Ufalme wa Mungu Utaanza Kutawala Dunia Lini?

Yesu alisema hivi: “Taifa litapigana na taifa, na ufalme kupigana na ufalme. Kutakuwa na matetemeko makubwa ya ardhi, na magonjwa na upungufu wa chakula katika sehemu mbalimbali.” (Luka 21:10, 11) Matukio hayo yote yangekuwa ishara isiyopingika kwamba “Ufalme wa Mungu umekaribia.” Je, matukio hayo yote yamewahi kutokea na kuonekana waziwazi ulimwenguni pote? Fikiria uthibitisho ufuatao.

1. VITA

Katika mwaka wa 1914, kulitokea vita ambayo iliathiri watu wengi na maeneo mengi kuliko vita nyingine yoyote iliyowahi kupiganwa! Wanahistoria wanasema kwamba mwaka wa  1914 ni mwaka wa kihistoria kwa sababu vita kuu ya kwanza ya ulimwengu ilianza. Wakati wa vita hiyo, wanajeshi walitumia vifaru vya vita, mabomu yanayotupwa kutoka angani, bunduki, gesi za sumu na silaha nyingine hatari kwa kiwango kikubwa kuliko wakati mwingine wowote. Ilifuatiwa na vita kuu ya pili ya ulimwengu ambapo silaha za nyuklia zilianza kutumiwa. Tangu mwaka wa 1914, vita vimekuwa vikipiganwa katika maeneo mbalimbali na kusababisha vifo vya mamilioni ya watu.

2. MATETEMEKO YA ARDHI

Makala ya Britannica Academic inasema kwamba, kila mwaka matetemeko makubwa ya ardhi yapatayo 100 hivi hutokea na kusababisha “uharibifu mkubwa.” Ripoti ya shirika moja la Marekani ilisema hivi; “Kulingana na rekodi zilizotunzwa kwa muda mrefu (tangu mwaka wa 1900), tunatarajia matetemeko makubwa ya ardhi 16 hivi kila mwaka.” Baadhi ya watu wanafikiri kwamba idadi ya matetemeko makubwa ya ardhi haijaongezeka lakini wanadamu wamebuni vifaa au njia bora za kugundua matetemeko hayo. Lakini ukweli ni kwamba matetemeko makubwa ya ardhi yanatokea ulimwenguni pote na yanasababisha vifo vya watu wengi sana na wengine wengi kuteseka.

3. UPUNGUFU WA CHAKULA

Upungufu wa chakula hutokea ulimwenguni pote kwa sababu ya vita, ufisadi, kuporomoka kwa uchumi, kutozingatia kilimo bora, au kutokuwa na mipango inayofaa ya kukabiliana na mabadiliko ya hali ya hewa. Ripoti ya Shirika la Chakula Duniani ya mwaka wa 2018 ilisema hivi kwa ufupi: “Watu milioni 821 duniani pote wanakabili janga la njaa na watu milioni 124 kati yao wameathiriwa zaidi.” Utapiamlo husababisha vifo vya watoto milioni 3.1 kila mwaka. Utapiamlo ulisababisha vifo vya asilimia 45 ya watoto waliokufa ulimwenguni pote katika mwaka wa 2011.

4. MAGONJWA

Chapisho moja kutoka Shirika la Afya Duniani linaripoti hivi: “Tangu mwaka 2001 kumekuwa na magonjwa hatari ya mlipuko. Magonjwa yaliyosumbua zamani kama vile kipindupindu, ugonjwa wa tauni na homa ya manjano yamerudi, na magonjwa mengine mapya yameibuka, kama vile mafua ya ndege, mafua makali, MERS, Ebola na Zika.” Na hivi karibuni, janga la COVID-19. Ingawa wanasayansi na madaktari wana ujuzi mwingi kuhusiana na magonjwa, hawajaweza kupata tiba ya magonjwa yote.

5. KAZI YA KUHUBIRI ULIMWENGUNI POTE

Yesu alitaja sehemu nyingine ya ishara alipotabiri hivi: “Hii habari njema ya Ufalme itahubiriwa katika dunia yote inayokaliwa ili kuwa ushahidi kwa mataifa yote, na ndipo ule mwisho utakapokuja.” (Mathayo 24:14) Licha ya hali mbaya zinazoendelea ulimwenguni leo, zaidi ya watu milioni nane kutoka mataifa mbalimbali, wanahubiri habari njema ya Ufalme wa Mungu kwenye nchi 240 katika lugha zaidi ya 1,000. Hilo halijawahi kutokea kamwe katika historia ya wanadamu.

Leo, tunashuhudia utimizo wa matukio yote ambayo Yesu alitabiri. Kwa nini tunapaswa kupendezwa na utimizo huo? Kwa sababu Yesu alisema: “Mtakapoona mambo hayo yakitukia, jueni kwamba Ufalme wa Mungu umekaribia.”—Luka 21:31.

Kuonekana kwa ishara ambayo Yesu alitabiri, na mfuatano wa matukio yaliyoandikwa katika Biblia, hutusaidia kujua kwamba Mungu aliusimamisha Ufalme wake mbinguni mwaka wa 1914.a Mwaka huo, alimweka rasmi Mwana wake, Yesu Kristo kuwa Mfalme. (Zaburi 2:2, 4, 6-9) Hivi karibuni, Ufalme wa Mungu utatawala dunia, nao utaondoa utawala wa wanadamu na kuifanya dunia kuwa paradiso ambapo wanadamu wataishi milele.

Hivi karibuni, maneno ya Yesu katika sala ya kielelezo yatatimia. Maneno hayo yanasema: “Ufalme wako na uje. Mapenzi yako na yatendeke duniani kama ilivyo mbinguni.” (Mathayo 6:10) Hata hivyo, Ufalme umekuwa ukifanya nini tangu uliposimamishwa mbinguni mwaka wa 1914? Na tunatarajia Ufalme utatimiza mambo gani utakapowatawala wanadamu?