Maswali Kutoka kwa Wasomaji
Waefeso 3:14, 15, (“NW”) husema kwamba “kila familia mbinguni na juu ya dunia hupata jina layo” kutoka kwa Mungu. Je, kuna familia mbinguni, na je, kila familia ya kibinadamu kwa njia fulani hupata jina layo kutoka kwa Yehova?
Mbinguni, hakuna familia kama zile zilizoko duniani, zenye baba, mama, na watoto—wote wakiwa na uhusiano na mwingine kwa njia ya kimwili. (Luka 24:39; 1 Wakorintho 15:50) Yesu alionyesha wazi kwamba malaika hawafungi ndoa, na hakuna kitu chochote kionyeshacho kwamba wao huzaa kwa njia yoyote ile.—Mathayo 22:30.
Hata hivyo, Biblia husema kwa njia ya mfano juu ya Yehova Mungu kuwa amefunga ndoa na tengenezo lake la kimbingu; amefunga ndoa katika maana ya kiroho. (Isaya 54:5) Tengenezo hilo la kimbingu hutokeza malaika. (Ayubu 1:6; 2:1; 38:4-7) Basi, katika maana hii, kuna familia ya kiroho ya ajabu mbinguni.
Na zaidi, familia mpya ya mfano inatokezwa mbinguni, ikifanyizwa na Yesu Kristo na bibi arusi wake wa kikundi cha 144,000. (2 Wakorintho 11:2) Wengi wa hawa watiwa-mafuta tayari wamekufa, wakiwa na tazamio la uhai wa kimbingu. Wengine wangali hai duniani. Wote watazamia kwa hamu “ndoa [ya kimbingu] ya Mwana-Kondoo.” Biblia huunganisha ndoa hiyo na wakati wa kuja kwa dhiki iliyo kubwa—uharibifu wa Babiloni Mkuu, na kuondolewa kwa sehemu inayobaki ya mfumo wa Shetani.—Ufunuo 18:2-5; 19:2, 7, 11-21, NW; Mathayo 24:21.
Kuhusu familia za kidunia, mtume Paulo haonyeshi kwenye Waefeso 3:15 kwamba kila kikundi cha familia hupata jina lacho moja kwa moja kutoka kwa Yehova. Badala ya hivyo, kwa wazi Paulo afikiria nasaba zilizoenea za familia ambazo huhifadhi jina. Yoshua 7:16-19 hutoa kielelezo. Yehova alikuwapo kufunua dhambi ya Akani. Kwanza, hatia ilielekezwa au kuhusishwa na kabila la Yuda. Kisha ikalengwa katika familia ya Wazera. Hatimaye, nyumba ya Akani ikafunuliwa. Akani pamoja na mke wake na watoto wake walionwa, au kusemwa kuwa, sehemu ya nyumba (au, familia) ya Zabdi, babu ya Akani. Nayo familia hiyo ilikuwa kikundi kilichoenea kilichohifadhi jina la mzazi wao wa kale Zera.
Miongoni mwa Waebrania, nasaba kama hizo za familia zilikuwa na umaana mkubwa sana, nyingi zikiorodheshwa katika Biblia. Mungu alitegemeza uhifadhi wazo kwa kufanya uandalizi, ilipohitajika, wa warithi kupitisha jina la familia kwa ndoa ya ndugu-mkwe.—Mwanzo 38:8, 9; Kumbukumbu la Torati 25:5, 6.
Kwa kielelezo kingine cha familia kubwa au iliyoenea, fikiria Yesu akiwa mwana wa Daudi. Kwa wazi hakuwa mzaliwa wa moja kwa moja wa Mfalme Daudi, kwa kuwa hakuzaliwa mpaka karne nyingi baada ya kifo cha Daudi. Lakini, ishara ya kumtambulisha Mesiya ilikuwa kwamba angekuwa wa familia ya Daudi, kama Wayahudi walivyojua kwa ujumla. (Mathayo 22:42) Yesu alikuwa wa nasaba ya Daudi kupitia mama yake na baba yake mlezi.—Mathayo 1:1; Luka 2:4.
Lakini familia hizo hupataje majina yazo kutoka kwa Yehova? Uhakika ni kwamba kulikuwa pindi chache—kama vile kisa cha Abrahamu na Isaka—ambapo kihalisi Yehova alitaja kichwa cha familia. (Mwanzo 17:5, 19) Hizo zilikuwa hali za kipekee. Kwa ujumla, Yehova haipi kila familia jina linalopitishiwa watoto.
Hata hivyo, Yehova alianzisha kifungo cha familia alipowaamuru Adamu na Hawa ‘wazaane, waongezeke, waijaze nchi.’ (Mwanzo 1:28) Na Yehova alimruhusu Adamu na Hawa wasiokamilika kuzaa watoto, hivyo akiweka msingi kwa ajili ya familia zote za kibinadamu. (Mwanzo 5:3) Hivyo, katika maana zaidi ya moja, Mungu aweza kuitwa Mwanzilishi wa majina ya familia.
Tamaduni nyingi leo hazioni uhitaji wa kudumisha majina ya familia kwa vizazi. Hata hivyo, Wakristo katika nchi zote hushukuru Yehova kwa ajili ya mpango wa familia na kumheshimu kwa kufanya bidii ili kifungo cha familia yao wenyewe kifanikiwe.