la kuhubiria mataifa yote habari njema za Ufalme. Roho ya Yehova ikiwa juu yao, hakuna kitu kingeweza kuzuia kazi hiyo, na Wakristo hao waaminifu walipata lile pendeleo kubwa la kutimiza sehemu kuu ya ishara ya kuwapo kwa Yesu. (Mathayo 24:3, 14, NW) Kutokana na utendaji wao wa kuhubiri kwa uaminifu, wasalia wa 144,000 waliitwa na kupakwa mafuta, na “umati mkubwa” ukakusanywa kwa wingi. (Ufunuo 7:1-3, 9, NW) Hiyo imeletea watu wa Mungu shangwe kubwa kama nini!
11. Wenye mafarakano walijaribuje kufisidi tengenezo la Yehova siku ya Yohana, na wamefanyaje hivyo siku yetu wenyewe?
11 Je! chochote chaweza kuwanyang’anya shangwe hiyo? Ndiyo. Kwa kielelezo, ijapokuwa wazee katika Pargamamu walikuwa wamevumilia vizuri wakati uliopita, hawakuweza kuondoa fundisho la farakano la Nikolausi kundini. (Ufunuo 2:15) Ufarakano ulikuwa ukitia mizizi. Vivyo hivyo, muda wote wa hizi siku za mwisho, watu fulani mmoja mmoja wameasi imani wakajaribu kufisidi tengenezo la Yehova. Wazee kwa ujumla wamewakinza, lakini, kwa kuhuzunisha, watu fulani wameongozwa vibaya. Tusiruhusu kamwe waasi-imani watunyang’anye shangwe yetu!
12. (a) Uvutano wa Kibalaamu na wa Kiyezebeli ni nini? (b) Je! Shetani amejaribu kuingiza uvutano wa Kibalaamu au wa Kiyezebeli ndani ya kundi la Kikristo nyakati za ki-siku-hizi?
12 Pia Yesu alionya kundi katika Pargamamu dhidi ya wale “wanaoshikilia kwa imara lile fundisho la Balaamu.” (Ufunuo 2:14, NW) Hilo lilikuwa fundisho gani? Mtu fulani katika Pargamamu alikuwa akifisidi Wakristo huko kwa njia ile ile ambayo Balaamu alifisidi Waisraeli jangwani: kwa kuwatia moyo ‘wale vitu vilivyodhabihiwa kwa sanamu na kufanya uasherati.’ (Hesabu 25:1-5; 31:8, NW) Yesu alionya kundi katika Thiatira dhidi ya yule “mwanamke Yezebeli.” Mwanamke huyo pia alikuwa akifundisha Wakristo “wafanye uasherati na kula vitu vilivyodhabihiwa kwa sanamu.” (Ufunuo 2:20, NW) Je! Shetani amejaribu kuingiza uvutano wa Kibalaamu au wa Kiyezebeli ndani ya kundi la Kikristo leo? Hakika amefanya hivyo, kwa kadiri ya kwamba watu karibu 40,000 kwa mwaka hutengwa na ushirika, wengi wao kwa sababu ya ukosefu wa adili. Msiba gani! Wanaume wa Kibalaamu na pia wanawake wa Kiyezebeli wameasi dhidi ya wazee na kujaribu kufisidi kundi. Sisi na tukinze mavutano hayo yasiyo safi kwa uwezo wetu wote!—1 Wakorintho 6:18; 1 Yohana 5:21.
13. (a) Eleza juu ya uchukizo mkubwa wa Yesu kuhusu uvugu-vugu. (b) Kwa nini Walaodikia walikuwa wavuguvugu, nasi tunaweza kuepukaje udhaifu huo leo?
13 Kwenye Ufunuo 3:15, 16, NW, Yesu alisema hivi kwa kundi katika Laodikia: “Mimi najua matendo yako, kwamba wewe si baridi wala moto. Mimi naona laiti wewe ungekuwa baridi au sivyo moto. Kwa hiyo, kwa sababu wewe ni vuguvugu na wala si moto wala baridi, mimi nitatapika wewe utoke katika kinywa changu.” Huo ni usimulizi wazi kama nini kwamba Yesu anachukizwa sana na uvuguvugu! Yeye anaendelea kusema: “Wewe wasema: ‘Mimi ni tajiri nami nimepata utajiri na mimi sihitaji kitu chochote kabisa.’” Ndiyo, ufuatiaji wa vitu vya kimwili ulikuwa umetongoza Wakristo katika Laodikia. Walikuwa na kinaya na utepetevu. Lakini Yesu akasema kwao hivi: “Wewe hujui u mwenye taabu na mwenye kusikitikiwa na maskini na kipofu na uchi.” (Ufunuo 3:17, NW) Je! sisi tunataka kuwa ‘wenye taabu na wenye kusikitikiwa na maskini na vipofu na uchi’ machoni pa Yesu? Bila shaka sivyo! Basi acheni kwa vyovyote tupigane dhidi ya kuwa wafuatiaji vitu vya kimwili au wavuguvugu.—1 Timotheo 6:9-12.
Vumilia Mpaka Mwisho
14. (a) Ni magumu gani yaliyokabiliwa na kundi katika Smirna? (b) Ni ulinganifu gani wa ki-siku-hizi uliopo kuhusiana na matukio ya Smirna?
14 Kundi lisilokuwa vuguvugu ni lile lililokuwa katika Smirna. Kwa Wakristo hao, Yesu alisema: “Mimi najua dhiki na umaskini wako—lakini wewe u tajiri—na kufuru la wale ambao husema wao wenyewe ni Wayahudi, na kumbe wao sio bali ni sinagogi la Shetani. Usiwe mwenye kuogopa vitu ambavyo wewe u karibu kupatwa navyo. Tazama! Ibilisi atafuliza kutupa baadhi ya nyinyi ndani ya gereza ili nyinyi mtiwe kenyekenye kwenye mtihani, na ili nyinyi muwe na dhiki siku kumi.” (Ufunuo 2:8-10, NW) Hiyo inalingana kama nini na mambo yenye kupata Wakristo leo! Wakristo wa ki-siku-hizi, wapakwa-mafuta na hata kondoo wengine, pia wamevumilia upinzani mkali kutoka “sinagogi la Shetani” la leo, Jumuiya ya Wakristo. Kuanzia vita ya ulimwengu ya kwanza mpaka sasa, maelfu ya wanaume, wanawake, na watoto wamepigwa, wakafungwa, wakateswa-teswa, wakanajisiwa, au wakauawa kwa kukataa kuacha msimamo wao wa ukamilifu.
15, 16. (a) Wakristo wapakwa-mafuta wanaweza kufurahije wajaponyanyaswa? (b) Ni thawabu gani maalumu zinazowangoja kondoo wengine ambazo zinaweza kuwasaidia wao pia wafurahi?
15 Je! mambo kama hayo huleta furaha? Hayo yenyewe hayaileti. Lakini kama mitume, Wakristo waaminifu wanaovumilia majaribu wanakuwa na shangwe ya kina kirefu ndani yao, kwa sababu ya ‘kuhesabiwa kuwa wanastahili kuaibishwa kwa ajili ya jina la Yesu.’ (Matendo 5:41) Nao wanakaa wakifurahi hata adui zao wawatende nini kwa sababu wanajua wakati uliowekwa u karibu ili ukamilifu wao uthawabishwe, na thawabu ni kubwa kweli kweli. Yesu alisema hivi kwa Wakristo katika Smirna: “Jithibitishe mwenyewe kuwa mwaminifu hata mpaka kifo, na mimi nitakupa wewe taji la uhai.” (Ufunuo 2:10, NW) Na kwa wale walio katika Sardisi alisema hivi: “Yeye ambaye hushinda atapambwa hivyo mavazi ya nje meupe; na mimi kwa njia yoyote sitafuta jina lake kutoka kitabu cha uhai.”—Ufunuo 3:5, NW.
16 Ni kweli, ahadi hizi zinatumika hasa kwa Wakristo wapakwa-mafuta, zikiwakumbusha zawadi ya uhai wa kimbingu usioweza kufa ambao unawangoja. Lakini wale walio wa kondoo wengine wanaimarishwa pia na maneno hayo. Yehova ana thawabu waliyotayarishiwa pia, mradi wana bidii na wanavumilia. Wana tazamio tukufu la kurithi uhai wa milele juu ya dunia-paradiso chini ya Ufalme ulio mikononi mwa Kristo. Humo wataipata Paradiso ambayo watu wa ulimwengu huu wataikosa.
17. Yesu alimalizia kila ujumbe kwa maneno gani, na maneno yake yanamaanisha nini kwetu leo?
17 Yesu alimalizia kila mmoja wa jumbe zake kwa yale makundi saba kwa maneno haya: “Acheni yeye ambaye ana sikio asikie ambacho roho husema kwa makundi.” (Ufunuo 3:22, NW) Ndiyo, ni lazima tusikie na kutii maneno ya Mchungaji Mkuu. Ni lazima tuepuke ukosefu wa usafi na uasi-imani, na ni lazima tudumishe bidii yetu. Kupokea kwetu thawabu kunategemea jambo hilo. Na tufikiriapo habari zaidi zilizo katika Ufunuo, tunazidi kupiga moyo konde tufanye hivyo hata zaidi.
Mihuri ya Hati-Kunjo
18. (a) Yesu anapokea nini katika kitalu cha kimbingu? (b) Upandaji wa watatu wa wale wanafarasi wa Ufunuo sura ya 6 unamaanisha nini kwa aina ya binadamu inayoishi leo?
18 Kwa kielelezo, katika sura 4 na 5, Yohana anaona njozi ya ajabu ya kitalu cha kimbingu cha Yehova. Mwana-Kondoo wa Mungu, Yesu Kristo, yumo humo, naye anapokea hatikunjo yenye mihuri saba. Katika sura ya 6, Yesu anafungua sita ya mihuri saba hiyo, mmoja baada ya mwingine. Wa kwanza unapofunguliwa, mpandaji wa farasi mweupe anaonekana. Anapewa taji na akiwa amepanda anaenda mbele “akishinda na kukamilisha ushindi wake.” (Ufunuo 6:2, NW) Huyo ni Yesu, Mfalme aliyevikwa taji karibuni. Alipoanza upandaji wake wa kifalme akiwa mshindi, katika 1914, siku ya Bwana ilianza. Mihuri mitatu ifuatayo inapofunguliwa, farasi zaidi watatu wanatokea wakiwa na wapandaji wao. Hivyo ni vidhihirisho vya kuogopesha sana, vikiwakilisha vita vya kibinadamu, njaa, na kifo kinacholetwa na magonjwa ya kipuku na visababishi vingine. Vinahakikisha ukweli wa unabii mkubwa wa Yesu kwamba kuwapo kwake mbinguni akiwa katika mamlaka ya kifalme kungetiwa alama duniani na vita vikubwa, njaa, magonjwa ya kipuku, matetemeko ya dunia, na misiba mingine. (Mathayo 24:3, 7, 8; Luka 21:10, 11) Kweli kweli, ni lazima Wakristo watii maneno ya Yesu kwa yale makundi saba ikiwa watavumilia wakati huo.
19. (a) Wakati wa kuwapo kwa Kristo, Wakristo wapakwa-mafuta walio waaminifu ambao wamekwisha kufa wanapewa thawabu gani? (b) Ni matukio gani ya hofu mbaya sana yanayotangulia kufananishwa na ufunguzi wa muhuri wa sita, na hiyo ikiongoza kwenye swali gani?
19 Wakati wa kufunguliwa muhuri wa tano, tukio fulani linafunuliwa katika makao yasiyoonekana. Wakristo waliofia imani yao wanapewa kanzu nyeupe kila mmoja. Kwa kuwa sasa kuwapo kwa Kristo ni jambo halisi, huo ni ushuhuda kwamba ufufuo wa kimbingu umeanza. (1 Wathesalonike 4:14-17; Ufunuo 3:5) Halafu muhuri wa sita unafunguliwa, na “dunia,” mfumo wa kidunia wa mambo ya Shetani, inatikiswa na tetemeko kubwa la dunia. (2 Wakorintho 4:4, NW) “Mbingu” ya utawala wa kibinadamu unaoongozwa na Shetani inakunjwa kama hatikunjo ya zamani, tayari kutupiliwa mbali. Kwa kuingiwa na hofu nyingi, wanadamu waasi wanapaaza kilio cha kukosa tu-maini wakiambia miamba: “Angukeni juu ya sisi na kuficha sisi kutoka uso wa yule Mmoja aliyeketi juu ya kiti cha ufalme na kutoka hasira-kisasi ya Mwana-Kondoo, kwa sababu siku kubwa ya hasira-kisasi yao imekuja, na ni nani anaweza kusimama?”—Ufunuo 6:13, 14, 16, 17, NW.
20. Ni nani anayeweza kusimama wakati wa siku kubwa ya hasira-kisasi ya Yehova na ya Mwana-Kondoo?
20 Naye ni nani anaweza kusimama? Yesu amekwisha kujibu swali hilo. Wale ‘wanaosikia ambacho roho husema kwa makundi’ watasimama katika siku hiyo kubwa ya hasira-kisasi. Na kuhakikisha hivyo, Yohana anaendelea kupata habari juu ya kutiwa muhuri kwa wale wa mwisho wa 144,000 na kukusanywa kwa umati mkubwa kutoka mataifa yote ili waokoke “dhiki kubwa.” (Ufunuo 7:1-3, 14, NW) Lakini sasa ni wakati wa kufunguliwa muhuri wa saba wa hatikunjo na kumwonyesha Yohana njozi zaidi zenye kutazamisha, na sisi leo tuonyeshwe kupitia yeye. Makala inayofuata inazungumzia baadhi yazo.
Je! Wewe Unakumbuka?
◻ Uhusiano ni nini kati ya Yesu na wazee wa kundi?
◻ Ni matatizo gani yaliyokabili wazee katika Pargamamu na Thiatira, na matatizo hayo ameathirije makundi leo?
◻ Kundi la Laodikia lilifanya kosa gani zito, nasi tunaweza kuepukaje kufanya kosa kama hilo leo?
◻ Wakristo wamelazimikaje kuvumilia katika karne hii ya 20, na ni ahadi gani za Yesu zimewasaidia kufanya hivyo?
◻ Tunaweza kuepukaje kukata tamaa na kukosa tumaini kama mataifa kwenye Har-Magedoni?
[Picha kutoka ukurasa wa 13]
Baadhi ya Wakristo waaminifu walioteseka katika kambi za mateso za Nazi
[Hisani]
DÖW, Vienna, Austria