Kuwaletea Walio Gerezani Uhuru wa Kiroho

“TUMEKUWA tukiwangoja.” “Siku chache zilizopita, nimeota juu ya kuja kwenu.” “Asanteni kwa kumpa mtu mmoja mgawo wa kututembelea kwa ukawaida.” “Twataka kutoa shukrani zetu kwa kila baraka tusiyostahili tupokeayo kutoka kwa Yehova na tengenezo lake na kwa chakula cha kiroho kinachotolewa kwa wakati ufaao.”

Ni nini iliyokuwa sababu ya maneno hayo ya shukrani? Hayo ni baadhi ya maneno kutoka kwa wafungwa katika magereza tofauti katika Mexico. Wao huthamini uangalifu wanaopokea kutoka kwa Mashahidi wa Yehova, ambao umewaletea uhuru wa kiroho hata wakiwa gerezani. Katika Mexico kuna magereza 42 ambako Mashahidi wa Yehova huhudumia kwa ukawaida mahitaji ya kiroho ya wafungwa. Mahali hapo mbalimbali huitwa Centro Readaptación Social (Kitovu cha Urekebishaji cha Kijamii). Katika baadhi ya magereza hayo, mikutano ya Kikristo hata inafanywa kwa ukawaida kukiwa na matokeo mazuri. Kwa kielelezo, katika hesabu fulani ya juzi, watu wapatao 380 walikuwa wakihudhuria mikutano mahali hapo mbalimbali. Wakati huo wastani wa mafunzo 350 ya Biblia yalikuwa yakiongozwa. Watu 37 walikuwa wamestahili kuanza kuhubiri, na 32 walikuwa wameweka wakfu maisha zao kwa Yehova, wakifananisha huo kwa ubatizo wa maji.

Jinsi Kazi Ifanywavyo

Mashahidi wa Yehova hufanyaje kazi yao ya kuhubiri katika mahali hapo mbalimbali? Kwanza wao huenda kwa maofisa wasimamizi kuomba idhini iliyoandikwa ya kuingia gerezani, wakieleza kusudi la hizo ziara—kufundisha wafungwa jinsi ya kuboresha maisha yao na kumtumikia Mungu katika njia impendezayo.

Katika kila kisa wenye mamlaka wametoa ruhusa. Maofisa hao huthamini maagizo ya Biblia wapewayo wafungwa. Wenye mamlaka wa magereza wameona kwamba Mashahidi wa Yehova hutii sheria za usalama zilizowekwa kwa ajili ya mahali hapo mbalimbali. Wamewaruhusu wahudumu hao wenye kuzuru kutumia ofisi, vyumba vya kulia, na vya kufanyia kazi ili kufanya mikutano yao. Mahali pamoja Mashahidi hata waliruhusiwa kujenga Jumba la Ufalme dogo, kama vile ionyeshwavyo katika jambo lililoonwa lifuatalo lenye kusimuliwa na mwangalizi asafiriye katika kusini-mashariki mwa Mexico.

“Mapema katika mwaka wa 1991 tulianza kutembelea gereza katika Tehuantepec, Oaxaca, tulikopata njaa kubwa ya kiroho. Upesi tulianzisha mafunzo 27 ya Biblia. Kwa sababu ya kupendezwa kwa wafungwa, mikutano mitano ya kutaniko iliratibiwa. Mmoja wa wafungwa, aliyeonyesha kumpenda Yehova sana, aliamua kujenga Jumba la Ufalme dogo ndani ya uwanja wa gereza ili kuwa na mahali pa kufanya mikutano. Alienda kwa mkurugenzi wa gereza na kuomba ruhusa, na wenye mamlaka walikuwa wenye kushirikiana sana. Mwanzoni mwa Desemba 1992, wafungwa sita walistahili kuwa watangazaji wa habari njema. Kwa sababu ya maendeleo walioonyesha, mipango ilifanywa ya kufanyia Ukumbusho humo gerezani. Tulimwomba mkurugenzi wa gereza ruhusa ya kuleta mifano—mkate na divai—na baada ya mazungumzo ya muda wa saa nne, ruhusa ilitolewa.

“Ilitukia kwamba katika Aprili 3, 1993 (siku tatu kabla ya sherehe ya Ukumbusho), baadhi ya wafungwa waliachiliwa. Mmoja aliyekuwa mtangazaji alipopata karatasi zake za kuachiliwa, aliomba kuongea na mkurugenzi wa gereza ili kupata ruhusa ya kukaa hadi baada ya sherehe ya Ukumbusho. Hilo kwa kweli lilimshangaza huyo mkurugenzi, kwa kuwa hilo si ombi la kawaida sana, lakini kwa sababu ya kupendezwa sana kwa huyo mfungwa kuhudhuria Ukumbusho hapo gerezani, alikubali hilo ombi. Huo Ukumbusho ulihudhuriwa na watu 53, waliotokwa na machozi ya shangwe mwishoni mwa programu. Tumekubali kukiita kikundi hicho ‘Freedom Cereso,’ kwa sababu wao wako huru katika maana ya kiroho.”

Kazi ya Mashahidi wa Yehova yathaminiwa sana mahali hapo mbalimbali. Katika mojawapo ya magereza hayo, anayesimamia hupendekeza wazi-wazi kuhudhuria mikutano ya Mashahidi wa Yehova kuwa “tiba” kwa ajili ya urekebishaji wa haraka wa wafungwa.

Programu Yenye Mafanikio ya Urekebishaji

Utendaji wa Mashahidi wa Yehova umetokeza urekebishaji kamili wa wafungwa wengi. Ingawa mara nyingi ni kweli kwamba wale ambao wamekuwa gerezani hurudia maisha ya uhalifu mara tu waachiliwapo, wale ambao wamekubali kikweli ujumbe wa Neno la Mungu wamebadilika kabisa. Kugeuka kwao kwatukumbusha maneno haya ya mtume Paulo: “Wala waasherati . . , wala wezi, wala watu wenye pupa, wala walevi, wala watukanaji, wala wanyang’anyi hawatarithi ufalme wa Mungu. Na hata hivyo baadhi yenu ndivyo mlivyokuwa. Lakini mmeoshwa mkawa safi, lakini mmetakaswa, lakini mmetangazwa kuwa waadilifu katika jina la Bwana wetu Yesu Kristo na kwa roho ya Mungu wetu.”—1 Wakorintho 6:9-11.

Badiliko lenye kutokeza katika utu wao ni wazi waelezapo hisia zao. Miguel, aliye katika gereza la Campeche katika Jiji la Campeche, alitaja jambo hilo hivi: “Leo naweza kusema kwa shangwe kwamba najihesabu miongoni mwa kondoo wengine walio na tumaini lililorekodiwa kwenye 2 Petro 3:13 na Mathayo 5:5.” José, aliye katika gereza la Koben, Campeche, alieleza hivi: “Ijapokuwa mimi ni mfungwa na huenda uhalifu wangu ukawa mzito sana, naelewa kwamba Yehova ni mwenye rehema sana na husikiliza sala na dua zangu. Yeye aweza kusamehe ukiukaji-sheria wangu na kunipa fursa ya kutumia muda wote uliobaki wa maisha yangu kushiriki habari njema juu ya Ufalme wa Mungu. Twashukuru wazee wetu kwa sababu ya wakati wanaotumia wakitutembelea gerezani ili tuweze kunufaika kutokana na ahadi za Ufalme wa Mungu. Ni baraka zenye kupendeza jinsi gani! Naweza kusema kwamba mimi ni mfungwa? La, Yehova amenipatia uhuru wa kiroho niliohitaji.”

Ni nini kiwafanyacho wauaji wa kukusudia, wabakaji, wateketezaji, wezi, na wengine wabadilike ili wawe Wakristo wanaoishi maisha yafaayo? Kulingana na wanaume haohao, ni uwezo wenye kugeuza wa Neno la Mungu na ushirika mzuri pamoja na watu wenye kujitoa kikweli. Kisa cha Tiburcio, mwenye kufungwa gerezani katika Mazatlán, Sinaloa, chaonyesha mafanikio ya programu hiyo ya urekebishaji. Alikuwa amekuwa gerezani katika Concordia, Sinaloa, ambamo alipata matatizo kwa sababu ya hasira yake yenye jeuri. Mke wake alikuwa mmoja wa Mashahidi wa Yehova, na alikuwa akimtenda vibaya sana, hata alipokuja kumtembelea gerezani. Mke wake alikuwa mwenye subira na aliendelea kumtembelea, kwa hiyo alimwomba amletee kitabu Unaweza Kuishi Milele Katika Paradiso Duniani, alichoanza kujifunza peke yake.a Kisha akaomba kwamba mtu fulani aje humo gerezani kujifunza pamoja naye. Alianza kufanya maendeleo ya kiroho, na uhusiano wake pamoja na wengine ukaanza kubadilika kuwa bora zaidi. Alihamishiwa gereza lililoko Mazatlán ambamo kuna kikundi kinachojifunza Biblia, na sasa yeye ni mtangazaji. Yeye aeleza hivi: “Sasa, mimi pamoja na mke na watoto wangu na waandamani wangu wafungwa, nashukuru sana kuweza kusikiliza kweli za Biblia mahali hapa, nikiwa na tumaini kwamba karibuni, nitaachiliwa na kuweza kuhudhuria makusanyiko yote na mikutano yote ya kutaniko.”

Pia, kuna Conrado, ashukuruye sana kwa ajili ya mabadiliko ambayo ameweza kufanya maishani mwake. Yeye alikuwa na matatizo mengi sana ya ndoa hivi kwamba mke wake alimwacha. Kwa hiyo alitafuta kitulizo katika dawa za kulevya. Baada ya muda alikuwa mlanguzi wa dawa za kulevya. Alikamatwa na kuhukumiwa kufungwa gerezani kwa sababu ya kusafirisha bangi na kokeni. Humo gerezani kulikuwa na kikundi chenye kujifunza Biblia pamoja na Mashahidi wa Yehova, na alialikwa kujifunza pamoja nao. Yeye aeleza hisia zake hivi: “Nilivutiwa na njia yenye utaratibu ambayo mikutano iliongozwa, programu ya kuchunguza Biblia kupitia vichapo, na uhakika wa kwamba kila jambo lilitegemea Biblia. Mara moja niliomba funzo la Biblia na kuanza kuhudhuria mikutano.” Hiyo ilikuwa katika Januari 1993. Sasa Conrado ametoka gerezani na azidi kufanya maendeleo katika kutaniko la Kikristo.

Vile Visiwa vya Islas Marías

Katika Mexico kuna gereza lenye kuogopwa linalotia ndani visiwa vinne viitwavyo Islas Marías. Wafungwa waweza kusafiri kokote katika visiwa hivyo vya adhabu ambako wamefungwa. Wengine huishi huko pamoja na wake zao na watoto wao.

Kutaniko dogo limeanzishwa. Ndugu watatu kutoka Mazatlán husafiri huko mara moja kwa mwezi kuongoza mikutano, kutoa fasihi, na kitia-moyo. Nyakati nyingine mwangalizi wa mzunguko huenda huko kuwatembelea. Hudhurio la wastani ni kati ya 20 na 25. Kuna wanne waliobatizwa na wawili ambao ni watangazaji wasiobatizwa. Mwangalizi asafiriye aripoti kwamba “baadhi yao hutembea kilometa 17 [maili 10] kuhudhuria mikutano Jumapili na kulazimika kuondoka kwenye mikutano kwa haraka ili kurudi seli kuitwa majina. Hata wakitembea haraka, inachukua zaidi ya muda wa saa mbili kurudi.” Mmoja wa hao ndugu, aliyejifunza kweli katika gereza hilo, juzi alisema hivi: “Nilikuwa nikipendezwa na kuachiliwa kutoka gerezani upesi, lakini sasa yaweza kuwa wakati wowote ambao Yehova apenda, kwa kuwa kwa vyovyote vile nina kazi nyingi za kufanya hapa gerezani.”

Twafurahi kuona kwamba ile kweli inadhihirisha uwezo wayo wa kuweka huru wanyoofu watafutao njia ya kumpendeza Yehova. Zaidi ya watu 12 kati yao, waliojifunza kweli gerezani, wameachiliwa, wakabatizwa, na sasa huishi maisha yenye heshima wakiwa watumishi wa Mungu, wengine hata wakiwa wazee wa kutaniko. Uwezo ambao Biblia inao wa kutibu mioyo na kugeuza watu umeonyeshwa kwa njia ya kutazamisha. Mara tu wanaume hao waliofungwa kwa kufanya mambo mabaya waingiapo katika njia ya nuru ya Neno la Mungu, wao hupata uhuru wa kweli ambao Yesu aliahidi aliposema hivi: “Nanyi mtajua kweli, na kweli itawaweka nyinyi huru.”—Yohana 8:32; Zaburi 119:105.

[Maelezo ya Chini]

[Picha katika ukurasa wa 23]

Wengi walinufaika na kweli za Kikristo walizojifunza gerezani