Maswali Kutoka kwa Wasomaji
◼ Je! kuna umri fulani uliowekwa kuwa ndicho kiwango cha chini zaidi cha mwanamume Mkristo kupendekezwa awe mtumishi wa huduma katika kundi?
Sivyo, Biblia haiweki umri wowote kuwa ndicho kiwango cha chini zaidi.
Katika Israeli ya kale, Mungu alitaja wazi umri mbalimbali uliopasa kuhusika katika visa fulani. Ilikuwa lazima wanaume walioandikishwa utumishi wa kijeshi wawe na umri wa miaka 20; vivulana hawakupelekwa piganoni, kama inavyotukia leo mahali fulani fulani. Umri ulikuwa jambo la kufikiriwa kuhusu Walawi pia. Wakohathi waliotumikia kwenye tabenakulo walipaswa kuwa wa kuanzia miaka 30 hadi 50. Kwa nini? Mpaka huu ulitajwa kuhusiana na “kufanya kazi ya utumishi, na kazi ya kuchukua mizigo katika hema ya kukutania.” (Hesabu 4:3, 47) Inaelekea kwamba Walawi wangeweza kuanza kufanya kazi nyepesi-nyepesi wakiwa na miaka 25, lakini ilikuwa lazima wawe na miaka 30 kabla ya kushiriki katika zile kazi nzito-nzito na mapendeleo yenye madaraka makubwa zaidi ya kubomoa, kuburuta, na kuisimamisha tabenakulo. (Hesabu 8:24-26) Kazi hiyo nzito haingehitajiwa baadaye kwenye hekalu, kwa hiyo Walawi walianza kutumikia wakiwa na umri wa miaka 20.—1 Nyakati 23:24.
Lakini Yehova alipoacha kutumia Israeli wa kimnofu na kuanza kutumia Israeli wa kiroho, je! yeye alitaja wazi umri fulani kuwa ndicho kiwango cha chini zaidi cha kuwa watumishi wa huduma (mashemasi) katika kundi la Kikristo?
Huenda mtu akafikiri hivyo, kwa kutegemea maandishi ya karne za baadaye. Katika Kanisa Katoliki la Kiroma, shemasi ni “mhudumu mwagizwa rasmi, ambaye cheo chake kinafuata mara tu baada ya cheo cha padri, katika mpangilio wa madaraja ya kipadri katika Kanisa.” Kichapo Antiquities of the Christian Church cha Bingham kinasema hivi: “Maaskofu na wapresbiteri [wazee]. . . kwa kawaida hawangeweza kuagizwa rasmi kabla ya miaka thelathini; lakini mashemasi waliruhusiwa kuagizwa rasmi wakiwa na miaka ishirini na mitano, wala si kabla ya hapo. Hili ndilo sharti ambalo limewekwa imara na sheria ya kiserikali na sheria ya kanisa . . . Ni mara chache sana tunapokuta kisa cha mtu yeyote aliyeagizwa rasmi kabla ya umri wa miaka ishirini na mitano, katika historia yote ya Kanisa.”
Ingawa hivyo, ni sifa gani zinazopatikana katika Biblia? Zilizotolewa tu ni zile zinazotajwa kwenye 1 Timotheo 3:8-10, 12, 13, NW: “Watumishi wa huduma imewapasa vivyo hivyo wawe wazito, si wenye kauli mbili, si wenye kujitoa wenyewe kwa divai nyingi, si wenye pupa ya pato la udanganyifu, wenye kushika siri takatifu ya imani kwa dhamiri safi. Pia, acha hawa watahiniwe juu ya kufaa kwanza, ndipo acha watumike kuwa wahudumu, kwa vile hawana shtaka. Watumishi wa huduma na wawe waume wa mke mmoja, wenye kusimamia kwa njia nzuri watoto na nyumba zao wenyewe. Kwa maana wanaume wanaohudumu kwa njia nzuri wanajipatia wenyewe msimamo mzuri na uhuru mkubwa wa kusema katika imani kuhusiana na Kristo Yesu.”
Hapa tunaweza kuona kwamba hakuna umri fulani uliotajwa wazi kuwa ndicho kiwango cha chini zaidi cha kuwekwa kuwa mtumishi wa huduma. Kwa hiyo wazee wanapokutana kuzungumza sifa za wanaume katika kundi, wanaweza kuzingatia akilini kwamba hakuna msingi wa Kibiblia wa kutaka kwamba mwanamume Mkristo awe na umri wa miaka 20, 25, au 30 kabla hajaweza kupendekezwa na kutumikia. Biblia inawataja wenye kushika cheo hiki kuwa “wanaume wanaohudumu,” kwa hiyo ingekuwa vigumu tuwatazamie wawe katika miaka yao ya utineja (uvulana) wa mapema au wa katikati. Ikionyesha wazi jambo hili, Biblia inasema kwamba hao watumishi wa huduma wangeweza kuwa wamefunga ndoa na wao wenyewe wangeweza kuwa na watoto.
Tena, wanaume wanaopendekezwa kuwa watumishi wa huduma wanapaswa kuwa wamekwisha ‘kutahiniwa juu ya kufaa,’ wakionyesha ushuhuda wa kwamba wana hisia ya kujali madaraka. Hiyo si kusema kwamba wanatumika wakiwa katika muda fulani wa kuchunguzwa tabia. Bali, ni lazima wawe wamekwisha kuonyesha ukomavu wa Kikristo kwa kipindi fulani kinachofaa (wakiwa wamekwisha kuwa watu waliobatizwa angalau kwa mwaka mmoja), wakiwa wanaume wenye nia na uwezo wa kufanya mambo waliyogawiwa. Ikiwa mwanamume kijana aliye ‘mzito’ anaonyesha sifa hizi, naye ni mnyenyekevu na anatimiza sifa nyinginezo, wazee wangeweza kumpendekeza awekwe hata ikiwa hajafika miaka 20. Huenda wanaume wengine wakawa na umri mkubwa zaidi ndipo waonyeshe wazi kwamba wanatimiza sifa za ‘kuhudumu kwa njia nzuri, wakijipatia wenyewe msimamo mzuri na uhuru mkubwa wa kusema.’